“Oiimati yomhepo” ohai fimanekifa Kalunga

“Tate ta fimanekwa ngenge tamu imi [oiimati ihapu, OB-1986].” — JOH. 15:8.

1, 2. (a) Otu na eemhito dilipi dokutwa vamwe omukumo? (b) Oshali ya dja kuJehova ilipi hai xwepopaleke onghedi yetu yoku mu longela?

NATU ka taleni keenghalo mbali tadi landula: Yotete, natu tye nee omukainhu wonhumba Omukriste okwa didilika kutya omumwameme umwe omunyasha ota monika e na eshi te lipula nasho. Omukainhu oo Omukriste okwa ninga elongekido opo a ka longe pamwe naye moilonga yomomapya. Ndele fimbo ve li moilonga yomomapya, omumwameme oo omunyasha okwa li a hovela okupopya kombinga youpyakadi waye. Eshi va dja moukalele, omukainhu oo omunyasha okwa ka ilikana ta pandula Jehova omolwomumwameme a pyokoka oo a li a ulika pahole kutya oku na ko nasha naye. Kungaho, omukainhu oo omunyasha okwa li a mona ekwafo olo a li a pumbwa. Onghalo imwe vali, natu tye nee ovalihomboli vonhumba opo va alukile moshilongo shavo okudja koshilongo shimwe oko va li va ka udifila. Eshi va li va ya kokavilo konhumba, ova li va hokolola oimoniwa yavo nehafo nopa li omumwatate umwe omunyasha oo a li ta pwilikine nelitulemo. Konima yomido donhumba, eshi omumwatate oo omunyasha a li te lilongekidile oku ka udifila koshilongo shimwe, okwa li ta diladila shi na sha novalihomboli ovo nosho yo kombinga yeenghundafana davo odo da li de mu linyengifa a kale a hala okuninga omutumwa.

² Otashi dulika eenghalo odo tadi ku dimbulukifa umwe oo a li a nwefa mo nawa onghalamwenyo yoye ile umwe oo wa li wa nwefa mo nawa. Oshoshili kutya okukundafana ashike nomunhu lumwe hanoupu tashi ke mu linyengifa a ninge omalunduluko monghalamwenyo yaye, ndele efiku keshe ohatu kala tu na eemhito dokutwa vamwe omukumo noku va pameka. Diladila nee ngeno pe na oshinima shonhumba osho tashi dulu okuxwepopaleka okudula nosho yo omaukwatya oye opo u dule okukwafela neenghono ovamwaxo nou dule okulongifwa pauyadi kuKalunga. Mbela osho itashi ka kala shiwa? Jehova okwe tu pa oshali, sha hala okutya, omhepo iyapuki. (Luk. 11:13) Eshi omhepo yaKalunga tai longo monghalamwenyo yetu, otai ka imika mufye omaukwatya mawa oo taa ka xwepopaleka onghedi yetu yoku mu longela. Kai fi tuu oshali ikumwifi! — Lesha Ovagalati 5:22.

3. (a) Okwiimika “oiimati yOmhepo” ohaku fimanekifa Kalunga ngahelipi? (b) Ohatu ka kundafana omapulo elipi?

³ Omaukwatya oo haa imikwa komhepo iyapuki otaa ulike kutya Odjo yomhepo oyo, Jehova Kalunga, naye oku na omaukwatya a tya ngaho. (Kol. 3:9, 10) Jesus okwa popya etomheno la fimanenena kutya omolwashike Ovakriste ve na okuhopaenena Kalunga, eshi a li a lombwela ovayapostoli vaye a ti: “Tate ta fimanekwa ngenge tamu imi [oiimati ihapu, OB-1986].”a (Joh. 15:8) Eshi hatu imike “oiimati yOmhepo,” otashi ke limonikila mokupopya kwetu nomeenghatu detu, naasho otashi ka fimanekifa Kalunga ketu. (Mat. 5:16) Oiimati yomhepo oya yooloka ko ngahelipi komaukwatya omounyuni waSatana? Ongahelipi hatu dulu okwiimika oiimati yomhepo? Omolwashike shi li eshongo okwiimika oiimati ya tya ngaho? Ohatu ka kundafana omapulo oo eshi hatu ka konakona omaukwatya atatu otete oo e li oshitukulwa shoiimati yomhepo, ohole, ehafo nombili.

Ohole oya kanghamena kefinamhango la tongomana

4. Jesus okwa honga ovashikuli vaye va kale nohole yoludi lilipi?

⁴ Ohole oyo omhepo iyapuki hai imike oya yooloka ko filufilu kohole oyo i niwe kovanhu vahapu mounyuni. Ngahelipi mbela? Ohole ya tya ngaho oya kanghamena kefinamhango la tongomana. Jesus okwa divilika eyooloko olo mEudifo laye lokOmhunda. (Lesha Mateus 5:43-48.) Okwa popya kutya nokuli novalunde ohava ungaunga navamwe monghedi omo hava ungaunga navo. Ohole ya tya ngaho inai kwatela mo omaliyambo asha, ndele oya kwatela mo ashike okuningila omunhu ouwa oo e ku ningila. Ngeenge otwa hala ‘okuninga ovana vaTate yetu womeulu,’ otu na okukala twa yooloka ko kovanhu va tya ngaho. Ponhele yokuungaunga navamwe ngaashi tava ungaunga nafye, otu na oku va tala ko nokuungaunga navo ngaashi Jehova he va tale ko noha ungaunga navo. Ndele mbela otashi shiiva ngoo okukala tu hole ovatondi vetu ngaashi Jesus e tu lombwela tu ninge?

5. Ongahelipi hatu dulu okuulikila ohole ovanhu ovo tave tu hepeke?

⁵ Natu ka taleni oshihopaenenwa shimwe shopaMbibeli. Fimbo Paulus naSilas va li tava udifile muFilippi ova li va kwatwa po, va dengwa neenghono nova li va tulwa modolongo omo eemhadi davo da li da tulwa meti. Natango otashi dulika va li va ungaungwa navo nai komunangeli wodolongo eshi va li modolongo. Eshi va li va mangululwa inave shi teelela omolwekakamo ledu olo la li la ningwa, mbela ova li ve wete va mona omhito iwa okwaalulila omulumenhu oo owii? Hasho nandenande. Okunakonasha kwavo nouwa waye nohole yavo yokuheliholamwene oya li ye ve linyengifa va katuke eenghatu meendelelo omolwaye, naasho osha li she linyengifa omunangeli wodolongo oo noukwaneumbo waye aushe va ninge ovaitaveli. (Oil. 16:19-34) Ovamwatate vahapu kunena navo ohava ningi sha faafana ‘mokunangeka noupuna ava tave va taata.’ — Rom. 12:14.

6. Omeenghedi dilipi hatu dulu okuulikila ovamwatate ohole yokuheliholamwene? (Tala oshimhungu pepandja 25.)

⁶ Ohole yetu yokuhola ovaitaveli vakwetu ohai tu linyengifa tu va ningile shihapu. ‘Otu na okuyandjela ovamwatate eemwenyo detu.’ (Lesha 1 Johannes 3:16-18.) Ndele nande ongaho, ohatu dulu okuulika ohole moinima inini. Pashihopaenenwa, ngeenge otwa popya sha ile twa ninga oshinima shonhumba osho sha nyemateka omumwatate wonhumba, ohatu dulu okuulika ohole mokukatuka eenghatu tu pange vali ombili naye. (Mat. 5:23, 24) Ndele mbela ongahelipi ngeenge otwa nyematekwa kuumwe? Mbela ohatu “dimine po” vamwe ile omafimbo amwe ohatu va kwatele onghone? (Eps. 86:5, OB-1986) Ohole ya xwama oyo hai imikwa komhepo iyapuki ohai tu kwafele tu dimine po vamwe omanyono inaa kwata moiti, hatu va dimine po nehalo liwa ‘ngaashi Jehova he tu dimine po nehalo liwa.’ — Kol. 3:13, 14, NW; 1 Pet. 4:8.

7, 8. (a) Ohole yetu yokuhola Kalunga oya pambafana ngahelipi nohole yokuhola ovanhu vakwetu? (b) Oshike tashi dulu oku tu kwafela tu kale tu hole Jehova nohole yomoule? (Tala efano pepandja 23.)

⁷ Ongahelipi hatu dulu okukulika ohole yokuheliholamwene yokuhola ovamwatate? Omokukala tu na ohole yomoule yokuhola Kalunga. (Ef. 5:1, 2; 1 Joh. 4:9-11, 20, 21) Ngeenge hatu lesha Ombibeli kombinga yaJehova, hatu dilonga nohatu ilikana, kungaho, ohatu palula omitima detu nohatu ka kala tu na ohole yomoule yokuhola Tate yetu womeulu. Otwa pumbwa okukonga efimbo opo tu ehene popepi naKalunga.

⁸ Oku shi faneka, natu tye nee ngeno owa pitikwa ashike u leshe Eendjovo daKalunga, u dilonge nou ilikane kuJehova povili imwe yokondadalunde efiku keshe. Mbela ito ka ninga ngaashi to dulu opo uha efe nande osha shi ye moshipala efimbo olo u na lokuninga oinima yopamhepo? Kape na oo taa dulu oku ku kelela u ilikane kuKalunga, navahapu vomufye ohatu dulu okulesha Ombibeli efimbo keshe olo twa hala. Ndele otu na okukala twa lungama tuha efe omalipyakidilo efiku keshe e tu imbe okuninga oinima yopamhepo. Mbela oho longifa ngoo efimbo efiku keshe u ehene popepi naJehova?

‘Ehafo lomhepo iyapuki’

9. Omhepo iyapuki ohai tu kwafele tu kale nehafo la tya ngahelipi?

⁹ Otu na okukala tu na omaukwatya oo e li oshitukulwa shoiimati yomhepo nonande otu li meenghalo didjuu. Ehafo, oukwatya mutivali oo hatu ka kundafana paife, oli li oshihopaenenwa shimwe osho tashi koleke oushili oo. Ehafo otali yelekwa noshimeno shi na omidi da ya moule osho tashi dulu okukala sha hapa nawa nonande oshi li momudingonoko omo mu na onghalo yomhepo ii. Ovapiya vaKalunga vahapu mounyuni aushe ‘ova tambula eendjovo nehafo lomhepo iyapuki, nande ova li meefina dihapu.’ (1 Tes. 1:6) Vamwe otava ungaunga neenghalo didjuu nosho yo omashongo amwe vali. Ndele nande ongaho, Jehova ohe va pameke okupitila momhepo yaye opo ve ‘lididimikile oudjuu keshe nehafo.’ (Kol. 1:11, yelekanifa no-NW.) Oshike hashi etifa ehafo la tya ngaho?

10. Oshike hashi tu etele ehafo?

¹⁰ Mepingafano ‘noupuna uhe fi okulineekelwa’ womounyuni waSatana, omamona opamhepo oo twa pewa kuJehova oku na ongushu tai kalelele. (1 Tim. 6:17; Mat. 6:19, 20) Jehova okwe tu udanekela oku ka kala fiyo alushe monakwiiwa. Otwa hafa eshi tu li oshitukulwa shoumwainafana wopaKriste womounyuni aushe. Komesho yaaishe, otwa hafa eshi tu na ekwatafano liwa naKalunga. Nafye otu udite ngaashi David, oo a li a tanga Jehova meimbilo nonande okwa li a fininikwa a ninge onauki, a ti: ‘Ouwanghenda woye ouwa, u dule okukalamwenyo; omilungu dange nadi ku tange. Onda hala ndi ku hambelele, fimbo ndi li po.’ (Eps. 63:4, 5) Nonande otu li meenghalo didjuu, ohatu tange Kalunga nehafo momitima detu.

11. Omolwashike sha fimana okulongela Jehova nehafo?

¹¹ Omuyapostoli Paulus okwa ladipika Ovakriste a ti: “Hafeni alushe mOmwene! Navali handi ti: Hafeni!” (Fil. 4:4) Omolwashike sha fimana kOvakriste okulongela Jehova nehafo? Omolwomhata oyo ya etifwa po kuSatana i na sha nounamapangelo waJehova. Satana okwa ti kutya kape na oo ta longele Kalunga nehalo liwa. (Job 1:9-11) Ngeenge otwa kala hatu longele Jehova molwaashi ashike tu na oshinakuwanifwa shoku shi ninga, ndele itatu shi ningi nehafo, omahambeleloyambo etu itaa ka kala e lixwa po. Onghee hano, otu na okutula moilonga ekumaido lomupsalme umwe oo a ti: “Longeleni Omwene nokuhafa! Holokeni koshipala shaye nokukuwilila.” (Eps. 100:2) Okulongela Kalunga nehafo nonehalo liwa ohashi mu fimanekifa.

12, 13. Oshike hatu dulu okuninga opo tu finde omaliudo mai?

¹² Oshoshili kutya nokuli novapiya vaJehova ovadiinini omafimbo amwe ohava kala va teka omukumo nohava kala tava kondjo opo va kale va hafa. (Fil. 2:25-30) Ndele mbela oshike tashi ke tu kwafela ngeenge tu li monghalo ya tya ngaho? Ovaefeso 5:18, 19 ova ti: “Yadifweni kOmhepo; mu tongafane nomapsalme nomalwiimbo opamhepo, nokwiimbila nokuhambelela Omwene momitima deni.” Ongahelipi hatu dulu okutula moilonga omayele oo?

¹³ Ngeenge otwa wililwa po komaliudo mai, ohatu dulu okupula Jehova meilikano nokukendabala okudilonga koinima iwa. (Lesha Ovafilippi 4:6-9.) Vamwe ova mona kutya okulididima pamwe nomaimbilo Ouhamba mokangalo ohaku va kwafele va pepelelwe nova diladile oinima oyo iwa. Omumwatate umwe oo a li ta ungaunga noupyakadi wonhumba oo luhapu wa li hau mu nyemateke nohau mu teya omukumo okwa ti: “Kakele kokwiilikana tashi di komutima pandjikilile, onde lihonga yo momutwe omaimbilo manini Ouhamba. Okwiimbila Jehova omaimbilohambelelo, kutya nee ohandi shi ningi mokule ile ohandi lididima, osha etela nge ombili yokomutima. Natango, embo Ehena popepi naJehova ola li la pita lwopefimbo opo. Embo olo onde li lesha lwoikando ivali omudo wa ka landula ko. Osho osha li sha hekeleka shili omutima wange. Onda mona kutya Jehova okwa nangeka noupuna eenghendabala dange.”

‘Ekwamo lombili lokumanga kumwe’

14. Omhepo iyapuki ohai tu kwafele tu kale nombili ididilikwedi ilipi?

¹⁴ Ovo hava i koyoongalele yopaiwana va dja momaputuko e lili noku lili ohava hafele eendafano liwa nOvakriste vakwao. Peemhito da tya ngaho, ohashi limonikila mo kutya oshiwana shaKalunga oshi na ombili, oyo i li euliko kutya oshi na oukumwe. Ovatali ohava kala va kumwa luhapu ngeenge ve wete ovanhu ovo va li va teelela ngeno va kale ve tondafane ve li ‘moukumwe nomekwamo lombili lokumanga kumwe.’ (Ef. 4:3) Oukumwe wa tya ngaho ou li shili oshinima shididilikwedi mokutala keenghalo omo ovapiya vaJehova vahapu va li.

15, 16. (a) Petrus okwa li e na onakudiwa ya tya ngahelipi, naasho osha li she mu etela eshongo lilipi? (b) Jehova okwa li a kwafela Petrus ngahelipi a lundulule oikala yaye?

¹⁵ Kashipu kovanhu va dja momaputuko e lili noku lili okukala moukumwe. Opo tu mone kutya oshike osho tu na okuhenuka opo tu kale moukumwe wa tya ngaho, natu taleni koshihopaenenwa shomuyapostoli Petrus oo a li ko mefelemudo lotete. Etaleko laye li na sha novanhu vomoiwana imwe ovo va li inava pita etanda oli liwetikile meendjovo daye edi tadi ti: “Nye omu shi shii Omujuda okwa dilikwa okweendafana nomunailongo nokuya kuye. Ndele Kalunga okwa ulikila nge, ndi ha tye nande omunhu, ye ina yapulwa ile ye ina koshoka.” (Oil. 10:24-29; 11:1-3) Petrus otashi dulika a li a tambula ko etaleko olo la li apeshe pefimbo opo kutya Omhango oya ti kutya oku na ashike okukala e hole Ovajuda vakwao. Otashi dulika a li e wete shi li nawa okutala ko ovanhu vomoiwana imwe ve li ovatondi.b

¹⁶ Diladila ashike nghee Petrus a li e udite ina manguluka eshi a li ta i meumbo laKornelius. Mbela omulumenhu oo a li e na etaleko lii li na sha novanhu ovo vehe fi Ovajuda okwa li ngoo ta ka “tulwa kumwe” navo ‘mekwamo lombili lokumanga kumwe’? (Ef. 4:3, 16) Omafiku onhumba komesho yaasho, omhepo yaKalunga oya li ya kuma omutima waPetrus, ye mu kwafela a lundulule etaleko laye noku kale vali ehe na onhondo. Okupitila memoniko, Jehova okwa li e mu yelifila kutya iha tale ko ovanhu she likolelela komuhoko ile koshiwana shavo. (Oil. 10:10-15) Onghee hano, Petrus okwa li a lombwela Kornelius a ti: “Paife ondi shi shii shili, Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oil. 10:34, 35) Petrus okwa li a lundulula oikala yaye nokwa ka kala oshitukulwa ‘shoukumwe aushe wovamwatate.’ — 1 Pet. 2:17, NW.

17. Oukumwe oo u li mokati koshiwana shaKalunga oudidilikwedi ngahelipi?

¹⁷ Oshimoniwa shaPetrus otashi tu kwafele tu kale tu na olupandu li na sha nomalunduluko madidilikwedi oo taa ningwa mokati koshiwana shaKalunga kunena. (Lesha Jesaja 2:3, 4.) Ovanhu omamiliyona va dja ‘moiwana aishe nomomaludi aeshe nomovanhu aveshe nomomalaka aeshe’ ova lundulula onghedi yavo yokudiladila opo va kale metwokumwe ‘nehalo laKalunga naashi shiwa, sha wapalela nosha wana.’ (Eh. 7:9; Rom. 12:2) Vahapu vomovanhu ovo ova li va nwefwa mo komhepo youtondwe noyetukauko yomounyuni waSatana. Ndele okupitila mokukonakona Eendjovo daKalunga nokukwafelwa komhepo iyapuki, ove lihonga ‘okulalakanena eshi tashi hapupalifa ombili.’ (Rom. 14:19) Osho ohashi etifa oukumwe oo hau fimanekifa Kalunga.

18, 19. (a) Ongahelipi keshe umwe womufye ta dulu okuxumifa komesho ombili noukumwe meongalo? (b) Oshike hatu ka kundafana moshitukulwa tashi landula?

¹⁸ Ongahelipi keshe umwe womufye ta dulu okuxumifa komesho ombili noukumwe oo u li mokati koshiwana shaKalunga? Momaongalo mahapu omwa tembukila ovamwatate ovo va dja koilongo imwe. Vamwe otashi dulika ve na eenghedindjikilile da yooloka ko kudetu ile tashi dulika vehe shii nawa elaka letu. Mbela ohatu ningi eenghendabala opo tu shiivafane navo? Eendjovo daKalunga otadi tu ladipike tu ninge ngaho. Eshi Paulus a li a shangela eongalo lokuRoma, omo mwa li ovaitaveli Ovajuda nosho yo ovanhu vomoiwana imwe, okwa ti: “Tambulafaneni hano, ngaashi Kristus e mu tambula okufimanekifa Kalunga.” (Rom. 15:7) Mbela ope na umwe meongalo leni oo wa pumbwa okushiiva nawa?

¹⁹ Oshike vali osho tu na okuninga opo tu efe omhepo iyapuki i longe mokukalamwenyo kwetu? Oshitukulwa tashi landula otashi ka nyamukula epulo olo eshi hatu ka konakona omaukwatya makwao oo e li oshitukulwa shoiimati yomhepo.

[Omashangelo opedu]

Oto nyamukula ngahelipi?

• Ongahelipi hatu dulu okuulikila ovamwatate ohole yokuheliholamwene?

• Omolwashike sha fimana okulongela Kalunga nehafo?

• Ongahelipi hatu dulu okuxumifa komesho ombili noukumwe meongalo?

[Oshimhungu pepandja 25]

“Ava ovo Ovakriste vashili”

Embo ledina Between Resistance and Martyrdom — Jehovah’s Witnesses in the Third Reich ola popya shi na sha naasho sha li sha popiwa komunyasha umwe omunadolongo Omujuda, omo a hokolola kombinga yanghee a li a shakeneka Eendombwedi daJehova oshikando shotete eshi a fika mokamba yeenghwate yaNeuengamme:

Okwa ti: “Diva eshi fye Ovajuda vokuDachau twa fika mokamba, Ovajuda vamwe ova li va holeka oinima yavo aishe oyo va li ve na molwaashi inava hala oku tu pa sha. . . . Eshi twa li kondje [yokamba yeenghwate] okwa li hatu kwafelafana. Ndele mokamba omo onghalo ya li tai pula efyo ile omwenyo, keshe umwe okwa li ta kendabala ashike okulixupifa ye mwene noka li ha dimbuluka vakwao. Ashike diladila kutya Ovakonakoni vOmbibeli ova li tava ningi shike. Pefimbo opo, ova li hava longo noudiinini, hava pangele ominino domeva. Okwa li ku na outalala nova li hava longo ve li ofika momukokomoko wefiku alishe ve li momeva matalala neenghono. Kape na oo a li e udite ko kutya oshike sha li hashi va kwafele ve lididimikile onghalo ya tya ngaho. Ova ti kutya Jehova ohe va pameke. Ngaashi fye, navo ova li va pumbwa oikulya neenghono molwaashi ova li va fya ondjala. Ndele mbela ova li va ninga po shike? Ova li va ongela oikulya aishe oyo va li ve na, ndele tave i tukula, imwe oyavo imwe tave i pe ovaitaveli vakwao ovo va li opo va fiki mo mokamba va dja kuDachau. Ova li yo ve va hambelela noku va xupita eshi va fika. Fimbo inava lya, ova li va ilikana. Konima yaasho, aveshe ova li va kuta nova li va hafa. Ova ti kutya kave udite vali ondjala. Osho osho nee sha li sha ningifa nge ndi diladile kutya: Ava ovo Ovakriste vashili.”

[Omafano pepandja 23]

Mbela oho kongo omhito efiku keshe opo u dule okweehena popepi naJehova?