Onghedi yaJehova yokupangela ya yukipalifwa!
“Ou wOkombadambada e kwete eenghonopangelo kombada yoilongo yovanhu.” — DAN. 4:17.
1, 2. Omolwashike omapangelo opanhu ihaa pondola?
NOPEHE na omalimbililo, onghedi yovanhu yokupangela inai pondola sha. Etomheno la fimana kutya omolwashike onghedi yovanhu yokupangela inai pondola ololo kutya ovanhu kave na ounongo oo tau dulu oku va kwafela va pondole. Onghedi yovanhu yokupangela oi liwetikile kutya itai pondola molwaashi ovapangeli vahapu kunena ‘ove lihole vo vene, ovanalwisho voimaliwa, ovalitangi, ovalinenepeki, kave na eitavelo, kave na ombili, ovalundili, ovahenalidiliko, ovakwanyanya, ovatondi vouwa, ovakengeleledi novafulalali.’ — 2 Tim. 3:2-4.
2 Ovadali vetu votete ova ekelashi onghedi yaKalunga yokupangela. Kungaho, otashi dulika va li tava diladila kutya otava ka kala va manguluka. Ndele paushili, ova li ashike va hoolola okudulika kepangelo laSatana. Onghedi ii yovanhu yokupangela oule womayovimido ahamano koshi yenwefemo laSatana, “omupangeli wounyuni ou,” oya etifa po eenghalo di nyikifa oluhodi mondjokonona yovanhu. (Joh. 12:31) O-The Oxford History of the Twentieth Century oya popya shi na sha nonghalo yovanhu kunena ya ti kutya itashi kwafa sha “okuteelela pe uye ounyuni wa wanenena.” Oya yelifa ya ti: “Osho inashi hala ashike okutya ounyuni wa wanenena itau dulu okweetwa po, ndele eenghendabala doku u etifa po oda etifa oiponga, omapangelo oukanyamukulwa nosho yo oita inyanyalifi.” Osho itashi ulike tuu shili kutya onghedi yovanhu yokupangela ihai pondola!
3. Kalunga ngeno okwa unganeka ngahelipi onghedi yaye yokupangela ngeno Adam naEva kava nyonene?
3 Kashi nyikifa tuu oluhodi eshi ovadali vetu votete va ekelashi epangelo laKalunga, olo olo alike tali pondola! Oshoshili kutya katu shii kondadalunde kutya ngeno Jehova okwa unganeka ngahelipi onghedi yaye yokupangela ombada yedu ngeno Adam naEva ova kalele ovadiinini kuye. Ndele otu na oushili kutya ngeno epangelo lopakalunga ola tambulilwe ko kovanhu aveshe, ngeno ola kala tali pangele pahole nosho yo nokuhe na onhondo. (Oil. 10:34; 1 Joh. 4:8) Okutala kounongo munene waKalunga, ohatu dulu yo okukala noushili kutya ngeno ovanhu ova dulikile kepangelo laJehova, ngeno omapuko aeshe oo a ningwa kovayambididi vepangelo lopanhu ngeno okwa henukwa. Epangelo laKalunga lopauteokratika, ngeno ola pondola ‘okupalula oinamwenyo aishe.’ (Eps. 145:16) Paulelalela, ngeno ola kala tali pangele monghedi ya wanenena. (Deut. 32:4) Kashi nyikifa tuu oluhodi eshi ovanhu va ekelashi epangelo laJehova!
4. Satana okwa efuwa a pangele shi fike peni?
4 Oshiwa okudimbuluka kutya nonande Jehova okwa efa ovanhu va kale tave lipangele vo vene, ina efa po nandenande oufemba waye wokupangela oishitwa yaye. Nokuli nohamba inaenghono yaBabilon oya li ya fininikwa i dimine xuuninwa kutya “Ou wOkombadambada e kwete eenghonopangelo kombada yoilongo yovanhu.” (Dan. 4:17) Hauxuuninwa, Ouhamba waKalunga otau ka ningifa ehalo laye li wanifwe. (Mat. 6:10) Ashike Jehova okwa efa Satana a kale onga ‘kalunga kefimbo lounyuni eli’ oule wokafimbo opo a yandje enyamukulo la yela li na sha nomhata oyo ya tukulwa komupataneki waye Satana. (2 Kor. 4:4; 1 Joh. 5:19) Ndele nande ongaho, Satana ita dulu okuninga oinima oyo Jehova ine mu efa a ninge. (2 Omaf. 20:6; yelekanifa naJob 1:11, 12; 2:3-6.) Efimbo keshe ohapa kala pe na ovanhu ovo va hoolola okudulika kuKalunga, nonande ove li mounyuni ou tau pangelwa kOmutondi munene waKalunga.
Nghee Kalunga a li ta pangele Ovaisrael
5. Oshiwana shaIsrael osha li sha ninga ehangano lilipi naKalunga?
5 Okudja pefimbo laAbel fiyo opokutotwa po kwoshiwana shaIsrael, ovanhu vahapu ovadiinini ova kala tava longele Jehova nokudulika koipango yaye. (Heb. 11:4-22) Pefimbo laMoses, Jehova okwa li a ninga ehangano noludalo latatekulululwa Jakob, nola li la ninga oshiwana shaIsrael. Mo 1513 K.O.P., Ovaisrael ova li va ana kutya vo nosho yo oludalo lavo ova tambula ko Jehova e li Omupangeli wavo, va ti: “Ashishe osho Omwene e shi tonga fye ohatu shi ningi.” — Ex. 19:8.
6, 7. Kalunga okwa li a pangela Ovaisrael monghedi ya tya ngahelipi?
6 Jehova okwa li e na elalakano eshi a hoolola Ovaisrael va kale oshiwana shaye. (Lesha Deuteronomion 7:7, 8.) Okuhoolola Ovaisrael kwaJehova okwa li kwa kwatela mo shihapu shihe fi ashike onghalonawa yavo. Okwa li yo kwa kwatela mo edina laye nosho yo ounamapangelo waye, naasho osho sha li sha fimanenena. Ovaisrael ova li ve na oshinakuwanifwa shokuyandja oundombwedi u na sha nokutya Jehova oye aeke Kalunga kashili. (Jes. 43:10; 44:6-8) Jehova okwa li a lombwela oshiwana osho a ti: “Onye ovana va yapulilwa Omwene Kalunga keni, nOmwene e mu hoolola mo moiwana aishe ei i li kombada yedu, mu ninge oshiwana shaye mwene.” — Deut. 14:2.
7 Eshi Kalunga a li ta pangele Ovaisrael, okwa li e shii kutya inava wanenena. Ndele pefimbo opo tuu opo, eemhango daye oda li da wanenena noda li da holola omaukwatya Omuyandji wado. Oipango yaJehova oyo ya li ya yandjwa okupitila muMoses oya ulika sha yela kutya Kalunga omuyapuki, oku hole ouyuki, oha dimine po nehalo liwa noku na elididimiko. Lwanima, pefimbo laJosua nosho yo ovanhu vepupi laye, oshiwana osha li hashi dulika koipango yaJehova nosha li shi na ombili nosha nangekwa noupuna pamhepo. (Jos. 24:21, 22, 31) Ondjokonona yaIsrael oya ulika kutya onghedi yaJehova yokupangela ohai pondola.
Onghedi yovanhu yokupangela ohai etifa oilanduliko ii
8, 9. Ovaisrael ova li va pula va ningilwe oshinima shihe li pandunge shilipi, naasho osha li sha etifa oilanduliko ilipi?
8 Ovaisrael ova li hava ekeleshi luhapu epangelo laKalunga nokava li hava kala meameno laye ngeenge va ekelashi epangelo laye. Hauxuuninwa, Ovaisrael ova li va pula omuprofeti Samuel e va pe ohamba yopanhu oyo tava dulu okumona nomesho. Jehova okwa li a lombwela Samuel e va ningile osho tava pula. Ndele nande ongaho, Jehova okwa li yo e mu lombwela a ti: “Vo inave ku ekelashi, ndelenee va ekela nge shi ndi ha kale ohamba yavo.” (1 Sam. 8:7) Nonande Jehova okwa li a efa Ovaisrael va kale ve na ohamba yopanhu, okwa li e va londwela kutya okupangelwa kohamba yopanhu ohaku eta oilanduliko ii. — Lesha 1 Samuel 8:9-18.
9 Ondjokonona oya ulika oushili welondwelo olo Jehova a li a pa Ovaisrael. Okupangelwa kwOvaisrael keehamba dopanhu okwa li kwe va etela omaupyakadi a kwata moiti, unene tuu ngeenge ohamba kaya li idiinini. Ngeenge otwa tale koshihopaenenwa osho shOvaisrael, itashi kumwifa eshi omapangelo oo e li meke lovanhu ovo vehe shii Jehova a nyengwa okweeta ouwa tau kalelele oule womido dihapu. Oshoshili kutya ovanapolitika vamwe ohava indile Kalunga a nangeke noupuna eenghendabala davo dokulalakanena ombili neameno, ndele mbela ongahelipi Kalunga ta dulu okunangeka noupuna ovanhu ovo ihava dulika kepangelo laye? — Eps. 2:10-12.
Oshiwana shipe osho tashi pangelwa kuKalunga
10. Omolwashike Ovaisrael va kufwa oufembanghenda wokukala oshiwana shaKalunga oshihoololwa?
10 Oshiwana shaIsrael osha li sha ulika kutya inashi hala okulongela Jehova noudiinini. Xuuninwa, Ovaisrael ova li va ekelashi Messias, oo a nangekwa po kuKalunga, na Kalunga okwe va ekelashi nokwa li a tokola oku va pingena po nongudu yovanhu ovo va ninga oshiwana shipe. Oshidjemo, opa li pa totwa eongalo lOvakriste ovavaekwa mo 33 O.P. Onghee hano, eongalo olo ola ninga oshiwana shipe osho tashi pangelwa kuJehova. Paulus okwa ti kutya oshiwana osho osho ‘Israel yaKalunga.’ — Gal. 6:16.
11, 12. Omafaafano elipi e li pokati kaIsrael shonale nosho yo ‘Israel yaKalunga’ ngeenge tashi ya pokukwatela komesho?
11 Ope na omayooloko nosho yo omafaafano onhumba pokati koshiwana shaIsrael shonale nosho yo osho shipe, ‘Israel yaKalunga.’ Pashihopaenenwa, mepingafano naIsrael shonale, eongalo lopaKriste ka li na ohamba yopanhu noinali pumbwa okuyamba omayambo oinamwenyo omolwovanyoni. Efaafano limwe olo li li pokati koshiwana shaIsrael shonale neongalo lopaKriste olo elongekido lokukala ve na ovakulunhu ile ovakulunhuongalo. (Ex. 19:3-8) Ovakriste va tya ngaho ihava pangele oufita. Ponhele yaasho, ohava lifa eongalo nohava kwatele komesho omalipyakidilo opaKriste nehalo liwa. Ohava ungaunga noohandimwe meongalo nohole nova fimaneka oilyo aishe yeongalo. — 2 Kor. 1:24; 1 Pet. 5:2, 3.
12 Oilyo ‘yaIsrael yaKalunga’ nosho yo oovakwao ‘veedi dimwe’ otai ka kala i na olupandu linene lokupandula Jehova nosho yo onghedi yaye yokupangela ngeenge oya dilonga kombinga yanghee a li ha ungaunga nOvaisrael. (Joh. 10:16, OB-1986) Pashihopaenenwa, ondjokonona oya ulika kutya ovapangeli vopanhu Ovaisrael ova li va nwefa mo neenghono ovapangelwa vavo, kutya nee onawa ile onai. Oushili oo otau kwafele ovo tava kwatele komesho meongalo lopaKriste kutya nonande kave fi ovapangeli ngaashi eehamba donale, ove na alushe okukala oshihopaenenwa shiwa sheitavelo. — Heb. 13:7.
Nghee Jehova ta pangele kunena
13. Oshiningwanima sha fimanenena shilipi sha li sha ningwa mo 1914?
13 Ovakriste kunena ohava udifile ovanhu kutya omapangelo opanhu oku li pokuxulifwa po. Mo 1914, Jehova okwa dika po Ouhamba waye meulu oo u li meke lOhamba oyo a nangeka po, Jesus Kristus. Pefimbo opo, Jehova okwa pa Jesus eenghonopangelo a ye “omufindani a ka findane.” (Eh. 6:2) Ohamba oyo ya nangekwa po oya li ya lombwelwa kutya: “Pangela mokati kovatondi voye.” (Eps. 110:2) Ndele mupya munene, oiwana inai hala nandenande okudulika kepangelo laJehova. Otai twikile okulihumbata ya fa i wete ‘kuhe na Kalunga.’ — Eps. 14:1.
14, 15. (a) Ouhamba waKalunga ohau tu pangele ngahelipi kunena, naasho osha etifa po omapulo elipi oo tu na okulipula? (b) Onghedi yaKalunga yokupangela ya denga mbada oi liwetikile ngahelipi kunena?
14 Oku na natango oshixupe shinini shovamwaxe vaJesus, sha hala okutya, oilyo “yaIsrael yaKalunga,” oyo tai twikile okulonga i li ‘ovatumwa ponhele yaKristus.’ (2 Kor. 5:20) Oya nangekwa po i li ongudu yomupiya omudiinini nomunaendunge oo ta pashukile nokuyandja eendja dopamhepo kovavaekwa nosho yo kongudu yOvakriste tai hapupala, oyo kunena ya fikama po movanhu omamiliyona ovo ve na eteelelo loku ka kala nomwenyo fiyo alushe kombada yedu. (Mat. 24:45-47; Eh. 7:9-15) Jehova okwa nangeka noupuna elongekido la tya ngaho, naasho oshi liwetikile mehepuluko lopamhepo olo tali hafelwa kovalongeli vaye vashili vokunena.
15 Oshiwa kukeshe umwe womufye okulipula kutya: ‘Mbela ondi shii ngoo filufilu oinakuwanifwa yange oyo ndi na okuwanifa po meongalo lopaKriste? Mbela ohandi yambidida ngoo filufilu onghedi yaJehova yokupangela? Mbela ondi udite ngoo etumba eshi ndi li omupangelwa wOuhamba waJehova? Mbela onda tokola ngoo okuninga ngaashi handi dulu opo ndi twikile okulombwela vamwe kombinga yOuhamba waKalunga?’ Tu li ongudu, ohatu dulika nehalo liwa kewiliko olo hatu pewa kOlutuwiliki nohatu longele kumwe novakulunhuongalo ovo va nangekwa po momaongalo. Kungaho, ohatu ulike kutya otwa tambula ko onghedi yaKalunga yokupangela. (Lesha Ovaheberi 13:17.) Okudulika nehalo liwa kewiliko la tya ngaho okwa etifa po oumwainafana womounyuni aushe, mounyuni ou wa tukauka. Okwa etifa po yo ombili nouyuki notaku fimanekifa Jehova, osho tashi ulike kutya onghedi yaYe yokupangela oya denga mbada neenghono.
Epangelo laJehova otali ka findana
16. Omunhu keshe oku na okuninga etokolo lashike kunena?
16 Efimbo lokukandula po omhata oyo ya li ya tukulwa moshikunino shaEden oli li pokufika mafiku. Onghee hano, paife olo efimbo olo ovanhu ve na okuninga omatokolo. Keshe umwe pauhandimwe oku na okutokola kutya ota tambula ko onghedi yaJehova yokupangela ile ota kala a kanyatela komapangelo opanhu. Oshi li oufembanghenda kufye okukwafela ovalininipiki va ninge omatokolo a yuka. Mafiku epangelo laJehova otali ka pingena po filufilu omapangelo opanhu oo e li mewiliko laSatana puHarmagedon. (Dan. 2:44; Eh. 16:16) Omapangelo opanhu otaa ka xula po, nOuhamba waKalunga otau ka pangela edu alishe. Hauxuuninwa, onghedi yaJehova yokupangela otai ka yukipalifwa fiyo alushe. — Lesha Ehololo 21:3-5.
17. Oinima ilipi tai dulu okukwafela ovalininipiki va ninge omatokolo mawa e na sha nepangelo?
17 Ovo inava tokola natango filufilu okuyambidida ounamapangelo waJehova ove na okudiladila pamwe neilikano kombinga yomauwa oo epangelo laJehova tali ka etela ovanhu. Omapangelo opanhu okwa nyengwa okuxulifa po ominyonena, mwa kwatelwa oukulo. Ashike epangelo laKalunga otali ka xulifa po ovakolokoshi aveshe kombada yedu. (Eps. 37:1, 2, 9) Okupangela kwovanhu okwa etifa oita ihai xulu, ndele epangelo laKalunga otali ka “xulifa po oita fiyo okeengaba dedu.” (Eps. 46:10) Kakele kaasho, epangelo laKalunga otali ka etulula nokuli ombili pokati kovanhu noinamwenyo. (Jes. 11:6-9) Omapangelo opanhu okwa nyengwa okuxulifa po oinima ngaashi oluhepo nosho yo ondjala, ndele epangelo laKalunga otali ka xulifa po oinima ya tya ngaho. (Jes. 65:21) Nokuli novapangeli vopanhu ovo ve na omalalakano mawa inava dula okuxulifa po omikifi nefyo, ndele koshi yepangelo laKalunga, ovakulupe novanaudu otava ka kala va hafa eshi tava ka alulilwa eenghono dounyasha. (Job 33:25; Jes. 35:5, 6) Edu otali ka ninga oparadisa omo tamu ka kala nokuli novanyumunwa. — Luk. 23:43; Oil. 24:15.
18. Ongahelipi hatu dulu okuulika kutya otwa itavela kutya onghedi yaJehova yokupangela oya denga mbada?
18 Epangelo laKalunga otali ka xulifa po owii aushe oo wa etifwa kuSatana okudja eshi a nwefa mo ovadali vetu votete va pilamene Omushiti wavo. Oshoshili kutya Satana okwa kala ta etifa owii oule womido 6 000 lwaapo, ndele Kalunga ote ke u xulifa po aushe moule womido 1000, okupitila muKristus. Osho itashi yandje tuu oumbangi wa kola kutya onghedi yaKalunga yokupangela oya denga mbada! Tu li Eendombwedi daKalunga, otwe mu tambula ko e li Omupangeli wetu. Onghee hano, onghalamwenyo yetu nai shi ulike efiku keshe notundi keshe kutya otu li ovalongeli vaJehova, ovapangelwa vOuhamba waye notu udite etumba okukala Eendombwedi daye. Natu longifeni yo omhito keshe tu lombwele ovanhu ovo tava pwilikine kombinga yepangelo laJehova olo la denga mbada.
Otwe lihonga shike shi na sha nepangelo laKalunga . . .
• MuDeuteronomion 7:7, 8?
• Mu 1 Samuel 8:9-18?
[Omafano pepandja 29]
Jehova oku li omupangeli waalushe
[Efano pepandja 31]
Okudulika nehalo liwa kepangelo laJehova okwa etifa po oumwainafana womounyuni aushe