Nghee okabroshure kape taka ka yandjwa
1. Oshishangomwa shilipi hatu ka yandja muNovemba, nelalakano loshishangomwa osho olashike?
1 Poshoongalele shoshitukulwa shomo 2009, osho sha li shi na oshipalanyole “Kaleni oupafi!” opa li pa yandja okabroshure ke na oshipalanyole Ombibeli oi na etumwalaka lilipi? MuNovemba, omaongalo mounyuni aushe otaa ka yandja okabroshure oko oshikando shotete. Ongahelipi okabroshure oko taka ka etela ouwa ovanhu vomoshitukulwa shetu? Ovanhu vahapu, unene tuu ovo ve li meengeleka dihe fi dOukwakriste, kave shii lela Ombibeli. Onghee hano, epandja 3 otali yelifa kutya okabroshure oko oka nyanyangidwa nelalakano lokukwafela omunhu a shiive kutya “Ombibeli oi na lela etumwalaka lilipi.”
2. Ongahelipi hatu dulu okuyandja okabroshure oko?
2 Nghee hatu dulu okuyandja okabroshure oko: Ohatu dulu okutya: “Mbela oto ti ngahelipi shi na sha naashi tashi popiwa momushangwa ou? [Lesha 2 Timoteus 3:16.] Ovanhu vahapu otava tu kumwe neendjovo odo, ashike vamwe ohava ti kutya Ombibeli embo ashike liwa. Ove oto ti ngahelipi shi na sha nOmbibeli? [Teelela omunhu a nyamukule.] Kashi na nee mbudi kutya otwa itavela shike melongelokalunga letu, otu na omatomheno mawa okukonakona Ombibeli paumwene. [Lesha etwalemo olo li li pehovelo lepandja 3.] Eshi to lesha etumwalaka olo tali hangwa mOmbibeli olo la ngongwa pauxupi monghedi itunhula moshishangomwa osho, oto ka didilika oshinima shihokwifa, osho kutya: Ombibeli oi na ashike enenediladilo netumwalaka limwe.”
3. Etwalemo vali limwe lilipi hatu dulu okulongifa ngeenge hatu yandje okabroshure, naunene tuu moitukulwa omo ovanhu vahapu vehe li momalongelokalunga Oukwakriste?
3 Etwalemo limwe vali olo hatu dulu okulongifa, naunene tuu ngeenge hatu udifile moitukulwa omo ovanhu vahapu ve li momalongelokalunga ehe fi Oukwakriste, ole li kutya: “Otwa hala okuuda kutya oto ti ngahelipi kombinga yaashi sha popiwa mOmishangwa (ile membo eli liyapuki). [Lesha Epsalme 37:11.] Mbela oto diladila kutya kombada yedu otaku ka kala kwa tya ngahelipi ngeenge exunganeko olo ola wanifwa? [Teelela omunhu a nyamukule.] Exunganeko olo olimwe lomomaxunganeko Ombibeli olo tali dulu okweetela ovanhu vomihoko adishe nosho yo vomaitavelo aeshe eteelelo nehekeleko.” Lesha etwalemo olo li li pombada pepandja 3, opo nee pa omunhu okabroshure.
4. Ongahelipi hatu dulu okulongifa okabroshure oko opo tu hovele omakonakonombibeli?
4 Nghee hatu dulu okuhovela omakonakonombibeli: Ngeenge to ningi elishuneko komunhu oo wa li wa pa okabroshure, oto dulu oku mu dimbulukifa osho mwa li mwa kundafana shike oshikando sha dja ko, opo nee, kundafana naye okatendo kamwe ile vavali voshikundafanwa osho mwa li mwa tamu popi kombinga yasho, to longifa omapulo oo e li pexulilo loshileshwa osho. Ile, ngeenge pomhito opo owa hala okupa omuneumbo oo embo Ombibeli otai hongo, oto dulu okulesha pamwe naye outendo ovo ve li koshipeko kexulilo lokabroshure, ndele to mu pe embo olo. Opo nee, mu pula kutya oshipalanyole shetukulwa shilipi a hokwa membo omo, ndele tamu kundafana naye okatendo kamwe ile vavali vetukulwa olo. Atusheni natu kufeni ombinga pauyadi mokuyandja okabroshure oko momwedi waNovemba!