Ofikola yOkudeula Ovaudifi
Elalakano: Okudeula Ovaudifi va kale ovahongi novaudifi vonghundana iwa va pyokoka.
Efimbo: Ihai xulu.
Onhele: Olupale lOuhamba lopopepi.
Oiteelelwa: Ovo hava endafana alushe neongalo notava tu kumwe nomahongo Ombibeli nove na onghedi yokukalamwenyo oyo i li metwokumwe nomifikamhango dopaKriste, otava dulu okulishangifa mofikola oyo.
Nghee u na okulishangifa: Popya nomupashukili wOfikola yOkudeula ovaudifi.
Sharon oo a lemanekwa komukifi woshinamenena hau ifanwa amyotrophic lateral sclerosis (ALS) okwa ti: “Ofikola yOkudeula Ovaudifi oya honga nge ndi kale handi ningi omapekaapeko nokukala handi yandje ouyelele monghedi i shii okuudiwa ko. Onde lihonga yo okukala handi yandje elitulemo keemhumbwe dopamhepo davamwe ndele hakudange ashike.”
Arnie oo a kala omupashukili omweendi efimbo lile okwa ti: “Onda kala handi kokoma noihandi dulu okushakenifa omesho navamwe. Ofikola oyo oya kwafela nge ndi kale ndi na omukumo nondi udite kutya ondi na oshilonga. Jehova okwa kwafela nge okupitila medeulo olo ndi lihonge okukala handi popi handi fuda nawa nokuyandja elitulemo. Onda pandula neenghono eshi handi dulu okutanga Kalunga meongalo nomoukalele.”
Ofikola yOvabetel Vape
Elalakano: Okukwafela Ovabetel vape va pondole moilonga yavo.
Efimbo: Ohai ningwa oule wominute 45 oshivike keshe, oule woivike 16.
Onhele: Betel.
Oiteelelwa: Omunhu oku na okukala oshilyo shoukwaneumbo waBetel shefimbo li yadi ile oo te liyambe oule womudo umwe ile shi dule po.
Nghee u na okulishangifa: Ovabetel vape ohava shivwa kofikola oyo nopehe na okulishangifa.
Demetrius oo a li mofikola oyo mo 1980 nasha, okwa ti: “Ofikola oyo oya kwafela nge ndi xwepopaleke onghedi yange yokukonakona nokulilongekidila oilonga yefimbo li yadi yaBetel. Ovahongi, oinima oyo twa hongwa nosho yo omayele taa longo okwa kwafela nge ndi kale nda tomwa kutya Jehova omunahole nokwa hala okukwafela nge ndi pondole moilonga yange yaBetel.”
Kaitlyn okwa ti: “Onda li nda kwafelwa ndi yandje elitulemo koshinima osho sha fimanenena, sha hala kutya, okuninga oinima monghedi oyo Jehova a hokwa. Ofikola yOvabetel vape oya kwafela nge ndi kale ndi na eudeko nolupandu li na sha naJehova, eumbo laye nosho yo ehangano laye.”
Ofikola yOukalele wOuhamba
Elalakano: Okudeula ovapashukili ovaendi, ovakulunhuongalo nomafimbo amwe ovayakuliongalo opo va dule okupashukila omaongalo nokuwanifa po oinakuwanifwa yehangano. (Oil. 20:28) Ohapa kundafanwa eenghalo di li pefimbo, omalunduluko nosho yo eemhumbwe domaongalo. Ofikola oyo ohai ningwa konima yomido dinini, she likolelela ketokolo lOlutuwiliki.
Efimbo: Omido opo da di ko, ovapashukili ovaendi ova kala hava i kofikola oyo omafiku avali ile avali netata, ovakulunhuongalo efiku limwe netata, ofimbo ovayakuliongalo efiku limwe alike.
Onhele: Luhapu ohai ningilwa mOlupale lOuhamba ile mOlupale lOyoongalele.
Oiteelelwa: Omunhu oku na okukala omupashukili omweendi, omukulunhuongalo ile omuyakuliongalo.
Nghee u na okulishangifa: Ovakulunhuongalo novayakuliongalo ohava shivwa komupashukilishikandjo. Oshitaimbelewa osho hashi shivi ovapashukili ovaendi.
Quinn okwa ti: “Nonande ofikola oyo ohai kundafana ouyelele muhapu poshikando, ohai kwafele ovakulunhuongalo opo va kale ve na ehafo nova twikile ve li ‘ovalumenhwelela, va pamenena’ moilonga yaJehova. Ovakulunhuongalo ovo va kala efimbo lile naavo opo va nangekwa po, ohave lihongo nghee ve na okulifa oufita nawa nokukala ve na oukumwe ‘nohava diladila shimwe.’”
Michael okwa ti: “Edeulo olo ohali tu omufindo ekwatafano olo li li pokati kokulitunga pamhepo nokukala tu na olupandu, hali tu londwele koiponga nohatu pewa omaetepo taa longo e na sha nokupashukila oufita. Jehova oku na olukeno shili nohe tu kwafele.”
Ofikola yOkudeula Ovakokolindjila
Elalakano: Okukwafela ovakokolindjila va ‘wanife po nawa oshilongayakulo shavo.’ — 2 Tim. 4:5.
Efimbo: Oivike ivali.
Onhele: Oshitaimbelewa osho hashi tokola kutya openi i na okuningilwa; naluhapu ohai ningilwa mOlupale lOuhamba.
Oiteelelwa: Omunhu oku na okukala a kokola ondjila oule wodula imwe ile shi dulife po.
Nghee u na okulishangifa: Ovakokolindjila ovo va wana ohava shiivifilwa komupashukilishikandjo wavo nopehe na okulishangifa.
Lily okwa ti: “Ofikola oya kwafela nge ndi dule okuungaunga nomashongo moukalele nosho yo monghalamwenyo yange. Onghedi yange yokukonakona, okuhonga nokulongifa Ombibeli oya xwepopala neenghono. Paife onde lilongekida nawa ndi kwafele vamwe, ndi yambidide ovakulunhuongalo nondi xumife komesho ekulo leongalo.”
Brenda, oo a li kofikola oyo lwoikando ivali paife, okwa ti: “Ofikola oyo oya kwafela nge ndi kale handi yandje elitulemo filufilu koinima yopamhepo, ndi pameke eliudo lange nondi yandje elitulemo kokukwafela vamwe. Nopehe na omalimbililo, Jehova oha yandje nehalo liwa!”
Ofikola yOkudeula Ovakulunhuongalo
Elalakano: Okukwafela ovakulunhuongalo va wanife po oinakuwanifwa yavo meongalo nova pameke oupamhepo wavo.
Efimbo: Omafiku atano.
Onhele: Oshitaimbelewa osho hashi tokola kutya otai ka ningilwa peni; naluhapu ohai ningilwa mOlupale lOuhamba ile mOlupale lOyoongalele.
Oiteelelwa: Omunhu oku na okukala omukulunhuongalo.
Nghee u na okulishangifa: Ovakulunhuongalo ohava shivwa koshitaimbelewa nopehe na okulishangifa.
Tala komatyekosha avamwe ovo va li mondodo onhi-92 mOilongo ya Hangana:
“Ofikola oya etela nge ouwa muhapu, oya kwafela nge ndi likonakone nokutala nghee handi dulu okufila oshisho eedi daJehova.”
“Onde lilongekida okuladipika vamwe handi longifa Omishangwa.”
“Edeulo olo ohandi ke li longifa monghalamwenyo yange aishe.”
Ofikola yOkudeula Ovapashukili Ovaendi nOvakulukadi Vavo
Elalakano: Ohai kwafele ovapashukili voikandjo novoitukulwa va kale va pyokoka mokuyakula omaongalo ve li ‘moshilonga shondjovo ndee tava hongo’ noudiinini. — 1 Tim. 5:17; 1 Pet. 5:2, 3.
Efimbo: Eemwedi mbali.
Onhele: Oshitaimbelewa osho hashi tokola.
Oiteelelwa: Omumwatate oku na okukala omupashukili woshikandjo ile woshitukulwa.
Nghee u na okulishangifa: Oshitaimbelewa osho hashi shivi ovapashukili ovaendi novakulukadi vavo nopehe na okulishangifa.
Joel, oo a li mondodo yotete mo 1999 okwa ti: “Eudeko letu li na sha naJesus e li omutwe wehangano ola li la hapupala. Otwa li twa uda ko kutya osha pumbiwa okuladipika ovamwatate ovo hatu yakula nokupameka oukumwe weongalo keshe. Ofikola oye tu dimbulukifa kutya nonande omupashukili omweendi oha yandje omayele ile nokuli omapukululo omafimbo amwe, elalakano laye la fimanenena olo okukwafela ovamwatate va mone kutya Jehova oku va hole.”
Ofikola yOmbibeli yOkudeula Ovamwatate Inava Hombola
Elalakano: Okudeula ovakulunhuongalo novayakuliongalo ovo inava hombola opo va dule oku ka pewa oinakuwanifwa ya wedwa po mehangano laJehova. Vahapu ovo hava piti mofikola oyo ohava tuminwa koitukulwa oko ku na omhumbwe yovaudifi moshilongo shavo. Ovamwatate vamwe otashi dulika va tuminwe koilongo imwe ngeenge ove na ehalo. Vamwe otashi dulika va tumwe va ka longe ve li ovakokolindjila ve likalekelwa vopakafimbo opo va ka longe keenhele dokokule nokwaado de likalela.
Efimbo: Eemwedi mbali.
Onhele: Oshitaimbelewa osho hashi tokola kutya otai ka ningilwa peni; naluhapu ohai ningilwa mOlupale lOuhamba ile mOlupale lOyoongalele.
Oiteelelwa: Omunhu oku na okukala omumwatate ina hombola e na omido 23 fiyo 62, e na oukolele muwa, noku na ehalo lokuyakula keshe opo pe na omhumbwe inene. (Mark. 10:29, 30) Oku na okukala a kokola ondjila oule weedula mbali noku na yo okukala omukulunhuongalo ile omuyakuliongalo oule womido mbali noina kala pedu lwopokati opo.
Nghee u na okulishangifa: Poshoongalele shoshikandjo ohapa ningwa okwoongala nohapa yandjwa ouyelele kwaavo va hala okuya kofikola oyo.
Rick oo a li mondodo onhi-23 kOilongo ya Hangana okwa ti: “Ngeenge owa kufa ombinga nomutima aushe mofikola oyo oto ka efa omhepo yaJehova i ninge omalunduluko manene mwoove. Ngeenge Jehova okwe kupe oshilonga, ote ke ku kwafela moshilonga sha tya ngaho. Onde lihonga kutya ngeenge onda yandje elitulemo kokulonga ehalo laKalunga ndele hakwaame mwene, ota ka pameka nge.”
Andreas, oo ta yakula kOndowishi okwa ti: “Ondi udite ko paife kutya onghedi omo ehangano tali longo kunena oya fa ashike oshikumwifilonga. Edeulo olo nda mona ola kwafela nge ndi kale nde lilongekidila oilonga oyo i li komesho. Natango, oihopaenenwa ihapu yopaMbibeli oya honga nge oshili ei ya fimanenena: Okuyakula ovamwatate nokulongela Jehova otaku eta ehafo lashili.”
Ofikola yOmbibeli yOkudeula Ovalihomboli Ovakriste
Elalakano: Okupa ovalihomboli edeulo le likalekelwa opo va dule okulongifwa pauyadi kuJehova nosho yo kehangano laye. Vahapu ovo hava piti mofikola oyo ohava tuminwa koitukulwa oko ku na omhumbwe yovaudifi moshilongo shavo. Ovamwatate vamwe ohava dulu okutuminwa koilongo imwe ngeenge ove na ehalo. Vamwe otashi dulika va tumwe va ka longe ve li ovakokolindjila ve likalekelwa vopakafimbo opo va ka longe keenhele dokokule nokwaado de likalela.
Efimbo: Eemwedi mbali.
Onhele: Ofikola oyo paife ohai ningilwa mOilongo ya Hangana, nokuhovela muSeptemba 2012 otai ka kala yo hai ningilwa moitukulwa yoitaimbelewa oyo ya hoololwa mounyuni aushe, tai ka ningilwa mOlupale lOyoongalele ile mOlupale lOuhamba.
Oiteelelwa: Ovalihomboli ove na okukala ve na omido 25 fiyo 50, ve na oukolele muwa, eenghalo davo tadi va pitike va ka longe keshe opo pe na omhumbwe nove na oikala oyo kutya: “Aame ou, tume nge!” (Jes. 6:8) Natango, ove na okukala va hombola oule womido mbali nova kala ve li moilonga yefimbo li yadi oule womido mbali noinava kala pedu lwopokati opo. Omushamane oku na okukala omukulunhuongalo ile omuyakuliongalo oule womido mbali da landulafana.
Nghee u na okulishangifa: Poshoongalele shoshitukulwa ohapa ningwa okwoongala opo hapa yandjwa ouyelele kwaavo va hala okulishangifa. Ngeenge poshoongalele sheni inapa ningwa okwoongala kwa tya ngaho oto dulu okushangela koshitaimbelewa opo u pewe ouyelele.
Eric naCorina ovo va li mondodo yotete mo 2011 ova ti: “Onghalamwenyo kaya li tuu ya lunduluka moule ashike woivike ihetatu nomhito inene oya yeulukila ovalihomboli ovo va hala okulonga shihapu moilonga yaJehova! Otwa tokola toko okukala nondjele monghalamwenyo opo tu dule okulongifa pandunge efimbo letu.”
Ofikola yOmbibeli yoWatchtower yaGilead
Elalakano: Okudeula ovanafikola opo va ka longe ve li ovatumwa vomoukalele moitukulwa oyo i na ovanhu vahapu, va ninge ovapashukili ovaendi ile va ninge Ovabetel. Elalakano olo okupameka omaongalo nosho yo oitaimbelewa.
Efimbo: Eemwedi nhano.
Onhele: Watchtower Educational Center, Patterson, New York, U.S.A.
Oiteelelwa: Ovalihomboli ovo ve li nale moilonga ye likalekelwa yefimbo li yadi, ngaashi ovatumwa vomoukalele ovo inava enda nale kofikola oyo, ovakokolindjila ve likalekelwa, ovapashukili ovaendi ile Ovabetel. Ove na okukala va kala moilonga yefimbo li yadi oule womido nhatu noinava kala pedu lwopokati opo. Ove na yo okukala hava popi, hava lesha nohava shange Oshiingilisha nawa.
Nghee u na okulishangifa: Okomitiye yOshitaimbelewa otai dulu okulombwela ovalihomboli vamwe va ninge eindilo.
Lade naMonique vokOilongo ya Hangana paife otava longo muAfrika. Lade okwa ti: “Ofikola yaGilead oye tu longekida tu ye keshe pamwe mounyuni nokukala twe lilongekida okulonga pamwe novamwatate ovaholike.”
Monique okwa ti: “Eshi handi tula moilonga osho nde lihonga mEendjovo daKalunga, ohandi mono ehafo linene moilonga yange. Ehafo la tya ngaho onde litala ko li li euliko lohole yaJehova.”
Ofikola yOkudeula Oilyo yEekomitiye dOitaimbelewa nOvakulukadi Vayo
Elalakano: Okukwafela oilyo yEekomitiye dOitaimbelewa i dule okupashukila omaumbo aBetel, okuyandja elitulemo koinima oyo ya kuma omaongalo nokupashukila oikandjo noitukulwa oyo i li koshi yoitaimbelewa yayo. Ohave lihongo yo shi na sha noilonga yokutoloka, yokunyanyangida nosho yo yokutumina oileshomwa komaongalo.
Efimbo: Eemwedi mbali.
Onhele: Watchtower Educational Center, Patterson, New York, U.S.A.
Oiteelelwa: Omumwatate oku na okukala oshilyo shOkomitiye yOshitaimbelewa ile shOkomitiye yOshilongo ile a ulikwa a ninge oshilyo shaimwe yomeekomitiye odo.
Nghee u na okulishangifa: Olutuwiliki olo hali shivi ovamwatate ovo va wana novakulukadi vavo.
Lowell naCara ovo va li mondodo onhi-25 paife otava longo moNigeria. Lowell okwa ti: “Onda li nda dimbulukifwa kutya kashi na nee mbudi kutya onde lipyakidila shi fike peni ile onda pewa oilonga ya tya ngahelipi, okuninga oinima monghedi oyo tai hafifa Jehova osho sha fimanenena. Ofikola oyo oya li yo ya divilika kutya otu na okuhopaenena Jehova, oo ha ulikile ovapiya vaye ohole, eshi hatu ungaunga navamwe.”
Cara okwa weda ko a ti: “Oshinima shimwe osho nda kala nokudilonga kusho oshosho kutya ngeenge itandi dulu okufatulula oshinima shonhumba monghedi oyo tai dulu okuudiwa ko noupu, onda pumbwa oku shi konakona fimbo inandi kendabala oku shi honga vamwe.”