Kristus ota wilike eongalo laye

“Tala, Ame ndi li pamwe nanye omafiku aeshe fiyo okexulilo [longhalelo yoinima, NW].”—MATEUS 28:20.

OMANGA Jesus Kristus, Omuwiliki wetu omunyumunwa ina londa meulu, okwe lihololela ovahongwa vaye ndele ta ti: “Onda pewa eenghono adishe meulu nokombada yedu. Indeni hano ka ningeni ovanhu [vomoiwana aishe] ovalongwa vange, noku va [ninginifa] medina laXe nolOmona nolOmhepo Iyapuki, noku va longa okudiinina aishe ei nde i mu lombwela. Ndele tala, Ame ndi li pamwe nanye omafiku aeshe fiyo okexulilo [longhalelo yoinima].”—Mateus 23:10; 28:18-20, yelekanifa NW.

1, 2. (a) Eshi Jesus omunyumunwa a yandja elombwelo lokuninga ovanhu ovahongwa, oshike a udanekela ovashikuli vaye? (b) Ongahelipi Jesus a wilika eongalo lopaKriste lopetameko?

² Jesus ina yandja ashike oshinakuwanifwa kovahongwa vaye shoshilonga tashi xupifa eemwenyo shokuninga ovanhu vahapu ovahongwa, ndelenee okwa udaneka yo kutya ota kala pamwe navo. Ondjokonona yOukriste wopetameko ngaashi ya shangwa membo lOmbibeli lOilonga, otai ulike nope he na omalimbililo kutya Kristus okwa longifa eenghonopangelo odo a pewa a wilike eongalo olo opo la totwa po. Okwa tuma “omukwafi” oo kwa li a udanekwa—omhepo iyapuki—i nghonopaleke ovashikuli vaye nokuwilika eenghendabala davo. (Johannes 16:7, NW; Oilonga 2:4, 33; 13:2-4; 16:6-10) Jesus omunyumunwa okwa longifa ovaengeli ve li koshi yepangelo laye okuyambidida ovahongwa vaye. (Oilonga 5:19; 8:26; 10:3-8, 22; 12:7-11; 27:23, 24; 1 Petrus 3:22) Kakele kaasho, Omuwiliki wetu okwa yandja ewiliko keongalo mokulongekida ovalumenhu ovo va wana, va longe ve li olutuwiliki.—Oilonga 1:20, 24-26; 6:1-6; 8:5, 14-17.

3. Omapulo elipi taa ka kundafanwa moshitukulwa eshi?

³ Ndele ongahelipi pefimbo letu, ‘exulilo longhalelo yoinima’? Ongahelipi Jesus Kristus ta wilike eongalo lopaKriste kunena? Nongahelipi hatu dulu okuulika kutya otwa tambula ko ewiliko eli?

Omwene oku na omupiya omudiinini

4. (a) Oolyelye ve li “omupiya omudiinini nomunaendunge”? (b) Oshike osho Omwene e lineekelela omupiya e shi file oshisho?

⁴ Eshi a li ta yandje exunganeko li na sha nedidiliko lokukala po kwaye, Jesus okwa ti: “Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo [la wapala, NW]? Omupiya ou e nelao, omwene waye nge ta aluka ngenge te mu hange a ninga ngaha. Oshili handi mu lombwele: Oye te mu ningi elenga loinima yaye aishe.” (Mateus 24:45-47) “Omwene” oye Omuwiliki wetu Jesus Kristus, nokwa nangeka po “omupiya omudiinini nomunaendunge”—ongudu yOvakriste ovavaekwa kombada yedu—i file oshisho oinima yaye yokombada yedu.

5, 6. (a) Memoniko olo omuyapostoli Johannes a mona, “oixwekelwashela i-7 yoshingoldo” nosho yo ‘eenyofi 7’ otai faneke shike? (b) Oshike tashi ulikwa koushili oo kutya ‘eenyofi 7’ odi li meke laJesus lokolulyo?

⁵ Embo lOmbibeli lEhololo otali ulike kutya omupiya omudiinini nomunaendunge oku li mepangelo laJesus Kristus sha yukilila. Memoniko ‘lefiku lOmwene,’ omuyapostoli Johannes okwa mona “oixwekelwashela i-7 yoshingoldo, nomokati koixwekelwashela . . . umwe, a fa Omona wOmunhu” oo ‘meke laye lokolulyo kwa li a kwatela mo eenyofi 7.’ Mokufatululila Johannes emoniko eli, Jesus okwa ti: “Oshiholekwa [shiyapuki, NW] sheenyofi odo 7 we di tala meke lange lokolulyo, noshoixwekelwashela ei i-7 yoshingoldo otashi ti ngaha: Eenyofi odo 7 odo ovaengeli vomaongalo a-7 noixwekelwashela ei i-7 oyo omaongalo a-7.”—Ehololo 1:1, 10-20.

⁶ “Oixwekelwashela i-7 yoshingoldo” otai faneke omaongalo ashili opaKriste oo e li po “mefiku lOmwene,” olo la hovela mo 1914. Ndelenee ongahelipi kombinga ‘yeenyofi 7’? Petameko, oda li da fikamena po ovapashukili aveshe ovo va dalwa pamhepo, ovavaekwa ovo kwa li tava file oshisho omaongalo omefelemido lotete.a Ovapashukili ova li ve li meke laJesus lokolulyo—koshi yepangelo newiliko laye. Heeno, Kristus Jesus okwa wilika ongudu yomupiya. Ndelenee kunena, omuvalu wovapashukili ovavaekwa owa ninipala. Ewiliko laKristus ola fika ngahelipi komaongalo aeshe Eendombwedi daJehova e dule po 93 000 oo e li kongonga yedu?

7. (a) Jesus oha longifa ngahelipi Olutuwiliki opo a yandje ewiliko momaongalo aeshe kombada yedu? (b) Omolwashike taku dulu okutiwa kutya ovapashukili Ovakriste ova nangekwa po komhepo iyapuki?

⁷ Ngaashi sha li mefelemido lotete, kunena okangudu kanini kovalumenhu ovo va wana vomovapashukili ovavaekwa otaka longo ke li Olutuwiliki, olo la fikamena po ongudu yomupiya omudiinini nomunaendunge. Omuwiliki wetu ota longifa Olutuwiliki eli okunangeka po ovalumenhu va wana—kutya nee ovavaekwa nomhepo ile hasho—va kale ovakulunhuongalo momaongalo. Moshinima eshi, omhepo iyapuki oyo Jehova a pa Jesus eenghonopangelo oku i longifa, otai dana onghandangala ya fimanenena. (Oilonga 2:32, 33) Shotete, ovapashukili ove na okukala va wanifa po oiteelelwa oyo ya tulwa po mEendjovo daKalunga, odo da nwefwa mo komhepo iyapuki. (1 Timoteus 3:1-7; Titus 1:5-9; 2 Petrus 1:20, 21) Omaetepopopilo nokunangekwa po ohaku ningwa konima yeilikano nokewiliko lomhepo iyapuki. Kakele kaasho, oohandimwe ovo va nangekwa po ohava yandje oumbangi wokukala ve na oiimati yomhepo. (Ovagalati 5:22) Onghee hano, omayele aPaulus oo taa ti: “Litaleni hano nye vene, nye mu pashukile [oshiunda] ashishe, omo mwa nangekwa kOmhepo Iyapuki,” otaa longo neenghono da faafana kovakulunhuongalo aveshe kutya nee ovavaekwa ile hasho. (Oilonga 20:28) Ovalumenhu ava ohava pewa ewiliko tali di kOlutuwiliki nohava lifa eongalo nehalo liwa. Monghedi ei, Kristus oku li pamwe nafye paife nota wilike eongalo.

8. Ongahelipi Kristus ta longifa ovaengeli okuwilika ovashikuli vaye?

⁸ Jesus oha longifa yo ovaengeli volela okuwilika ovashikuli vaye kunena. Pafaneko loilya neu, efimbo leteyo otali uya ‘pexulilo longhalelo yoinima.’ Oolyelye tava ka longifwa kOmwene okulonga oshilonga shokuteya? Kristus okwa ti: ‘Ovateyi ovo ovaengeli.’ Okwa weda ko ta ti: “Omona wOmunhu ota tumu ko ovaengeli vaye, ndee tava ka ongela mo mouhamba waye omashindo aeshe naava hava nyono ouyuki.” (Mateus 13:37-41) Kakele kaasho, ngaashi ashike omweengeli a li a wilika eenghatu daFilippus opo a mone elenga lokuEtiopia, ope na yo oumbangi muhapu kunena oo tau ulike kutya Kristus ota longifa ovaengeli vaye okuwilika oilonga yOvakriste vashili opo va mone ovo ve na omitima da yuka.—Oilonga 8:26, 27; Ehololo 14:6.

9. (a) Omeenghedi dilipi Kristus ha wilike eongalo lopaKriste kunena? (b) Epulo lilipi tu na okukonakona ngeenge otwa hala okumona ouwa tau di mewiliko laKristus?

⁹ Kashi fi tuu etwomukumo okushiiva kutya Jesus Kristus ota yandje ewiliko kovahongwa vaye kunena okupitila mOlutuwiliki, momhepo iyapuki nosho yo movaengeli! Nokuli nande ovalongeli vaJehova vamwe ova tetwe ko oule wokafimbo kokukala ve na ekwatafano nOlutuwiliki omolwomahepeko ile omolwomatomheno oludi olo, Kristus ota twikila okuyandja ewiliko okupitila momhepo iyapuki nosho yo mekwafo lovaengeli. Ndelenee ouwa oo hau di mewiliko laye ohatu u mono ashike ngeenge otwe li tambula ko. Ongahelipi hatu dulu okuulika kutya otwa tambula ko ewiliko laKristus?

‘Dulikeni nokuliyandja’

10. Ongahelipi hatu dulu okuulika efimano lokufimaneka ovakulunhuongalo va nangekwa po?

¹⁰ Omuwiliki wetu okwa yandja “eeshali odo di li ovanhu” komaongalo—‘vamwe ovaengeliste navamwe ovafita navamwe ovalongindjovo.’ (Ovaefeso 4:8, 11, 12, yelekanifa NW.) Oikala nosho yo eenghatu detu di na sha navo, otai ulike sha yela kutya otwa tambula ko ewiliko laKristus ile hasho. Osha yuka lela ‘okukala tu na olupandu’ omolwovalumenhu ovo va wana pamhepo ovo va yandjwa kuKristus. (Ovakolossi 3:15) Ova wana yo okufimanekwa kufye. Omuyapostoli Paulus okwa shanga ta ti: “[Ovakulunhu veongalo, OB-1986] ava hava lele nawa, ove lilongela okufimanekwa shili.” (1 Timoteus 5:17) Ongahelipi hatu dulu okuulika olupandu letu nokufimaneka kwetu ovakulunhuongalo ile ovapashukili meongalo? Paulus okwa nyamukula ta ti: “Dulikeni kovakwatelikomesho veni nokuliyandja kuvo.” (Ovaheberi 13:17, NW) Heeno, otu na okudulika nokuliyandja kuvo.

11. Omolwashike okufimaneka elongekido li na sha novakulunhuongalo ku li oshitukulwa shokukala metwokumwe neninginifo letu?

¹¹ Omuwiliki wetu okwa wanenena. Ovalumenhu ovo a yandja ve li eeshali inava wanenena. Onghee hano omafimbo amwe otava dulu okuninga omapuko. Ndele nande ongaho, osha fimanenena kufye okukanyatela noudiinini kelongekido laKristus. Doshili, okukala metwokumwe neliyandjo nosho yo neninginifo letu otashi ti kutya otwa dimina okukala po kweenghonopangelo da nangekwa po komhepo meongalo nokukala hatu dulika kudo nehalo liwa. Eninginifo letu ‘medina lomhepo iyapuki’ oli li ehepaululo lomoipafi kutya otwa shiiva kutya omhepo iyapuki oshike notwa dimina onghandangala oyo tai dana momalalakano aJehova. (Mateus 28:19) Eninginifo la tya ngaho otali tu pula tu longele kumwe nomhepo notu ha ninge sha osho tashi imbi okulonga kwayo mokati kovashikuli vaKristus. Molwaashi omhepo iyapuki ohai dana onghandangala ya fimanenena momaetepopopilo nomokunangekwa po kwovakulunhuongalo, mbela ohatu dulu okukala ovadiinini keliyandjo letu ngeenge ohatu dopa okulongela kumwe nelongekido li na sha novakulunhuongalo meongalo?

12. Oihopaenenwa ilipi i na sha nokuhafimaneka eenghonopangelo ya popiwa kuJudas, notai tu hongo shike?

¹² Omishangwa odi na oihopaenenwa oyo tai tu hongo efimano lokukala hatu dulika nokuliyandja. Mokupopya ovo va popila mowii ovalumenhu va nangekwa po meongalo, omuhongwa Judas okwa yukifa elitulemo koihopaenenwa itatu tai londwele, ta ti: “Woo kuvo, osheshi va enda nondjila yaKain, nomokulikongela ondjabi ve liundulila mepuko laBileam ndee tava ka nyonaukila mokulundakana kwavo ongaashi kwinya kwaKora.” (Judas 11) Kain okwe lipwililikila omayele opahole aJehova nokwa katuka onghatu youtondwe wokudipaa. (Genesis 4:4-8) Nonande Bileam okwa li a mona omalondwelo opakalunga a endululwa, okwa kendabala okutula omutima oshiwana shaKalunga molwondjabi yopashimaliwa. (Numeri 22:5-28, 32-34; Deuteronomion 23:5) Kora okwa li e na oshinakuwanifwa shaye shiwa muIsrael, ndelenee kasha li she mu wanena. Okwa xwaxwameka ounashibofa okukondjifa omupiya waKalunga, Moses, omulininipiki munene kombada yedu. (Numeri 12:3; 16:1-3, 32, 33) Kain, Bileam nosho yo Kora ova hangika koshiponga. Oihopaenenwa ei itai tu hongo tuu sha yela nawa okukala hatu pwilikine komayele aavo Jehova ta longifa peendodo doinakuwanifwa noku va fimaneka!

13. Omanangeko noupuna elipi a xunganekwa komuprofeti Jesaja molwaavo tave liyandje kelongekido li na sha novakulunhuongalo?

¹³ Olyelye mbela ina hala okumona ouwa tau di melongekido la denga mbada lepashukilo olo Omuwiliki wetu a tula po meongalo lopaKriste? Omuprofeti Jesaja okwa xunganeka omanangeko noupuna alo, ta ti: “Tala, ohamba otai ka pangela pauyuki, nomalenga otaa ka tokola etokolo la yuka. Ndele keshe umwe [womuvo] ta ka kala ngaashi oshikelelifo shokukelela omhepo nongaashi ehondameno lokuyaama oshikungulu [nongaashi] omakungulukilo omeva medu loluteni nomudidimbe wemanya lile medu lenotelo.” (Jesaja 32:1, 2) Keshe umwe womovakulunhuongalo oku na okukala a fa “ehondameno” la tya ngaho leameno. Nokuli nande okudulika keenghonopangelo oshinima shidjuu kufye, natu ilikane nokukendabala okudulika nokuliyandja keenghonopangelo da tulwa po kuKalunga meongalo.

Nghee ovakulunhuongalo tave liyandje kewiliko laKristus

14, 15. Ovo hava kwatele komesho meongalo ohava ulike ngahelipi kutya otave liyandje kewiliko laKristus?

¹⁴ Omukriste keshe—unene tuu ovakulunhuongalo—ove na okulandula ewiliko laKristus. Ovapashukili ile ovakulunhuongalo ove na eenghonopangelo donhumba meongalo. Ndelenee ihava lalakanene ‘okupangela eitavelo lovaitaveli vakwao’ mokukendabala okupangela okukalamwenyo kwavo. (2 Ovakorinto 1:24) Ovakulunhuongalo ohava dulika kelombwelo laJesus olo tali ti: “Omu shi shii, ovapangeli voiwana ohave i pangele, novanaenghono ohava longifa eenghono davo kuyo. Ndelenee hasho shi kale mokati keni.” (Mateus 20:25-27) Eshi ovakulunhuongalo tava wanifa po oinakuwanifwa yavo, ohava kendabala shili okuyakula vamwe.

¹⁵ Ovakriste otava kumaidwa taku ti: “Dimbulukweni ovakwatelikomesho veni . . . ; taleni exulilo leengeda davo na shikuleni eitavelo lavo.” (Ovaheberi 13:7) Eshi itashi pulwa molwaashi ovakulunhuongalo ve li ovawiliki. Jesus okwa ti: “Omuwiliki weni umwe aeke oKristus.” (Mateus 23:10, OB-1986) Eitavelo lovakulunhuongalo olo li na okuhopaenenwa omolwaashi vo ove li ovahopaeneni vOmuwiliki wetu washili, Kristus. (1 Ovakorinto 11:1) Natu tale keenghedi dimwe omo ovakulunhuongalo hava kendabala okukala va fa Kristus momakwatafano avo navamwe meongalo.

16. Nonande Jesus okwa li e na eenghonopangelo, ongahelipi a ungaunga novashikuli vaye?

¹⁶ Nonande Jesus okwa li e dule kokule ovanhu inava wanenena monghedi keshe nokwa kala e na eenghonopangelo itadi yelekwa nasha odo a pewa kuXe, okwa li e lininipika mokweendafana novahongwa vaye. Ina djuupaleka ovapwilikini vaye neuliko likumwifi leshiivo. Jesus okwa udila ovashikuli vaye olukeno nokwa li e na ko nasha neemhumbwe davo dopanhu. (Mateus 15:32; 26:40, 41; Markus 6:31) Ina pula nande ovahongwa vaye shihapu shi dulife pwaasho tava dulu okuyandja noine va pa nande oinakuwanifwa i dulife pwaayo tava dulu okuhumbata. (Johannes 16:12) Jesus okwa li ‘omunambili nomulininipiki momutima.’ Onghee hano, itashi kumwifa eshi vahapu va tulumukifwa kuye.—Mateus 11:28-30.

17. Ongahelipi ovakulunhuongalo ve na okuulika elininipiko lopaKriste mekwatafano lavo navamwe meongalo?

¹⁷ Ngeenge Kristus Omuwiliki okwa ulika elininipiko, ovo tava kwatele komesho meongalo ove na yo okuulika elininipiko. Heeno, ove na okulungama va ha longife nai eenghonopangelo odo va pewa. Noihave ‘uya newapalo leendjovo’ nokukendabala okukumwifa vamwe. (1 Ovakorinto 2:1, 2) Ponhele yaasho, ove na okukendabala okupopya eendjovo doshili yopamishangwa monghedi yanafangwa nonomutima wa yuka. Kakele kaasho, ovakulunhuongalo ohava kendabala okukala ve na ondjele mwaasho va teelela vamwe va ninge nosho yo okukala ve na ko nasha neemhumbwe davo. (Ovafilippi 4:5) Molwaashi ove shi shii kutya keshe umwe oku na omangabeko, ohave shi dimbuluka mokuviyauka kwavo novamwaxe. (1 Petrus 4:8) Mbela ovakulunhuongalo ovo ve lininipika nove li ovanambili itava tulumukifa tuu shili? Osho naanaa.

18. Ovakulunhuongalo otava dulu okulihonga shike monghedi omo Jesus a ungaunga nounona?

¹⁸ Jesus okwa li ha popiwa naye noupu, nokuli nokwaavo inava tumbala. Diladila kelinyengo laye eshi ovahongwa vaye va hanyena ovanhu molwaashi ‘va eta ounona kuye.’ Jesus okwa ti: “Efeni ounona ve uye kuame nye inamu va kelela ko.” Konima yaasho, “okwe va ukata momake aye, ndele okwe va nangeka noupuna nokutenheka omake aye kuvo.” (Markus 10:13-16) Jesus okwa li e na oukaume novanhu nosho yo onghenda, novanhu vamwe okwa li va nanenwa kuye. Ovanhu kava li ve na oumbada wokutila Jesus. Nokuli nounona okwa li va manguluka okukala puye. Ovakulunhuongalo ove shii yo okupopiwa navo noupu, nomokuulika oukaume novanhu nosho yo onghenda, vamwe—nokuli nounona—ohava ka kala va manguluka okukala puvo.

19. Oshike sha kwatelwa mo mokukala “nomadiladilo aKristus,” notashi pula eenghendabala dilipi?

¹⁹ Opo pe fike okudula kwovakulunhuongalo okuhopaenena Kristus Jesus okwe likolelela koku mu shiiva nawa. Paulus okwa pula ta ti: “Olyelye a shiiva omadiladilo Omwene, e mu longe eendunge?” Nokwa weda ko ta ti: “Ndelenee fye otu nomadiladilo aKristus.” (1 Ovakorinto 2:16) Okukala nomadiladilo aKristus osha kwatela mo okushiiva onghedi yokudiladila kwaye nosho yo omaukwatya aye aeshe, opo tu dule okushiiva kutya ngeno okwa katuka onghatu ilipi monghalo yonhumba. Diladila ashike okushiiva nawa Omuwiliki wetu monghedi ya tya ngaho! Heeno, eshi otashi pula okuyandja elitulemo filufilu komahokololo Omavangeli nokukala hatu yadifa alushe omadiladilo etu neudeko lokuuda ko okukalamwenyo kwaJesus nosho yo oshihopaenenwa shaye. Ngeenge ovakulunhuongalo tava ningi eenghendabala okulandula ewiliko laJesus fiyo opondodo oyo, ovo ve li meongalo otava ka kala va hala unene okuhopaenena eitavelo lavo. Novakulunhuongalo otava ka mbilipalekwa okumona vamwe tava landula nehafo moshikoti shOmuwiliki.

Twikila okukala koshi yewiliko laKristus

20, 21. Omanga twa teelela okuya mounyuni mupe wa udanekwa, otu na okukala twa tokola toko okuninga shike?

²⁰ Osha fimanenena kufyeni atusheni okukala koshi yewiliko laKristus. Eshi hatu ehene pexulilo longhalelo ei yoinima, onghalo yetu otai yelekwa naayo yOvaisrael eshi va li mOmaluhaela aMoab mo 1473 K.O.P. Ova li popepi nokuya mEdu lEudaneko eshi Kalunga a popya okupitila momuprofeti Moses, ta ti: “[Josua] ove to ka ya mo novana ava medu olo, Omwene e li [udanekela] ooxo nokwaana e li va pe.” (Deuteronomion 31:7, 8) Josua okwa li omuwiliki a nangekwa po. Opo Ovaisrael va dule okuya mEdu lEudaneko, okwa li ve na okudulika kewiliko laJosua.

²¹ Ombibeli otai tu lombwele tai ti: “Omuwiliki weni umwe aeke oKristus.” Kristus oye aeke te tu wilike okuya mounyuni mupe wa udanekwa, omo tamu ka kala ouyuki. (2 Petrus 3:13) Onghee hano, natu kale twa tokola toko okudulika kewiliko laye meenghedi adishe dokukalamwenyo.

[Omashangelo opedu]

Oto dimbuluka?

• Ongahelipi Kristus a wilika eongalo lopetameko?

• Ongahelipi Kristus ta wilike eongalo laye kunena?

• Omolwashike tu na okudulika kwaavo tava kwatele komesho meongalo?

• Omeenghedi dilipi ovakulunhuongalo tava dulu okuulika kutya Kristus Omuwiliki wavo?[Efano pepandja 15]

Kristus ota wilike eongalo laye noku kwete ovapashukili meke laye lokolulyo

[Efano pepandja 16]

“Dulikeni kovakwatelikomesho veni nokuliyandja kuvo”

[Efano pepandja 19]

Jesus okwa li e na oukaume novanhu nokwa li ha popiwa naye noupu. Ovakulunhuongalo Ovakriste ove na okukendabala va kale ve mu fa