Ovapiya vaJehova ove na eteelelo lashili
“Oshixupe shaJakob tashi ka kala mokati koiwana ihapu ngaashi omume hai di kOmwene, . . . ihai teelele omunhu.”—MIKA 5:6.
1. Ongahelipi Israel shopamhepo shi li odjo yetulumuko?
JEHOVA oye Omuningi munene wodula nomume. Itashi kwafa sha okuteelela omunhu a ete omume ile odula. Omuprofeti Mika okwa shanga ta ti: “Oshixupe shaJakob tashi ka kala mokati koiwana ihapu ngaashi omume hai di kOmwene, heeno, ngaashi oihomo yodula tai loko omwiidi; ihai teelele omunhu noihai dulika kovana vovanhu.” (Mika 5:6) Oolyelye ve li “oshixupe shaJakob” kunena? Ovo Ovaisrael vopamhepo, oshixupe ‘shaIsrael yaKalunga.’ (Ovagalati 6:16) “Koiwana ihapu” yokombada yedu, otava tulumukifa va fa “omume hai di kOmwene” nongaashi “oihomo yodula tai loko omwiidi.” Heeno, Ovakriste ovavaekwa kunena ove li enangeko noupuna kovanhu la dja kuKalunga. Otava longifwa kuJehova ve li ovaudifi vOuhamba okuyandja etumwalaka leteelelo lashili kovanhu.
2. Omolwashike tu na eteelelo lashili nonande otu li mounyuni ou mwii?
2 Kashi kumwifa eshi ounyuni ou u he na eteelelo lashili. Omakuyunguto opapolitika, okuhenomikalo, oukolokoshi, oupyakadi wopamaxupilo, oukulo, oita—oinima oyo hatu dulu okuteelela mounyuni oo tau pangelwa kuSatana Ondiaboli. (1 Johannes 5:19) Ovanhu vahapu ova tila shi na sha naasho tashi dulu okuningwa po monakwiiwa. Ndelenee tu li ovalongeli vaJehova, inatu tila, molwaashi otu na eteelelo lonakwiiwa la shilipalekwa. Oli li eteelelo lashili molwaashi ola kanghamena kEendjovo daKalunga. Otwa itavela Jehova nosho yo Eendjovo daye molwaashi osho ha popi ohashi wanifwa alushe.
3. (a) Omolwashike Jehova a li ta ka katukila Israel naJuda onghatu? (b) Omolwashike eendjovo daMika tadi longo kunena?
3 Exunganeko laMika la nwefwa mo kuKalunga otali tu pameke tu ende medina laJehova notali tu pe ekanghameno leteelelo lashili. Mefelemudo etihetatu K.O.P., eshi Mika a xunganeka, oshiwana shaKalunga osho a li e na ehangano nasho osha li sha tukulwa moiwana ivali—Israel naJuda—ndele aishe okwa li ye lipwililikila ehangano laKalunga. Oshidjemo osha li okuhenomikalo, oushunimonima wopalongelokalunga nokuhola omaliko sha pitilila. Onghee hano, Jehova okwa londwela kutya ote ke va katukila onghatu. Doshili, omalondwelo aKalunga oo okwa li a yukifwa kovanhu vopefimbo laMika. Ndelenee onghalo kunena oya faafana naayo yopefimbo laMika nomolwaasho eendjovo daye tadi longo yo kunena. Eshi otashi ka yela mo eshi hatu konakona omanenediladilo omatukulwa aheyali embo laMika.
Osho ekwatelokumwe tali holola
4. Mika etukulwa 1 fiyo eti-3 ota yandje ouyelele ulipi?
4 Natu taleni pauxupi oikalimo yembo laMika. Metukulwa 1, Jehova ota nyaneke pomutenya ounashibofa waIsrael naJuda. Omolwoukolokoshi wavo, Israel osha li tashi ka hanaunwa po, nehandukilo laJuda ola li tali ka hanga nokuli fiyo okomivelo daJerusalem. Etukulwa eti-2 otali holola kutya oipuna novanaenghono okwa li tava fininike ovanhu vongaho. Ndelenee otali holola yo eudaneko laKalunga. Oshiwana shaKalunga otashi ka ongelwa moukumwe. Etukulwa eti-3 otali hokolola omahandukilo aJehova okuhandukila ovawiliki vopashiwana nosho yo ovaprofeti ovakolokoshi. Ovawiliki okwa li tava endamifa ouyuki novaprofeti okwa li tava popi oipupulu. Ndele nonande osha li ngaho, Mika okwa li a pamekwa komhepo iyapuki a udife etokolo laJehova olo la li pokuuya.
5. Omanenediladilo etukulwa eti-4 neti-5 laMika oelipi?
5 Etukulwa eti-4 otali xunganeke kutya momafiku axuuninwa oiwana aishe otai ke uya komhunda ya lepalifwa yeumbo laJehova opo i hongwe kuye. Fimbo osho inashi ningwa, Juda okwa li tashi ka ya moupongekwa muBabilon, ndele Jehova okwa li te ke shi mangulula. Etukulwa eti-5 otali holola kutya Messias okwa li ta ka dalelwa muBetlehem shomuJuda. Ota ka lifa oshiwana shaye noku shi mangulula momake oiwana ifininiki.
6, 7. Oitwa ilipi tai hangika metukulwa eti-6 neti-7 lexunganeko laMika?
6 MuMika etukulwa eti-6 omwa shangwa omapopyo aJehova e li molupe loihokolola, ta yandje oushima koshiwana shaye. Mbela okwa ninga shike opo ve mu tukululile oshibofa? Ke na osho a ninga. Doshili, oiteelelwa yaye oi li pandjele. Okwa hala ovalongeli vaye va ninge eshi sha yuka, va kale ve na onghenda nova ende nelininipiko pamwe naye. Ndele ponhele yokuninga ngaho, Israel naJuda ova landula onghatu younashibofa nokwa li ve na okumona oilanduliko.
7 Metukulwa laxuuninwa lexunganeko laye, Mika ota tokola oukolokoshi wovanhu vopefimbo laye. Ndelenee ina teka omukumo, omolwaashi okwa li a tokola toko ‘okuteelela’ Jehova. (Mika 7:7) Embo olo ola xulifa neendjovo di na sha nelineekelo kutya Jehova ota ka fila onghenda oshiwana shaye. Ondjokonona oya ulika kutya eteelelo olo ola ka wanifwa. Mo 537 K.O.P., eshi outekuduliko waJehova okuhandukila oshiwana shaye we uya pexulilo, okwa alulila nonghenda oshixupe kedu lasho.
8. Oto hokolola ngahelipi oshikalimo ashishe shembo laMika?
8 Kae fi tuu omauyelele mawa oo Jehova a holola okupitila muMika! Embo olo la nwefwa mo oli na oihopaenenwa tai londwele yanghee Kalunga a ungaunga naavo have liti kutya otave mu longele ndele kave fi ovadiinini. Otali xunganeke oiningwanima oyo tai ningwa kunena. Notali yandje omayele opaKalunga e na sha nanghee tu na okulihumbata pomafimbo aa madjuu opo tu pameke eteelelo letu.
Jehova Omwene Omunamapangelo aeshe ta popi
9. PaMika 1:2, oshike osho Jehova a li ta ka ninga?
9 Paife natu konakoneni embo laMika moule. MuMika 1:2 ohatu lesha taku ti: “Oiwana aishe, pwilikineni! Edu ove nouyadi walo, didilika! Omwene Kalunga na kale ondombwedi yeni oku mu pa oushima, Omwene womotembeli yaye iyapuki.” Ngeno owa li ko pefimbo laMika, nope he na omalimbililo ngeno eendjovo odo ode ku hokwifa. Doshili, otadi ku hokwifa molwaashi Jehova ota popi okudja motembeli yaye iyapuki noita popi ashike naIsrael naJuda ndele onovanhu keshe pamwe. Pefimbo laMika ovanhu okwa li ve lipwililikila Jehova Omwene Omunamapangelo aeshe oule wefimbo. Divadiva osho okwa li tashi ka lunduluka. Jehova okwa li a tokola toko okukatuka onghatu ya kwata moiti.
10. Omolwashike eendjovo daMika 1:2 da fimana kufye?
10 Onghalo oya faafana nokunena. Ehololo 14:18-20 otali ulike kutya Jehova natango ota popi okudja motembeli yaye iyapuki. Mafiku, ota ka katuka onghatu ya kwata moiti noiningwanima ikumwifi otai ka halukifa ovanhu aveshe. Pefimbo olo, “omuviinyu wedu” mwii otau ka umbilwa moshikolelo shinene shehandu laJehova, fiyo osheshi onghalelo yoinima yaSatana ya hanaunwa po filufilu.
11. Eendjovo daMika 1:3, 4 oda hala okutya shike?
11 Pwilikina kwaasho Jehova ta ka ninga. Mika 1:3, 4 ota ti: “Tala, Omwene ota di mo monhele yaye ta kulukile poshi, ndee ta ende kombada yoikulundudu yedu. Ndele eemhunda otadi hengumuka koshi yaye nomafilu otaa tende omifya ngaashi edu tali hekuluka komundilo, ngaashi omeva taa kunguluka komhunda ya yukilila.” Mbela Jehova ota ka fiya po onhele yaye yokukala meulu ndele ta ende a fa omunhu keemhunda nomomalufilu Edu lEudaneko? Hasho. Ina pumbwa okuninga ngaho. Ota ka yukifa ashike elitulemo laye kedu opo ehalo laye li wanifwe. Kakele kaasho, edu lo vene halo tali ka mona oixuna oyo ya hokololwa, ndele ponhele yaasho ovakali kulo. Eshi Jehova ta ka katuka onghatu, oshidjemo otashi ka kala oshiponga kwaavo ve he fi ovadiinini—sha fa eemhunda tadi hengumuka ngaashi omakaadi nongaashi omalufilu taa tende omifya kekakamo ledu.
12, 13. Metwokumwe na 2 Petrus 3:10-12, oshike tashi ka shilipaleka eteelelo letu?
12 Eendjovo dopaxunganeko daMika 1:3, 4 otashi dulika di tu dimbulukife exunganeko vali limwe la nwefwa mo tali xunganeke oiningwanima yokedu ya nyika oshiponga. Ngaashi sha shangwa mu 2 Petrus 3:10, omuyapostoli Petrus okwa ti: “Efiku lOmwene otali ke uya ngaashi omulunga, opo tuu eulu tali nyonauka po [nomipwalakato] dinene noihovelitungifo otai dilukifwa komundjene, nedu noilongwanima otai lungwinine mo.” Sha faafana nexunganeko laMika, eendjovo daPetrus itadi yukifwa keulu nedu lo venevene. Otadi yukifwa koudjuu munene oo tau ka hanga onghalelo ei yoinima i he fi yopakalunga.
13 Nonande ope na oshiponga shinene osho tashi uya, Ovakriste otava dulu okukala nelineekelo shi na sha nonakwiiwa, ngaashi ashike Mika. Ongahelipi mbela? Omokulandula omayele oo taa hangika meevelishe da landula ko monhumwafo yaPetrus. Omuyapostoli okwa ti: “Omu nokuhangika mwa tya ngahelipi [meengeda diyapuki nomoilonga yometilokalunga, NW] mokuteelela nokweendelelifa euyo lefiku laKalunga.” (2 Petrus 3:11, 12) Eteelelo letu lonakwiiwa otali ka shilipalekwa ngeenge otwa kala nomutima hau dulika nokushilipaleka kutya elihumbato letu oliyapuki nosho yo kutya okukalamwenyo kwetu okuyadi oilonga yometilokalunga. Opo tu shilipaleke eteelelo letu, otu na yo okudimbuluka kutya efiku laJehova otali uya shili.
14. Omolwashike Israel naJuda ya li ya wana okuhandukilwa?
14 Jehova okwa yelifa kutya omolwashike oshiwana shaye shonale kwa li sha wana okuhandukilwa. Mika 1:5 ota ti: “Ashishe eshi tashi ka ningwa molwomatauluko aJakob nomolwomatimba eumbo laIsrael. Jakob eshi a tauluka, molwalyelye? [HamolwaSamaria] mbela? Noikulundudu yomayambo yomuJuda ya dile peni? HamuJerusalem mbela?” Israel naJuda oya li po omolwaJehova. Ndelenee oya li ye mu tukululila oshibofa, nounashibofa wayo owa li nokuli wa tukulwa nomoilandopangelo yayo, Samaria naJerusalem.
Oilonga youkolokoshi ya hapupala
15, 16. Ovanhu vopefimbo laMika okwa li ve na ondjo omolwoilonga youkolokoshi ilipi?
15 Oshihopaenenwa shoukolokoshi wovanhu vopefimbo laMika osha hokololwa nawa muMika 2:1, 2, taku ti: “Woo ava, hava diladila oulunde nohava longekida owii momitala davo. Ongula ngenge kwa sha, ohave shi ningi. Osheshi vo ove neenghono momake avo. Heeno, tava haluka omapya ndee tave a nyeka ko. Omaumbo yo have a kufa po. Osho ngaha hava fininike omulumenhu neumbo laye, nomunhu nefyuululo laye.”
16 Ovanalwisho okwa li hava nangala oupafi tava pangele eemhangela nghee ve na okunyeka ovanhu vakwao omapya nomaumbo. Ongula ohava endelele okuwanifa po eemhangela davo. Ngeno ova dimbulukile ehangano laJehova ngeno inava longa oilonga youkolokoshi ya tya ngaho. Omhango yaMoses oi na elongekido lokwaamena eehepele. Pamhango oyo, oukwaneumbo kawa li u na okukanifa efyuululo lao fiyo ofiyo. Ndelenee ovanalwisho kava li ve na ko nasha naasho. Ove lipwililikila eendjovo domuLeviticus 19:18 odo tadi ti: “Hola omukweni ngaashi u lihole mwene.”
17. Oshike tashi dulu okuningwa po ngeenge ovo tava ti kutya otava longele Kalunga tava pitifa oinima yopamaliko komesho mokukalamwenyo kwavo?
17 Osho otashi ulike osho tashi dulu okuningwa po ngeenge ovanhu ovo tava ti kutya otava longele Kalunga tava efa po omalalakano opamhepo ndele tava lalakanene tete oinima yopamaliko. Paulus okwa londwela Ovakriste vopefimbo laye ta ti: “Ava va hala okupunapala, otava wile momahongaulo nomomwiyo nomouhalu uhapu woulai nowoiponga, tau ninginifa ovanhu menyonauko nomekano.” (1 Timoteus 6:9) Ngeenge omunhu okwa ninga okulikola oimaliwa elalakano laye la shiya ko mokukalamwenyo kwaye, doshili, ota longele oshikalunga—Emona. Oshikalunga osho ihashi yandje eteelelo lashili li na sha nonakwiiwa.—Mateus 6:24.
18. Oshike kwa li tashi ka ningilwa ovaholi vomaliko vopefimbo laMika?
18 Vahapu vopefimbo laMika ove lihonga okupitila moimoniwa yavo vene iyahameka kutya okulineekela moinima yopamaliko oshi li ashike shongaho. PaMika 2:4, Jehova ota ti: “Mefiku olo tave ke mu yelulila eimbilosheko nokwiimba eimbilokemo, tali ti: Sha twa—osho tava ka tya—fye otwa hanaunwa po sheke. Ye okwa lundulula oshitukulwa shoshiwana shange. Ngahelipi Ye te shi kufa nge! Omapya etu Ye ta tukulile oonakuliteeka.” Heeno, ovo va vaka omaumbo nomapya okwa li tava ka kanifa omafyuululo omaukwaneumbo avo. Okwa li tava ka twalwa koshilongo shimwe shi lili, noiniwe yavo okwa li tai ka ninga oixuulwa ‘yoonakuliteeka’ ile tu tye yoiwana imwe. Itapa kala eteelelo lasha lonakwiiwa iwa.
19, 20. Oshike sha ningilwa Ovajuda ovo va li ve lineekela Jehova?
19 Ndelenee eteelelo laavo ve lineekela Jehova kala li tali ka ponya. Jehova okwa kala a diinina ehangano laye olo a ninga naAbraham nosho yo olo a ninga naDavid, noku na onghenda naavo ve mu hole ngaashi Mika, nova nyika oluhodi omolwokutukuka ko kwovanhu vakwao kuYe. Omolwovayuki, okwa li taku ka kala etungululo pefimbo laKalunga la wapala.
20 Osho osha ningwa mo 537 K.O.P., eshi Babilon sha teka po noshixupe shOvajuda sha shuna koshilongo shambulavo. Pefimbo opo, eendjovo daMika 2:12 oda li da wanifwa ewanifo lado lotete. Jehova okwa ti: “Oshili, Ame [onda] hala oku ku ongela, ove Jakob! Oshili, ohandi ka ongela oshixupe shaIsrael noku va eta kumwe ngaashi eedi moshiunda, ngaashi ongudu youfita weedi moixwa yado, ndee tapa ka kala euyaano lovanhu vahapu.” Jehova ke fi tuu omunahole! Konima eshi a handukila oshiwana shaye, okwa efa oshixupe shi shune noku mu longela medu olo a yandjele kooxekulululwa vasho.
Omafaafano makonekwedi kunena
21. Ongahelipi eenghalo dokunena da faafana naado dopefimbo laMika?
21 Eshi twa konakona omatukulwa avali otete aMika, ino kumwa mbela okumona nghee oinima ya faafana kunena? Ngaashi sha li pefimbo laMika, kunena ope na vahapu ovo tava ti kutya otava longele Kalunga. Ndelenee ngaashi Juda naIsrael, ovanhu va tya ngaho ova tukauka nohava lwifafana nokuli. Oipuna ihapu yomOukwakriste oya fininika eehepele. Ovawiliki vomalongelokalunga vahapu otava pitike oilonga oyo ya pangulwa filufilu kOmbibeli. Nomolwaasho kashi kumwifa eshi Oukwakriste mafiku tau ka hanaunwa po pamwe nouhamba aushe wounyuni womalongelokalunga oipupulu, ‘Babilon shinene.’ (Ehololo 18:1-5) Ndelenee ngaashi sha li pefimbo laMika, Jehova ota ka kala e na ovapiya ovadiinini kombada yedu.
22. Eengudu mbali dilipi eteelelo lado le likolelela kOuhamba waKalunga?
22 Mo 1919, Ovakriste ovadiinini ovavaekwa ove litongola ko filufilu kOukwakriste nova hovela okuudifila oiwana aishe onghundana iwa yOuhamba. (Mateus 24:14) Tete, ova konga oshixupe shaIsrael yopamhepo. Opo nee ova hovela okwoongela “eedi dimwe,” neengudu odo mbali oda ninga “oshiunda shimwe, nomufita umwe.” (Johannes 10:16, yelekanifa OB-1954.) Nonande ovalongeli vaJehova aveshe ovadiinini otave mu longele moilongo 234, ova etwa “kumwe” shili. Paife moufita weedi omu na “euyaano lovanhu vahapu,” ovalumenhu, ovakainhu nounona. Eteelelo lavo ole likolelela kOuhamba waKalunga oo mafiku tau ka eta eduparadisa, ndele hakonghalelo ei yoinima.
23. Omolwashike u na oushili kutya eteelelo loye ola shilipalekwa?
23 Ovelishe yaxuuninwa yetukulwa eti-2 laMika otai popi shi na sha novalongeli vaJehova ovadiinini tai ti: “Nohamba yavo tai va kwatele komesho nOmwene te va endifa.” Mbela ou liwete molweendo olo lefindano, to landula Ohamba yoye Jesus Kristus, na Jehova ta endifa osheendo osho? Ngeenge osho, oto dulu okukala noushili kutya efindano otali shiiva nosho yo kutya eteelelo loye ola shilipalekwa. Osho otashi ke limonikila mo unene eshi hatu ka konakona omanenediladilo amwe natango mexunganeko laMika.
Oto nyamukula ngahelipi?
• Omolwashike Jehova a li a tokola okukatukila Juda naIsrael onghatu pefimbo laMika?
• Oshike tashi dulu okuningwa po ngeenge ovo tava ti otava longele Kalunga tava pitifa komesho oinima yopamaliko mokukalamwenyo kwavo?
• Konima yokukonakona Mika etukulwa 1 neti-2, omolwashike u na oushili kutya eteelelo loye ola shilipalekwa?
[Efano pepandja 6]
Exunganeko laMika otali dulu oku tu pameka pamhepo
[Efano pepandja 7]
Ngaashi oshixupe shOvajuda mo 537 K.O.P., Ovaisrael vopamhepo nosho yo ookaume kavo otava xumifa komesho elongelokalunga lashili