Efimbo lEdimbuluko oli li omhito iwa yokutamununa mo oukalele wetu!
1. Omolwashike tu na okutamununa mo oukalele wetu muMarsa, Aprili nosho yo Mei?
1 Mbela ito dulu okutamununa mo oukalele woye pefimbo lEdimbuluko, muMarsa, Aprili ile muMei? Ovaudifi vamwe otashi dulika va ka kale ve li mefudo loilonga ile lofikola nefimbo olo tava dulu oku li longifa moukalele. Okuhovela momafiku 2 Aprili, otapa ka ningwa oshikonga she likalekelwa shokushiva ovanhu ovo ve na ohokwe ve uye kEdimbuluko momafiku 17 Aprili. Olomakaya, 16 Aprili, otali ka kala efiku le likalekelwa lokuyandja oifo. Konima yEdimbuluko, natu ka kendabaleni okukulika ohokwe yaavo tave ke uya kEdimbuluko noku va shiva koshipopiwa she likalekelwa osho tashi ka yandjwa moshivike osho tashi hovele nomafiku 25 aAprili. Doshili, otu na omatomheno mahapu okutamununa mo oukalele wetu muMarsa, Aprili nosho yo Mei.
2. Onghedi imwe ya denga mbada ilipi omo hatu dulu okutamununa mo oukalele wetu?
2 Oukwafelikokolindjila: Onghedi imwe ya denga mbada omo hatu dulu okutamununa mo oukalele wetu oyo okukufa oukwafelikokolindjila. Molwaashi atusheni ohatu kala nomalipyakidilo mahapu, ohatu ka pumbwa okuninga omalongekido komesho yefimbo nokuninga po omalunduluko shi na sha nomalipyakidilo etu. (Omayel. 21:5) Oto dulu okuundulila komesho omalipyakidilo oye amwe akwalukeshe oo inaa fimana. (Fil. 1:9-11) Omolwashike ito lombwele vamwe meongalo kutya owa hala okukufa oukwafelikokolindjila opo mu dule okukokola ondjila pamwe navo?
3. Ongahelipi omaukwaneumbo taa dulu okuliunganeka opo a dule okutamununa mo oukalele wao?
3 PEkonakono lOukwaneumbo weni tali landula, otamu dulu okukundafana omalalakano oo mwa hala okulitulila po mu li oukwaneumbo. (Omayel. 15:22) Ngeenge amushe omwa longele kumwe, otashi dulika oilyo imwe youkwaneumbo i kufe oukwafelikokolindjila omwedi umwe ile dihapu. Ndele mbela ongahelipi ngeenge omwa mona kutya kape na oo ta dulu okukufa oukwafelikokolindjila moukwaneumbo weni? Otamu dulu okuninga omalongekido opo mu dule okutamununa mo oukalele weni mokukala hamu longo momapya keenguloshi dimwe ile mu kale hamu longo efimbo lile moukalele mexuliloshivike.
4. Omanangeko noupuna elipi hatu ka mona ngeenge otwa tamununa mo oukalele wetu pefimbo lEdimbuluko?
4 Jehova oha didilike eenghendabala detu doku mu longela noha pandula yo omaliyambo oo hatu ningi. (Heb. 6:10) Ohashi tu etele ehafo ngeenge hatu pe sha Jehova nosho yo vamwe. (1 Omaf. 29:9; Oil. 20:35) Mbela ito dulu okutamununa mo oukalele woye pefimbo lEdimbuluko opo u hapupalife ehafo loye nokumona omanangeko noupuna oo haa di moilonga yokuudifa?