Ehena popepi naKalunga

“Tu kwafela tu alukile keumbo”

Mbela owa li nale ho longele Jehova? Mbela owa hala okukala ho mu longele vali, ndele owa limbililwa ngeenge ote ku tambula ko ngoo? Oto indilwa opo u leshe noukeka oshitukulwa eshi nosho yo osho sha landula ko, molwaashi oove unene ya nuninwa.

OMUKAINHU umwe oo a li a efa po okulongela Kalunga nokukatuka monghedi oyo ihe li metwokumwe nomifikamhango dopaKriste odo a li a hongwa okudja kounona, okwa ti: “Onda li nda ilikana kuJehova opo a kwafele nge ndi alukile keumbo noku dimine nge po eshi nde mu nyemateka.” Mbela ou uditile onghenda omukainhu oo? Mbela oho lipula kutya: ‘Kalunga oku uditile ngahelipi ovanhu ovo vali have mu longele nale? Mbela ohe va dimbuluka ngoo? Okwa hala ngoo va “alukile keumbo”?’ Opo tu mone omanyamukulo omapulo oo, natu ka konakoneni eendjovo odo di li muJeremia. Nopehe na omalimbililo, omanyamukulo omapulo oo otaa ka hekeleka omutima woye. — Lesha Jeremia 31:18-20.

Konakona oshikalimo sheendjovo daJeremia. Mo 740 K.O.P., omido omilongo komesho yefimbo laJeremia, Jehova okwa li a efa ouhamba womapata omulongo aIsrael u twalwe moukwatwa kOvaassiria.a Kalunga okwa li a efa onghalo idjuu ya tya ngaho onga outekuduliko molwaashi oshiwana shaye osha li sha nyona sha kwata moiti nosha li she lipwililikila omalondwelo oo a li he shi pe lwoikando okupitila movaprofeti vaye. (2 Eehamba 17:5-18) Mbela oshiwana osha li sha lundulula oikala yasho omolwomaudjuu oo sha li sha shakeneka eshi sha li moukwatwa, eshi sha li shihe na ekwatafano naKalunga nosho yo eshi sha li kokule neduumbo lasho? Mbela Jehova okwa li e shi dimbwa filufilu? Mbela okwa li ngoo te ke shi tambula ko ngeenge sha alukile keumbo?

‘Onde lipa oushima’

Ovanhu ova li va mona kutya ova ninga epuko eshi ve li moukwatwa nove linyengifwa ve livele ombedi. Jehova okwa li a didilika kutya ova li ve livela ombedi shili. Natu ka tale nghee Jehova a popya etaleko laye nosho yo nghee a li e uditile Ovaisrael ovo va li moukwatwa, e va popya ve li ongudu kutya ove li Efraim.

“Onda uda Efraim ta lili.” (Ovelishe 18) Jehova okwa uda Ovaisrael tava lili omolwoilanduliko youlunde wavo. Omuhongwanhu umwe okwa ti kutya oshitya osho sha tolokwa ‘okulila’ otashi yandje yo ediladilo “lokukakama ile okundjungauka.” Ovaisrael ova li va fa omumati a nyona oo a li ta puku komutwe e udite nai omolwonghalo idjuu oyo e lietela nokwa li a djuulukwa onghalamwenyo oyo a li e na nale eshi a li meumbo. (Lukas 15:11-17) Oshiwana osho osha li tashi ti ngahelipi?

‘Ove owa denga nge ngaashi onhana inai dulika.’ (Ovelishe 18) Oshiwana osha li sha dimina kutya osha wana okupewa outekuduliko. Kakele kaasho, osha kala sha fa onhana inai deuka. Efaafanifo olo otashi dulika tali ti kutya osha kala sha fa onhana oyo ya popiwa kodjo imwe youyelele ya ti kutya “ngeno kai tangalalele eshi i li kondjoko ngeno inai fangula koxulo yeonga.”

“Alule nge, ndi aluke, osheshi Oove Omwene Kalunga kange.” (Ovelishe 18) Ovaisrael ova li ve lininipika momutima nova li va konga ekwafo kuKalunga. Ova li moulunde, ndele pomhito oyo ova li va konga ekwafo opo va kale va hokiwa vali kuYe. Etoloko limwe ola ti: “Oove Kalunga ketu, tu kwafela tu alukile keumbo.” — Contemporary English Version.

‘Ame nde lialuluka, ame onda fya ohoni, ndi udite ohoni shili.’ (Ovelishe 19) Oshiwana osha li sha nyika oluhodi molwaashi osha nyona. Osha li sha dimina epuko lasho. Osha li yo shi udite shihe na oshilonga nosha nyika oluhodi sha fa tashi lidenge monhulo pafaneko. — Lukas 15:18, 19, 21.

Ovaisrael ova li ve livela ombedi. Ova li va nyika oluhodi nokuhepaululila Kalunga omanyono avo ndele tave a efa po. Mbela elivelombedi lavo ola li la pupika omutima waKalunga? Mbela okwa li ngoo te ke va tambula ko ngeenge va alukile keumbo?

“Ame ondi noku mu fila onghenda”

Jehova okwa li e na ekwatafano le likalekelwa nOvaisrael. Okwa ti: “Aame Xe yaIsrael, naEfraim oye oshiveli shange.” (Jeremia 31:9) Mbela xe omunahole ota dulu ngoo okwaanya okutambula ko omona waye oo e livela ombedi shili? Natu ka tale nghee Jehova a li a ungaunga noshiwana shaye e li ngaashi Xe yasho.

“Efraim ke shi omumwange omuholike nokaana kehafo lange? Nomomafimbo oku mu hanyena kwange ohandi dimbulukwa yo alushe.” (Ovelishe 20) Eendjovo odo itadi hekeleke tuu! Ngaashi omudali oo e na outeku nomunahole, Kalunga okwa li e na oshinakuwanifwa ‘shokuhanyena’ ovana vaye, te va pe omalondwelo lwoikando omolwomanyono avo. Eshi va li inava hala okupwilikina, okwa li e va efa va ye moukwatwa, e va efa va dje mo meumbo, oku shi popya pafaneko. Ndele nande okwa li e va pa ehandukilo, ine va dimbwa. Ke na efiku e va dimbwe. Xe omunahole iha dimbwa ovana vaye. Ndele mbela Jehova okwa li e udite ngahelipi eshi a li a mona ovana vaye ve livela ombedi shili?

“Omwenyo wange owe mu tukulukila ndele u mu uditile onghenda. Ame ondi noku mu fila onghenda.” (Ovelishe 20) Jehova okwa li a djuulukwa neenghono ovana vaye. Okulivela ombedi kwavo kwashili okwa li kwa kuma omutima waye nokwa li a halelela va alukile kuye. Ngaashi xe womeyele laJesus li na sha nomumati a kanene, Jehova okwa li e “uditile onghenda” ovana vaye nokwa li e va tambula ko nehalo liwa eshi va alukila keumbo. — Lukas. 15:20.

‘Jehova kwafele nge ndi alukile keumbo’

Eendjovo daJeremia 31:18-20 otadi tu pe ouyelele muhapu u na sha nolukeno nosho yo onghenda yaJehova. Kalunga iha dimbwa ovanhu ovo va li have mu longele nale. Ongahelipi ngeenge ovanhu va tya ngaho ova hala okwaalukila kuye? Kalunga ‘oku yadi ekufilo.’ (Epsalme 86:5) Ke na efiku a ekeleshi ovanhu ovo ve livela ombedi shili. (Epsalme 51:19) Mepingafano naasho, oha tambula ko nehafo ovo tava alukile keumbo. — Lukas 15:22-24.

Omukainhu oo a tumbulwa kehovelo okwa li a katuka eenghatu opo a alukile kuJehova ndele tai keongalo lEendombwedi daJehova lomoshitukulwa shavo. Pehovelo, okwa li e na okufinda omaliudo mai. Omukainhu oo okwa ti: “Onda li ndi udite ndihe na oshilonga nandenande.” Ndele ovakulunhuongalo ova li ve mu twa omukumo nove mu kwafela a kale vali a pama pamhepo. Okwa popya a pandula neenghono a ti: “Oshiwa neenghono eshi Jehova a kwafela nge ndi alukile keumbo.”

Ngeenge owa li ho longele Jehova nale nowa diladila oku mu longela vali, oto indilwa u uye keongalo lEendombwedi daJehova lomoshitukulwa sheni. Dimbuluka kutya Jehova oha ulikile ovanhu olukeno nohe va file onghenda ngeenge ve livela ombedi notave mu indile tava ti: “Tu kwafela tu alukile keumbo.”

[Eshangelo lopedu]