Otu na okulongela Jehova twa mana mo
‘Oinima aishe oyo ya fimana i diladileni.’ — FIL. 4:8.
1, 2. Oshike sha ningifa ovanhu vahapu mounyuni va kale vehe na ko nasha nonghalamwenyo, naasho osha etifa po omapulo elipi?
OTU li mefimbo lidjuu neenghono mondjokonona yovanhu. Onghee hano, oshidjuu neenghono kovanhu ovo vehe na ekwatafano lopofingo naJehova okuungaunga ‘nomafimbo madjuu’ oo tu li muo. (2 Tim. 3:1-5) Ovanhu va tya ngaho kape na ou ta dulu oku va kwafela va kandule po omaupyakadi avo noihava dulu lela oku a kandula po kuvo vene. Onghee hano, vahapu vomuvo ohava kendabala okukufa ombinga momalihafifo e lili noku lili omounyuni opo vaha kale tave lipula unene shi na sha neenghalo omo ve li.
2 Ovanhu luhapu ohava pitifa komesho omalihafifo opo ngeno va dule okuungaunga noisho yokukalamwenyo. Ovakriste vashili navo otava dulu okukala ve na oikala ya tya ngaho ngeenge inava lungama. Ongahelipi hatu dulu okuhenuka oikala oyo? Mbela osho osha hala okutya katu na okukufa ombinga momalihafifo nande asha? Ongahelipi hatu dulu okukala tu na ondjele ngeenge tashi uya pomalihafifo nosho yo pokuwanifa po oinakuwanifwa yetu? Omafinamhango opamishangwa elipi tae tu kwafele tu kale hatu hafele okukalamwenyo, hatu shi ningi pandjele?
Yandja elitulemo koinima oyo ya fimana mounyuni omu ovanhu ve hole omalihafifo
3, 4. Omishangwa ohadi tu kwafele ngahelipi tu mone kutya otwa pumbwa okuyandja elitulemo koinima oyo ya fimana?
3 Ovanhu mounyuni ove ‘hole omalihafifo’ sha pitilila. (2 Tim. 3:4, NW) Ounyuni ou ohau ladipike ovanhu va kale ashike tave lihafifa, nongeenge otwa kala ashike hatu lalakanene omalihafifo, otashi dulu okunyona po ekwatafano letu naJehova. (Omayel. 21:17) Onghee hano, omuyapostoli Paulus okwa li e na etomheno liwa eshi a li a yandja omayele e na sha nokuyandja elitulemo koinima oyo ya fimana meenhumwafo odo a li a shangela Timoteus naTitus. Ngeenge otwa tula moilonga omayele oo, otashi ke tu kwafela tuha nwefwe mo ketaleko lounyuni li na sha nonghalamwenyo. — Lesha 1 Timoteus 2:1, 2; Titus 2:2-8.
4 Omafelemido a tetekela, Salomo okwa li a shanga kutya oshi li pandunge okukala hatu yandje elitulemo koinima oyo ya fimanenena monghalamwenyo, ponhele yokukala ashike hatu yandje elitulemo komalihafifo. (Omuud. 3:4; 7:2-4) Molwaashi okukalamwenyo kwetu okuxupi neenghono, otwa pumbwa okukala hatu ‘kondjo’ opo tu ka xupifwe. (Luk. 13:24) Otu na yo okukala hatu konakona oinima aishe oyo ‘ya fimana.’ (Fil. 4:8, 9) Osho osha hala kutya otu na okuyandja elitulemo filufilu koinima aishe oyo ya kuma okukalamwenyo kwetu tu li Ovakriste.
5. Oshinima shimwe shilipi tu na okukala twa tala ko sha fimana monghalamwenyo yetu?
5 Ovakriste ohava hopaenene Jehova naJesus mokukala hava wanifa po oinakuwanifwa yavo noudiinini. (Joh. 5:17) Oshidjemo, ovanhu luhapu ohave va pandula molwaashi ohava longo noudiinini nove shii okulineekelwa. Omitwe domaukwaneumbo odo unene di na okulonga noudiinini opo di file oshisho omaukwaneumbo ado. Osho osha fimana molwaashi ngeenge umwe iha file oshisho oukwaneumbo waye, okwa fa ashike omunhu oo e “lidimbika” Jehova. — 1 Tim. 5:8.
Elongelokalunga letu oshinima sha kwata moiti ashike oli hafifa
6. Otu shi shii ngahelipi kutya otu na okutala ko okulongela kwetu Jehova ku li oshinima sha kwata moiti?
6 Jehova oha tale ko alushe oku mu longela monghedi ya yuka ku li oshinima sha kwata moiti. Pashihopaenenwa, eshi Ovaisrael va li koshi yOmhango yaMoses ova li hava mono oilanduliko inyikifa oluhodi ngeenge va li va efa po okulongela Jehova. (Jos. 23:12, 13) Mefelemudo lotete O.P., ovashikuli vaKristus ova li va pumbwa okukondjela nouladi elongelokalunga lashili opo liha nwefwe mo komahongo oipupulu nokoikala ii yovakwaunyuni. (2 Joh. 7-11; Eh. 2:14-16) Kunena, Ovakriste vashili ove na okukala va tala ko elongelokalunga lavo li li oshinima sha kwata moiti. — 1 Tim. 6:20.
7. Paulus okwa li he li longekidile ngahelipi oukalele waye?
7 Oukalele wetu ou li odjo yehafo. Ndele nande ongaho, opo tu kale hatu hafele oukalele wetu, otwa pumbwa okukala hatu lipula shi na sha nao twa mana mo nokukala hatu u lilongekidile komesho yefimbo. Paulus okwa li a ulika kutya oku na ko nasha novanhu ovo a li ha hongo, eshi a shanga a ti: “Onda ninga omukwao waaveshe muaishe, opo ndi xupife nande ovamwe. Ndele aishe ohandi [i] ningi omolwevangeli, naame yo ndi mone oshitukulwa shomulo.” (1 Kor. 9:22, 23) Paulus okwa li ha kala a hafa ngeenge ta kwafele ovanhu pamhepo, nokwa li ha diladila moule shi na sha nanghee e na okuwanifa po eemhumbwe dokondadalunde dovapwilikini vaye. Onghee hano, okwa li a dula oku va twa omukumo noku va ladipika va longele Jehova.
8. (a) Otu na okukala twa tala ko ngahelipi ovanhu ovo hatu hongo moukalele wetu? (b) Ongahelipi okukala hatu konakona Ombibeli navamwe tashi dulu oku tu kwafela tu hafele oukalele wetu?
8 Mbela Paulus okwa li a tala ko oukalele u li oshinima sha fimana shi fike peni? Okwa li e liyandja nehalo liwa a ninge “omupiya” waJehova nosho yo waavo va li hava pwilikine ketumwalaka loshili. (Rom. 12:11; 1 Kor. 9:19) Ngeenge hatu hongo vamwe Eendjovo daKalunga, kutya nee opokwoongala kwopaKriste, pEkonakono lOukwaneumbo ile ngeenge hatu konakona navamwe Ombibeli, mbela ohatu shi tale ko ngoo shi li oshinakuwanifwa sha kwata moiti? Otashi dulika tu kale tu udite kutya okukala hatu konakona navamwe Ombibeli pandjikilile oshi li oshinima shidjuu. Oshoshili kutya okuninga ngaho ohashi tu pula tu yambe po efimbo olo twa li tu na okulongifa moinima yetu yopaumwene opo tu mone efimbo lokukwafela vamwe. Okuninga ngaho oku li metwokumwe neendjovo daJesus odo tadi ti kutya “okuyandja oku nelao komesho yokutambula.” (Oil. 20:35) Ngeenge hatu hongo vamwe va mone ondjila oyo tai twala kexupifo ohashi tu etele ehafo linene li dulife olo hatu mono ngeenge twa longa oshilonga shimwe shi lili.
9, 10. (a) Mbela okukala twa tala ko oinima ya kwata moiti otashi ti kutya katu na okulihafifa nosho yo okuhafela eendafano navamwe? Shi yelifa. (b) Oshike tashi ka kwafela omukulunhuongalo a kale ha tu vamwe omukumo noku va ningifa va kale va manguluka okupopya naye?
9 Okukala hatu tale ko oinima ya kwata moiti itashi ti kutya katu na okulihafifa nosho yo okuhafela eendafano navamwe. Jesus okwe tu tulila po oshihopaenenwa sha wanenena ngeenge tashi uya pokulihafifa nokukonga efimbo opo tu pange oukaume navamwe. (Luk. 5:27-29; Joh. 12:1, 2) Okukala hatu tale ko oinima ya kwata moiti itashi ti yo kutya otu na okukala twa lulika oipala yetu. Ngeno Jesus ka li omunambili, ngeno ovanhu inava kala va nanenwa kuye. Nokuli nounona ova li hava kala va manguluka okupopya naye. (Mark. 10:13-16) Ongahelipi hatu dulu okuhopaenena onghedi yaJesus yokukala nondjele?
10 Omumwatate umwe okwa popya shi na sha nomukulunhuongalo umwe a ti: “Oha kala a hala okuninga shihapu ndele iha kala a teelela vamwe va ninge oinima monghedi ya wanenena.” Mbela vamwe otava dulu okupopya ngaho shi na sha naave? Otashi ka kala shiwa okukala tu na ondjele ngeenge tashi uya pwaasho twa teelela vamwe va ninge. Pashihopaenenwa, ngeenge ovadali ova tulile po ounona vavo omalalakano eli pandjele noku va kwafela ve a hange, otashi ka twa ounona omukumo. Sha faafana, ovakulunhuongalo otava dulu okuladipika oohandimwe meongalo va ninge exumokomesho lopamhepo noku va pa omaetepo okondadalunde e na sha nanghee tava dulu oku shi ninga. Natango, ngeenge omukulunhuongalo okwa kala e na etaleko li li pandjele li na sha naye mwene, otashi ka twa vamwe omukumo notashi ka kala shipu kuvo okupopya naye. (Rom. 12:3) Omumwameme umwe okwa ti: “Inandi hala omukulunhuongalo oo ha tale ko keshe shimwe sha fa omashendjo. Ndele natango ngeenge ke na ohamu, otashi ka kala shidjuu okupopya naye.” Omumwameme umwe vali okwa ti kutya ovakulunhuongalo vamwe “otashi dulika shiha kale shipu okupopya navo molwaashi ohava kala unene va lulika oipala yavo.” Kape na omukulunhuongalo ta ka kala a hala okuningifa vamwe vaha kale netaleko liwa olo ovaitaveli aveshe ve na okukala ve na li na sha nokulongela kwavo Jehova e li ‘Kalunga omunelao.’ — 1 Tim. 1:11, OB-1954.
Okulalakanena oinakuwanifwa meongalo
11. Omunhu oku na okuninga po shike opo a dule okupewa oinakuwanifwa meongalo?
11 Eshi Paulus a li a ladipika ovalumenhu meongalo va lalakanene okupewa oinakuwanifwa ya wedwa po, ka li e va ladipika va wanife po omahalo avo okuliholamwene. Ponhele yaasho, okwa shanga a ti: ‘Umwe ngeenge a hala oshilonga shoufitaongalo, oye okwe lihalela oshilonga shiwa.’ (1 Tim. 3:1, 4) Ngeenge ovalumenhu Ovakriste va ‘hala’ okupewa oinakuwanifwa meongalo ove na okulonga noudiinini opo va wanife po oiteelelwa yopamishangwa va dule okuyakula ovamwaxe. Ngeenge omumwatate okwa ninginifwa oule womudo umwe lwaapo nota wanifa po oiteelelwa yonhumba yopamishangwa i na sha naavo va hala okuninga ovayakuliongalo oyo ya popiwa mu 1 Timoteus 3:8-13, ota dulu okupewa oshinakuwanifwa osho. Didilika kutya ovelishe 8 oya popya kondadalunde kutya ‘ovayakuliongalo nava kale [hava tale ko oinima sha kwata moiti, NW].’
12, 13. Yelifa kutya omeenghedi dilipi ovamwatate ovanyasha tava dulu okuulika kutya ova halelela okupewa oinakuwanifwa meongalo.
12 Mbela ou li omumwatate a ninginifwa u li pokuwanifa omido 20, oo a tala ko okulongela Jehova ku li oshinima sha fimana? Ope na eenghedi di lili noku lili omo to dulu okuulika kutya owe lihalela oshilonga shiwa. Onghedi imwe oyo okuxwepopaleka okukufa ombinga kwoye moukalele. Mbela oho hafele okulonga pamwe novamwatate vomapupi aeshe momapya? Mbela oho ningi eenghendabala dokumona omunhu oo to dulu okukonakona naye Ombibeli? Oto ka xwepopaleka ounghulungu woye wokuhonga ngeenge owa longifa omaetepo oo hatu pewa pokwoongala kwopaKriste eshi to ningi ekonakonombibeli nomunhu wonhumba. Kakele kaasho, oto ke lihonga yo okukala ho kenukile omunhu oo te lihongo eendjila daJehova. Eshi omukonakonimbibeli ta hovele okuninga omalunduluko a pumbiwa, oto ke lihonga oku mu kwafela a tule moilonga omafinamhango Ombibeli, to shi ningi nelungi nonelididimiko.
13 Ovamwatate ovanyasha otamu dulu okukala hamu kwafele ovanamido meongalo, tamu va pe ekwafo keshe olo va pumbwa. Otamu dulu yo okuulika kutya omu na ko nasha neholokepo lOlupale lOuhamba, mokukwafela okulikaleka la wapala nola koshoka. Ngeenge omwa kala hamu kwafele nehalo liwa, otamu ka ulika kutya omwa halelela okuwanifa po oukalele weni. Ngaashi Timoteus, otamu dulu okulihonga okuwanifa po eemhumbwe deongalo noudiinini. — Lesha Ovafilippi 2:19-22.
14. Ongahelipi ovamwatate ovanyasha tava dulu ‘okutalwa tete’ ngeenge ova wana okupewa oinakuwanifwa meongalo?
14 Ovakulunhuongalo ove na okukala hava yandje oinakuwanifwa kovamwatate ovanyasha ovo tava kendabala okuya “onhapo [okahalu] kounyasha” notava lalakanene “ouyuki neitavelo nohole nombili” nosho yo omaukwatya makwao mawa. (2 Tim. 2:22) Ngeenge ovanyasha ova kala hava pewa va ninge oinima yonhumba meongalo, kungaho, otava dulu ‘okutalwa tete’ ngeenge ova wana okupewa oinakuwanifwa opo okuxuma kwavo “komesho ku monike kuaveshe.” — 1 Tim. 3:10; 4:15.
Ulika kutya oto longele Jehova wa mana mo moukwaneumbo nosho yo meongalo
15. Metwokumwe na 1 Timoteus 5:1, 2, ongahelipi hatu dulu okuulika kutya ohatu longele Jehova twa mana mo ngeenge tashi uya pokufimaneka vamwe?
15 Okulongela Jehova twa mana mo okwa kwatela mo okufimaneka ovamwatate novamwameme. Paulus okwa li a pa Timoteus omayele e na sha nokufimaneka vamwe. (Lesha 1 Timoteus 5:1, 2.) Osha fimana okuninga ngaho unene tuu ngeenge hatu ungaunga novanhu voukashike kookanhu wa yooloka kuwetu. Job okwe tu tulila po oshihopaenenwa shiwa shi na sha nokufimaneka ovakainhu, unene tuu eshi a li ha fimaneke kaume kaye kopahombo. Okwa li a ninga eenghendabala da mana mo opo aha tale omukainhu wonhumba nokahalu. (Job 31:1) Ngeenge otwa kala twa fimaneka ovamwatate novamwameme otashi ke tu kwafela tu henuke oku ve lihumbatela monghedi oyo tai kokele momilele, ile okuninga sha osho tashi dulu okuningifa omumwatate ile omumwameme aha kale e udite a manguluka ngeenge e li nafye. Okufimanekafana okwa fimana unene tuu ngeenge ovanhu vavali tava endelafana nelalakano loku ka hombola. Omukriste oo a pitifa komesho oinima yopamhepo ke na efiku a danauke nomaliudo ovanhu voukashike kookanhu wa yooloka ko kuwaye. — Omayel. 12:22.
16. Tumbula kutya ovanhu vamwe mounyuni ova tala ko ngahelipi ovashamane nonokutya Ombibeli oya popya shike shi na sha nonghandangala oyo ovashamane ve na okudana.
16 Otu na okukala hatu wanifa po noukeka oinakuwanifwa yetu oyo twa pewa kuKalunga moukwaneumbo. Ovanhu mounyuni waSatana inava fimaneka onghandangala oyo i na okudanwa komushamane. Omalihafifo mahapu ohaa ningifa ovanhu vaha fimaneke omitwe domaukwaneumbo nokukala ashike tave di kembaula. Ndele Omishangwa otadi ulike kutya omushamane oku na oshinakuwanifwa sha kwata moiti, molwaashi otadi ti kutya oye ‘omutwe womukainhu.’ — Ef. 5:23; 1 Kor. 11:3.
17. Yelifa nghee okukufa ombinga mEkonakono lOukwaneumbo tashi ka ulika kutya omunhu okwa halelela okuwanifa po oinakuwanifwa yaye.
17 Omushamane otashi dulika a kale ha wanifa po eemhumbwe dopalutu doukwaneumbo waye. Ndele ngeenge ihe va pe ewiliko lopamhepo, otashi ka ulika kutya ke na ondjele nosho yo ounongo. (Deut. 6:6, 7) Nomolwaasho, 1 Timoteus 3:4 okwa ti kutya ngeenge ou li omutwe woukwaneumbo nowa hala okukala u na oinakuwanifwa ya wedwa po meongalo, ou na okukala omulumenhu oo ha ‘pangele nawa eumbo laye mwene, ndee ta tekula nawa ounona vaye neenghedi da fimana meduliko.’ Onghee hano, lipula kutya, ‘Mbela ohadi kongo efimbo opo ndi ninge Ekonakono lOukwaneumbo pandjikilile?’ Ovakulukadi vamwe Ovakriste ohava pula lwoikando ovashamane vavo va kwatele komesho oinima yopamhepo. Omushamane keshe oku na okulikonakona a mana mo a tale kutya ye oku na etaleko la tya ngahelipi ngeenge tashi uya poshinakuwanifwa shaye shokukwatela komesho oukwaneumbo moinima yopamhepo. Ndele nande ongaho, omukulukadi Omukriste oku na okuyambidida elongekido lEkonakono lOukwaneumbo nokulongela kumwe nomushamane waye opo va pondole.
18. Ongahelipi ounona tava dulu okulihonga okulongela Jehova va mana mo?
18 Ounona navo otava ladipikwa va yandje elitulemo koinima oyo ya fimanenena monghalamwenyo. (Omuud. 12:1) Inashi puka ngeenge omunyasha te lihongo okulonga noudiinini, ngaashi okulonga oilonga oyo ta dulu okulonga meumbo she likolelela komido nokokudula kwaye. (Omaimb.kemo. 3:27) Ohamba David okwa li natango inyasha eshi ya li ye lihonga okukala omufita woimuna muwa. Okwa li yo e lihonga okwiimba nokutota omaimbilo, nounghulungu oo owa li we mu ningifa a ka longele omupangeli waIsrael. (1 Sam. 16:11, 12, 18-21) Nopehe na omalimbililo, eshi David a li omunyasha okwa li ha hafele omaudano onhumba, ndele okwa li yo a likola ounghulungu oo a li a ka longifa opo a tange Jehova. Ounghulungu oo a li a mona eshi a li omufita weedi owa li we mu kwafela a kwatele komesho oshiwana shaIsrael nelididimiko. Ovanyasha, mbela omu na ounghulungu ulipi oo tau dulu oku mu kwafela mu longele Omushiti weni notau mu kwafele mu lilongekidile oinakuwanifwa yomonakwiiwa?
Kala u na etaleko li li pandjele
19, 20. Owa tokola toko okukala netaleko li li pandjele lilipi li na sha naave mwene nosho yo elongelokalunga loye?
19 Atusheni ohatu dulu okuninga eenghendabala opo tu kale tu na etaleko li li pandjele li na sha nafye vene. Inatu hala nande okukala tu lishii ‘unene ouyuki.’ (Omuud. 7:16) Ngeenge otwa kala ovanambili otashi ke tu kwafela tu pongolole po okuhaudafana pokati ketu noilyo youkwaneumbo, novanailonga vakwetu ile ngeenge hatu ungaunga nOvakriste vakwetu. Oilyo youkwaneumbo oi na okulungama iha kale hai kembaulafana unene opo iha nyone po ombili youkwaneumbo. Aveshe meongalo otava dulu okulihonga okukala hava yolo nosho yo okuhafela eendafano navamwe nokukala hava ningi eenghundafana tadi tungu nosho yo okuhonga monghedi oyo tai ladipike vamwe. — 2 Kor. 13:10; Ef. 4:29.
20 Otu li mounyuni omo ovanhu inava fimaneka Jehova nosho yo eemhango daye. Mepingafano naasho, oshiwana shaJehova osha tala ko okudulika nosho yo okukala ovadiinini kuye shi li oshinima sha fimana. Kashi hafifa tuu okukala hatu endafana novanhu ovo hava longele Jehova va mana mo! Onghee hano, natu kaleni twa tokola toko okukala twa tala ko okukalamwenyo nosho yo elongelokalunga letu li li oshinima sha fimanenena.
Oto nyamukula ngahelipi?
• Omolwashike tu na okuhenuka oikala younyuni i na sha nokuhenakonasha nonghalamwenyo?
• Ongahelipi hatu dulu okukala twa hafa nonande otwa tala ko oukalele wetu u li oshinima sha kwata moiti?
• Onghedi omo hatu wanifa po oinakuwanifwa yetu ohai ulike ngahelipi kutya ohatu longele Jehova twa mana mo ile hasho?
• Yelifa kutya omolwashike sha fimana okukala twa fimaneka ovamwatate nosho yo oilyo youkwaneumbo wetu.
[Omafano pepandja 16]
Omushamane oku na okufila oshisho oukwaneumbo waye palutu nopamhepo