Natu hopaeneneni ovaprofeti — Mika
1. Epulo lilipi Mika tashi dulika a li te lipula, nomolwashike oukalele waye wa li uhe fi wongaho?
1 ‘Exulilo longhalelo ei yoinima ya nyonauka otali uya naini?’ Omuprofeti Mika naye otashi dulika a li e lipula epulo olo eshi a li ta shiivifa etumwalaka laJehova letokolo li na sha nouhamba waIsrael nowaJuda. Ndele oukalele waye kawa li wongaho. Pefimbo laMika, mo 740 K.O.P., eendjovo daJehova di na sha naSamaria oda li da wanifwa. (Mika 1:6, 7) Lwanima, Jerusalem osha ka hanaunwa po mo 607 K.O.P. (Mika 3:12) Ongahelipi hatu dulu okuhopaenena Mika ofimbo twa teelela etokolo laJehova lopefimbo letu?
2. Ongahelipi nomolwashike tu na okuulika elididimiko ofimbo twa teelela efiku laJehova?
2 Kala omulididimiki: Mika okwa ti: “Ame ohandi liamene omesho ange kOmwene, handi teelele Kalunga kexupifo lange.” (Mika 7:7) Ndele Mika ka li ashike a mwena a teelela exulilo li uye. Okwa kala e lipyakidila e li omuprofeti waJehova. Eshi twa teelela efiku laJehova, nafye natu kaleni “moweenda uyapuki nometilokalunga.” (2 Pet. 3:11, 12) Elididimiko laJehova ola pa keshe umwe omhito yokulidilulula. (2 Pet. 3:9) Onghee hano, otu na okukaleka momadiladilo ekumaido laKalunga li na sha nokuhopaenena ovaprofeti mokukala nelididimiko. — Jak. 5:10.
3. Omolwashike tu na okwiindila Jehova e tu pe omhepo yaye iyapuki?
3 Lineekela meenghono daJehova: Nonande Mika okwa li e na oshinakuwanifwa shidjuu, okwa li a konga ekwafo kuJehova opo e mu pe eenghono a dule oku shi wanifa po. (Mika 3:8) Onghee hano, itashi kumwifa eshi Eendjovo daJehova tadi tu ladipike tu mu pule e tu pe eenghono. Jehova oha pe eenghono ovo va loloka opo va dule okuwanifa po oinakuwanifwa yavo yopauteokratika. (Eps. 84:6, 8; Jes. 40:28-31) Mbela naave owa ningilwa oshinima osho monghalamwenyo yoye eshi to longo oilonga iyapuki? Mbela oho ilikana ngoo pandjikilile kuJehova e ku kwafele okupitila momhepo yaye iyapuki inaenghono? — Luk. 11:13.
4. Mika okwe tu tulila po oshihopaenenwa sha denga mbada shilipi kunena okupitila monghedi yaye yokukalamwenyo?
4 Mika okwa li a pitifa komesho okulonga ehalo laKalunga mokukalamwenyo kwaye akushe. Okwa li a tokola okukala omudiinini nonande okwa li a dingililwa kovanhu vehe neenghedi. Sha faafana, oudiinini wetu ohau yelekwa efiku keshe. Onghee hano, natu pamekeni etokolotoko letu ‘lokweenda medina [laJehova, NW] Kalunga ketu alushe fiyo alushe.’ — Mika 4:5.