Mona etulumuko moinima yopamhepo

‘Litwikeni ondjoko yange, ndele tamu limonene eemwenyo deni etulumuko.’ — MAT. 11:29.

1. Elongekido lilipi Kalunga a li a ninga po pomhunda yaSinai, nomolwashike?

ESHI ehangano lOmhango la li la totwa pomhunda yaSinai, ola li la kwatela mo okudana efiku lEshabata koshivike. Jehova okwa li a lombwela oshiwana shaIsrael okupitila momupopikalelipo waye Moses, a ti: “Omafiku a-6 ove u nokulonga oilonga yoye, ndelenee mefiku eti-7 u nokutulumukwa, opo ongobe yoye nondongi yoye i shiive okufuda po nomona omumati womupika woye omukainhu nomunailongo a shiive okutulumukwa po.” (Ex. 23:12) Molwaashi Jehova okwa li ha yavelele ovo ve li koshi yOmhango, okwa li e va pa pahole efiku lokufuda po opo va dule “okutulumukwa.”

2. Ovaisrael ova li va mona ouwa ulipi mokudiinina Eshabata?

² Ndele mbela efiku lEshabata ola li ashike efiku lokufuwa? Hasho, ola li efiku la fimana kOvaisrael lokulongela Jehova. Okudiinina Eshabata okwa li kwa pa omhito omitwe domaukwaneumbo di honge omaukwaneumbo ado ‘okudiinina ondjila yOmwene, noku shiive okulonga ouyuki noshili.’ (Gen. 18:19) Eshabata ola li yo hali pe omhito omaukwaneumbo nosho yo ookaume va ongale pamwe nova dilonge kombinga yoilonga yaJehova nokuhafela eendafano. (Jes. 58:13, 14) Ndele osho sha fimanenena oshosho kutya Eshabata ola li tali faneke efimbo lokomesho eshi Epangelo laKristus lOmido Eyovi tali ka eta etulumuko lashili. (Rom. 8:21) Ndele mbela ongahelipi shi na sha nokunena? Openi nongahelipi Ovakriste vashili ovo ve na ohokwe meendjila daJehova tava dulu okumona etulumuko la tya ngaho?

Mona etulumuko mokweendafana nOvakriste vakweni

3. Omonghedi ilipi Ovakriste vomefelemudo lotete va li va kwafelafana, nosha li sha eta oidjemo ilipi?

³ Omuyapostoli Paulus okwa popya kutya eongalo lopaKriste oli li “ongudi nekanghameno loshili.” (1 Tim. 3:15) Ovakriste vonale ova li va kwafelwa neenghono kokutwaafana omukumo nokutungafana pahole. (Ef. 4:11, 12, 16) Eshi Paulus a li muEfeso, okwa li a tuwa omukumo ketalelepo loilyo yeongalo laKorinto. Paulus okwa popya kutya etalelepo olo ola li le mu kuma ngahelipi a ti: ‘Onda hafela okuuya kwaStefanas naFortunatus naAkaikus, osheshi ovo va hekeleka omhepo yange.’ (1 Kor. 16:17, 18) Sha faafana, eshi Titus a li a ya kuKorinto a ka yakule ovamwaxe, Paulus okwa li a shangela eongalo konima yaasho a ti: “Omhepo yaye oya hekelekwa kunye amushe.” (2 Kor. 7:13) Sha faafana kunena, Eendombwedi daJehova ohadi mono etulumuko okupitila meendafano lopaKriste tali tungu.

4. Okwoongala kweongalo ohaku tu tulumukifa ngahelipi?

⁴ Nopehe na omalimbililo, owa mona kutya okwoongala kweongalo ohaku etele omunhu ehafo linene. ‘Ohatu hekelekwa keitavelo lavamwe’ pokwoongala kwa tya ngaho. (Rom. 1:12) Ovamwatate novamwameme vopamhepo kave fi ashike ovashiivikile ovo hatu shakeneke omafimbo nomafimbo. Ove li ookaume kashili, tu va hole notwe va fimaneka. Ohatu kala twa hafa neenghono nohatu hekelekwa kuvo mokwoongala pamwe navo nopehe na okufaula. — Filem. 7.

5. Ongahelipi hatu dulu okumona etulumuko poyoongalele inini naai ya kula?

⁵ Ohatu tulumukifwa yo koyoongalele yetu yokomudo inini naai yakula. Oyoongalele ya tya ngaho ohai tu pe omeva oshili taa yandje omwenyo oo e li mEendjovo daKalunga, Ombibeli, nosho yo omhito ‘yokumbwalangadjeka’ eendafano letu. (2 Kor. 6:12, 13) Ndele mbela ongahelipi ngeenge otu na eehoni nohatu mono shidjuu okuya puvamwe? Onghedi imwe omo hatu dulu okushiiva nawa ovamwatate novamwameme oyo okuninga omaliyambo okukwafela poshoongalele shoshitukulwa. Omumwameme umwe oo a li ta kwafele poshoongalele shimwe shopaiwana okwa ti: “Kanda li ndi shii ovanhu vahapu, kakele koukwaneumbo wetu nosho yo ookaume vanini ovo nda li ndi na. Ndele eshi nda li nda kwafela shi na sha nokuwapaleka, onda li nda shakeneka ovamwatate novamwameme vahapu. Osho osha li shihafifa neenghono.”

6. Onghedi imwe ilipi omo hatu dulu okumona etulumuko ngeenge tu li mefudo?

⁶ Omudo keshe, Ovaisrael ova li hava i kuJerusalem va ka dane oivilo itatu yopalongelokalunga. (Ex. 34:23) Osho luhapu osha li hashi pula ovanhu va fiye po omapya neengeshefa nokuya molweendo oule womafiku mahapu, tava ende kolupadi meendjila di na ondwi. Ndele nande ongaho, ovanhu ova li hava mono ‘ehafo linene’ eshi ‘tava hambelele Omwene.’ (2 Omaf. 30:21) Ovapiya vaJehova vahapu kunena navo ohava mono ehafo linene mokuya nomaukwaneumbo avo va ka talele po koBetel ile koshitaimbelewa shEendombwedi daJehova osho shi li popepi navo. Mbela itamu dulu oku ka talela po kObetel ile kombelewa yEendombwedi pamwe noukwaneumbo woye mefudo leni tali landula?

7. (a) Ongahelipi hatu dulu okumona ouwa pouvilo? (b) Oshike hashi ningifa okavilo ka kale taka dimbulukiwa notaka tu omukumo?

⁷ Okweendafana nomaukwaneumbo onhumba nosho yo nookaume pokavilo konhumba, otaku dulu yo okukala etwomukumo. Ohamba inaendunge Salomo oya ti: “Omunhu ke na nande ouwa umwe, okulya nokunwa nokushambukifa omwenyo waye nouwa mokulonga kwaye kudjuu.” (Omuud. 2:24) Ouvilo ihave tu etele ashike epepelelo keemwenyo, ndele ohava pameke yo ekwamo letu lohole nOvakriste vakwetu eshi hatu shiivafana nawa navo. Opo okavilo oko hatu ningi ka kale omhito i shii okudimbulukiwa notaka tu omukumo, oshiwa okushiva ovanhu vomuvalu munini nokushilipaleka kutya otava pashukilwa nawa, unene tuu ngeenge otapa ka nuwa oikunwa yoalkoholi.

Oukalele ohau eta etulumuko

8, 9. (a) Etumwalaka laJesus ola yooloka ko ngahelipi kwaalo lovanongo vomishangwa nOvafarisai? (b) Ouwa ulipi hatu mono mokulombwela vamwe eeshili dOmbibeli?

⁸ Jesus okwa li e na ouladi wokulonga moukalele, nokwa ladipika ovahongwa vaye va ninge sha faafana. Osho oshi liwetikile meendjovo daye odo tadi ti: “Oilya oi li po ihapu, ndele ovateyi ovo ovanini. Ilikaneni hano Omwene weteyo, a tume ovateyi keteyo laye.” (Mat. 9:37, 38) Etumwalaka olo Jesus a honga ola li tali tulumukifa shili, nola li “onghundana iwa.” (Mat. 4:23; 24:14, NW) Onghundana iwa oya li ya yooloka ko keemhango didjuu odo da li da twikwa ovanhu kOvafarisai. — Lesha Mateus 23:4, 23, 24.

⁹ Ngeenge hatu udifile vamwe etumwalaka lOuhamba, ohatu va talaleke pamhepo, nopefimbo opo tuu opo, ohatu mono eudeko lomoule nohatu kala tu na olupandu li na sha neeshili dOmbibeli di na ondilo. Omupsalme umwe okwa popya sha yuka eshi a ti: “Hambeleleni Omwene! Osheshi okwiimbila Kalunga ketu, osho oshiwa, noku mu imbila omahambelelo osha wapala.” (Eps. 147:1) Mbela ito dulu okuwedela ko kehafo loye mokukala ho hambelele Jehova mokati kovanhu vakweni?

10. Okupondola kwetu moukalele inaku likolelela kushike? Shi yelifa.

¹⁰ Oshoshili kutya ovanhu moitukulwa imwe ohave linyenge nawa konghundana iwa shi dulife muimwe. (Lesha Oilonga 18:1, 5-8.) Ngeenge ou li moshitukulwa omo ovanhu ihava tambula ko lela etumwalaka lOuhamba, kendabala u yandje elitulemo kwaasho to pondola moukalele. Dimbulukwa kutya eenghendabala odo to ningi efimbo keshe okuudifila vamwe kombinga yedina laJehova kadi fi doshimha. (1 Kor. 15:58) Natango, okupondola kwetu moukalele inaku likolelela konghedi omo ovanhu have linyenge konghundana iwa oyo hatu va udifile. Ndele otu na elineekelo kutya Jehova ota ka shilipaleka kutya ovanamitimadiwa ova pewa omhito yokuudifilwa etumwalaka lOuhamba. — Joh. 6:44.

Ekonakono lOukwaneumbo ohali tulumukifa

11. Jehova okwa pa ovadali oshinakuwanifwa shilipi, nongahelipi tava dulu oku shi wanifa po?

¹¹ Ovadali ovatilikalunga ove na oshinakuwanifwa shokuhonga ounona vavo kombinga yaJehova nosho yo eendjila daye. (Deut. 11:18, 19) Ngeenge ou li omudali, mbela owa tula po efimbo lokuhonga ounona voye kombinga yaTate yetu omunahole womeulu? Opo u dule okuwanifa po oshinakuwanifwa osho sha kwata moiti nokufila oshisho eemhumbwe doukwaneumbo woye, Jehova okwe ku pa eendja dihapu dopamhepo tadi talaleke okupitila momambo, moifo, mouvidio nosho yo moungalo.

12, 13. (a) Omaukwaneumbo otaa dulu ngahelipi okumona ouwa mEkonakono lOukwaneumbo? (b) Ongahelipi ovadali tava dulu okushilipaleka kutya ekonakono loukwaneumbo wavo otali tulumukifa?

¹² Ongudu yomupiya omudiinini nomunaendunge oya ninga po yo elongekido opo pa kale efiku lokuninga Ekonakono lOukwaneumbo. Omaukwaneumbo okwa tula po efiku lokukonakona Ombibeli oshivike keshe. Vahapu ova mona kutya elongekido la tya ngaho ole va kwafela va kale va hangana nove holafane nola pameka ekwatafano lavo naJehova. Ndele mbela ongahelipi ovadali tava dulu okushilipaleka kutya Ekonakono lOukwaneumbo wavo oli li odjo yepepelelo lopamhepo?

¹³ Ekonakono lOukwaneumbo kali na okukala oshinima shififa oudja ile la kwata moiti neenghono. Kalunga ou hatu longele ‘oKalunga omunelao,’ nokwa hala tu kale twa hafa eshi hatu mu longele. (1 Tim. 1:11, OB-1954; Fil. 4:4) Okukala tu na efiku la wedwa po lokukonakona eeshili dOmbibeli di na ondilo oku li shili enangeko noupuna. Ovadali ove na okukala hava tifuka meenghedi davo dokuhonga, hava longifa ounghulungu wokunduluka po oinima i lili noku lili. Pashihopaenenwa, oukwaneumbo umwe owa li wa pa omhito okamonamati kavo komido omulongo kedina Brandon ka kundafane kombinga yoshipalanyole tashi ti: “Omolwashike Jehova a li a longifa eyoka tali faneke Satana?” Oshikundafanwa osho osha li sha nyemateka Brandon molwaashi oku hole omayoka, nokwa handuka eshi Satana a li a popya okupitila meyoka. Omaukwaneumbo amwe ohaa lesha Ombibeli omo oshilyo keshe hashi lesha shi lile po omunhu wonhumba oo a popya eendjovo odo tava lesha ile a dane oinyandwa yOmbibeli. Eenghedi dokuhonga da tya ngaho ihadi hafifa ashike ounona ndele ohadi va kwafele va kufe ombinga, naasho ohashi dulu okuningifa omafinamhango Ombibeli a kume omitima davo.a

Henuka oinima oyo tai dulu oku ku wilila po

14, 15. (a) Okuwililwa po koisho pamaliudo nosho yo okukala uhe na eameno okwa hapupala shi fike peni momafiku axuuninwa? (b) Omaupyakadi amwe vali elipi hatu dulu okushakeneka?

¹⁴ Okuwililwa po koisho pamaliudo nosho yo okukala uhe na eameno oya hapupala momafiku aa axuuninwa onghalelo ei yoinima. Ovanhu omamiliyona kave na oilonga navamwe otava nane noudjuu omolwouxupilo. Nokuli naavo hava longo luhapu ohava kala ve udite kutya ondjabi yavo ova fa ashike have i humbatele meendjato di na eembululu, nokungaho omaukwaneumbo ihaa mono lela ouwa. (Yelekanifa naHaggai 1:4-6.) Ovawiliki vopapolotika nosho yo vakwao vamwe otava monika vehe na ekwafo lasha eshi tava kondjo nokuxulifa po oukulo nosho yo oyeetifi ikwao yowii. Ovanhu vahapu ova teka omukumo omolwomaunghundi avo opaumwene. — Eps. 38:5.

¹⁵ Ovakriste vashili inava lya olusha lokuha hangwa komaupyakadi nosho yo komafininiko omonghalelo yoinima yaSatana. (1 Joh. 5:19) Omafimbo amwe, ovahongwa vaKristus otava dulu okushakeneka omaupyakadi onhumba eshi tava kendabala okukala ovadiinini kuJehova. Jesus okwa ti: “Ngenge va taata nge, otave mu taata yo.” (Joh. 15:20) Ndele nonande otu ‘tewaatewe, inatu ekelwashi.’ (2 Kor. 4:9) Mbela omolwashike taku dulu okutiwa ngaho?

16. Oshike tashi dulu oku tu kwafela tu kaleke po ehafo letu?

¹⁶ Jesus okwa ti: “Ileni kuame, nye amushe hamu longo nomwa lolokifwa, Ame ohandi mu pe etulumuko.” (Mat. 11:28) Ngeenge otwa itavela filufilu mekuliloyambo laKristus, ohatu liyandje momake aJehova, oku shi popya pafaneko. Kungaho, ohatu pewa “eenghono di dule odo dopaushitwe.” (2 Kor. 4:7, NW) Omhepo iyapuki yaKalunga oi li “omupopili” nohai pameke eitavelo letu opo tu dule okulididimikila omayeleko nomaudjuu tu na ehafo. — Joh. 14:26; Jak. 1:2-4.

17, 18. (a) Otwa pumbwa okulungama opo tuha nwefwe mo koikala ilipi? (b) Oshike tashi dulu okuningwa po ngeenge otwa pitifa komesho omalihafifo?

¹⁷ Ovakriste vashili kunena ove na okulungama vaha nwefwe mo koikala younyuni ou yokuhola omalihafifo sha pitilila. (Lesha Ovaefeso 2:2-5.) Ngeenge hasho, oshi na oupu tu kwatwe ‘kokahalu kombelela nokahalu komesho noifulalala yokukalamwenyo.’ (1 Joh. 2:16) Ile oshi na oupu tu fike pexulifodiladilo la puka kutya ngeenge otwa efa tu kwatwe kokahalu kombelela otashi ke tu etela etulumuko. (Rom. 8:6) Pashihopaenenwa, ovanhu vamwe ova hovela okulongifa oingangamwifi, okunwa sha pitila, okutala omafano oipala, okukala ve hole omaudano sha pitilila ile okuninga oinima ihapu inai koshoka opo ve lihafife. “Omakonda” aSatana okwa unganekwa nelalakano loku tu pukifa opo tu kale tu na etaleko la puka li na sha naasho hashi eta etulumuko. — Ef. 6:11.

¹⁸ Oshoshili kutya kape na sha sha puka shi na sha nokulya ile okunwa nosho yo okukufa ombinga momalihafifo onhumba mawa, ngeenge ohatu shi ningi pandjele. Ndele nande ongaho, ihatu efa oinima ya tya ngaho i kale pondodo yotete mokukalamwenyo kwetu. Osha fimanenena okukala tu na ondjele nosho yo elipangelo, unene tuu mokutala kefimbo eli tu li mulo. Okulalakanena oinima yopaumwene otaku dulu oku tu wilila po fiyo osheshi twa kwatwa ‘kondede ile tuhe na oiimati yokushiiva Omwene wetu Jesus Kristus.’ — 2 Pet. 1:8.

19, 20. Ongahelipi hatu dulu okumona etulumuko lashili?

¹⁹ Ngeenge otwa kala metwokumwe neemhango daJehova, ohatu ka didilika kutya omalihafifo keshe omounyuni ou oopakafimbo ashike. Moses okwa li a didilika oshinima osho, onghee hano, nafye osho tu na okuninga. (Heb. 11:25) Etulumuko lashili olo tali eta ehafo newanenwo tali kalelele ohali di mokulonga ehalo laTate yetu womeulu. — Mat. 5:6.

²⁰ Natu twikileni okumona epepelelo moinima yopamhepo. Ngeenge otwa ningi ngaho, ohatu ‘efa okudina Kalunga nouhalu wopaunyuni, fimbo twa teelela ewanifo leteelelo lelao neholoko loshinge shaKalunga omunene nolOmukulili wetu Jesus Kristus.’ (Tit. 2:12, 13) Onghee hano, natu kaleni twa tokola toko okukala koshi yondjoko yaJesus mokukala hatu dulika keenghonopangelo nosho yo kewiliko laye. Ngeenge otwa ningi ngaho, ohatu ka mona ehafo netulumuko lashili.

[Eshangelo lopedu]

Oto nyamukula ngahelipi?

• Oshiwana shaJehova ohashi mono ngahelipi etulumuko kunena?

• Omonghedi ilipi oukalele wetu hau tu tulumukifa nosho yo ovo hatu udifile?

• Oshike osho omitwe domaukwaneumbo tadi dulu okuninga po opo di shilipaleke kutya ekonakono lomaukwaneumbo ado otali tulumukifa?

• Oinima ilipi hai tu wilile po pamhepo?