Oolyelye tava longo ehalo laJehova kunena?
1. Ongahelipi hatu dulu okumona ouwa eshi hatu konakona okambo Oolyelye tava longo ehalo laJehova kunena?
1 Omaukwaneumbo ile oohandimwe otava dulu okukonakona oshishangomwa Oolyelye tava longo ehalo laJehova kunena? shi li oshitukulwa shelongelokalunga loukwaneumbo ile ekonakonombibeli lopaumwene. Oshishangomwa osho shipe, osho sha li sha pita poshoongalele “Amena omutima woye!,” osha nuninwa okukwafela ovakonakonimbibeli va nanenwe kehangano laJehova. Ngeenge otwe shi konakona, otashi ke tu kwafela tu kale tu na olupandu eshi tu li oshitukulwa shehangano laJehova, notashi ke tu kwafela yo tu shi longife nawa moukalele. — Eps. 48:14.
2. Oshishangomwa eshi otashi dulu okulongifwa ngahelipi pelongelokalunga loukwaneumbo ile pekonakonombibeli lopaumwene?
2 Nghee tashi dulu okukonakonwa: Omaukwaneumbo ile oohandimwe otaa dulu okukala ha konakona oshileshwa shimwe moshivike keshe shi li oshitukulwa shelongelokalunga loukwaneumbo ile ekonakonombibeli lopaumwene. Omutwe woukwaneumbo otau dulu okukala hau twala mo eenghundafana di na sha noshileshomwa eshi mokulesha oshipalanyole shoshileshwa keshe osho shi li molupe lepulo. Opo nee ota dulu okupula umwe moukwaneumbo a leshe okatendo kotete, ye ta pula epulo olo a longekidila okatendo oko. Okudja opo, outendo ovo va hovela neendada odo da laulikwa, otava dulu okukundafanwa kookamwe. Konima ngeenge okatendo ka leshwa, oukwaneumbo otau dulu okukundafana nghee taka tu kumwe noshipalanyole shoshileshwa. Oshishangomwa eshi oshi na yo omafano mahapu, notashi ka kala shiwa okukundafana omafano oo. Osha fimana okulesha omishangwa odo da fimanenena, ngeenge efimbo leni otali shi pitike. Lwopexulilo loshileshwa keshe, oshiwa oukwaneumbo u tale ngeenge otau dulu okunyamukula omapulo oo e li pedu lepandja. Ngeenge moshileshwa omu na okamhungu “Lihonga shihapu,” oshiwa mu ka leshe nokukundafana kombinga yanghee taka dulu okukwafela ovakonakonimbibeli. Pexuliloelela lekonakono, otamu dulu okweendulula epulo olo li li oshipalanyole, opo mu ngonge osho mwe lihonga. Natu dimbulukeni kutya osho sha kundafanwa metetekelo oshi li ashike eetepo li na sha nanghee oshishangomwa eshi tashi dulu okukonakonwa pelongelokalunga loukwaneumbo ile pekonakonombibeli lopaumwene; ndele nande ongaho, oukwaneumbo otau dulu oku li vyula she likolelela keemhumbwe doukwaneumbo. Osho inashi hala okutya ou oo omukalo oo tu na okulandula ngeenge hatu longifa oshishangomwa eshi mokuninga omakonakonombibeli.
3. Ongahelipi hatu dulu okumona ouwa pauyadi mokukonakona oshishangomwa eshi?
3 Opo oukwaneumbo aushe u mone ouwa pauyadi, oshilyo keshe osha pumbwa okukufa ombinga nexwamo meenghundafana. Pefimbo leenghundafana odo, diladileni kutya ouwa ulipi ovakonakonimbibeli tava dulu okumona moileshwa oyo tamu kundafana. Otwe lineekela kutya eenghundafana da tya ngaha otadi ke tu kwafela opo tu kale twe lilongekida okukwafela vamwe ve tu waimine mokulonga ehalo laKalunga nova ka kale nomwenyo fiyo alushe. — 1 Joh. 2:17.