Osho tashi dulu oku ku kwafela u ude ko Ombibeli

3. Tambula ko ekwafo olo to pewa kuvamwe

Eshi omukonakoni woinima umwe omweendi wedina Edward John Eyre, a li ta tavakana Oluhaela laNullarbor, okwa li a hongwa keedalele domuAustralia nghee e na okulimonena omeva moikulundudu nosho yo momitutu domiti. Eyre okwa li a xupifa omwenyo waye molwaashi okwa li a tambula ko ekwafo olo a li a pewa kwaavo va li ve shii nawa oshilongo osho.

NGAASHI oshihopaenenwa osho tashi ulike, opo omunhu a pondole okulonga oshilonga shonhumba shidjuu, luhapu okwa pumbwa okukwafelwa komunhu oo e na owino muhapu. Osho osho naanaa shi li ngaho ngeenge omunhu ta hovele okulesha Ombibeli.

Jesus ka li a teelela ovashikuli vaye va ude ko Ombibeli nopehe na ekwafo lavamwe. Pomhito imwe, Jesus ‘okwa li a patulula omadiladilo avo, va ude ko Omishangwa.’ (Lukas 24:45, OB-1986) Jesus okwa li e shii kutya ovaleshi vOmbibeli ova pumbwa ekwafo opo va ude ko omahongo opamishangwa.

Oolyelye tava dulu okukwafela ovo va hala okuuda ko Ombibeli?

Jesus okwa li a lombwela ovashikuli vaye vashili va kale tava kwafele ovo va hala okuuda ko Ombibeli. Fimbo Jesus ina shuna meulu, okwa li e va lombwela a ti: ‘Indeni hano ka ningeni ovanhu aveshe ovalongwa vange, noku va honga okudiinina aishe ei nde i mu lombwela.’ (Mateus 28:19, 20) Oilonga ya fimanenena yOvakriste oya kwatela mo okuhonga ovanhu, nokuyelifa yo nghee omafinamhango Ombibeli taa dulu okutulwa moilonga monghalamwenyo yakeshe efiku. Ovakriste vashili ohava kwafele vamwe va ude ko Ombibeli.

Konima yefimbo lixupi okudja eshi Jesus a li a pa ovashikuli vaye oshilonga osho, opa li pa ningwa oshiningwanima shihokwifa. Ombibeli oya popya kombinga yelenga limwe lokuEtiopia, olo la li tali lesha exunganeko lonhumba laJesaja. Fimbo la li tali lesha, ola li la mona mo eevelishe dimwe lihe di udite. Eevelishe odo otadi ti: “Oye ta ka twalwa koshidipaelo ngaashi odi nongaashi odjona hai limwenene omukululi wayo, hano osho ngaha naye yo ita makula okanya kaye. Omolwokulininipika kwaye etokolo laye ola kufwa po, olyelye ta dulu okuhepaulula epupi laye, osheshi omwenyo waye owa kufwa ko kedu.” — Oilonga 8:32, 33; Jesaja 53:7, 8.

Elenga ola li la pula Filippus, Omukriste oo a li e shii nawa Omishangwa, la ti: “Olyelye ou ta popiwa komuprofeti, oye mwene ile oumwe elili?” (Oilonga 8:34) Omuetiopia oo omunamutimamuwa okwa li tadi kuJerusalem oko a li a ka longela Kalunga, notashi dulika a li a ilikana a mone ekwafo. Osha yela kutya okwa li ta lesha nehalo liwa nonelininipiko, ndele nande ongaho, ka li e udite ko osho ta lesha. Opo nee, okwa li a pula Filippus nelininipiko e mu kwafele. Omulumenhu oo okwa li a hafela neenghono eyelifo laFilippus nokwa li e linyengifwa a ninge Omukriste. — Oilonga 8:35-39.

Eendombwedi daJehova otadi twikile okulonga oilonga oyo ya li tai longwa kuFilippus nokOvakriste vakwao vonale. Eendombwedi ohadi kwafele nehalo liwa ovanhu vakwao va ude ko osho Ombibeli tai hongo lela, moilongo i dule po 235. Ohadi shi ningi mokukonakona novanhu tadi longifa oikundafanwa yopamishangwa hai konakonwa palandulafano. Onghedi oyo yokukonakona Ombibeli oshivike keshe oya kwatela mo okutala kutya omishangwa otadi ti ngahelipi kombinga yoshikundafanwa shonhumba kondadalunde.a — Tala oshimhungu “Omanyamukulo taa mbilipaleke e na sha nomapulo opaMbibeli.”

“Omapulo ange aeshe okwa nyamukulwa”

Steven, Valvanera naJo-Anne, ovo va tumbulwa moshitukulwa shotete, ova li va hovela okukonakona Ombibeli nEendombwedi daJehova. Steven okwa ti: “Onda li nda kumwa okumona kutya ngeenge owa yelekanifa omafinamhango ile omahokololo onhumba opamishangwa, luhapu oto mono enyamukulo mOmbibeli. Fimbo nda li inandi konakona Ombibeli nEendombwedi, kape na oo a li a ulikila nge nghee handi dulu okuninga ngaho. Onda li nda pepelelwa neenghono okushiiva kutya ovanhu inava pumbwa okuninga eenghundafana dOmbibeli diledile odo ihadi kwafele ovanhu va mone omanyamukulo taa mbilipaleke.”

Valvanera okwa dimina a ti: “Oinima aishe oya li tai tu kumwe noi na eityo. Keshe shimwe oshoshili, ndele hamolwaashi ashike nde shi hongwa kongeleka, ndele osheshi nda li nda pewa omatomheno a yela nawa.” Jo-Anne okwa ti: “Eshi omapulo ange aeshe a nyamukulwa okudja mOmbibeli, osha ningifa nge ndi kale nda fimaneka neenghono Omushangi wayo, molwaashi oku shii kutya ovanhu otava ka kala ve na omapulo mahapu madjuu nokwa yandja omanyamukulo taa mbilipaleke mOmbibeli.”

Mbela ou shii umwe womEendombwedi daJehova? Omolwashike ito mu pula e ku ulikile nghee to dulu okukonakona Ombibeli? Ngeenge ku shii umwe womEendombwedi daJehova, shangela kuimwe yomeendjukifi odo di li pepandja eti-2 loshifo eshi. Omunhu ota dulu okuuda ko Eendjovo daKalunga, Ombibeli, ngeenge okwa kwafelwa komhepo iyapuki yaKalunga nokukala e na ehalo okutambula ko osho ta lesha nosho yo okukwafelwa kovahongi vOmbibeli ovo ve na owino. Onghee hano, oto dulu okuuda ko Ombibeli.

[Eshangelo lopedu]

[Oshimhungu/Efano pepandja 8]

Omanyamukulo taa mbilipaleke e na sha nomapulo opaMbibeli

Oikundafanwa imwe oyo hai kundafanwa kEendombwedi daJehova ngeenge tadi ningi ekonakonombibeli naumwe:

• Elalakano laKalunga olashike li na sha nedu?

• Oonakufya ove li peni?

• Mbela otu li ngoo ‘momafiku axuuninwa’?

• Omolwashike Kalunga a efela okumona oixuna ku kale po?

• Ongahelipi handi dulu okuxumifa komesho ehafo moukwaneumbo wetu?

[Omafano pepandja 7]

Opo u ude ko Ombibeli . . . ilikana kuKalunga e ku pe omhepo yaye, lesha u na ehalo okutambula ko osho to lesha nokutambula ko ekwafo olo to pewa kuvamwe