OMAPULO OPAMBIBELI A NYAMUKULWA

Mbela ohatu dulu ngoo okuuda ko Ombibeli?

Ombibeli oyo Eendjovo daKalunga noya fa onhumwafo ya dja kuxe omunahole. (2 Timoteus 3:​16) Kalunga okwa yelifa mOmbibeli nghee hatu dulu oku mu hafifa, kutya omolwashike a efa oukolokoshi u kale po nosho yo osho ta ka ningila ovanhu monakwiiwa. Ashike ovahongi vomalongelokalunga ovapilika omahongo Ombibeli, naasho osha ningifa vahapu va diladile kutya kave na efiku va ude ko Ombibeli. — Oilonga 20:​29, 30.

Jehova Kalunga okwa hala tu shiive oshili kombinga yaye. Onghee hano, okwe tu pa embo olo hatu dulu okuuda ko. — Lesha 1 Timoteus 2:​3, 4.

Ongahelipi to dulu okuuda ko Ombibeli?

Kakele ko ku tu pa Ombibeli, okwe tu pa yo osho tashi dulu oku tu kwafela tu i ude ko. Okwa li a tuma Jesus e tu honge. (Lukas 4:​16-21) Jesus okwa li ha kwafele ovapwilikini vaye va ude ko Omishangwa, a li ha yelifa ovelishe novelishe. — Lesha Lukas 24:​27, 32, 45.

Jesus okwa tota po eongalo lopaKriste opo oilonga oyo a hovela i dule okutwikila. (Mateus 28:​19, 20) Kunena, ovashikuli vaJesus vashili otava kwafele ovanhu va ude ko osho Ombibeli tai hongo kombinga yaKalunga. Ngeenge owa hala okuuda ko Ombibeli, Eendombwedi daJehova otadi ka kala da hafa oku ku kwafela. — Lesha Oilonga 8:​30, 31.