Ombibeli otai dulu ngoo okuudiwa ko?
Steven wokuBritania okwa ti: “Oukwaneumbo wetu ohau lesha Ombibeli Osoondaxa keshe. Okulesha Ombibeli kwa tya ngaho kanda li handi ku hafele lela. Onda itavela kutya Ombibeli oyo Eendjovo daKalunga, ndele oinima ihapu oyo nda li nda lesha kombinga yayo onda li ndi wete idjuu unene okuuda ko.”
Valvenera wokuSpania okwa ti: “Eshi nda li ndi na eedula 17, onda li nda kendabala okulesha Ombibeli, ndele kanda li ndi i udite ko, nokudja opo onda li nda efa po oku i lesha.”
Jo-Anne wokuAustralia okwa ti: “Onda li nda lesha Ombibeli aishe, molwaashi onda li ndi udite kutya osho ndi na okuninga ngaho ndi li Omukatolika. Osha pula nge oule weedula nhatu opo ndi i maneko. Ndele kanda li ndi udite ko lela osho nda lesha.”
OMBIBELI oyo embo olo li holike neenghono kovanhu vahapu mounyuni. Ohai landwa unene i dule omambo makwao, oi li kovanhu vahapu, oi li momalaka mahapu noi li yo moungalo, mou-CD nosho yo mou-DVD. Ndele nande ongaho, ovanhu vahapu ovo ve na Ombibeli ohava mono shidjuu oku i uda ko. Mbela naave oho mono shidjuu oku i uda ko?
Mbela Kalunga okwa hala tu ude ko Ombibeli?
Ombibeli oya ti: “Omishangwa adishe da yandjwa keenghono dOmhepo yaKalunga.” (2 Timoteus 3:16) Jehova Kalunga oye Omushangi wOmbibeli. Ndele mbela Kalunga okwa hala ngoo tu ude ko Eendjovo daye? Ile Ombibeli okwe i ninga idjuu owina opo i kale itai dulu okuudiwa ko kovanhu aveshe, ndele ta hoolola ashike ovanhu vanini, ngaashi ovafita nosho yo ovahongwanhu vOmbibeli ovo va kale ve i udite?
Natu ka konakoneni eevelishe dimwe da dja mOmbibeli edi tadi landula apa:
“Oshipango eshi handi shi ku lombwele nena eli, kashi fi shidjuu, ndee kashi li kokule.” — Deuteronomion 30:11.
“Eyeuluko leendjovo doye ohali minikile, ndee tali pe eendunge ava tave lininipike.” — Epsalme 119:130.
“Mokafimbo tuu oko Jesus okwa hafela pombada mOmhepo Iyapuki ta ti: Handi ku hambelele Tate, Omwene weulu nowedu, osheshi oinima ei we i holeka ovanaendunge novanongo ndele owe i hololela ava va fa ouhanana.” — Lukas 10:21.
Omishangwa odo otadi ulike kutya Omushangi wOmbibeli okwa hala u ude ko Eendjovo daye. Ashike nande ongaho, ovanamitimadiwa vahapu ove udite kutya itava dulu oku di uda ko. Ndele mbela oshike tashi dulu oku ku kwafela u di ude ko? Oshitukulwa tashi landula otashi yandje omaetepo atatu oo taa dulu oku ku kwafela u ude ko Ombibeli.