NGHEE HATU DULU OKWEEFA PO OUTONDWE

1 | Kala Uhe Na Onhondo

Osho Ombiibeli tai ti:

“Kalunga ke na okatongo, ndele oha tambula ko omunhu womoshiwana keshe oo he mu tila noha longo osho sha yuka.” — OILONGA 10:34, 35.

Osho osha hala okutya:

Jehovaa Kalunga ihe tu tokola she likolelela koukwashiwana, komuhoko, koluvala, ile keputuko letu. Ponhele yaasho, oha yandje elitulemo komadiladilo nokomahalo etu, oukwatya wetu womeni. Oshoshili kutya ‘omunhu oha tale osho shokombada, ndelenee Omwene oha tale omutima.’ — 1 Samuel 16:7.

Osho to dulu okuninga:

Nonande ihatu mono momitima, ohatu dulu okukendabala okuhopaenena Kalunga nokukala hatu tale ko vamwe tuhe na onhondo. Kendabala okukala ho tale ko ovanhu pauhandimwe, ponhele yoku va tala ko ve li meengudu. Ngeenge owa didilike kutya ou na etaleko lii li na sha navamwe, li na sha naavo vomomuhoko, ile vomoshiwana shimwe, ilikana kuKalunga e ku kwafele u efe po etaleko lii la tya ngaho. (Epsalme 139:23, 24) Ngeenge owa pula Jehova wa mana mo e ku kwafele u kale uhe na onhondo, oto dulu okukala noushili kutya ota ka pwilikina keilikano loye note ke ku kwafela. — 1 Petrus 3:12.

a Jehova olo edina laKalunga. — Epsalme 83:18, NW.

“Inandi kala nande onale omutumba pamwe nomutilyane tu na ombili . . . Paife ondi li oshitukulwa shoumwainafana womounyuni aushe, oo u holafane.” — TITUS

Oshimoniwa shoshili—TITUS

Okwa efa po outondwe

Titus okwa li a handuka neenghono shi na sha neemhango dihe li pauyuki doukwamuhoko, onghee okwa li a waimina vamwe ovo ve hole elongifo leenghono, ovo va li ve udite ngaashi ye. Okwa ti: “Otwa li hatu i keenhele odo di li modoolopa oko inaku pitikilwa ovalaule, ngaashi keehotela nokee-bar, opo tu ka tukule olwoodi.” Titus okwa ti kutya okwa li e yadi outondwe nowe mu ningifa a kale e hole elongifo leenghono, okwa we da ko a ti: “Ngeenge twa li twa hovele eenhamanana naumwe, omulumenhu, ile omukainhu, aame alushe nda li handi umbu ongonyo tete.”

Titus okwa hovela okuninga omalunduluko, eshi a hovela okukonakona Ombiibeli nEendombwedi daJehova. Eshi a lesha Ombiibeli oye mu ningifa a kale e na etaleko li lili. Okwa li unene a kumwa keudaneko li na sha nonakwiiwa eshi ‘efyo itali ka kala po vali, ile oluhodi, okulila nouyahame itau ka kala po vali.’ — Ehololo 21:3, 4.

Potete osha li shidjuu kuTitus okweefa po outondwe momutima waye. Okwa ti: “Osha li shidjuu neenghono okulundulula onghedi omo handi diladila nohandi katuka.” Ashike okwa li a kwafelwa kwaasho e lihonga mOilonga 10:34, 35, oyo tai ti kutya Kalunga ke na okatongo.

Oshidjemo osha li shike? Titus okwa yelifa a ti: “Onda li nda tomhwa kutya Eendombwedi daJehova odi li melongelokalunga lashili, eshi nda mona ohole oyo hadi ulikilafana, kashi na nee mbudi kutya odo momuhoko ulipi, ile odi na oluvala lilipi. Nokuli ofimbo inandi ninginifwa ndi li Ondombwedi, omutilyane umwe meongalo okwa li a shiva nge keumbo laye tu ka lye pamwe. Osha li sha fa ondjodi. Inandi kala nande onale omutumba pamwe nomutilyane tu na ombili, ndele onda li nda dula okukala meumbo laye hatu li pamwe. Paife ondi li oshitukulwa shoumwainafana womounyuni aushe, oo u holafane.”