Nghee hatu dulu okulongifa okambo Oolyelye tava longo ehalo laJehova kunena?
Okambo oko kape oka nuninwa okukwafela ovakonakonimbibeli va shiive ehangano
1. Okambo Oolyelye tava longo ehalo laJehova kunena? oka nyanyangidwa omolwomatomheno atatu elipi?
1 Mbela owa hovela ngoo okulongifa okambo oko kape ke na oshopalanyole: Oolyelye tava longo ehalo laJehova kunena? Elalakano lako (1) okukwafela ovakonakonimbibeli va shiive nawa Eendombwedi daJehova, (2) ve lihonge kombinga yoilonga yetu nosho yo (3) oku va ulikila nghee ehangano letu hali longo. Okambo Oolyelye tava longo ehalo laJehova kunena? keshe pepandja ope na oshileshwa osho tashi dulu okukundafanwa noupu meni lominute 5 ile 10 pexulilo lekonakono keshe.
2. Hokolola nghee okambo oko ka unganekwa nosho yo oitukulwa yako.
2 Nghee ka unganekwa: Okambo oko oka tukulwa moitukulwa itatu, oyo keshe shimwe shomuyo sha kundafana oshinima shi lili shi na sha nehangano laJehova ngaashi sha ulikwa pombada. Oshipalanyole shoshileshwa keshe shomoileshwa 28 oshi li molupe lepulo, noupalanyole va laulikwa ovo va landulwa kenyamukulo lepulo. Omu na omafano a dja moilongo i dule 50 oo taa ulike nghee hatu longo oilonga yetu mounyuni aushe. Oileshwa ihapu oi na okamhungu “Lihonga shihapu,” oko ke na omaetepo oo to dulu okuladipikila omukonakonimbibeli woye e a tule moilonga.
3. Ongahelipi hatu dulu okulongifa okambo Oolyelye tava longo ehalo laJehova kunena?
3 Nghee to dulu oku ka longifa: Oto dulu okuhovela mokuulikila omukonakoni epulo olo li li oshipalanyole shoshileshwa. Opo nee eshi wa lesha oshileshwa pamwe naye, divilika oupalanyole ovo va laulikwa. Xuuninwa, kundafaneni omapulo eendululo oo e li pedu lepandja. Oto dulu okulesha oshileshwa ashishe ile u shi leshe noku shi kundafana moutukulwa. Longifa eendunge dokuyoolola opo u tale kutya omishangwa dilipi odo da etwa mo mu na okulesha. Ino dimbwa okukundafana omafano nosho yo okamhungu “Lihonga shihapu.” Peemhito dihapu, oileshwa otai dulu okukundafanwa melandulafano. Ndele kala wa manguluka okutaulukila koshileshwa shi li komesho osho sha kundafana oshinima osho omunhu e na ohokwe musho pefimbo opo. Pashihopaenenwa, ngeenge oshoongalele oshi li popepi, otamu dulu okutaulukila koshileshwa 11.
4. Omolwashike wa hafa eshi u na oshilongifo osho shipe?
4 Ngeenge hatu konakona Ombibeli naumwe, ohatu mu kwafele opo a shiive nawa Tate yetu womeulu. Ndele otu na yo oku mu honga kombinga yehangano laJehova. (Omayel. 6:20) Inatu hafa tuu eshi tu na oshilongifo shipe osho she tu pupalekela okuninga ngaho!