Ohatu ka kala nokweenda medina laJehova fiyo alushe!
“Ohatu ka kala nokweenda medina [laJehova, NW] Kalunga ketu alushe fiyo alushe.”—MIKA 4:5.
1. Omatumwalaka elipi e li muMika etukulwa eti-3 fiyo eti-5?
JEHOVA okwa li a hala okulombwela oshiwana shaye oshinima shonhumba nokwa longifa Mika e li omuprofeti waye. Kalunga okwa li a lalakanena okukatukila ovanyoni onghatu. Okwa li ta ka handukila Israel omolwoushunimonima washo. Ndelenee lao linene, Jehova okwa li ta ka nangeka noupuna ovo tava ende medina laye. Omatumwalaka oo otaa udika nawa metukulwa eti-3 fiyo eti-5 lexunganeko laMika.
2, 3. (a) Ovawiliki vaIsrael okwa li ve na okuulika oukwatya ulipi, ndele paushili ova ninga shike? (b) Ongahelipi to dulu okuyelifa eendjovo dopafaneko odo da longifwa muMika 3:2, 3?
2 Omuprofeti waKalunga okwa ti: “Udeni ko, nye ovakulunhu vomuJakob nomalenga omeumbo laIsrael! Hanye tuu mu nokushiiva ouyuki hamba?” Heeno, osho osho sha li oshinakuwanifwa shavo, ndele mbela okwa li tava ningi shike paushili? Mika ota ti: “Ovatondadi vouwa nye, novaholi vowii, ava hamu yuvu oshipa shovanhu, ndele hamu tenge ombelela yavo yokomakipa avo, ava tava li ombelela yoshiwana shange ndee tava yuvu oshipa shasho. Tava nyanyaula omakipa asho, ndee tava shashala nokuteta ngaashi ombelela yomombiya nongaashi [ombelela yomoshipana].”—Mika 3:1-3.
3 Doshili, ovawiliki okwa li tava hepeke eehepele, ovanhu ovo ve he na eameno. Eendjovo dopafaneko odo da longifwa kuMika okwa li di uditiwe ko noupu kwaavo ve mu uda. Ngeenge odi ya dipawa okwa li hai telekwa momeva, tete okwa li hai yuvwa oshipa opo nee tai tetaulwa. Omafimbo amwe omakipa okwa li haa shashaulwa opo omungo u dje mo. Ombelela nosho yo omakipa okwa li haa fulukifilwa mumwe mombiya ya kula, ngaashi oyo ya popiwa kuMika. (Hesekiel 24:3-5, 10) Kali fi tuu efaneko tali wapalele langhee ovanhu vopefimbo laMika va ningwa nai kovawiliki vavo ovanawii!
Jehova ote tu pula tu longe ouyuki
4. Eyooloko lilipi la li pokati kaJehova novawiliki vaIsrael?
4 Opa li eyooloko linene pokati kOmufita omunahole, Jehova novawiliki vaIsrael. Molwaashi kava li hava longo ouyuki, ova dopa okuwanifa po oshilonga shavo shokwaamena oufita. Ponhele yaasho, molwohole yokulihola mwene ova fininika eedi dopafaneko, va anya oku di yukifila ouyuki nove di ninga oihakanwa ‘yetileshi lohonde’ ngaashi sha shangwa muMika 3:10. (NW) Oshike hatu lihongo monghalo oyo?
5. Oshike osho Jehova ta pula ovo tava kwatele komesho mokati koshiwana shaye?
5 Kalunga ota pula ovo tava kwatele komesho mokati koshiwana shaye va longe ouyuki. Osho osho shi li ngaho movapiya vaJehova kunena. Naasho oshi li metwokumwe naJesaja 32:1, omo hatu lesha taku ti: “Tala, ohamba otai ka pangela pauyuki, nomalenga otaa ka tokola etokolo la yuka.” Ndelenee oshike kwa li tashi ningwa pefimbo laMika? ‘Ovatondadi vouwa novaholi vowii’ ova kala tava pengifa ouyuki.
Omailikano oolyelye haa nyamukulwa?
6, 7. Oshitwa sha fimana shilipi sha divilikwa muMika 3:4?
6 Mbela ovanhu ovakolokoshi vopefimbo laMika okwa li tava dulu okuteelela okuhokiwa kuJehova? Hasho nande! Mika 3:4 ota ti: “Otava ka kuwila Omwene, ndelenee Ye ite ke va nyamukula. Ndelenee Ye ote ke va holeka oshipala shaye mefimbo tuu olo, molwaashi vo ova ninga eshi inashi yuka.” Osho otashi divilike oshitwa sha fimanenena.
7 Jehova ita ka nyamukula omailikano etu ngeenge ohatu nyono. Osho naanaa shi li ngaho ngeenge ohatu kala nokukalamwenyo kwopavali, hatu holeke omanyono etu ofimbo hatu limonikifa twa fa hatu longele Kalunga noudiinini. PaPsalme 26:4, David okwa imba ta ti: “Ame ihandi kala omutumba pamwe neembudi, noinandi endafana naava ve na koshi.” Na Jehova ita ka nyamukula omailikano aavo hava nyonene owina Eendjovo daye!
A pamekwa komhepo yaKalunga
8. Ovaprofeti ovanaipupulu vopefimbo laMika okwa li va londwelwa shi na sha nashike?
8 Kaya li tuu oilonga inyikifa oluhodi oyo ya li tai longwa kovawiliki vopamhepo vaIsrael! Ovaprofeti ovanaipupulu ova pukifa oshiwana shaKalunga pamhepo. Ovawiliki ovanalwisho ova udifa “Ombili!” ndelenee ova shinga oita okulwifa keshe oo a li ite va pe sha shomokanya. Jehova okwa ti: “Onghee hano otaku uya kunye oufiku u he nemoniko, nomilaulu otadi uya kunye di he nexunganeko. Heeno, etango otali ka ninginina ovaxunganeki nomutenya otau va laulile. Ndele ovamonikokule otava ka kala nohoni, noipala yovaxunganeki tai ka pemba. Ndele vo aveshe [otave ke likwata komilungu, OB-1954].”—Mika 3:5-7a.
9, 10. Osha hala okutya ngahelipi ‘okulikwata komilungu,’ nomolwashike Mika a ha li netomheno okuninga ngaho?
9 Omolwashike taku popiwa ‘okulikwata komilungu’? Osho oshinima sha ningwa kovanhu ovakolokoshi vopefimbo laMika omolwohoni. Ovanawii ovo okwa li ve na okufya ohoni. Shi na sha navo “kape na nande enyamukulo laKalunga.” (Mika 3:7b) Jehova iha pwilikine komailikano ovakolokoshi ovalinenepiki.
10 Mika ka li e na etomheno ‘lokulikwata komilungu.’ Ka li a fya ohoni. Jehova okwa nyamukula omailikano aye. Didilika Mika 3:8 omo omuprofeti omudiinini a ti: “Ndelenee ame ondi yadi eenghono nOmhepo yOmwene nouyuki nonyati.” Mika ka li tuu e na olupandu molwaashi momukokomoko woukalele waye mule oo a longa noudiinini, okwa li alushe e “yadi eenghono nOmhepo yOmwene”! Osho oshe mu pameka a ‘hololele Jakob etauluko laye naIsrael omatimba aye.’
11. Ongahelipi ovanhu hava pamekwa va udife etumwalaka laKalunga?
11 Mika okwa li a pumbwa eenghono di dule dopaushitwe opo a udife etumwalaka laKalunga letokolo lidjuu. Omhepo yaJehova ile eenghono daye dinene tadi longo oda fimanenena. Ongahelipi shi na sha nafye? Oilonga yetu yokuudifa otai dulu ashike okuwanifwa po ngeenge Jehova okwe tu pameke okupitila momhepo yaye iyapuki. Eenghendabala detu dokuudifa otadi ka ponya filufilu ngeenge ohatu nyonene owina. Molwaashi kungaha Kalunga ita ka nyamukula eshi hatu ilikana e tu pameke tu longe oilonga yaye. Doshili, itatu dulu okuudifa etumwalaka laTate yetu womeulu letokolo ngeenge katu na ‘Omhepo yaye.’ Okupitila momailikano oo haa udika nosho yo kekwafo lomhepo iyapuki, ohatu dulu okupopya eendjovo daKalunga nonyati ngaashi Mika.
12. Omolwashike ovahongwa vaJesus vonale kwa li va dula ‘okupopya nouladi aushe eendjovo daKalunga’?
12 Otashi dulika oto dimbuluka ehokololo li li mOilonga 4:23-31. Natu tye nee ngeno ove oumwe womovahongwa vaJesus vomefelemudo lotete. Ovapataneki ovakwanyanya ova li tava kendabala okumweneka ovashikuli vaKristus. Ndele ovadiinini ovo ova ilikana kOmwene Omunamapangelo aeshe tava ti: “Omwene, tala, nhumbi tava popi nomaaneko, Ove u pe ovapiya voye okupopya nouladi aushe eendjovo doye.” Oshidjemo osha li shike mbela? Eshi va ilikana, onhele omo kwa li va ongala oya kakama, aveshe ova li va yadifwa omhepo iyapuki ndele tava popi eendjovo daKalunga nouladi. Onghee hano natu ilikaneni kuJehova nokulineekela mekwafo laye okupitila momhepo iyapuki eshi hatu wanifa po oukalele wetu.
13. Oshike kwa li tashi ka ningilwa Jerusalem naSamaria, nomolwashike?
13 Diladila vali shi na sha nefimbo laMika. PaMika 3:9-12, ovapangeli ve na etimba lohonde okwa li tava tokola omolwombubo, ovapristeri okwa li tava hongo omolwofuto, novaprofeti ovanaipupulu okwa li tava xunganekele oimaliwa. Onghee hano, kashi kumwifa eshi Kalunga a tokola kutya Jerusalem, oshilandopangelo shaJuda otashi “ka ninga onduba yomamanya.” Molwaashi elongelokalunga loipupulu neenghedi da xutuka oda li yo muIsrael, Mika okwa nwefwa mo a londwele kutya Kalunga okwa li ta ka ninga Samaria “onduba yomamanya.” (Mika 1:6) Doshili, omuprofeti oo okwa kala ko fiyo osheshi a mona ehanauno laSamaria olo la xunganekwa, eshi omatanga aAssiria e shi hanauna po mo 740 K.O.P. (2 Eehamba 17:5, 6; 25:1-21) Oshi liwetikile mo kutya omatumwalaka oo e na eenghono e na sha naJerusalem nosho yo Samaria okwa li ashike taa dulu okuudifwa meenghono daJehova.
14. Ongahelipi exunganeko olo la shangwa muMika 3:12 la wanifwa, naasho oshi na oku tu kuma ngahelipi?
14 Doshili, Juda kasha li tashi dulu okuhenuka etokolo laJehova lidjuu. Shi na sha newanifo lexunganeko olo la shangwa muMika 3:12, Sion okwa li tashi ka “pululwa epya.” Oku shi talela mefano lomefelemudo eti-21, otu shi shii kutya oinima oyo oya ningwa eshi Babilon sha hanauna po Juda naJerusalem mo 607 K.O.P. Osho osha ningwa omido efele konima eshi Mika a xunganeka, ndele okwa li e na oushili kutya otashi ka ningwa. Doshili, otu na okukala tu na elineekelo la faafana kutya onghalelo yopaife yoinima youkolokoshi otai ka xula po ‘mefiku laKalunga’ la xunganekwa.—2 Petrus 3:11, 12.
Jehova ota yukifa oinima
15. Oto hokolola ngahelipi noitya yoye mwene exunganeko olo la shangwa muMika 4:1-4?
15 Mokutala koinima oyo ya pita, otu wete kutya Mika okwa shikulifa ko etumwalaka leteelelo likumwifi. Kadi fi tuu eendjovo ditunhula odo hatu hange muMika 4:1-4! Mika okwa ti: “Pexulilo lomafiku omhunda yotembeli yOmwene otai ka kala ya pamenena koxulo yeemhunda, ndele tai lepala i dule oikulundudu aishe. Ndele oko taku ka tondokela oiwana. . . . Ndele Ye ta ka tokola pokati koiwana ihapu ndee ta ka yukifa oiwana i neenghono fiyo koilongo yokokule. Ndele tava ka hambula omaongamukonda avo omatemo nomaonga avo oikashulifo. Oshiwana itashi yelulile vali eongamukonda oshiwana shikwao, ndele itave ke lilonga vali oukwaita. Ndelenee otava ka kala omutumba, keshe umwe, momudile womuviinyu waye nowomukwiyu waye, ndele kape na ou te va tilifa. Osheshi okanya kOmwene womatanga ovakwaita ke shi tya.”
16, 17. Mika 4:1-4 ota wanifwa ngahelipi kunena?
16 Mbela oolyelye ve li ‘oiwana ihapu’ nosho yo “oiwana i neenghono” oyo ya tumbulwa apa? Kave fi oiwana nomapangelo ounyuni ou. Ponhele yaasho, exunganeko otali yukifwa koohandimwe ovo va dja moiwana aishe ovo paife tava longo oilonga iyapuki va hangana komhunda yaJehova yelongelokalunga lashili.
17 Metwokumwe nexunganeko laMika, elongelokalunga laJehova la koshoka mafiku otali ka tulwa moilonga panghedi iyadi kongonga yedu alishe. Kunena, ovanhu ovo “ve na oikala iwa kombinga yomwenyo waalushe” otava hongwa eendjila daJehova. (Oilonga 13:48, NW) Jehova ota tokola nota yukifa oinima pamhepo omolwovaitaveli ovo va ama kombinga yOuhamba. Otava ka xupa “moudjuu unene” ve li “ongudu inene.” (Ehololo 7:9, 14, yelekanifa NW.) Molwaashi ova hambula omaongamukonda avo omatemo, nokuli nokunena ove na ombili nEendombwedi daJehova dikwao nosho yo navamwe. Itashi hafifa tuu okukala mokati kavo!
Otwa tokola toko okweenda medina laJehova
18. Oshike tashi fanekwa ‘kokukala omutumba momudile womuviinyu nowomukwiyu woye’ mwene?
18 Kunena, eshi oumbada wa pupwikilila po ounyuni aushe wa fa oshilemo shitilifa, otwa hafa eshi vahapu tave lihongo eendjila daJehova. Otwa djuulukwa efimbo olo li li popepi eshi ovaholi aveshe vaKalunga va tya ngaho itave ke lihonga vali oukwaita ndele otava ka kala omutumba momudile womiviinyu davo nosho yo womikwiyu davo. Omikwiyu luhapu ohadi twikwa mepya lomiviinyu. (Lukas 13:6) Okukala omutumba momudile womuviinyu nowomukwiyu woye mwene otashi faneke onghalo yombili, yehepuluko neameno. Nokuli nopaife, ekwatafano letu naJehova otali tu etele ombili yopamadiladilo nosho yo eameno lopamhepo. Eshi tapa ka kala eenghalo da tya ngaho koshi yepangelo lOuhamba, ohatu ka kala tu he na oumbada notwa amenwa filufilu.
19. Otashi ti shike okweenda medina laJehova?
19 Opo tu dule okuhokiwa kuJehova nokuhafela omanangeko noupuna aye, otu na okweenda medina laye. Osho osha tuwa omufindo muMika 4:5 omo omuprofeti a ti: “Oiwana aishe tai kala nokweenda, keshe shimwe, medina laKalunga kasho, ndelenee fye ohatu ka kala nokweenda medina [laJehova, NW] Kalunga ketu alushe fiyo alushe.” Okweenda medina laJehova inashi hala okutya okukala ashike hatu ti oye Kalunga ketu. Otashi pula shihapu shi he fi ashike okukufa ombinga mokwoongala kwopaKriste nosho yo moilonga yokuudifa Ouhamba, nonande oilonga ya tya ngaho oya fimanenena yo. Okweenda medina laJehova otashi ti okukala twe mu liyapulila nokukala hatu kendabala oku mu longela noudiinini omolwoku mu hola nomutima aushe. (Mateus 22:37) Doshili, tu li ovalongeli vaye, otwa tokola toko okweenda medina laJehova Kalunga ketu fiyo omoukwaalushe.
20. Oshike sha li sha xunganekwa muMika 4:6-13?
20 Paife konakona eendjovo dopaxunganeko daMika 4:6-13. “Okakadona kaSion” oka li ke na okuya moukwatwa “kuBabel.” Osho osho naanaa sha ningilwa ovakalimo vomuJerusalem mefelemudo etiheyali K.O.P. Ndele nande ongaho, exunganeko laMika ola ulika kutya oshixupe okwa li tashi ka shuna kuJuda nopetungululo laSion Jehova okwa li ta ka shilipaleka kutya ovatondi vasho otava ka hanaunwa po.
21, 22. Ongahelipi Mika 5:1 a wanifwa?
21 Ope na natango oiningwanima imwe ikumwifi ya xunganekwa muMika etukulwa eti-5. Pashihopaenenwa, didilika osho sha popiwa muMika 5:1-3. Mika okwa xunganeka kutya Omupangeli a nangekwa po kuKalunga—oo ‘ehovelo laye loshitonale’—oku na okudja muBetlehem. Ota ka pangela “meenghono dOmwene” e li omufita. Kakele kaasho, Omupangeli oo ota ka kala munene, hamuIsrael ashike ndele ofiyo “kominghulo dedu.” Shi na sha naasho kutya omupangeli oo olyelye, otashi dulika shi limbililike ovanhu vomounyuni ndele kashi fi oshiholekwa kufye.
22 Olyelye a li omunhu a fimanenena a dalelwa muBetlehem? Na olyelye ta ka kala “munene fiyo kominghulo dedu”? OMessias, Jesus Kristus! Eshi Herodes Munene a pula ovapristeri ovakulunhu novanongo vomishangwa kutya Messias okwa li e na okudalelwa peni, ove mu nyamukula tava ti: “OmuBetlehem shomuJudea.” Ova tofa nokuli meendjovo daMika 5:1. (Mateus 2:3-6) Vamwe vomovanhu vongaho navo okwa li ve shi shii, omolwaasho Johannes 7:42 okwa tofa mwaasho va popya tava ti: “Omushangwa itau ti: Kristus ota di moludalo laDavid nomoshilando shaBetlehem, oku kwa li David?”
Etulumuko lashili kovanhu
23. Oshike tashi ningwa shi li ewanifo laMika 5:6?
23 Mika 5:4-14 okwa popya shi na sha nokuhomona kwaAssiria oko kwa li taku ka pondola ashike oule wokafimbo nokwa ulika kutya Kalunga okwa li ta ka handukila oiwana ihai dulika. Mika 5:6 okwa udaneka okwaalukila kwoshixupe shOvajuda she livela ombedi koshilongo shambulavo, ndele eendjovo odo otadi wanifwa yo mefimbo letu. Mika okwa ti: “Oshixupe shaJakob tashi ka kala mokati koiwana ihapu ngaashi omume hai di kOmwene, heeno, ngaashi oihomo yodula tai loko omwiidi.” Efaneko olo liwa ola longifwa okuxunganeka kutya oshixupe shaJakob wopamhepo ile Israel shopamhepo otashi ka kala enangeko noupuna olo Kalunga ta ka punika nalo ovanhu. “Eedi dimwe” daJesus, odo di na eteelelo lokombada yedu, oda hafa okulonga moukumwe noshixupe ‘shaIsrael yaKalunga’ kunena, mokukwafela vamwe va tulumukwe pamhepo. (Johannes 10:16, OB-1954; Ovagalati 6:16; Sefanja 3:9) Shi na sha naasho, ope na oshitwa sha fimana osho tu na okuyandja elitulemo kusho. Tu li ovaudifi vOuhamba, atusheni otu na okulenga oufembanghenda wetu wokutwaalela ovanhu etulumuko lashili.
24. Oitwa ilipi metukulwa eti-3 fiyo eti-5 laMika ye ku kuma?
24 Oshike we lihonga metukulwa eti-3 fiyo eti-5 lexunganeko laMika? Otashi dulika we lihonga mo oitwa ngaashi: (1) Kalunga ota pula ovo tava kwatele komesho oshiwana shaye va longe ouyuki. (2) Jehova ita ka nyamukula omailikano etu ngeenge ohatu nyonene owina. (3) Oilonga yetu yokuudifa otai dulu ashike okuwanifwa po ngeenge Kalunga te tu pameke okupitila momhepo yaye iyapuki. (4) Opo tu dule okuhafela okuhokiwa kuJehova otu na okweenda medina laye. (5) Tu li ovaudifi vOuhamba, atusheni otu na okulenga oufembanghenda wetu wokutwaalela ovanhu etulumuko lashili. Otashi dulika pe na vali oitwa imwe oyo ye ku kuma. Oshike vali hatu dulu okulihonga membo olo lOmbibeli lopaxunganeko? Oshitukulwa tashi landula otashi ke tu kwafela tu lihonge oilihongomwa i na oshilonga momatukulwa avali axuuninwa exunganeko laMika tali pameke eitavelo.
Oto nyamukula ngahelipi?
• Kalunga ota pula shike kwaavo tava kwatele komesho oshiwana shaye?
• Omolwashike eilikano nosho yo omhepo iyapuki ya fimana shi na sha noilonga yetu yokulongela Jehova?
• Ongahelipi ovanhu hava ‘ende medina laJehova’?
[Efano pepandja 12]
Mbela oto dulu okuyelifa efaneko laMika li na sha nombiya?
[Efano pepandja 15]
Ngaashi Mika, nafye ohatu wanifa po oukalele wetu twa nyatipala