Etukulwa etitatu

Diinina Eendjovo daKalunga

1. (a) Ongahelipi Israel shonale sha mona kutya eendjovo daKalunga odi shii okulineekelwa? (b) Omolwashike oshinima osho shihokwifa kufye?

“NYE mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa. Adishe de mu wanifilwa.” (Josua 23:14-16) Osho osho Josua a lombwela ovakulunhu vomuIsrael konima eshi va li va tula mEdu lEudaneko. Heeno, omaudaneko aJehova okwa ulika kutya okwa li e shii okulineekelwa. Ondjokonona oyo—nosho yo Ombibeli aishe—oya diininwa omolwetu opo tu “kale tu neteelelo.”—Ovaroma 15:4.

2. (a) Omeityo lilipi Ombibeli ya ‘yandjwa kuKalunga’? (b) Okushiiva kutya Ombibeli oya nwefwa mo kuKalunga otaku tu pe oshinakuwanifwa shilipi?

² Nonande ovanhu 40 lwaapo va li va longifwa okushanga Ombibeli, Jehova oye lela Omushangi wayo. Mbela osho osha hala okutya oye a wilika keshe shimwe osho sha shangwa mo shi shangwe? Heeno. Okwe shi ninga okupitila momhepo yaye iyapuki i na eenghono, sha hala okutya, eenghono daye tadi longo. Omuyapostoli Paulus okwa popya paushili ta ti: “Omishangwa adishe da yandjwa keenghono dOmhepo yaKalunga . . . omunhu womuKalunga opo a kale a wana nokwa wanenena oshilonga keshe shiwa.” Ovanhu keshe pamwe ovo va itavela kutya Ombibeli oya nwefwa mo kuKalunga ohava pwilikine kuyo nohava kala metwokumwe naasho sha shangwa muyo.—2 Timoteus 3:16, 17; 1 Ovatessaloniki 2:13.

Kwafela vamwe va kale ve i lenga

3. Onghedi iwa ilipi yokukwafela ovanhu vahapu ovo inava itavela kutya Ombibeli oyo Eendjovo daKalunga?

³ Ovanhu vahapu ovo hatu popi navo inava itavela ngaashi fye kutya Ombibeli oyo Eendjovo daKalunga. Mbela ongahelipi hatu dulu oku va kwafela? Luhapu, onghedi iwa oyo okupandja Ombibeli noku va ulikila osho shi li mo. “Ondjovo yaKalunga oi nomwenyo neenghono, noi neememo i dule eongamukonda leememo keembinga mbali, . . . ndele i shii kutokola omadilongo nomadiladilo omutima.” (Ovaheberi 4:12) “Ondjovo yaKalunga” kai fi ondjokonona i he na eityo, ndele oi na omwenyo! Omaudaneko Ombibeli otaa wanifwa nope he na okwiimbwa kusha. Etumwalaka lOmbibeli ohali nwefa mo neenghono elinyengotomheno lashili lomutima womunhu shi dulife keshe osho hatu dulu okutya paumwene.

4. Omayelifilo oshili yOmbibeli elipi a lundulula oikala yovanhu vamwe shi na sha nOmbibeli, nomolwashike?

⁴ Okumona edina laKalunga li li mOmbibeli oshe linyengifa ovanhu vahapu ve i konakone moule. Vamwe ova tokola okukonakona Ombibeli konima eshi va ulikilwa osho tai ti shi na sha nelalakano longhalamwenyo, nonokutya omolwashike Kalunga a efela oukolokoshi, eityo loiningwanima oyo tai ningwa paife olilipi ile shi na sha neteelelo lomwenyo waalushe moparadisa kombada yedu. Moilongo omo eenghedi dopamalongelokalunga tadi ningifa ovanhu va hepekwe keemhepo dowii, eyelifo lOmbibeli laasho hashi etifa oshinima osho nonghee tava dulu okumona epepelelwo osha pendula ohokwe. Omolwashike oitwa oyo hai linyengifa ovanamitima diwa? Omolwaashi Ombibeli oyo aike odjo i na omauyelele e shii okulineekelwa moinima aishe ya fimanenena ya tya ngaho.—Epsalme 119:130.

5. (a) Ngeenge ovanhu tava ti kutya inava itavela Ombibeli, otashi dulika omatomheno a kale elipi? (b) Ongahelipi hatu dulu okukwafela ovanhu va tya ngaho?

⁵ Ndele mbela ongahelipi ngeenge ovanhu tave tu lombwele kutya inava itavela Ombibeli? Mbela osho oshi na okuxulifa po eenghundafana? Hasho, ngeenge ove na ehalo lokupwilikina kufye. Otashi dulika hava tale ko Ombibeli i li embo lOukwakriste. Ondjokonona yOukwakriste yoihelele nokulidopa kwao meepolitika nosho yo okwiindila kwasho alushe oimaliwa, otashi dulika oyo ya etifa okuhahokwa Ombibeli kwavamwe. Omolwashike ito pula ngeenge osho shi li ngaho? Okutokola kwOmbibeli eenghedi dounyuni dOukwakriste nosho yo ekondjifafano pokati kOukwakriste nOvakriste vashili, otai dulu okupendula ohokwe yavo.—Mika 3:11, 12; Mateus 15:7-9; Jakob 4:4.

6. (a) Oshike she ku tomha u itavele kutya Ombibeli oyo Eendjovo daKalunga? (b) Oitwa imwe ilipi yokutomhafana tai dulu okulongifwa okukwafela ovanhu va ude ko kutya Ombibeli oya dja shili kuKalunga?

⁶ Kuvamwe, eenghundafana da yukilila di na sha noumbangi kutya Ombibeli oya nwefwa mo kuKalunga otashi dulika di va kwafele. Oshike lela tashi ku ulikile kutya Ombibeli oya dja kuJehova Kalunga? Mbela oshosho Ombibeli tai ti shi na sha nodjo yayo? Ile oushili oo kutya Ombibeli oi na omaxunganeko mahapu oo taa ulike eshiivo lokondadalunde li na sha nonakwiiwa, omaxunganeko oo e na okukala a dja kodjo i na eenghono di dule dovanhu? (2 Petrus 1:20, 21) Mbela oushili oo kutya Ombibeli otai ulike etwokumwe lomeni likumwifi, nonande oya shangwa kovalumenhu 40 oule womido di dule hanga 1 600? Ile mbela oushili wayo wopaunongononi oo tau kondjifafana nomambo makwao oo a shangwa pefimbo olo? Ile mbela ounashili wovashangi vayo? Ile mbela okudiininwa kwayo nonande opa kala eenghendabala donyanya doku i hanauna po? Keshe tuu osho wa mona paumwene she ku kumwifa otashi dulu yo okulongifwa okukwafela vamwe.a

Okulesha kwetu Ombibeli

7, 8. (a) Oshike tu na okuninga shi na sha nOmbibeli? (b) Oshike twa pumbwa kakele kokulesha Ombibeli paumwene? (c) Ongahelipi wa mona eudeko paumwene lokuuda ko omalalakano aJehova?

⁷ Kakele kokukwafela ovanhu va itavele Ombibeli, nafye otu na okulongifa efimbo tu i leshe pandjikilile. Mbela osho ho ningi? Momambo aeshe oo a nyanyangidwa, olo olo embo olo la fimanenena. Doshili, osho inashi hala okutya ngeenge ohatu i lesha kufye vene inatu pumbwa sha vali. Omishangwa otadi tu londwele tu he litongole ko fye vene. Inatu diladila nande kutya ohatu dulu okumona omanyamukulo kukeshe shimwe mokukonga omauyelele kufye vene. Ekonakono lopaumwene nosho yo okukala pokwoongala kwoshiwana shaKalunga pandjikilile oyo oinima ya pumbiwa opo tu kale Ovakriste ve na ondjele.—Omayeletumbulo 18:1; Ovaheberi 10:24, 25.

⁸ Shi na sha naasho, Ombibeli otai tu lombwele shi na sha nelenga lokuEtiopia olo kwa li tali lesha exunganeko laJesaja. Omweengeli okwa wilika Omukriste Filippus omuudifi wevangeli a pule omulumenhu oo ta ti: “Ove u udite ko tuu eshi to lesha?” Omuetiopia okwa nyamukula nelininipiko a ti: “Handi udu ko ngahelipi, ngenge kape na ou ta tula nge mondjila?” Okwa pula Filippus e mu yelifile oshitukulwa shOmishangwa odo. Ndele Filippus ka li ashike ha lesha Ombibeli kuye mwene nokuyandja omadiladilo aye shi na sha nOmishangwa. Okwa kala popepielela nehangano laKalunga li wetike. Onghee hano, okwa li a dula okukwafela Omuetiopia a mone ouwa melongo olo Jehova kwa li a yandja okupitila mehangano olo. (Oilonga 6:5, 6; 8:5, 26-35) Sha faafana kunena, kape na oo he uya peudeko li li mondjila lokuuda ko omalalakano aJehova kuye mwene. Atusheni otwa pumbwa ekwafo olo Jehova ta yandje pahole okupitila mehangano laye li wetike.

9. Oprograma ilipi yokulesha Ombibeli tai dulu oku tu etela ouwa atusheni?

⁹ Opo li tu kwafele tu ude ko Ombibeli, ehangano laJehova ohali yandje omauyelele a denga mbada opamishangwa moileshomwa i lili noku lili. Kakele kaasho, otwa tulilwa po elandulafano lokulesha Ombibeli pandjikilile shi na sha nOfikola yOukalele woPauteokratika oyo hai ningwa momaongalo aeshe Eendombwedi daJehova mounyuni aushe. Ouwa munene otau dulu okudja mokukonakona Omishangwa Diyapuki paumwene. (Epsalme 1:1-3; 19:8, 9) Ninga eenghendabala de likalekelwa u leshe Ombibeli pandjikilile. Nokuli nongeenge ku udite ko filufilu keshe shimwe, okumona kwoye eudeko lakwalukeshe lOmishangwa otaku ka eta ouwa muhapu. Pashihopaenenwa, ngeenge oto lesha ashike omapandja ane ile atano efiku keshe, oto dulu okumana ko Ombibeli momudo umwe.

10. (a) Onaini ho lesha Ombibeli? (b) Oolyelye vali ve na okukwatelwa mo ngeenge to lesha Ombibeli, nomolwashike oku shi ninga pandjikilile kwa fimana?

¹⁰ Onaini to dulu okulesha Ombibeli? Ngeenge owa longifa nande ominute 10 ile 15 efiku keshe, oto ka mona ouwa muhapu. Ngeenge osho itashi shiiva, ninga elandulafano loku i lesha oshivike keshe ndele to diinine elandulafano olo. Ngeenge owa hombola ile wa hombolwa, ove nakaume koye kopahombo otamu dulu okuhafela okuleshelafana Ombibeli mokule. Ngeenge ope na ounona ovo va kula nokulesha, otava dulu okuninga omalufo okulesha mokule. Okulesha Ombibeli oku na okukala oshinima shondjikilile monghalamwenyo, ngaashi naanaa okulya oikulya. Ngaashi u shi shii kutya ngeenge omunhu iha li nawa, oukolele waye wopalutu ohau kala u he li nawa. Sha faafana, onghalamwenyo yetu yopamhepo nosho yo onghalamwenyo yetu yaalushe oye likolelela kokulipalula kwetu pandjikilile ‘nondjovo keshe tai di mokanya kaKalunga.’—Mateus 4:4.

Elalakano letu

11. Elalakano letu lokulesha Ombibeli oli na okukala shike?

¹¹ Oshike shi na okukala elalakano letu eshi hatu lesha Ombibeli? Elalakano letu kali na okukala ashike okumana ko omapandja onhumba. Elinyengotomheno letu oli na okukala okushiiva nawa Kalunga opo tu dule okuhapupalifa ohole yetu yoku mu hola nosho yo oku mu longela panghedi oyo a hokwa. (Johannes 5:39-42) Oikala yetu oi na okukala ya fa oyo yomushangi umwe wOmbibeli oo a ti: “Omwene, ulikile nge eendjila doye, Ove u longe nge omalila oye.”—Epsalme 25:4.

12. (a) Omolwashike okumona “eshiivo lashili” kwa pumbiwa, neenghendabala dilipi omunhu a pumbwa okuninga ngeenge ta lesha opo a mone eshiivo olo? (b) Omokulongifa oitwa ine ilipi hatu dulu okukonakona osho hatu lesha mOmbibeli monghedi oyo tai tu etele ouwa? (Tala oshimhungu pepandja 30.) (c) Yelifa oitwa oyo mokunyamukula omapulo oo a yandjwa mokatendo aka. Tala omishangwa odo da yandjwa ndele inadi tofwa mo.

¹² Eshi hatu hongwa kuJehova, otu na okukala twa hala okumona “eshiivo lashili.” Notu he li na, ongahelipi hatu dulu okutula nawa moilonga Eendjovo daKalunga monghalamwenyo yetu ile oku di yelifila vamwe paushili? (Ovakolossi 3:10, NW; 2 Timoteus 2:15) Okumona eshiivo lashili otashi pula okulesha noukeka, nongeenge oshitukulwa shonhumba oshidjuu okuuda ko, otashi dulika twa pumbwa oku shi lesha shi dulife lumwe opo tu ude ko eityo lasho. Ohatu ka mona yo ouwa ngeenge ohatu longifa efimbo okudilonga oshinima shi na sha nouyelele oo twa lesha, hatu shi talele meembinga di lili noku lili. Eenghedi di li nhee da fimana di na sha nokudilonga oda ulikwa pepandja 30. Oitukulwa ihapu yOmishangwa otai dulu oku tu etela ouwa moku i konakona hatu longifa shimwe ile ihapu yomoitwa oyo. Eshi to nyamukula omapulo momapandja taa landula, oto ka mona nghee shi li ngaho.

(1) Luhapu, oshitukulwa shOmishangwa osho to lesha otashi dulu oku ku lombwela sha kombinga youkwatya waJehova. Pashihopaenenwa, mEpsalme 139:13, 14, ohatu lihongo mo okunakonasha kunene kwaJehova shi na sha nounona inava dalwa, taku ti: “Owa dutila nge medimo lameme. Ohandi ku pandula, eshi nda tungwa nda tungikikika; oilonga yoye oya longekekeka, nomwenyo wange otau shi shiiva nawa.” Oilonga yaJehova yeshito kai kumwifi tuu! Onghedi omo ovanhu va shitwa otai yandje oumbangi wohole inene yaye yoku tu hola.

Mokutala kwaasho sha popiwa muJohannes 14:9, 10, eshi hatu lesha nghee Jesus a ungaunga navamwe, otu wete lela nghee Jehova ngeno a katuka. Tu na osho momadiladilo, mbela ohatu ke uya pexulifodiladilo lilipi shi na sha naJehova mokutala koiningwanima oyo ya shangwa muLukas 5:12, 13 nosho yo Lukas 7:11-15?

(2) Konakona nghee ehokololo tali yambidida enenediladilo lOmbibeli: eyukipalifo lounamapangelo waJehova nosho yo eyapulo ledina laye okupitila mOuhamba waye koshi yaJesus Kristus, Oludalo la udanekwa.

Ongahelipi enenediladilo lOmbibeli la divilikwa kuHesekiel naDaniel? (Hesekiel 38:21-23; Daniel 2:44; 4:17; 7:9-14)

Ongahelipi Ombibeli tai ulike sha yela kutya Jesus oye Oludalo la udanekwa? (Ovagalati 3:16)

Ehololo otali hokolola ngahelipi oidjemo yomaudaneko e na sha nOuhamba, oo u li enenediladilo lOmbibeli? (Ehololo 11:15; 12:7-10; 17:16-18; 19:11-16; 20:1-3; 21:1-5)

(3) Lipula kutya ongahelipi to dulu okulongifa paumwene osho wa lesha. Pashihopaenenwa, ohatu lesha muExodus fiyo okuDeuteronomion shi na sha noluhaelo nounashibofa waIsrael. Otwe lihonga kutya oikala oyo nosho yo eenghatu odo oda eta oilanduliko ii. Onghee hano, otu na okulinyengifwa tu hafife Jehova mokuhahopaenena oshihopaenenwa shii shOvaisrael. “Ei aishe oya ningilwa venya i kale elondwelo kufye noya shangwa oku tu kumaida, ofye ava twa hangika komaxulilo omafimbo ounyuni.”—1 Ovakorinto 10:11.

Mehokololo li na sha nokudipaa Abel kwaKain ohatu lihongo mo shike? (Genesis 4:3-12; Ovaheberi 11:4; 1 Johannes 3:10-15; 4:20, 21)

Mbela omayele Ombibeli oo taa pewa Ovakriste ovo ve na eteelelo lomeulu otaa longo yo kwaavo ve na eteelelo lokukala nomwenyo waalushe kombada yedu? (Numeri 15:16; Johannes 10:16)

Nokuli nande otu na edina liwa meongalo lopaKriste, omolwashike twa pumbwa okukonakona nghee tu na okutula moilonga pauyadi omayele Ombibeli oo tu shii nale? (2 Ovakorinto 13:5; 1 Ovatessaloniki 4:1)

(4) Diladila kunghee to dulu okulongifa osho wa lesha opo u kwafele vamwe. Molwaashi ovanhu aveshe otave lipula shi na sha nomaupyakadi oukolele, ohatu dulu hano okulesha pamwe navo osho Jesus a ninga okuulika kutya oshike ta ka ninga monghedi ya tamunuka mo meenghono dOuhamba eendjovo edi tadi ti: “Eengudu dinene dovanhu de uya kuye, ndele da eta oingudu noilema novapofi novafitamatwi novakwao vahapu, . . . Oye okwe va velula.”—Mateus 15:30.

Oolyelye tava dulu okukwafelwa kehokololo lokunyumunwa kwokamonakadona kaJairus? (Lukas 8:41, 42, 49-56)

13. Oidjemo ilipi hatu dulu okumona moprograma tai twikile yokulesha Ombibeli nosho yo okukonakona pamwe nehangano laJehova?

¹³ Okulesha Ombibeli itaku ka kala tuu ku na ouwa ngeenge hatu diladila koitwa ine oyo ya tumbulwa metetekelo! Ndele paushili, okulesha Ombibeli oku li eshongo. Ndele otaku dulu oku tu etela ouwa monghalamwenyo aishe, omolwaasho eshi hatu lesha Omishangwa, ohatu ka kala twa pama pamhepo. Okulesha Ombibeli pandjikilile otaku ke tu ehenifa popepi elela naTate yetu omunahole Jehova nosho yo novamwatate Ovakriste. Otaku ke tu kwafela tu pwilikine komayele okutwikila ‘okudiinina eendjovo domwenyo.’—Ovafilippi 2:16.

[Omashangelo opedu]

Eenghundafana dokweendulula

• Omolwashike Ombibeli ya shangwa noya diininwa fiyo okunena?

• Ongahelipi hatu dulu okukwafela vamwe va lenge Ombibeli?

• Omolwashike okulesha Ombibeli paumwene pandjikilile ku na ouwa? Omokulongifa oitwa ine ilipi hatu dulu okumona ouwa mwaasho hatu lesha?

[Oshimhungu/Efano li li pepandja 30]

NGEENGE TO LESHA OSHITUKULWA SHOMBIBELI, DILADILA KUTYA

Otashi ku lombwele shike kombinga yaJehova e li omunhu

Nghee sha pambafana nenenediladilo lOmbibeli

Nghee shi na okunwefa mo onghalamwenyo yoye

Nghee to dulu oku shi longifa u kwafele vamwe