Omitwe domaukwaneumbo—Kalekei po elandulafano liwa loinima yopamhepo
1 Nonande a li mokati kelongelo loikalunga nenyonauko laBabilon oule womido omilongo, Daniel okwa li a shiivika omolwokulongela Jehova “alushe.” (Dan. 6:17, 21) Okwa dula okukaleka po oupamhepo waye ngahelipi? Ehokololo lOmbibeli otali ulike kutya okwa li e na elandulafano liwa lokuwanifa po omalipyakidilo oo a pamba elongelokalunga lashili. Pashihopaenenwa, okwa li e na onghedindjikilile yokwiilikana lutatu mefiku mondjuwo yaye yopombada. (Dan. 6:11) Nope he na omalimbililo, okwa li yo a tula po elandulafano li na sha noinima ikwao yopamhepo, ngaashi okulesha Omhango. Omolwaasho, eshi a li a taalelwa keyeleko olo la li tali ti omwenyo ile efyo, Daniel ka li a tengauka meliyandjo laye okuliyandjela Jehova, nokwa li a xupifwa pashikumwifilonga.—Dan. 6:5-23.
2 Sha faafana kunena, otu na okulonga neenghono adishe opo tu ‘kale twa pashuka moudiinini aushe.’ (Ef. 6:18) Ounyuni ou tu li ou li “mepangelo lomunawii.” (1 Joh. 5:19) Omapataneko ile omayeleko otaa dulu okuholoka ombadilila nokuyeleka eitavelo letu. Pefimbo loudjuu munene, ovapiya vaKalunga otava ka kala oihakanwa yomaponokelo aeshe aGog yaMagog, opo tapa ka kala pa fa pe he na oupitilo wokuxupa. Osho otashi ka pula elineekelo filufilu muJehova.—Hes. 38:14-16.
3 “Oshitwa shimwe sha fimanenena osho okuninga elesho, ekonakono nosho yo eenghundafana dOmbibeli doukwaneumbo di na omupondo onghedi yokukalamwenyo.” Etwalemo loshinyandwa shoshoongalele shoshitukulwa shomo 1998 osho sha li shi na oshipalanyole “Omaukwaneumbo—Okulesha Ombibeli keshe efiku naku ninge oshitukulwa shokukalamwenyo kweni!” osho la tile ngaho. Ola twikila tali ti: “Ngeenge omaukwaneumbo otaa landula alushe elandulafano la tya ngaho nosho yo monghedi oyo tai ningi Ombibeli i kale ya mwenyopala, elandulafano olo li na sha nOmbibeli otali ka kuma omaukwaneumbo neenghono. Ohali hapupalifa eshiivo letu. Ohali pameke eitavelo letu. Ohali tu pe oihopaenenwa yovalumenhu novakainhu vonale ovadiinini shili, ovo tava dulu oku tu nwefa mo noku tu linyengifa tu diinine oshili.” Eshi hatu konakona oitukulwa i lili noku lili yelandulafano liwa lomalipyakidilo opamhepo, omitwe domaukwaneumbo odi na okutala onghedi imwe ile mbali omo tadi dulu okuxwepopaleka omalandulafano oinima yopamhepo omaukwaneumbo ado.
4 Konakona Eendjovo daKalunga keshe efiku: “Eshi Ouhamba waKalunga tau [ka pangela] nope he na epataneko nehalo laye tali [ka] longwa kombada yedu ngaashi hali longwa meulu, itapa ka kala ovanhu ovakwanyanya—nokuli noinamwenyo—itai ka ‘ninga owii ile okunyona sha.’ (Jes. 11:9; Mat. 6:9, 10)” Eendjovo odo oda holoka muKonakona Omishangwa keshe efiku—2001 mokomenda yomushangwa wo 11 Septemba. Edimbulukifo olo kala li tuu tali hekeleke! U li omutwe woukwaneumbo, mbela ou na onghedindjikilile yakeshe efiku yokukonakona omushangwa wOmbibeli nosho yo eekomenda noukwaneumbo woye? Osho oshi na lela ouwa. Ngeenge itamu dulu oku shi ninga pamwe ongula, otamu dulu oku shi ninga pefimbo limwe li lili. Omushamane umwe omudali okwa ti: “Efimbo louvalelo ola kala liwa kufye okukundafana omushangwa wOmbibeli wefiku keshe.”
5 Ngeenge omu na nale elandulafano liwa lokukundafana omushangwa keshe efiku mu li oukwaneumbo, omu shii okupandulwa. Pamwe otamu dulu okuweda ko kwaasho okulesha oshitukulwa shOmbibeli pefimbo opo tuu opo. Vamwe ove na onghedindjikilile yokulesha etukulwa alishe omo omushangwa wefiku wa kufwa. Vamwe ohava lesha palandulafano mokweendela ko kwefimbo embo alishe lOmbibeli olo va hoolola. Okulesha Ombibeli keshe efiku otaku dulu okukwafela oukwaneumbo woye u kulike etilo liwa lokutila okunyemateka Jehova notaku kulike ehalo lao lokuhalelela okulonga ehalo laye.—Deut. 17:18-20.
6 Elandulafano loukwaneumbo woye lokulesha Ombibeli nokukonakona omushangwa keshe efiku otali ka kala nokuli li na ouwa munene ngeenge omwa kufa ominute dinini okukundafana nghee omauyelele taa dulu okulongifwa. Elongifwambo Ministry School, epandja 60, oli na eetepo eli tali ti: “Oto dulu . . . okuhoolola eevelishe dinini melandulafano lelesho lOmbibeli loshivike, okukundafana omaityo ado nokupula nee omapulo ngaashi aa: ‘Eshi otashi tu pukulula ngahelipi? Ongahelipi hatu dulu okulongifa eevelishe edi moukalele? Otadi tu lombwele shike kombinga yaJehova nosho yo onghedi yaye yokuninga oinima, naasho otashi hapupalifa ngahelipi olupandu letu molwaye?’ ” Eenghundafana dopamhepo da tya ngaho otadi ka kwafela aveshe moukwaneumbo woye va ‘shiive ehalo lOmwene.’—Ef. 5:17.
7 Ekonakono loukwaneumbo: Okukwatela komesho alushe ekonakono loukwaneumbo oshivike keshe osho onghedi iwa omo omitwe domaukwaneumbo tadi dulu okuulikila ovana vado kutya oinima yopamhepo oyo yotete. Omulumenhu umwe omunyasha okwa dimbuluka ta ti: “Omafimbo amwe Tate okwa li ha di koilonga a loloka noka li ha dulu okukala oupafi lela, ndele nande ongaho ekonakono okwa li li na ashike okuningwa, naashi oshe tu kwafela tu ude ko kutya oli li oshinima sha kwata moiti.” Ounona navo otava dulu yo okuyambidida elandulafano olo opo li kale li na omupondo. Oukwaneumbo umwe omo mwa li ounona omuwoi okwa li hau penduka alushe ponhano opo u ninge ekonakono loukwaneumbo molwaashi kapa li vali efimbo limwe tali shiiva.
8 Opo ekonakono loukwaneumbo li kale li na omupondo, oo e li omutwe woukwaneumbo oku na ‘okupashukila enongeko laye.’ (1 Tim. 4:16) Elongifwambo Ministry School, epandja 32, otali ti: “Otaku dulu ku tiwe kutya ekonakono loukwaneumbo li na omupondo ohali tameke nokukonakona eemhumbwe doukwaneumbo woye. Mbela oilyo youkwaneumbo woye otai xumu komesho pamhepo ngahelipi? . . . Ngeenge u li moukalele womomapya nounona voye, mbela ohava kala va mbilipalelwa okuliulika moipafi yoomakula vavo kutya vo ove li Eendombwedi daJehova? Mbela ohava hafele elandulafano leni loukwaneumbo lokulesha nokukonakona Ombibeli? Mbela otava ningi ondjila yaJehova ondjila yokukalamwenyo kwavo? U li omutwe woukwaneumbo, okukonakona nawa otaku ke ku hololela osho wa pumbwa okuninga opo u mone omaukwatya opamhepo oo u na okutunga nao oshilyo keshe shoukwaneumbo.”
9 Okwoongala kweongalo: Okulilongekidila okwoongala kweongalo nokukala puko oku na okukala oshitukulwa sha fimana shelandulafano leni loshivike keshe. (Heb. 10:24, 25, NW ) Omafimbo amwe, otashi dulika tamu dulu okulilongekidila okwoongala kumwe mu li oukwaneumbo. Ponhele yokuteelela fiyo omunute waxuuninwa, itamu dulu mbela okupangela omhangela mu lilongekide nawa komesho yefimbo? Elandulafano liwa li na sha naasho, otali xwepopaleke okulilongekida kweni notali mu kwafele mu mone ouwa muhapu mokwoongala.—Omayel. 21:5.
10 Elandulafano loinima yopamhepo li na omupondo ololo tali landulwa noukeka nosho yo noudiinini. Ongahelipi ngeenge eenghalo tadi shi ningi shidjuu okulilongekidila okwoongala akushe? Elongifwambo Ministry School, epandja 31, oli na eetepo eli tali ti: “Henuka omwiyo wokutala omauyelele neendelelo opo ashike u mane ile osho shii unene, wokuhakonakona nande umwe womuo molwaashi ito dulu okuninga ashishe. Ponhele yaasho, tala kutya oto dulu okukonakona shi fike peni noku shi ninga nawanawa. Shi ninga oshivike keshe. Mokweendela ko kwefimbo, kendabala okutamununa mo elandulafano loye opo u kwatele mo okwoongala kukwao.”
11 Ngeenge omaukwaneumbo ohaa fiki kuyele kokwoongala, eshi ohashi kwafa oku a kaleka nomadiladilo mawa opo a hambelele Jehova noku mone ouwa mehongo olo ha yandje. Mbela oukwaneumbo woye ou na onghedindjikilile yoku shi ninga? Otashi pula okuninga elongekido liwa nosho yo elongelokumwe laaveshe moukwaneumbo. Ngeenge owa didilika luhapu kutya oukwaneumbo woye ohau endelele nai nohau kala wa djuupalelwa keenguloshi dokwoongala, mbela itaku dulu okuningwa omalunduluko melandulafano leni? Mbela ope na oinima oyo tai dulu okuningwa komesho yefimbo? Ngeenge oshilyo shimwe shoukwaneumbo osha wilililwa po koinakuwanifwa ihapu, mbela ikwao itai dulu oku shi kwafela? Mbela okudjuupalelwa itaku xwepopala ngeenge keshe umwe okwa kala e lilongekida okuuya kuyele kokwoongala? Elandulafano liwa otali kwafa okukaleka po omhepo yombili moukwaneumbo nosho yo meongalo.—1 Kor. 14:33, 40.
12 Oilonga yomomapya: Okutula po omafimbo okondadalunde okukufa ombinga moukalele oku li yo oshitukulwa shimwe shelandulafano liwa loinima yopamhepo. Omulumenhu umwe omunyasha Jayson okwa dimbuluka ta ti: “Moukwaneumbo wetu, ongula yOlomakaya keshe oya li ya nuninwa oilonga yomomapya. Eshi osha li shiwa kwaame omolwaashi mokukala handi i moukalele omo mokukala handi mono ouwa oo hau [di muo] nonda dula oku u hafela unene.” Vahapu ovo va tekulwa momaukwaneumbo Eendombwedi ova mona sha faafana kutya okukala nefimbo lokondadalunde molwoukalele oshivike keshe oshe va kwafela va xume komesho ve li ovakalele Ovakriste.
13 Elandulafano liwa otali dulu yo okukwafa okuninga efimbo olo oukwaneumbo woye tau longifa moilonga yomomapya li kale lihafifa notali imike oiimati ihapu. Ongahelipi mbela osho tashi dulu okuningwa? Oshungonangelo ye 1 Juli 1999, epandja 31, oya yandja eetepo tali landula, olo tali ti: “Omafimbo amwe oho longifa mbela efimbo pekonakono loukwaneumbo weni okukwafela oilyo youkwaneumbo weni i lilongekidile oilonga yomomapya yomoshivike? Oku shi ninga otaku dulu okukala ku na oshilonga. (2 Timoteus 2:15) Otaku dulu oku i kwafa i ninge oilonga yayo yomomapya tai ti sha notai eta po sha. Omafimbo amwe, otamu dulu okukala mu na omutumba wekonakono alishe we likalekelwa wokulilongekida kwa tya ngaho. Ashike luhapu pexulilo lekonakono loukwaneumbo ile pomafimbo amwe e lili moshivike, otamu dulu okukundafana pauxupi osho tamu ka ninga moukalele womomapya.” Mbela oukwaneumbo woye owa kendabala okuninga ngaho?
14 Twikileni okuninga exumokomesho: Meenghundafana edi, mbela owa mona eenghedi omo oukwaneumbo woye tau ningi nawa? U pandula nokukendabala okutungila keenghedi odo. Ngeenge owa mona eenghedi dihapu odo exwepopalo la pumbiwa, hoolola onghedi imwe ile mbali nokuungaunga nado tete. Ngeenge oda ningi oshitukulwa shelandulafano leni loinima yopamhepo, ungaunga natango nonghedi vali imwe ile mbali. Kala u na omukumo nosho yo ondjele. (Fil. 4:4, 5) Okutula po elandulafano liwa loinima yopamhepo omolwoukwaneumbo woye otashi pula eenghendabala shili ndele oshi na oshilonga, omolwaashi Jehova ota shilipaleke ta ti: “Naau e he na oshipo mokweenda kwaye, oye tuu ou handi monifile exupifo laKalunga.”—Eps. 50:23.