Otu na okwiilikana kombinga
4 Yashike?
OHAKU tiwa kutya eilikano olo Jesus a li a honga ovashikuli vaye ohali endululwa neenghono li dule omailikano aeshe Ovakriste. Kutya nee osho ile hasho, oshihopaenenwa sheilikano osho Jesus a honga ovashikuli vaye, osho omafimbo amwe hashi ifanwa Eindilo lOmwene ile Tate Yetu, osha udiwa ko papuko kovanhu vahapu. Ovanhu omamiliyona keshe efiku ohava popi eendjovo deilikano olo momutwe, tashi dulika hava endulula eilikano olo lwoikando momukokomoko wefiku. Ndele Jesus ka li a lalakanena eilikano olo li kale hali longifwa monghedi ya tya ngaho. Otu shi shii ngahelipi?
Fimbo Jesus a li ina honga ovashikuli vaye eilikano olo, okwa ti: “Ngenge tamu ilikana, [inamu endulula oinima ya faafana, NW].” (Mateus 6:7) Mbela Jesus okwa li a popya oinima tai kondjifafana eshi a li a honga ovashikuli vaye eendjovo odo ve na ngeno okukwata momutwe nokukala have di endulula lwoikando? Hasho nandenande! Ponhele yaasho, Jesus okwa li te tu hongo kutya otu na okwiilikana kombinga yashike nokwe tu ulikila nawa kutya oinima ya fimana ilipi tu na okukaleka momadiladilo ngeenge hatu ilikana. Natu ka konakoneni nawa osho a li a popya. Eilikano olo otali hangwa muMateus 6:9-13.
“Tate yetu ou u li meulu! Edina loye nali yapulwe.”
Kungaho Jesus okwa li a dimbulukifa ovashikuli vaye kutya omailikano aeshe oku na okuyukifwa kuXe, Jehova. Ndele mbela ou shii kutya omolwashike edina laKalunga la fimanenena nonokutya omolwashike la pumbwa okuyapulwa, ile okukalekwa liyapuki?
Okudja pehovelo londjokonona yovanhu, edina laKalunga liyapuki ola kala tali shekifwa. Omutondi munene waKalunga, Satana, okwa ti kutya Jehova omunaipupulu nonokutya oku li omupangeli e lihole ye mwene oo ehe na lela oufemba wokupangela oishitwa yaYe. (Genesis 3:1-6) Ovanhu vahapu otava yambidida Satana, mokuhonga vamwe kutya Kalunga ke na ko nasha novanhu, omukwanyanya, noku na onghone ile tava patana filufilu kutya Kalunga oye Omushiti. Vamwe ove li filufilu omhinge nedina laKalunga, Jehova, ve li kufa mo momatoloko avo Eembibeli nohava kelele vamwe oku li longifa.
Ombibeli otai ulike kutya Kalunga ota ka yukifa okuhenouyuki akushe. (Hesekiel 39:7) Eshi ta ka ninga ngaho, ota ka wanifa po eemhumbwe doye adishe nota ka kandula po omaupyakadi oye aeshe. Mbela osho ote ke shi ninga ngahelipi? Eendjovo deilikano laJesus tadi landula otadi ka nyamukula epulo olo.
“Ouhamba woye nau uye.”
Kunena, ope na engwangwano linene mokati kovahongi vomalongelokalunga ngeenge tashi uya pOuhamba waKalunga. Ndelenee ovapwilikini vaJesus ova li ve shi shii nawa kutya ovaprofeti vaKalunga ova li va xunganeka nale kutya Messias, Omuxupifi oo a nangekwa po kuKalunga, ota ka ninga Ohamba yOuhamba oo tau ka lundulula ounyuni. (Jesaja 9:5, 6; Daniel 2:44) Ouhamba oo otau ka yapulifa edina laKalunga mokunyaneka pomutenya oipupulu yaSatana notau ka xulifa po Satana nosho yo oilonga yaye. Otau ka xulifa po yo oita, omikifi, ondjala nosho yo efyo nokuli. (Epsalme 46:10; 72:12-16 Jesaja 25:8; 33:24) Onghee hano, ngeenge to ilikana Ouhamba waKalunga u uye, oto ilikana opo omaudaneko aeshe oo a wanifwe.
“Ehalo loye nali wanifwe kombada yedu yo ngaashi meulu.”
Eendjovo daJesus otadi ulike kutya ehalo laKalunga otali dulu okulongwa kombada yedu ngaashi meulu, omo Kalunga ha kala. Ehalo laKalunga otali longwa meulu molwaashi Omona waKalunga okwa lwifa Satana novalanduli vaye, nokwe va umbila kedu. (Ehololo 12:9-12) Ngaashi oitukulwa ivali yotete yoshihopaenenwa sheilikano, oshitukulwa eshi oshititatu otashi tu kwafele tu yandje elitulemo koshinima sha fimana, sha hala okutya, okulonga ehalo laKalunga ndele haletu. Oshi li ehalo laKalunga okweetela oishitwa yaye aishe ouwa munenenene. Onghee hano, nokuli naJesus oo a wanenena okwa popya shi na sha naXe a ti: “Hahalo lange, ndelenee oloye.” — Lukas 22:42.
“Omungome wetu womafiku aeshe u tu pa yo nena.”
Jesus okwa li a ulika kutya otu na yo okwiilikana shi na sha neemhumbwe detu dopaumwene. Inashi puka okwiilikana kombinga yeemhumbwe detu defiku keshe odo twa pumbwa shili. Doshili, okuninga ngaho otashi tu dimbulukifa kutya Jehova oye “ha yandjele ovanhu aveshe omwenyo nomufudo noinima aishe.” (Oilonga 17:25) Ombibeli otai ulike kutya oku li omudali omunahole oo ha hafele okupa ovana vaye osho va pumbwa. Ndele ngaashi omudali omunahole, Jehova ita ka nyamukula omaindilo oo itae tu etele ouwa.
“Tu kufila po omatimba etu.”
Mbela owa nyona ngoo lela kuKalunga? Mbela owa pumbwa ngoo ediminepo? Ovanhu vahapu kunena kave udite ko kutya oulunde oshike nonokutya owa kwata moiti shi fike peni. Ndele Ombibeli otai hongo kutya oulunde oo wa etifa omaupyakadi a kwata moiti oo hae tu hange, molwaashi oulunde oo naanaa hau etifa efyo. Molwaashi atusheni otwa dalwa moulunde, ohatu nyono lwoikando, nohatu dulu ashike okukala neteelelo loku ka kala fiyo alushe ngeenge Kalunga okwe tu dimine po. (Ovaroma 3:23; 5:12; 6:23) Ndele otashi tulumukifa okushiiva kutya Ombibeli otai ti: “Omwene, Ove u nonghedi iwa, u yadi ekufilo.” — Epsalme 86:5.
“Tu xupifa mowii.”
Mbela owa didilika ngoo kutya owa pumbwa eameno laKalunga meendelelo shi fike peni? Ovanhu vahapu inava itavela kutya ‘omunawii,’ Satana, oko e li shili. Ndelenee Jesus okwa honga kutya Satana oko e li shili, nokwe mu ifana nokuli “omupangeli wounyuni ou.” (Johannes 12:31; 16:11) Satana okwa pukifa ounyuni ou u li mepangelo laye, nokwa halelela oku ku pukifa opo uha kale nekwatafano lopofingo naXo, Jehova. (1 Petrus 5:8) Ndele Jehova oku na eenghono dinene e dule Satana nokwa halelela okwaamena ovo ve mu hole.
Engongo olo li li pauxupi loitwa ya fimanenena yoshihopaenenwa sheilikano laJesus inali kwatela mo oinima aishe oyo tu na okukwatela meilikano. Dimbuluka kutya 1 Johannes 5:14 okwa popya kombinga yaKalunga a ti: ‘Ngenge hatu mu indile sha pahalo laye, ote tu udu.’ Onghee hano, ino fika pexulifodiladilo kutya omaupyakadi oye inaa kwata moiti noitaa dulu okupwilikinwa kuKalunga. — 1 Petrus 5:7.
Ndele mbela ongahelipi shi na sha nefimbo nosho yo onhele opo tu na okwiilikanena? Mbela otu na okukala tu na efimbo lokondadalunde olo tu na okwiilikana nosho yo onhele opo tu na okwiilikanena?