Twikila okulongela Jehova nomutima wa pama

JEHOVA ota dulu oku tu ninga twa pama meitavelo lopaKriste opo tu dule okukanyatela kOukriste washili tu li ovapiya vaye ve mu liyapulila. (Ovaroma 14:4) Onghee hano, ohatu dulu okukala neitavelo ngaashi olo lomupsalme David, oo e linyengifwa a imbe ta ti: “Kalunga, omutima wange owa [pama, NW].” (Epsalme 108:2) Ngeenge omitima detu oda pama, ohatu ke linyengifwa tu wanife po okuliyapulila kwetu Kalunga. Nosho yo okukonga ewiliko neenghono kuye, ohatu dulu okuulika kutya itatu tengauka, otwa pama metokolotoko nomeitavelo tu li ovakanyateli voudiinini notu li ‘alushe ovaladi moilonga yOmwene.’—1 Ovakorinto 15:58.

2, 3. Omakumaido aPaulus a shangwa mo 1 Ovakorinto 16:13 otaa ti shike?

² Momakumaido oo a pewa ovashikuli vaJesus muKorinto shonale ndele okwa wapala shili nokOvakriste vonena, omuyapostoli Paulus okwa ti: “Kaleni oupafi, mwa pama meitavelo, [mu twikile mu li] ovalumenhwelela, mwa pamenena.” (1 Ovakorinto 16:13, yelekanifa NW.) MOshigreka omalombwelo aeshe oo oku li mepaifefimbo, onghee hano otaa ladipike oshilonga tashi twikile. Ekumaido eli otali ti ngahelipi?

³ Ohatu dulu ‘okukala oupafi’ pamhepo mokukondjifa Ondiaboli nokukala popepi naKalunga. (Jakob 4:7, 8) Elineekelo muJehova otali tu dulifa tu kale twa hangana nokukala ‘twa pama meitavelo lopaKriste.’ Fye—mwa kwatela ovakainhu vahapu ovo ve li mokati ketu—ohatu ‘twikile tu li ovalumenhwelela’ mokulongela Kalunga nouladi tu li ovaudifi vOuhamba. (Epsalme 68:12) Otwa “pamenena” mokutwikila okukonga eenghono kuTate yetu womeulu tu longe ehalo laye.—Ovafilippi 4:13.

4. Oshike sha twala mokuninginifwa kwetu tu li Ovakriste?

⁴ Otwa ulika kutya otwa tambula ko eitavelo lashili eshi twe liyapulila Jehova filufilu notwe shi ulika mokuninginifwa momeva. Ndelenee oshike she tu eta peninginifo letu? Tete otwa mona eshiivo lashili lEendjovo daKalunga. (Johannes 17:3) Eshi osha eta eitavelo noshe tu linyengifa tu livele ombedi notu ulike oluhodi lashili komanyono a pita. (Oilonga 3:19; Ovaheberi 11:6) Opo nee taku uya elidilululo letu, molwaashi otwa efa oilonga ya puka opo tu lalakanene onghalamwenyo i li metwokumwe nehalo laKalunga. (Ovaroma 12:2; Ovaefeso 4:23, 24) Eshi osha landulwa kokuliyapulila Jehova nomutima aushe meilikano. (Mateus 16:24; 1 Petrus 2:21) Otwa ilikana kuKalunga omolweliudo liwa notwa ninginifwa shi li edidiliko loku mu liyapulila kwetu. (1 Petrus 3:21) Mokukaleka eenghatu edi momadiladilo etu otashi ke tu kwafela tu kale twa yandja elitulemo komhumbwe yeenghendabala tadi twikile opo tu kale metwokumwe neliyapulo letu nokutwikila okulongela Jehova nomutima wa pama.

Twikila okukonga kwoye eshiivo lashili

5. Omolwashike tu na okutwikila okumona eshiivo lopamishangwa?

⁵ Okukala metwokumwe nokuliyapulila kwetu Kalunga, otu na okutwikila okumona eshiivo lopamishangwa olo tali tungu eitavelo. Kasha li tuu ehafo okumona oikulya yopamhepo eshi twa shiiva oshili yaKalunga lwotete! (Mateus 24:45-47) “Oikulya” oyo oya li iwa—noye tu palula nawa pamhepo. Paife osha fimanenena tu twikile okulya oikulya iwa yopamhepo opo tu kaleke po omutima wa pama tu li ovapiya vaJehova ve mu liyapulila.

6. Ongahelipi wa kwafelwa u kulike olupandu tali di komutima okupandula oshili yOmbibeli?

⁶ Eenghendabala oda pumbiwa tu mone natango eshiivo lOmishangwa. Osha fa okukonga omamona a holekwa—oshinima osho tashi pula okulongifa eenghono. Ndelenee kashi na tuu ondjabi okumona “eshiivo lokushiiva Kalunga”! (Omayeletumbulo 2:1-6) Eshi omuudifi wOuhamba a konakona tete Ombibeli naave, otashi dulika a longifa embo Ontseyo Ndjoka Tayi Fala kOmwenyo Gwaaluhe. Otashi dulika pa longifwa efimbo lihapu okumana ko etukulwa keshe, tashi dulika shi dulife poshikando shimwe. Owa mona ouwa eshi omishangwa odo da yandjwa da leshwa noda kundafanwa. Ngeenge osha li shidjuu okuuda ko oshitwa shonhumba, osha li sha yelifwa. Oo a li a kwatela komesho ekonakonombibeli loye okwa li he lilongekida nawa, ta ilikana omolwomhepo yaKalunga nokwe ku kwafela u kulike olupandu tali di komutima lokupandula oshili.

7. Oshike tashi ningi omunhu a kale a wana okuhonga vamwe oshili yaKalunga?

⁷ Eenghendabala odo oda li da wapala, omolwaashi Paulus okwa shanga ta ti: “Ou ta longwa eendjovo, oye na tukulile omulongindjovo waye moinima yaye aishe iwa.” (Ovagalati 6:6) Apa eendjovo dOshigreka otadi ulike kutya omahongo Eendjovo daKalunga okwa li a findilwa momadiladilo nomomutima waao “ta longwa.” Okukala wa hongwa monghedi oyo otashi ku ningi wa wana okukala omuhongi wokuhonga vamwe nokuli. (Oilonga 18:25) Okukala omudiinini keliyapulo loye, ou na okukaleka po oukolele noudiinini woye wopamhepo mokutwikila okukonakona Eendjovo daKalunga.—1 Timoteus 4:13; Titus 1:13; 2:2.

Dimbuluka elivelombedi nelidilululo loye

8. Ongahelipi tashi shiiva u diinine elihumbato lopakalunga?

⁸ Mbela oto dimbuluka epepelelwo olo wa kala u udite eshi we lihonga oshili, we livela ombedi nowa diminwa po kuKalunga sha kanghamena meitavelo mekuliloyambo laJesus? (Epsalme 32:1-5; Ovaroma 5:8; 1 Petrus 3:18) Doshili, ino hala okushuna konghalamwenyo youlunde. (2 Petrus 2:20-22) Okwiilikana alushe kuJehova oko oshinima shimwe osho tashi ke ku kwafela u diinine elihumbato lopakalunga, okukala metwokumwe neliyapulo loye nosho yo okutwikila okulongela Jehova noudiinini.—2 Petrus 3:11, 12.

9. Eshi twa efa oilonga youlunde, onghatu ilipi tu na okulalakanena?

⁹ Eshi we lidilulula nowa efa oilonga youlunde, twikila okukonga ekwafo laKalunga mokukaleka omutima woye wa pama. Doshili, owa li to ende nondjila ya kula ya puka ndelenee owa konakona okaalita ke shii okulineekelwa nowa tameka okweenda mondjila ya yuka. Ino puka mondjila paife. Twikila okulineekela mewiliko laKalunga nokukala wa tokolatoko okukala mondjila oyo tai twala komwenyo.—Jesaja 30:20, 21; Mateus 7:13, 14.

Ino dimbwa nande eliyapulo neninginifo loye

10. Oitwa ilipi tu na okudimbuluka shi na sha nokuliyapulila kwetu Kalunga?

¹⁰ Dimbuluka kutya owe liyapulila Jehova meilikano, u na eteelelo loku mu longela fiyo alushe. (Judas 20, 21) Eliyapulo otali ulike okutukuka ko ile okulitongola ko omolwelalakano liyapuki. (Leviticus 15:31; 22:2) Eliyapulo loye kala li eudafano lopokafimbo ile okuliyandja komunhu. Ola li eliyapulo tali kalelele okuliyapulila Omunamapangelo aeshe nokukala metwokumwe nalo otashi pula u kale omudiinini kuKalunga okukalamwenyo kwoye akushe. Heeno, kutya nee ‘ohatu kala nomwenyo ile ohatu fi, ofye ovOmwene.’ (Ovaroma 14:7, 8) Elao letu ole likolelela kokudulika kwetu kehalo laye nosho yo okutwikila kwetu oku mu longela nomutima wa pama.

11. Omolwashike u na okudimbuluka eninginifo loye nosho yo osho tali ti?

¹¹ Dimbuluka alushe eninginifo loye li li edidiliko lokuliyapulila kwoye Kalunga nomutima aushe. Kala li elininginifo we li findilwa, omolwaashi owa ninga etokolo kwoove mwene. Mbela paife owa tokola toko ehalo loye li kale metwokumwe nehalo laKalunga monghalamwenyo yoye aishe? Owa ninga eindilo kuKalunga omolweliudo liwa nowa ninginifwa shi li edidiliko leliyapulo loye kuye. Amena eliudo eli liwa mokuwanifa po eliyapulo loye nomanangeko noupuna aJehova otaa ka kala kombada yoye.—Omayeletumbulo 10:22.

Ehalo loye otali dana onghandangala

12, 13. Ongahelipi ehalo letu vene la pambafana neliyapulo nosho yo neninginifo?

¹² Doshili, eliyapulo neninginifo ola etela omamiliyona ovanhu omanangeko noupuna manene mounyuni aushe. Eshi twa ulika okuliyapulila kwetu Kalunga mokuninginifwa momeva, otwa fya shi na sha nonghalamwenyo yetu yonale ndele inatu fya shi na sha nehalo letu. Tu li ovaitaveli va hongwa nawa, otwa ulika shili ehalo letu vene eshi twe liyapulila Kalunga meilikano nokuninginifwa. Onghatu yeliyapulo neninginifo otai pula tu mone kutya ehalo laKalunga olilipi opo nee hatu diladila okuhoolola oku li longa. (Ovaefeso 5:17) Kungaha ohatu hopaenene Jesus, oo a ulika ehalo laye eshi a fiya po oilonga yaye yokuhonga oipilangi, okwa ninginifwa nokwe liyandja filufilu okulonga ehalo laXe womeulu.—Epsalme 40:7, 8; Johannes 6:38-40.

¹³ Jehova Kalunga okwa tokola kutya Omona waye ota ka ‘lengwa okupitila mouyahame a kale a wana.’ Onghee hano Jesus okwa li e na okuulika ehalo laye okulididimikila okumona oixuna moudiinini. Opo shi ningwe, okwa yandja “omaindilo nomailikano nokukuwa pombada nomahodi . . . nokwa udika omolwetilokalunga [laye, NW].” (Ovaheberi 2:10, 18; 5:7, 8) Ngeenge ohatu ulike etilofimaneko lokutila Kalunga la faafana, nafye ohatu ka “udika” nohatu ka dula okukala nelineekelo kutya Jehova ote ke tu ninga twa pama tu li Eendombwedi daye de mu liyapulila.—Jesaja 43:10.

Oto dulu okudiinina omutima wa pama

14. Omolwashike tu na okulesha Ombibeli efiku keshe?

¹⁴ Oshike tashi ke ku kwafela u diinine omutima wa pama nokukala metwokumwe nokuliyapulila kwoye Kalunga? Nelalakano lokumona ouyelele tau hapupala wEendjovo daKalunga, lesha Ombibeli efiku keshe. Eshi osho oshinima osho “omupiya omudiinini nomunaendunge” te tu ladipikile alushe tu ninge. Omayele a tya ngaha okwa yandjwa molwaashi okukala metwokumwe neliyapulo letu otaku pula tu twikile nokweenda moshili yaKalunga. Ngeno ehangano laJehova okwa li tali yambidida omahongo oipupulu, ngeno Eendombwedi daJehova nosho yo ovo tadi udifile inava pewa omayele okulesha Ombibeli.

15. (a) Oshike shi na okudiladilwa ngeenge taku ningwa omatokolo? (b) Omolwashike taku dulu okutiwa kutya oilonga yokulikongela omboloto oi li pondodo onhivali kOmukriste?

¹⁵ Ngeenge to ningi omatokolo, diladila alushe nghee taa ka nwefa mo okuwanifa po okuliyapulila kwoye Jehova. Eshi otashi dulu okuyukifwa koilonga yoye yokulikongela omboloto. Mbela oho kendabala oku i ninga i ku kwafele mokuxumifa komesho elongelokalunga lashili? Nonande ovayandji voilonga vahapu ohava mono kutya konyala Ovakriste aveshe ve liyandja ove shii okulineekelwa nohava longo nawa, ova didilika yo kutya Eendombwedi daJehova ihadi nwefwa mo kehalo di mone eendodo mounyuni nosho yo ihadi ningi omalihakano navamwe okumona eendodo odo di holike. Eshi oshi li ngaho molwaashi elalakano lEendombwedi kali fi okumona oupuna, etumbalo ile eenghono. Kwaavo tava kala metwokumwe nokuliyapulila kwavo Kalunga, oshinima sha fimana osho okuwanifa po ehalo laKalunga. Oilonga yokulikongela omboloto oyo tai va dulifa va mone oipumbiwa yonghalamwenyo oi li oilonga oyo i li pondodo onhivali. Ngaashi omuyapostoli Paulus, oilonga yavo yotete oyo oukalele wopaKriste. (Oilonga 18:3, 4; 2 Ovatessaloniki 3:7, 8; 1 Timoteus 5:8) Mbela oho pitifa tuu komesho oinima yOuhamba komesho monghalamwenyo yoye?—Mateus 6:25-33.

16. Oshike hatu dulu okuninga ngeenge oisho ya pitilila tai shi ningi shidjuu okukala metwokumwe nokuliyapulila kwetu Kalunga?

¹⁶ Vamwe otashi dulika konyala va li va wilililwa po koisho i lili noku lili fimbo inave lihonga oshili. Ndelenee omitima davo inadi yadifwa tuu ehafo, olupandu nosho yo ohole yokuhola Kalunga eshi va diinina eteelelo lOuhamba! Okudilonga komanangeko noupuna oo va hafela okudja nale otaku va kwafele nawa okukala metwokumwe nokuliyapulila kwavo Jehova. Mepingafano naasho, ongahelipi ngeenge oisho ya pitilila tai etwa komaupyakadi oo mahapu monghalamwenyo monghalelo ei yopaife ya hala okufininika “eendjovo daKalunga,” ngaashi naanaa eeshosholo tadi dulu okukelela omhaona i kule i imike oiimati? (Lukas 8:7, 11, 14; Mateus 13:22; Markus 4:18, 19) Ngeenge ou udite kutya eshi osha tameka oku ku ningilwa ile oukwaneumbo woye, undulila oisho yoye kuJehova nokwiilikana e ku kwafe u kule mohole nosho yo molupandu. Ngeenge oto undulile omutengi woye kuye, ote ke ku kwafela noku ku pa eenghono u twikile oku mu longela nehafo nomutima wa pama.—Epsalme 55:23; Ovafilippi 4:6, 7; Ehololo 2:4.

17. Ongahelipi tashi shiiva okupondola omayeleko madjuu?

¹⁷ Twikila okwiilikana kuJehova Kalunga alushe, nokuli ngaashi wa ilikanene eshi we mu liyapulila. (Epsalme 65:3) Ngeenge to yelekwa u longe owii ile wa taalelwa keyeleko lidjuu, konga ewiliko laKalunga nosho yo ekwafo laye okushikula ewiliko olo. Dimbuluka omhumbwe yokukala neitavelo, omolwaashi omuhongwa Jakob okwa shanga ta ti: “Ngenge umwe womunye okwa hepa ounongo [okupondola eyeleko], ne u indile kuKalunga ou e hole okuyandjela aveshe noku he nokungongota, opo nee ote u pewa. Ashike ye na indile meitavelo, ina limbililwa, osheshi ou ta limbililwa, a fa ekufikufi tali twalwaatwalwa notali telaanifwa komhepo. Omunhu a tya ngaha ina diladila kutya, ota pewa sha kOmwene, omulumenhu womitima mbali nomutengauki meendjila daye adishe.” (Jakob 1:5-8) Ngeenge eyeleko otali monika la fa lidjuu, ohatu dulu okukala noushili waashi: “Inamu hangika keyeleko limwe, olo tuu olo lopanhu, ndelenee Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.”—1 Ovakorinto 10:13.

18. Oshike hatu dulu okuninga ngeenge enyono la kwata moiti la holekwa tali nghundipaleke etokolotoko letu tu kale metwokumwe nokuliyapulila kwetu Jehova?

¹⁸ Ongahelipi ngeenge enyono la kwata moiti la holekwa tali piyaaneke eliudo loye notali nghundipaleke etokolotoko loye okukala metwokumwe nokuliyapulila kwoye Kalunga? Ngeenge owe livele ombedi, oto dulu okumona ehekeleko mokushiiva kutya Jehova ‘ita dini omutima wa teyauka nowa alamekwa.’ (Epsalme 51:19) Konga ekwafo lovakulunhuongalo Ovakriste ovanahole, u shii kutya mokuhopaenena Jehova itava ka tala ko ehalo loye okumonununa ekwatafano liwa naXo yomeulu li li inali fimana. (Epsalme 103:10-14; Jakob 5:13-15) Opo nee pamwe neenghono dopamhepo nosho yo omutima wa pama, oto ka dula okuyukifa omalila eemhadi doye nokumona kutya otashi shiiva okukala metwokumwe nokuliyapulila kwoye Kalunga.—Ovaheberi 12:12, 13.

Twikila okulongela Jehova nomutima wa pama

19, 20. Omolwashike sha fimanenena opo tu twikile okukala metwokumwe neliyandjo letu?

¹⁹ Momafiku aa madjuu, otu na okulonga noudiinini tu kale metwokumwe neliyapulo letu nokutwikila okulongela Kalunga nomutima wa pama. Jesus okwa ti: “Ou te lididimike fiyo exulilo, oye ta xupifwa.” (Mateus 24:13) Molwaashi otu li ‘momafiku axuuninwa,’ exulilo otali dulu okuuya efimbo keshe. (2 Timoteus 3:1) Kakele kaasho, kape na umwe womufye e shii ngeenge ohatu ka kala nomwenyo mongula. (Jakob 4:13, 14) Onghee hano osha fimanenena opo tu twikile okukala metwokumwe neliyapulo letu kunena.

²⁰ Omuyapostoli Petrus okwe shi divilika monhumwafo yaye onhivali. Okwa ulika kutya nokuli ngaashi ngoo ovahenakalunga va xulifwa po mEyelu, edu lopafaneko ile oulipamwe wovanhu ovakolokoshi otau ka hanaunwa po ‘mefiku laKalunga.’ Onghee hano Petrus okwa ti: “Omu na okuhangika mwa tya ngahelipi meengeda diyapuki nomoilonga yometilokalunga.” Okwe va ladipika yo ta ti: “Ovaholike, eshi mwe shi shiiva fimbo inashi uya, kaleni mwa londoka, mu ha twalwaatwalwe [kovalongi ovanaipupulu nosho yo ovanhu ovahenakalunga], nye mu ha we mo mekanghameno leni la pama.” (2 Petrus 3:5-17, yelekanifa NW.) Itashi ka kala tuu shinyikifa oluhodi ngeenge omunhu a ninginifwa a pukifwa nokufika pexulilo lokukalamwenyo kwaye e li umwe oo a dopa okukala nomutima wa pama!

21, 22. Ongahelipi eendjovo dEpsalme 57:8 di li doshili moshinima shi na sha naDavid nosho yo nOvakriste vashili?

²¹ Etokolotoko loye okukala metwokumwe nokuliyapulila kwoye Kalunga otali ka pamekwa ngeenge oto dimbuluka nehafo efiku leninginifo loye nokukonga ekwafo laKalunga opo eendjovo noilonga yoye i hafife omutima waye. (Omayeletumbulo 27:11) Jehova iha nyemateke nande oshiwana shaye, notu na shili okukala ovadiinini kuye. (Epsalme 94:14) Okwa ulika olukeno nosho yo onghenda mokuya moshipala eemhangela dovatondi vaDavid noku mu xupifa. Omolwolupandu laasho, David okwa shiivifa okupama nokuhatengauka kwohole yaye yokuhola Omuxupifi waye. Okwa imba nomutima aushe ta ti: “Omutima wange [wa pama] Kalunga, omutima wange [wa pama]; onda hala okwiimba nokushika.”—Epsalme 57:8, yelekanifa NW.

²² Ngaashi David, Ovakriste vashili inava tengauka keliyandjo lavo kuKalunga. Nomitima da pama, ova hokolola exupifo lavo kuJehova, oo tave mu imbile ehambelelo nehafo. Ngeenge omutima woye owa pama, otau ka kala u na elineekelo muKalunga nosho yo kekwafo laye oto ka dula okuwanifa po eliyapulo loye. Heeno, oto dulu okukala ngaashi ‘omuyuki’ oo omupsalme a imba shi na sha naye ta ti: “Ita ka tila nokuli eenghundana dii. Omutima waye owa pama, we lineekela muJehova.” (Epsalme 112:6, 7, NW) Neitavelo muKalunga nosho yo elineekelo muye filufilu, oto dulu okukala metwokumwe neliyapulo loye nokutwikila okulongela Jehova nomutima wa pama.

1. Omolwashike hatu dulu okukala tu na eitavelo ngaashi olo laDavid?

[Efano pepandja 28]

Mbela oto ka diinina tuu oukolele woye wopamhepo mokulesha Eendjovo daKalunga efiku keshe?

[Efano pepandja 28]

Okuninga oukalele wopaKriste oilonga yetu yotete otashi tu kwafele tu twikile okulongela Jehova nomutima wa pama

[Efano pepandja 30]

Oto dimbuluka?

• Omolwashike tu na okutwikila okumona eshiivo lashili lokushiiva Ombibeli?

• Omolwashike tu na okudimbuluka elivelombedi nelidilululo letu?

• Ongahelipi hatu mono ouwa mokudimbuluka eliyapulo nelininginifo letu?

• Oshike tashi ke tu kwafela tu twikile okulongela Jehova nomutima wa pama?