Ulika kutya owa pandula Jehova eshi ha yandje

JEHOVA oKalunga ha yandje. (Jakob 1:17) Oinima oyo a shita otai ulike kutya oha yandje. Okwa yadifa evalelwa neenyofi, nokwa yadifa ombada yedu noimeno ihapu ya wapala. — Epsalme 65:13, 14; 147:7, 8; 148:3, 4.

Omushangi wEpsalme 104 okwa pandula Jehova omolwoinima aishe oyo a shita, onghee oshe mu linyengifa a shange eimbilo tali tange Jehova. Mbela ngeenge to lesha epsalme olo oho pandula ngaashi omupsalme oo? Okwa ti: “Ame onda hala okwiimbila Omwene, fimbo ndi nomwenyo, nokutanga Kalunga kange, fimbo ndi li po.” (Epsalme 104:33) Mbela naave ino hala okuninga sha faafana?

OSHIHOPAENENWA SHA SHIYA KO SHI NA SHA NOKUYANDJA

Jehova okwa hala tu hopaenene onghedi yaye yokuyandja. Okwe tu pa omatomheno mawa okukala hatu yandje. Okwa nwefa mo omuyapostoli Paulus a shange kutya: “Oipuna yomounyuni ou va kumaida, ve he linenepeke, navali va ha tule elineekelo lavo moupuna kau fi kulineekelwa, ndelenee nave lineekele Kalunga omunamwenyo, ou he tu pe pauyadi aishe yoku tu hafifa, vo nava longe ouwa, va ninge oipuna yoilonga iwa, va ninge ovayandji nokutukulilafana, vo ve lituvikilile emona tali ningi ekanghameno liwa laayo yokomesho, opo va mone omwenyo waalushe.” — 1 Timoteus 6:17-19.

Paulus okwa yelifa monhumwafo yaye onhivali oyo a shangela Ovakorinto kutya otu na okuyandja ngahelipi. Okwa ti: “Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo.” (2 Ovakorinto 9:7) Oolyelye hava mono ouwa ngeenge hatu yandje? Paulus okwa ti kutya ohatu kwafele vamwe ngeenge hatu va pe osho va pumbwa, ndele nafye vene ohatu mono ouwa molwaashi Jehova ote ke tu nangeka noupuna. — 2 Ovakorinto 9:11-14.

Paulus okwa ulika koshihopaenenwa sha shiya ko shaKalunga shokuyandja eshi a ti: “Kalunga na pandulilwe oshali yaye i he fi kutumbulwa.” (2 Ovakorinto 9:15) “Oshali” yaJehova oya kwatela mo oinima aishe iwa oyo e tu pa okupitila muJesus Kristus. Kape na oitya nomatumbulo oyo tai dulu okuyelifa ongushu yoshali oyo moule.

Ongahelipi hatu dulu okuulika kutya otwa pandula kwaasho Jehova naJesus ve tu ningila nosho yo osho tave ke tu ningila monakwiiwa? Onghedi imwe omo hatu dulu okuninga ngaho omokulongifa efimbo letu, eenghono detu noinima yetu yopamaliko mokulongela Jehova nomokukwafela vamwe ve mu shiive. Ohatu dulu okuninga ngaho kutya nee otu na shihapu ile oshinini. — 1 Omafimbo 22:14; 29:3-5; Lukas 21:1-4.

Eenghedi Dimwe Omo Vamwe Hava Yambidida Oilonga Yomounyuni Aushe

Ngaashi Ovakriste vomefelemudo lotete, vahapu kunena ohava tuvikile sha ile ve litulile po omuvalu wonhumba woimaliwa oyo va tokola okukala tava tula mokakefa kOmayambidido Oilonga yomOunyuni Aushe. (1 Ovakorinto 16:2) Omwedi keshe, omaongalo ohaa tumu omayambidido oo keembelewa dEendombwedi daJehova domoilongo yao. Oto dulu yo okutuma omayambidido odikilila kehangano lopaveta olo hali longifwa kEendombwedi daJehova moshilongo sheni. Opo u shiive edina lehangano lopaveta olo hali longifwa kEendombwedi daJehova moshilongo sheni, tala ko-www.pr2711.com ile u kwatafane noshitaimbelewa osho hashi yakula oshilongo sheni. Oto dulu okuyandja omayambidido meenghedi tadi landula:

OMAYAMBIDIDO OO HATU DULU OKUTUMA ODIKILILA

Omayambidido oo taa ningwa paelektronika, okulongifa okakalata kodebit ile kocredit. Moilongo imwe oto dulu yo okuninga ngaho to longifa o-jw.org ile o-Web site imwe vali.
Omayambidido opashimaliwa, oulyenge ile oinima ikwao yondilo. Ou na yo okutuma onhumwafo i li pauxupi omo wa popya kutya oimaliwa noinima ikwao oi li omayambidido.

OMIKALO DIMWE VALI OMO TO DULU OKUYAMBIDIDA

Ope na vali eenghedi dimwe omo to dulu okuyambidida oilonga yOuhamba yomounyuni aushe odo da tumbulwa pedu. Fimbo ino yandja omayambidido, alikana kwatafana tete noshitaimbelewa opo u ude kutya omukalo ulipi tau longo moshilongo sheni. Molwaashi oiteelelwa yopaveta nosho yo eemhango di na sha noifendela oda yoolokafana, osha fimana okuninga ekwatafano novashiivinawa moinima oyo ofimbo ino hoolola onghedi omo wa hala okuyandja.

Omakwashilipaleko: Ngeenge omunhu okwe lishangifa momahangano omakwashilipaleko ile a pendjelwa, ota dulu okushangifa ehangano lopaveta olo hali longifwa kEendombwedi daJehova li kale omufyuululi woimaliwa yaye.

Omatuvikilo okombaanga: Oto dulu okupula ombaanga opo oimaliwa oyo i li koakounta yoye, opendjela yoye ile oyo wa tuvikilifa oule wefimbo lonhumba i fyuululwe po kehangano lopaveta olo hali longifwa kEendombwedi daJehova, to shi ningi metwokumwe noiteelelwa yeembanga domoshilongo sheni.

Oipambuliko nomikuli odo wa ehelwa komahangano onhumba ile kepangelo (Stocks and Bonds): Oto dulu okushanga sha yela nawa kutya oinima oyo nai pewe po ehangano lopaveta olo hali longifwa kEendombwedi daJehova ile kutya nai ninge po yalo ngeenge owa fi.

Oiniwe ngaashi etungo ile edu: Ngeenge owa hala okuyandja omayambidido oinima ya tya ngaho, alikana ninga tete ekwatafano noshitaimbelewa. Oshitaimbelewa osho tashi ka ufa kutya oshinima osho otashi ka longifwa kehangano ile kutya otashi landifwa po sho oshimaliwa tashi ka yambidida oilonga yomounyuni aushe.

Omatestamenti nomikanda dikwao dopaveta di na sha netukulo loikwamaliko (Wills and Trusts): Oto dulu okushanga etestamenti kutya ngeenge owa fi oikwamaliko yoye nai pewe ehangano lopaveta olo hali longifwa kEendombwedi daJehova ile oku li kwatela momikanda dikwao di na sha netukulo loikwamaliko yoye. Ngeenge owa shangifa ehangano lopalongelokalunga momikanda da tya ngaho, otashi dulika uha ka fute oifendela ihapu.

Opo u mone ouyelele muhapu, dengela ile u shangele ko-Accounting Office (ombelewa yomavalulo) kondjukifi oyo ya ulikwa pedu ile u kwatafane noshitaimbelewa osho hashi pashukile oshilongo sheni.