“Kaleni nombili novanhu aveshe”
1. Omayele Ombibeli elipi tu na okutula moilonga ngeenge otwa shakeneke omuneumbo oo a handuka?
1 Oshiwana shaJehova oshi hole ombili noukalele wetu owombili. (Jes. 52:7) Ndele nande ongaho, omafimbo amwe ovanhu ohava kala ve tu handukila molwaashi twa ya komaumbo avo. Oshike tashi tu kwafele tu kale ovanambili meenghalo da tya ngaho? — Rom. 12:18.
2. Omolwashike sha fimana okuuda ko eenghalo dovanhu?
2 Kala ho udu ko eenghalo dovanhu: Nonande vamwe ohava kala va handuka molwaashi ve li omhinge noshili, vamwe otashi dulika va kenyananekwa koinima imwe ihe fi etumwakala letu. Otashi dulika twa ya peumbo lavo pefimbo la puka. Omuneumbo otashi dulika a handuka omolwomaupyakadi aye opaumwene. Nokuli nonande onghundana iwa oyo ye mu handula, otu na okudimbuluka kutya oku udite ngaho molwaashi okwa pukifwa. (2 Kor. 4:4) Okuuda ko eenghalo dovanhu otaku ke tu kwafela tu kale twa ngungumana nokumona kutya omuneumbo hafye a handukila. — Omayel. 19:11.
3. Ongahelipi hatu dulu okuulika kutya otwa fimaneka omuneumbo?
3 Kala u na efimaneko: Ovanhu vahapu ova nwefwa mo neenghono komaitavelo avo. (2 Kor. 10:4) Ashike ove na emanguluko lokutokola kutya ova hala okupwilikina ile hasho. Inatu kala twa dina eitavelo lomuneumbo ile tu ulike kutya otu na eshiivo lihapu li dule laye. Ngeenge okwe tu lombwele tu fiye po onhele yaye, natu shi ninge nefimaneko.
4. Okupopya nombili osha hala okutya shike?
4 Popya nombili: Nokuli nonande ove tu ule oinima ii, otu na oku va nyamukula nombili. (Kol. 4:6; 1 Pet. 2:23) Ponhele yokukala tamu patafana, tala kutya omoinima ilipi tamu tu kumwe naye. Ohatu dulu okupula omuneumbo nefimaneko kutya omolwashike ta pataneke oshinima shonhumba. Ndele opo u henuke okukala tamu tu eemhata naye, omafimbo amwe oshiwa okuxulifa po eenghundafana. — Omayel. 9:7; 17:14.
5. Omauwa elipi haa di mokukala ovanambili ngeenge tu li moukalele?
5 Ngeenge otu li ovanambili, omuneumbo otashi dulika aha dimbwe nghee twa li twa ungaunga naye nota ka pwilikina kwaao te ke mu pa vali oundombwedi moshikando tashi landula. (Rom. 12:20, 21) Nokuli nonande ote tu pataneke, fiku limwe oshi na oupu a ka ninge omumwatate. (Gal. 1:13, 14) Kashi na nee mbudi kutya omunhu oo ona ka kale e na ohokwe moshili ile hasho, ngeenge otwa kala tu na elipangelo notu li ovanambili ohatu ka fimanekifa Jehova nosho yo elongelokalunga letu. — 2 Kor. 6:3.