Oho hafele ngoo okulesha nokukonakona Eendjovo daKalunga?
OMUKAINHU umwe wedina Lorraine okwa ti: “Eshi nda hovela okukala handi lesha Ombibeli pandjikilile, onda li handi kala nde shi tala ko shi li omutengi ponhele yokukala nde shi tala ko shi li oshinima shihafifa. Okwa li hashi kala shidjuu kwaame okuuda ko osho handi lesha, molwaashi oikando ihapu okwa li handi twalwaatwalwa.”
Ovanhu vamwe ova dimina kutya potete navo kava li hava hafele okulesha Ombibeli. Ndele nande ongaho, ova li va twikila molwaashi ove shii kutya osha yuka okulesha Omishangwa Diyapuki. Omulumenhu wedina Marc okwa ti: “Oshipu okweefa omalipyakidilo onhumba aye moshipala elesho lOmbibeli nosho yo ekonakono lopaumwene. Onda li nda ilikana lwoikando nokuninga eenghendabala da mana mo opo ndi li tulile po efimbo lokulesha Ombibeli monghalamwenyo yange.”
Ou na okuninga po shike opo u kale wa lenga neenghono Eendjovo daKalunga, Ombibeli? Ongahelipi to dulu okukala ho hafele oku di lesha? Natu ka taleni komaetepo taa shikula apa.
Omalalakano oo u na okulitulila po neenghedi odo u na okulongifa
Ilikana fimbo ino hovela okulesha Ombibeli nokukendabala uha twalwaatwalwe. Pula ekwafo kuJehova opo u kulike ohokwe yokukonakona Eendjovo daye. Mu pula a patulule omadiladilo oye nomutima woye u dule okuuda ko ounongo waye pauyadi. (Eps. 119:34) Ngeenge otwa kala inatu pula ekwafo kuJehova, ekonakonombibeli letu lopaumwene itali ka kala li na eityo lasha noitatu ka kala tu na ohokwe yokutwikila okukonakona. Omukulukadi umwe wedina Lynn okwa ti: “Omafimbo amwe ohandi lesha handi endelele neenghono naasho ohashi ningifa nge ndiha didilike nandenande oitwa yonhumba oyo ihokwifa. Luhapu, ihandi kala ndi udite ko filufilu oitwa oyo ya fimana. Ohandi ilikana opo ndi kale ndi na elipangelo, naasho ohashi kwafele nge opo ndiha twalwaatwalwe.”
Kala wa lenga osho to lihongo. Dimbuluka kutya owa pumbwa okuuda ko nokutula moilonga eeshili dOmbibeli opo u ka mone omwenyo waalushe. Onghee hano, ninga eenghendabala da mana mo opo u mone oitwa tai longo noku i tula moilonga. Omulumenhu umwe wedina Chris okwa ti: “Ngeenge handi lesha Ombibeli ohandi yandje elitulemo koitwa oyo tai kwafele nge ndi didilike oikala nosho yo omalinyengotomheno ange oo inaa yuka. Ohashi hafifa nge neenghono okumona nghee Ombibeli nosho yo oishangomwa yetu ihapu i na omauyelele oo haa etele nge ouwa pauhandimwe, nonande ovo ve i shanga kave shii nge nandenande.”
Litulila po omalalakano oo to dulu okuhanga. Kendabala okulihonga oshinima shonhumba shipe kombinga yovanhu ovo va hokololwa mOmbibeli. Oto dulu okulihonga oinima ihokwifa kombinga yavahapu vomuvo ngeenge owa kongo ouyelele kombinga yavo mo-Insight on the Scriptures ile mo-Watch Tower Publications Index. Eshi to ende to shiiva ovalumenhu novakainhu ovo va popiwa mOmbibeli kutya ova li ovanhu volela ovo va li ve na omaukwatya nosho yo omaliudo ngaashi fye, osho to ke lihonga moihopaenenwa yavo otashi ke ku kuma neenghono.
Tala kutya omeenghedi dipe dilipi to dulu okutomhafana to longifa Omishangwa. (Oil. 17:2, 3) Omukulukadi umwe wedina Sophia oo ha konakona e na oshitwa osho momadiladilo, okwa ti: “Onda hala okulihonga eenghedi dipe dokutomhafana novanhu moukalele nosho yo peemhito dimwe vali, opo ndi dule oku va yelifila nawa eeshili dOmbibeli. Oshungonangelo oyo oshilongifo sha denga mbada osho tashi dulu okukwafela nge ndi pondole moshinima eshi.” — 2 Tim. 2:15.
Kala wa fa u wete oiningwanima oyo to lesha momahokololo Ombibeli. Ovaheberi 4:12 ova ti kutya “ondjovo yaKalunga oi nomwenyo.” Ngeenge to lesha Omishangwa, nadi kale di na omwenyo momadiladilo oye mokukala wa fa u wete osho sha li shi wetike kwaavo va hokololwa mOmbibeli. Kendabala okukala wa fa u udite oinima oyo va li va uda nosho yo okukala u na omaliudo a fa avo. Kwatakanifa oimoniwa yavo neenghalo dokondadalunde odo ho shakeneke monghalamwenyo yoye. Lihonga nghee va li va ungaunga neenghalo donhumba. Osho otashi ka xwepopaleka eudeko loye noku ku kwafela u koneke omahokololo Ombibeli.
Kala ho longifa efimbo lihapu mokukonakona omishangwa odo didjuu okuudiwa ko nosho yo nghee da yelifwa opo u di ude ko nawa. Kala ho longifa efimbo lihapu pomhito keshe to konakona. Otashi dulika u mone omapulo mahokwifa neenghono oo to ka pumbwa okukonga ouyelele wa wedwa po shi na sha nao. Konga omaityo oitya oyo uhe shii nawa, tala omashangelo opedu nosho yo omishangwa odo da pambafana naao to lesha. Apa ngoo pe fike eudeko loye nokutula moilonga osho to lesha, opo ngoo tapa ka kala pe fike okukala kwoye to hafele Eendjovo daKalunga. Oto ka dula okupopya ngaashi omupsalme oo a ti: ‘Omalongo oye [Jehova] oo efyuululo lange fiyo alushe, osheshi oo oshihafifo shomutima wange.’ — Eps. 119:111.
Henuka okweendelela ngeenge to konakona. Kala u na ondjele shi na sha nefimbo olo we litulila po lokuninga ekonakono lopaumwene. Litulila po yo efimbo lokulilongekidila okwoongala. Omukulukadi umwe wedina Raquel okwa ti: “Luhapu ohandi kala nda wililwa po koisho nohashi imbi nge ndi yandje elitulemo. Onghee hano, onda mona kutya okukonakona oule wefimbo lixupi ohashi etele nge ouwa. Ohashi kwafele nge yo ndi mone ouwa muhapu mekonakono lange.” Chris okwa dimina a ti: Ngeenge onda konakona handi endelele, eliudo lange ohali kala tali vele nge ombedi molwaashi ihandi likola mo shihapu. Luhapu, ouyelele oo handi konakona ihau kumu omutima wange.” Onghee hano, kala ho longifa efimbo la wana eshi to konakona.
Kala u na odjuulufi yokulihonga Eendjovo daKalunga. Omuyapostoli Petrus okwa ti: ‘Ngaashi ouhanana [kaleni mu na odjuulufi yomashini, NW] aa omeendjovo inamu ya sha, opo mu kule keenghono dao, mu xupifwe.’ (1 Pet. 2:2) Ouhanana inava pumbwa okukulika ohole yokuhola omashini molwaashi oshinima ashike hashi uya paushitwe. Mepingafano naasho, Omishangwa oda popya kutya otu na okukala nodjuulufi yEendjovo daKalunga. Ngeenge owa kala ho lesha nande oshitukulwa ashike shinini shOmbibeli efiku keshe, oto ka kala u na odjuulufi ya tya ngaho. Okuninga ngaho otashi dulika shi monike sha fa shidjuu pehovelo, ndele lwanima otashi ka kala shihafifa neenghono.
Kala ho dilonga kOmishangwa odo wa lesha. Ouwa muhapu ohau di yo mokudilonga kombinga yaasho wa lesha. Osho otashi ke ku kwafela u kwatakanife oikundafanwa yopamhepo oyo wa konakona kombinga yayo. Kungaho, oto ka likola ounongo wopamhepo u na ondilo, oo u li emona lihafifa. — Eps. 19:15; Omayel. 3:3.
Longifa nawa efimbo
Okukala u na elandulafano liwa lokukonakona ohashi pula eenghendabala, ndele nande ongaho, ohashi etifa omanangeko noupuna mahapu. Otashi ka xwepopaleka yo eudeko loye li na sha nOmishangwa. (Heb. 5:12-14) Eendunge dokuyoolola nosho yo ounongo oo to likola mOmishangwa da nwefwa mo otau ke ku etela ehafo nombili notau ke ku ningifa u kale u na omaukwatya mawa. Ounongo oo u li mEendjovo daKalunga da nwefwa mo oo “omuti womwenyo” kwaavo tave u likola nokukatuka metwokumwe nao. — Omayel. 3:13-18.
Okukonakona moule Eendjovo daKalunga otashi ke ku kwafela u kale nomutima u na eudeko. (Omayel. 15:14) Otashi ke ku kwafela u yandje omayele taa di komutima oo a kanghamena filufilu kOmbibeli. Ngeenge owa kala ho ningi omatokolo e likolelela kwaasho we lihonga mOmishangwa nosho yo moishangomwa oyo ya nyanyangidwa ‘komupiya omudiinini nomunaendunge,’ Eendjovo daJehova da nwefwa mo otadi ke ku tulumukifa notadi ke ku nghonopaleka. (Mat. 24:45) Oto ka kala u na etaleko liwa, omukumo noto ka ulika kutya oto wilikwa kOmishangwa. Kakele kaasho, oto ka pondola mukeshe shimwe osho sha kwatela mo ekwatafano loye naKalunga. — Eps. 1:2, 3.
Ohole yokuhola Kalunga nomutima aushe otai ke ku linyengifa u lombwele vamwe shi na sha neitavelo loye. Osho otashi dulu yo okukala shihafifa neenghono. Omumwameme umwe wedina Sophia oha ningi eenghendabala a dimbuluke nokulongifa omishangwa odo hadi pendula ohokwe yovanhu nohadi mu kwafele a pondole moukalele waye wopaKriste noku u hafele. Okwa ti: “Ohashi kala shihafifa okumona nghee ovanhu tave linyenge kwaasho sha popiwa mOmbibeli.”
Ndele ouwa wa denga mbada oo to dulu okumona mokukala to hafele Eendjovo daKalunga oo okukala nekwatafano lopofingo naye. Ekonakonombibeli otali ke ku kwafela u shiive omifikamhango daKalunga nosho yo kutya omunahole, oha yandje nomuyuki. Kape na vali shimwe osho to dulu okulalakanena sha fimanenena ile tashi ku etele ouwa shi dulife pwaasho. Litula mo filufilu mokukonakona Eendjovo daKalunga. Kungaho, oto ka longifa nawa efimbo loye. — Eps. 19:8-12.
[Oshimhungu/Omafano pepandja 5]
OMALALAKANO OO TO DULU OKULITULILA PO NEENGHEDI ODO TO DULU OKULONGIFA ESHI TO LESHA EENDJOVO DAKALUNGA
▪ Ilikana fimbo ino hovela okulesha Ombibeli nokukendabala uha twalwaatwalwe.
▪ Kala wa lenga osho to lihongo.
▪ Litulila po omalalakano oo to dulu okuhanga.
▪ Tala kutya omeenghedi dipe dilipi to dulu okutomhafana to longifa Omishangwa.
▪ Kala wa fa u wete oiningwanima oyo to lesha momahokololo Ombibeli.
▪ Kala ho longifa efimbo lihapu mokukonakona omishangwa odo didjuu okuudiwa ko nosho yo nghee da yelifwa opo u di ude ko nawa.
▪ Henuka okweendelela ngeenge to konakona.
▪ Kala u na odjuulufi yokulihonga Eendjovo daKalunga.
▪ Kala ho dilonga kOmishangwa odo wa lesha.
[Efano pepandja 4]
Ngeenge to lesha ehokololo lOmbibeli kala wa fa u liwete u li meenghalo da fa odo da hokololwa omo