تامىز
1-تامىز، جۇما
ٵدىل جان قيىندىققا كوپ كەزىگەدى، ٴبىراق ەحوبا سونىڭ بارىنەن ازات ەتەدى (ٴزاب. 34:19).
بۇل تارماقتا ەكى ماڭىزدى وي بار: 1) ادىلدەر قيىندىقتارعا كەزىگەدى؛ 2) ەحوبا ولاردى قيىندىقتارىنان قۇتقارادى. قالاي؟ ەحوبا وسى دۇنيەدەگى ٶمىردىڭ شىندىعىنا تۋرا قاراۋىمىزعا كومەكتەسەدى. ول وزىنە قىزمەت ەتسەك، قۋانىشقا كەنەلەتىنىمىزدى ۋادە ەتكەنىمەن، ەش ۋايىم-قايعىسىز، جايباراقات ٶمىر سۇرەسىڭدەر دەگەن جوق (يشايا 66:14). ول ٴبىزدى ٶزى سيلايتىن الداعى ماڭگىلىك ومىرگە نازار تىگۋگە شاقىرادى (قور. 2-ح. 4:16—18). ال ازىرگە ەحوبا بىزگە قيىندىققا قايىسپاي، ٵربىر كۇندى وتكەرۋگە كومەكتەسەدى (ەرم. ز. 3:22—24). ەحوبانىڭ ەجەلدەگى جانە قازىرگى زامانداعى ادال قىزمەتشىلەرىنەن قانداي ۇلگى الامىز؟ ٴبىز دە كۇتپەگەن قيىندىقتارعا كەزىگۋىمىز مۇمكىن. الايدا ەحوباعا سەنىم ارتساق، ول ٴبىزدى ارقاشان قولداپ-دەمەيدى (ٴزاب. 55:22). 23w.04 14، 15-ب.، 3، 4-ابز.
2-تامىز، سەنبى
بيلىك باسىنداعىلارعا باعىنىڭدار (ريم. 13:1).
ٴبىز قيىن بولسا دا بيلىككە باعىنعان ٴجۇسىپ پەن ٴماريامنان نە ۇيرەنەتىنىمىزدى كورەيىك (لۇقا 2:1—6). ريم يمپەراتورى اۆگۋست اركىم ساناقتان ٶتۋ ٷشىن ٶز قالاسىنا بارىپ تىركەلسىن دەگەن جارلىق شىعارادى. ال بۇل كەزدە ٴماريامنىڭ بوساناتىن ايى-كۇنى جەتىپ تۇرعان ەدى. بەتلەحەمگە ويلى-قىرلى جولدارمەن 150 شاقىرىمداي جول ٴجۇرۋ كەرەكتىگىن ويلاعاندا، ولار ابدەن ۋايىمداعان شىعار. ٴماريام جولدى كوتەرە الا ما؟ ىشتەگى سابيگە قاۋىپ تونبەي مە؟ جارتى جولدا تولعاق ۇستاپ قالسا نە ىستەيدى؟ ٴماريامنىڭ قۇرساعىندا جاتقان بالا ۋادە ەتىلگەن ٴماسىح ەمەس پە؟! وسىلاردى سەبەپ قىلىپ، ٴجۇسىپ پەن ٴماريام ۇكىمەتكە باعىنباي قويدى ما؟ ۋايىمدايتىن جايتتارى بولسا دا، ٴجۇسىپ پەن ٴماريام زاڭعا باعىندى. ال ەحوبا ولاردى مويىنسۇنعاندارى ٷشىن جارىلقادى. ٴماريام بەتلەحەمگە امان-ەسەن جەتىپ، ساپ-ساۋ بالانى دۇنيەگە اكەلدى. ولار ٴتىپتى كيەلى كىتاپتاعى پايعامبارلىقتى دا ورىندادى (ميحا 5:2). 23w.10 8-ب.، 9-ابز.؛ 8، 9-ب.، 11، 12-ابز.
3-تامىز، جەكسەنبى
ٴبىر-ٴبىرىمىزدى جىگەرلەندىرە بەرەيىك (ەۆر. 10:25).
قول كوتەرىپ، قاۋىمدا جاۋاپ بەرۋ تۋرالى ويلاعاندا، جۇرەگىڭىز تارسىلداپ، قوبالجيسىز با؟ بىرىنشىدەن، جاقسىلاپ دايىندالىڭىز (ناق. س. 21:5). مالىمەتپەن جاقسىراق تانىسىپ الساڭىز، تۇسىنىكتەمە بەرۋگە قاتتى قورىقپايسىز. ەكىنشىدەن، تۇسىنىكتەمەلەرىڭىز قىسقا بولسىن (ناق. س. 15:23؛ 17:27). قىسقا جاۋاپتى ايتىپ شىعۋ اسا ۋايىمداتپايدى. ال سول قىسقا تۇسىنىكتەمەڭىزدى ٶز سوزىڭىزبەن ايتساڭىز، جاقسى دايىندالعانىڭىزدى ٵرى مالىمەتتى انىق تۇسىنگەنىڭىزدى كورسەتەسىز. وسى كەڭەستەردى قولدانىپ كورسەڭىز دە، ٴبىر-ەكى تۇسىنىكتەمەدەن ارتىق ايتۋعا ٵلى دە قوبالجيسىز با؟ وندا مىناعان سەنىمدى بولىڭىز: شىن جۇرەكتەن كۇش سالىپ، قولىڭىزدان كەلگەندى ىستەپ جاتقانىڭىزدى ەحوبا باعالايدى (لۇقا 21:1—4). ول بىزدەن قولىمىزدان كەلمەيتىندى تالاپ ەتىپ، اۋىر جۇك ارتپايدى (ٴفىلىپ. 4:5). ەندەشە، شاماڭىزعا قاراي قانشا تۇسىنىكتەمە بەرە الاتىنىڭىز جايلى ويلانىپ، سوعان قول جەتكىزۋگە ۇمتىلىڭىز، جۇرەگىڭىزگە تىنىشتىق سۇراپ دۇعا ەتىڭىز. بالكىم، كەيبىرەۋىمىز قىسقا بولسا دا ٴبىر تۇسىنىكتەمە بەرۋدەن باستايتىن شىعارمىز. 23w.04 21-ب.، 6—8 ابز.
4-تامىز، دۇيسەنبى
سەنىم مەن سۇيىسپەنشىلىكتى ساۋىت قىلىپ، ال... ٷمىتىمىزدى دۋلىعا ەتىپ كيەيىك (سال. 1-ح. 5:8).
ەلشى پاۋىل ٴبىزدى شايقاس كيىمىن كيىپ، ساقاداي ساي تۇرعان جاۋىنگەرگە تەڭەگەن. جورىقتاعى جاۋىنگەر كۇننىڭ قاي مەزگىلىندە دە ۇرىسقا ارالاسۋعا دايىن تۇرۋ كەرەك. تۋرا سولاي ٴبىز دە ەحوبانىڭ كۇنىنە دايىن ٴجۇرۋ ٷشىن، سەنىم مەن سۇيىسپەنشىلىگىمىزدى ساۋىت قىلىپ، ال ٷمىتىمىزدى دۋلىعا ەتىپ تاستاماي كيىپ ٴجۇرۋىمىز كەرەك. ساۋىت جاۋىنگەردىڭ جۇرەگىن قورعايتىنداي، سەنىم مەن سۇيىسپەنشىلىك ٴبىزدىڭ بەينەلى جۇرەگىمىزدى ساقتايدى. قالاي؟ بويىمىزدا وسى قاسيەتتەر بولسا، ەحوباعا ەشتەڭەگە قاراماستان قىزمەت ەتە بەرەمىز ٵرى يسانىڭ دا ىزىنەن تايمايمىز. سەنىمى بار ادام ەحوبا «ٶزىن شىن جۇرەكتەن ىزدەيتىندەرگە سي بەرەتىنىنە» ەش كۇماندانبايدى (ەۆر. 11:6). سەنىمىمىز بولسا، قيىنشىلىقتاردان وتۋگە تۋرا كەلسە دە، كوسەمىمىز يساعا ادالدىق ساقتاپ قالامىز. ەشبىر قيىنشىلىققا قايىسپايتىن سەنىم دامىتۋ ٷشىن، قۋعىن-سۇرگىنگە يا جوقشىلىققا قاراماستان، مىنسىزدىك ساقتاپ قالعان باۋىرلاستاردان ۇيرەنسەك بولادى. ال دۇنيەقۇمارلىقتىڭ تۇزاعىنا ٴتۇسىپ قالماس ٷشىن، پاتشالىقتى ٴبىرىنشى ورىنعا قويىپ، قاراپايىم ٶمىر ٴسۇرىپ جۇرگەن باۋىرلاستاردان ۇلگى الساق بولادى. 23w.06 10-ب.، 8، 9-ابز.
5-تامىز، سەيسەنبى
جەل باققان تۇقىم سەپپەس، بۇلت اڭدىعان ٶنىم جيناماس (ۋاع. 11:4).
ۇستامدىلىق ٶزىڭنىڭ سەزىمدەرىڭ مەن ارەكەتتەرىڭدى قاداعالاۋدى بىلدىرەدى. بۇل قاسيەت ماقساتىمىزعا جەتۋ ٷشىن دە قاجەت. اسىرەسە ماقساتىمىزعا جەتۋ قيىن بولسا نەمەسە وعان جەتۋگە ىقىلاسىمىز بولماسا، ٶزىمىزدى قاداعالاۋ كەرەك بولىپ جاتادى. ۇستامدىلىق كيەلى رۋحتىڭ جەمىسىنە كىرەتىندىكتەن، بويىڭىزدا وسى قاسيەتتى دامىتۋعا ەحوبادان كيەلى رۋح سۇراڭىز (لۇقا 11:13؛ عال. 5:22، 23). ورايى تۇسكەنىن كۇتىپ وتىرماڭىز. مىنا دۇنيەدە ٴبارى كەرەمەت بولىپ، قولايلى جاعداي تۋاتىن كەز ەشقاشان بولمايدى. ونداي جاعدايدى كۇتىپ جۇرە بەرسەك، ماقساتىمىزعا سول كۇيى جەتە المايمىز. نەگە كەيدە ماقساتىمىزعا قاراي جىلجۋعا ەش زاۋقىمىز سوقپايدى؟ ويتكەنى ول قول جەتپەس بيىك بەلەستەي كورىنەتىن شىعار. ەندەشە، ونى كىشىگىرىم بولشەكتەرگە ٴبولىپ تاستاڭىز. مىسالى، قانداي دا ٴبىر قاسيەت دامىتقىڭىز كەلسە، ونى كىشىگىرىم ىستەردە تانىتۋدان باستاڭىز. ال ەگەر كيەلى كىتاپتى تۇگەل وقىپ شىعۋدى ماقسات ەتسەڭىز، از-ازدان وقۋدان باستاساڭىز بولادى. 23w.05 29، 30-ب.، 11—13 ابز.
6-تامىز، سارسەنبى
ٵدىلدىڭ جولى تاڭ شاپاعى ىسپەتتى، تال ٴتۇس بولعانشا جارقىراي تۇسەدى (ناق. س. 4:18).
وسى سوڭعى كۇندەرى ەحوبا ٶزىنىڭ ۇيىمى ارقىلى رۋحاني اس-سۋدى ۇزدىكسىز بەرىپ، ٴبارىمىزدى «قاسيەتتى جولمەن» جەتەلەپ كەلەدى (يشايا 35:8؛ 48:17؛ 60:17). قانداي دا ٴبىر ادام كيەلى كىتاپتى زەرتتەۋدى باستاعاندا «قاسيەتتى جولعا» اياق باسادى. كەيبىرەۋلەرى ۇزاققا بارماي، بۇل جولدان شىعىپ كەتەدى. باسقالارى مارەگە جەتپەيىنشە وسى جولدان اۋىتقىماۋعا بەلدى بەكەم بۋعان. ال مارە دەگەنىمىز نە؟ كوكتە ٶمىر سۇرۋگە ۇمىتتەنەتىندەردى بۇل «قاسيەتتى جول» كوكتەگى «قۇدايدىڭ جۇماعىنا» اپارادى (ايان 2:7). ال جەردە ٶمىر سۇرۋگە ۇمىتتەنەتىندەردى مىڭجىلدىقتىڭ سوڭىندا كەمەلدىلىككە جەتكىزەدى. وسى جولمەن كەلە جاتساڭىز، ارتىڭىزعا ەش قاراماڭىز. جاڭا دۇنيەگە جەتپەيىنشە بۇل جولدان اۋىتقىماڭىز. 23w.05 17—19 ب.، 15—18 ابز.
7-تامىز، بەيسەنبى
ال ٴبىزدىڭ سۇيەتىن سەبەبىمىز — ول ٴبىزدى الدىمەن ٴسۇيدى (جوح. 1-ح. 4:19).
ەحوبانىڭ سىزگە جاساعان بارلىق جاقسىلىقتارى تۋرالى ويلانساڭىز، ەرىكسىز وعان ٶمىرىڭىزدى باعىشتاعىڭىز كەلىپ كەتەدى (ٴزاب. 116:12—14). كيەلى كىتاپتا «يگى دە كەمەلدى سيدىڭ ٴبارى» ەحوبادان كەلەدى دەپ ٴدال ايتىلعان (جاق. 1:17). سي اتاۋلىنىڭ ەڭ كەرەمەتى — ەحوبا ٶزىنىڭ ۇلى يسانى كۇنالارىمىز ٷشىن تولەم رەتىندە بەرگەنى. ٴبىر ساتكە ويلانىپ كورىڭىزشى، سول تولەمنىڭ ارقاسىندا ٴسىز ەحوبامەن دوس بولا الاسىز جانە ماڭگى ٶمىر سۇرۋگە مۇمكىندىگىڭىز بار (جوح. 1-ح. 4:9، 10). ەحوبا ٴسىزدى قاتتى جاقسى كورگەندىكتەن ٶزىنىڭ ۇلىن بەردى، باسقا دا جاقسىلىعىن اياپ وتىرعان جوق. وسىنداي قۇدايعا قالاي عانا ريزا بولمايسىڭ؟! ال ريزاشىلىق ٴبىلدىرۋدىڭ تاماشا جولى — ٶمىرىمىزدى ەحوباعا ارناۋ (مۇس. 5-ج. 16:17؛ قور. 2-ح. 5:15). 24w.03 5-ب.، 8-ابز.
8-تامىز، جۇما
تۋرا جولمەن جۇرگەن ادام ەحوبادان قورقادى (ناق. س. 14:2).
بۇگىندە مىنا دۇنيەدەگى ادامدار ازعىندانىپ، مورالدىق نورمالارى تومەندەپ كەتكەنىن كورگەندە، ٴبىز دە لۇت سياقتى كۇي كەشەمىز. ول «بۇزىق ادامداردىڭ ورەسكەل قىلىقتارعا بەرىلىپ كەتكەندەرىنە قاتتى قينالعان»، ويتكەنى ەحوبا بۇنداي جامان ىستەردى جەك كورەتىنىن بىلگەن (پەت. 2-ح. 2:7، 8). لۇت ەحوبادان قورقىپ، ونى سۇيگەندىكتەن، اينالاسىنداعى ادامداردىڭ ىرقىنا ەش بەرىلمەگەن. ٴبىز دە ەحوبانىڭ مورالدىق نورمالارىنا نەمكەتتى قارايتىن قوعامدا ٶمىر ٴسۇرىپ جاتىرمىز. الايدا قۇدايدى ٴسۇيىپ، ونى قاستەرلەۋدى ۇيرەنە بەرسەك، ٶزىمىزدى تازا ساقتاپ، تۋرا جولدان اينىمايمىز. وسى ورايدا ەحوبا ناقىل سوزدەر كىتابى ارقىلى ٴبىزدى دانالىققا شاقىرادى. ونداعى اقىل-كەڭەستەردىڭ ۇلكەن-كىشىمىزگە دە، ەرلەر مەن ايەلدەرگە دە پايداسى زور. ەحوبادان قورىقساق، جامان ورتادان اۋلاق بولامىز. 23w.06 20-ب.، 1، 2-ابز.؛ 21-ب.، 5-ابز.
9-تامىز، سەنبى
كىم مەنىڭ سوڭىمنان ەرگىسى كەلسە، وزىنەن باس تارتىپ، كۇن سايىن ازاپ باعاناسىن الىپ، ۇدايى سوڭىمنان ەرىپ ٴجۇرسىن (لۇقا 9:23).
بالكىم، ٴسىز وتباسىڭىزدا قارسىلىققا كەزىككەن شىعارسىز نەمەسە پاتشالىقتى ٴبىرىنشى ورىنعا قويۋ ٷشىن كوپ اقشا تابۋدان باس تارتقان بولارسىز (مات. 6:33). كەزىككەن قيىندىقتارىڭىزعا قاراماستان، وعان ادال بولىپ جۇرگەنىڭىزدى ەحوبا كورىپ تۇر (ەۆر. 6:10). يسانىڭ مىنا سوزدەرىنىڭ راستىعىنا ٴسىز دە كوز جەتكىزگەن شىعارسىز. ول بىلاي دەگەن ەدى: «كىم مەن ٷشىن جانە ىزگى حابار ٷشىن ٷي-جايىن، باۋىرلارىن، اپكە-قارىنداستارىن، اكەسىن نە شەشەسىن، بالا-شاعاسىن نە تانابىن قالدىرسا، وعان قازىرگى ۋاقىتتا قۋعىن-سۇرگىن كورۋمەن قاتار، ٷي-جاي، باۋىر، اپكە-قارىنداس، شەشە، بالا-شاعا، تاناپ ٴجۇز ەسە ارتىعىمەن بەرىلەدى، ال كەلەر زاماندا ول ماڭگىلىك ومىرگە يە بولادى» (مار. 10:29، 30). راسىمەن دە، يە بولعان باتالارىڭىز قۇربان ەتكەن نارسەلەرىڭىزدەن الدەقايدا كوپ (ٴزاب. 37:4). 24w.03 9-ب.، 5-ابز.
10-تامىز، جەكسەنبى
ناعىز دوس ارقاشان جاقسى كورەر، ول — باۋىرىڭ قيىن شاقتا ارقا سۇيەر (ناق. س. 17:17).
I-عاسىردا ياھۋدەيا جەرىن قاتتى اشتىق جايلاعان كەزدە انتيوحيا قالاسىنداعى ماسىحشىلەر «ٴارقايسىسى ٶز شاماسىنا قاراي ياھۋدەيادا تۇراتىن باۋىرلاستارىنا جاردەم جىبەرۋدى شەشتى» (ەل. ٸس. 11:27—30). ياھۋدەيا تىم الىس جەر بولسا دا، باۋىرلاستارىنا قول ۇشىن سوزۋعا بۇل ەش كەدەرگى بولمادى (جوح. 1-ح. 3:17، 18). ٴبىز دە باۋىرلاستاردىڭ قانداي دا ٴبىر اپاتقا يا توتەنشە جاعدايعا ۇشىراعانىن ەستىسەك، جاناشىرلىق تانىتىپ، كومەكتەسۋگە اسىق بولايىق. ول ٷشىن اقساقالدارعا جولىعىپ، كومەكتەسۋ شاراسىنا قالاي اتسالىسا الامىن دەپ سۇراساڭىز بولادى نەمەسە دۇنيەجۇزىلىك ىسكە ساداقا جاساساڭىز دا، سول باۋىرلاستار ٷشىن دۇعا ەتسەڭىز دە بولادى. باۋىرلاستار ٴتىپتى تىرشىلىككە ەڭ قاجەتتى نارسەلەردىڭ وزىنە ٴزارۋ بولىپ قالۋى مۇمكىن. سوندىقتان سول كەزەڭدە دە بارىنشا جاناشىر بولعانىمىز ماڭىزدى. سوندا پاتشامىز يسا ٴماسىح ادامزاتتى سوتتاۋعا كەلگەندە، ٴبىزدى «پاتشالىعىن مۇرا ەتۋگە» لايىقتى دەپ تابادى (مات. 25:34—40). 23w.07 4-ب.، 9، 10-ابز.؛ 6-ب.، 12-ابز.
11-تامىز، دۇيسەنبى
سەندەردىڭ ەستى ەكەندەرىڭدى جۇرتتىڭ ٴبارى كورەتىن بولسىن (ٴفىلىپ. 4:5).
يسا دا ەحوباعا ۇقساپ يلىككىش بولعان. ول، نەگىزىنەن، تەك «يسرايل ٷيىنىڭ جوعالعان قويلارىنا جىبەرىلگەن» ەدى. ٴبىراق وسى تاپسىرمانى اتقارا ٴجۇرىپ، ول يلىككىش بولدى. مىسالى، بىردە وزگە ۇلتتىڭ ايەلى «جىن بۋىپ، قاتتى قينالىپ جاتقان» قىزىن ساۋىقتىرۋدى وتىنگەندە، يسا جانى اشىپ، ونىڭ تىلەگىن ورىندادى (مات. 15:21—28). تاعى ٴبىر جاعدايدى كەلتىرەيىك. قىزمەتى باستالعاندا يسا: «مەنەن تانعان اركىمنەن... مەن دە تانامىن»،— دەگەن بولاتىن (مات. 10:33). ال كەيىن پەتىر ودان ٷش رەت تانىپ كەتكەندە، يسا ودان تەرىس اينالدى ما؟ جوق، ويتكەنى ول پەتىردىڭ شىن وكىنگەنىن جانە سەنىمىن كوردى. قايتا تىرىلگەن سوڭ پەتىرگە كورىنگەندە، ول ونى ٵلى دە جاقسى كورەتىنىن جانە كەشىرگەنىن ٴبىلدىردى (لۇقا 24:33، 34). ەحوبا مەن يسا — يلىككىش. ال ٴبىز شە؟ ەحوبا بىزگە دە يلىككىش بولىڭدار دەيدى. 23w.07 21-ب.، 6، 7-ابز.
12-تامىز، سەيسەنبى
ەندى قايتىپ ٶلىم بولمايدى (ايان 21:4).
وسى ۋادەگە باسقالاردىڭ كوزىن جەتكىزۋ ٷشىن نە ايتساق بولادى؟ بىرىنشىدەن، بۇل ۋادەنى ەحوبانىڭ ٶزى بەرگەن. ايان كىتابىندا ايتىلعانداي، تاقتا وتىرعان: «مىنە، ٴبارىن دە جاڭادان جاراتىپ جاتىرمىن»،— دەگەن. ەحوبانىڭ ٶز ۋادەسىن ورىنداۋعا دانالىعى دا، كۇشى دە جەتەدى، ىقىلاسى دا بار. ەكىنشىدەن، ەحوبا بۇل ۋادەنىڭ ورىندالاتىنىنا سەنىمدى بولعانى سونشا — ونى ورىندالىپ قويعانداي ايتقان. سوندىقتان دا: «بۇل سوزدەر سەنۋگە تۇرارلىق ٵرى شىنايى... بۇلار ورىندالدى!»— دەگەن. ۇشىنشىدەن، ەحوبا ٴبىر نارسەنى باستاسا، ونى سوڭىنا دەيىن جەتكىزبەي قويمايدى. ويتكەنى: «مەن الفا جانە ومەگامىن»،— دەگەن (ايان 21:6). ەحوبا نيەتىن تولىق ىسكە اسىرادى دا، وتىرىكشى ٵرى قولىنان تۇك كەلمەيتىن شايتاننىڭ ٶزى ەكەنىن دالەلدەيدى. الدەكىم سىزگە «بۇل مۇمكىن ەمەس سياقتى» دەسە، نە دەۋگە بولادى؟ ايان 21:5، 6-تارماقتارىن وقىپ، ەحوبا وسى ۋادەسىنە «قول قويىپ»، قالاي كەپىلدىك بەرگەنىن كورسەتىڭىز (يشايا 65:16). 23w.11 7-ب.، 18، 19-ابز.
13-تامىز، سارسەنبى
مەن سەنەن ۇلى حالىق تاراتامىن (مۇس. 1-ج. 12:2).
ەحوبا بۇل ۋادەنى بەرگەندە 75 جاسقا كەلىپ قالعان ىبىرايىمنىڭ ٵلى دە بالاسى جوق ەدى. ىبىرايىم بۇل ۋادەنىڭ ورىندالۋىن تولىقتاي كوردى مە؟ جوق. ەۆفرات وزەنىنەن ٶتىپ، سودان 25-جىلدان كەيىن عانا، ىبىرايىمنىڭ بالاسى ىسقاق تۋىلدى. ودان كەيىن 60-جىلدان سوڭ نەمەرەلەرى ەساۋ مەن جاقىپ دۇنيەگە كەلدى (ەۆر. 6:15). ايتسە دە ول ۇرپاقتارىنىڭ ۇلى حالىققا اينالىپ، ۋادە ەتىلگەن جەرگە قونىستانعانىن كورگەن جوق. ٴبىراق ول ادالدىق ساقتاپ، جاراتۋشىسىمەن جاقىن دوس بولدى (جاق. 2:23). ىبىرايىم قايتا تىرىلگەن كەزدە سەنىمى مەن شىدامدىلىعىنىڭ ارقاسىندا قانشاما حالىقتىڭ جارىلقانعانىن كورىپ، قۋانىشتان جۇرەگى جارىلا جازدايتىن شىعار! (مۇس. 1-ج. 22:18). بۇدان قانداي قورىتىندى شىعارامىز؟ ەحوبانىڭ بارلىق ۋادەلەرىنىڭ ورىندالۋىن ٴبىز ٶز كوزىمىزبەن كورمەۋىمىز مۇمكىن. الايدا ىبىرايىم سياقتى شىدامدى بولساق، ەحوبا ٴبىزدى قازىر دە جارىلقايدى، ال جاڭا دۇنيەدە باتاسىن ٴجۇز ەسە توگەدى (مار. 10:29، 30). 23w.08 24-ب.، 14-ابز.
14-تامىز، بەيسەنبى
ەحوبانى ىزدەگەن كەزىنىڭ بارىندە شىنايى قۇداي ونى جارىلقاپ وتىردى (شەج. 2-ج. 26:5).
ۇزياح جاس كەزىندە كىشىپەيىل بولعان. ول «شىنايى قۇدايدان قورقۋدى ۇيرەنگەن». 68 جىلدىق ٶمىرىنىڭ باسىم بولىگىندە ەحوبا وعان جار بولىپ ٴجۇردى (شەج. 2-ج. 26:1—4). ۇزياح كوپ دۇشپاندارىن ويسىراتا جەڭىپ، ٴيسرايلدىڭ قورعانىس كۇشىن نىعايتتى (شەج. 2-ج. 26:6—15). ەحوبانىڭ قولداۋىمەن ول وسىنشاما كوپ ٸس اتقارعانىنا قۋانسا كەرەك (ۋاع. 3:12، 13). ۇزياح پاتشا قول استىنداعىلار ايتقانىن ەكى ەتپەي ورىندايتىنىنا ۇيرەنىپ قالعان ەدى. سوندىقتان ول «ماعان قالاعانىمنىڭ ٴبارىن ىستەۋگە بولادى» دەپ ويلاپ كەتكەن شىعار. ٴسۇيتىپ، ول پاتشالارعا رۇقسات ەتىلمەسە دە، ەركىنسىپ عيباداتحاناعا كىرىپ، حوش ٴيىستى زاتتى تۇتەتپەك بولدى (شەج. 2-ج. 26:16—18). جوعارعى ٴدىني قىزمەتكەر ازارياح ونى توقتاتپاق بولعاندا، ول اشۋلانىپ، ىزاعا بۋلىقتى. وكىنىشكە قاراي، ول قاسىقتاپ جيناعان ابىرويىن شەلەكتەپ توگىپ، ادالدىعىنان اتتاپ كەتتى. ەحوبا ونى جازالاپ، الاپەسكە شالدىقتىردى (شەج. 2-ج. 26:19—21). ول كىشىپەيىل بولىپ قالا بەرگەندە عوي، وسىنداي مۇشكىل حالگە دۋشار بولماس ەدى! 23w.09 10-ب.، 9، 10-ابز.
15-تامىز، جۇما
سۇندەتتەلۋدى جاقتايتىنداردان قايمىققاندىقتان... ولاردان قاشقاقتاي باستادى (عال. 2:12).
ەلشى پەتىر مايلانعان ٴماسىحشى بولعاننان كەيىن دە، كەمشىلىكتەرى بويىنان جوق بولىپ كەتپەدى. ب. ز. 36-جىلى سۇندەتتەلمەگەن باسقا ۇلتتىق كورنەل پەتىردىڭ كوزىنشە كيەلى رۋحپەن مايلاندى. وسىلاي «قۇدايدىڭ ەشكىمدى الالامايتىنى»، باسقا ۇلت ادامدارىنىڭ دا ماسىحشىلەر قاۋىمىنىڭ مۇشەسى بولا الاتىنى ايقىن كورىندى (ەل. ٸس. 10:34، 44، 45). ٴسۇيتىپ، بۇعان دەيىن باسقا ۇلت ادامدارىمەن ەشقاشان تاماقتانىپ كورمەگەن پەتىر ولارمەن ەمىن-ەركىن داستارقانداس بولىپ ٴجۇردى. ٴبىر كەزدە ياھۋديلەر مەن باسقا ۇلت ادامدارى بىرگە تاماقتانباۋى كەرەك دەيتىن كەيبىر ماسىحشىلەر انتيوحياعا كەلىپ قالدى. سول ياھۋدي ماسىحشىلەردىڭ كوڭىلىنە قاراعان بولسا كەرەك، پەتىر باسقا ۇلتتىق باۋىرلاستارىمەن بىرگە اس ىشپەي قويدى. سوندا پاۋىل ونىڭ وسى ەكىجۇزدى قىلىعىن ٴبارىنىڭ كوزىنشە بەتىنە باسىپ، ايىپتادى (عال. 2:13، 14). تاعى دا ٴسۇرىنىپ قالسا دا، پەتىر ەش مويىماي، قىزمەت ەتە بەردى. 23w.09 22-ب.، 8-ابز.
16-تامىز، سەنبى
«قۇدايدىڭ ٶزى... نەگىزدەرىڭدى بەرىك ەتەدى» (پەت. 1-ح. 5:10).
اقساقال بولساڭىز، ەحوبانىڭ وتارىن بار ىنتاڭىزبەن باعىپ-قامقورلاۋعا بەكىنگەن شىعارسىز. ٶزىڭىزدى شىنشىلدىقپەن تەكسەرە كەلە، كەمشىلىكتەرىڭىزدى بايقاساڭىز، كوڭىلىڭىز تۇسپەسىن. ىزگى يەمىز يسانىڭ كومەگىمەن ٴسىز جاقسارا الاسىز (پەت. 1-ح. 2:3). ەلشى پەتىردىڭ مىنا سوزدەرى سىزگە جىگەر بولسىن: «قۇدايدىڭ ٶزى تالىمدەرىڭدى اقىرىنا دەيىن جەتكىزىپ، سەندەردى نىعايتادى». ٴبىر كەزدەرى پەتىر ٶزىن قۇداي ۇلىنىڭ قاسىندا تۇرۋعا لايىقسىز سەزىنگەن ەدى (لۇقا 5:8). ٴبىراق ەحوبانىڭ جانە يسانىڭ قولداۋىمەن ەش بەرىلمەي، ٴماسىحتىڭ سوڭىنان ەرە بەردى. سونىڭ ارقاسىندا ول «يەمىز ٵرى قۇتقارۋشىمىز يسا ٴماسىحتىڭ ماڭگىلىك پاتشالىعىنا» كىردى (پەت. 2-ح. 1:11). پەتىر ٷشىن بۇدان اسقان سي جوق شىعار! ٴسىز دە پەتىر سياقتى العان باعىتىڭىزدان تايماي، ەحوبانىڭ ۇيرەتكەنىن قابىلداي بەرسەڭىز، ماڭگىلىك ٶمىر سيىن الاسىز. «سەنىمىڭىز ٷشىن سي رەتىندە جانىڭىز قۇتقارىلاتىن» بولادى (پەت. 1-ح. 1:9). 23w.09 31-ب.، 16، 17-ابز.
17-تامىز، جەكسەنبى
كوك پەن جەردى، تەڭىز بەن سۋ كوزدەرىن جاراتقان قۇدايعا عيبادات ەتىڭدەر! (ايان 14:7).
كيەلى شاتىردىڭ اۋلاسى قورشالعان، اشىق جەر بولعان. ول جەردە ٴدىني قىزمەتكەرلەر ٶز مىندەتتەرىن اتقارعان. سونداي-اق وندا تۇگەل ورتەلەتىن قۇرباندىقتارعا ارنالعان ۇلكەن مىس وشاق پەن سۋى بار ۇلكەن مىس قازان تۇرعان. سول مىس قازانداعى سۋعا ٴدىني قىزمەتكەرلەر قاسيەتتى قىزمەتتەرىنە كىرىسپەس بۇرىن جۋىنعان (مۇس. 2-ج. 30:17—20؛ 40:6—8). بۇگىندە مايلانعان ماسىحشىلەر رۋحاني عيباداتحانانىڭ ىشكى اۋلاسىندا ادال قىزمەت ەتەدى. كيەلى شاتىرداعى سۋ قۇيىلعان ۇلكەن مىس قازان بولسا، ولارعا دا، بارلىق ماسىحشىلەرگە دە رۋحاني جانە مورالدىق تازالىق ساقتاۋدىڭ ماڭىزدىلىعىن ەسكە سالادى. ال «ۇلى جاماعات» قايدا قىزمەت ەتەدى؟ ەلشى جوحان ولاردىڭ «تاقتىڭ الدىندا» تۇرعانىن كورگەن. بۇل رۋحاني عيباداتحانانىڭ سىرتقى اۋلاسىنا سايكەس كەلەدى. وندا ولار «قۇدايعا كۇنى-ٴتۇنى قاسيەتتى قىزمەت اتقارادى» (ايان 7:9، 13—15). ٴبىز ەحوبانىڭ تازا عيبادات ٷشىن جاساعان شاراسىنداعى ٶز ورنىمىزدى شىن جۇرەكتەن باعالايمىز! 23w.10 28، 29-ب.، 15، 16-ابز.
18-تامىز، دۇيسەنبى
قۇدايدىڭ ۋادەسىنە ەش كۇماندانباي، سەنىمىنەن كۇش الدى (ريم. 4:20).
ەحوبا بىزگە اقساقالدار ارقىلى دا كۇش بەرەدى (يشايا 32:1، 2). سوندىقتان بويىڭىزدى ۋايىم مەڭدەپ، مازاسىز كۇي كەشىپ جۇرسەڭىز، اقساقالدارعا ايتىڭىز جانە ولاردىڭ ۇسىنعان كومەگىن قۋانا قابىلداڭىز. ويتكەنى ەحوبا سولار ارقىلى ٴسىزدى مىقتى ەتەدى. كيەلى كىتاپقا نەگىزدەلگەن ٷمىتىمىز دە — جۇماق ورناعان جەردە ماڭگى ٶمىر ٴسۇرۋ بولسىن نە كوكتە ماڭگى ٶمىر ٴسۇرۋ بولسىن — ٴبىزدىڭ كۇش-قۋاتىمىزدىڭ قاينارى (ريم. 4:3، 18، 19). سول ٷمىت بىزگە سىناقتارعا توزۋگە، ىزگى حاباردى جاريالاۋعا جانە قاۋىمدا ٵرتۇرلى ٸستى اتقارۋعا كۇش بەرەدى (سال. 1-ح. 1:3). بۇل ٷمىت ەلشى پاۋىلدىڭ دا جانىنا جالاۋ بولعان. ول ٶزىنىڭ جان-جاقتان «قىسپاقتالعانىن»، «ابىرجىعانىن»، «قۋعىندالعانىن» جانە «قۇلاتىلعانىن» جازعان. ونىڭ ٶمىرى قىل ۇستىندە تۇرعان كەزدەرى دە بولعان (قور. 2-ح. 4:8—10). پاۋىل ۇمىتىنە نازار تىگىپ، سودان كۇش العاننىڭ ارقاسىندا قيىندىقتارىنا توزە الدى (قور. 2-ح. 4:16—18). پاۋىلدىڭ بار نازارى كوكتە ماڭگى ٶمىر ٴسۇرۋ ۇمىتىندە بولعان. ٷمىتى جايلى ويلانىپ جۇرگەندىكتەن، ونىڭ جان دۇنيەسى «كۇن سايىن جاڭارا تۇسكەن». 23w.10 15، 16-ب.، 14—17 ابز.
19-تامىز، سەيسەنبى
ەحوبا ٶز حالقىنا كۇش دارىتادى، ەحوبا حالقىنا تىنىشتىق سيلاپ باتاسىن جاۋدىرادى (ٴزاب. 29:11).
دۇعا ەتكەندە مىنا تۋرالى ويلاڭىز: «قازىر ەحوبانىڭ بۇل وتىنىشىمە جاۋاپ بەرەتىن ۋاقىتى ما؟» ٴبىز دۇعامىزدىڭ جاۋابىن بىردەن العىمىز كەلەتىن شىعار. الايدا ٴبىزدىڭ ٶتىنىشىمىزدى ورىندايتىن ەڭ دۇرىس ۋاقىتتى ەحوبا بىلەدى (ەۆر. 4:16). جاۋابىن بىردەن الماعاندا، ەحوبا بىزگە «جوق» دەپ جاتقانداي بولار. ٴبىراق ول «قازىر ەمەس» دەپ جاتقان بولۋى مۇمكىن. مىسالى، ەر باۋىرلاس اۋرۋىنان ايىعۋدى سۇراپ، دۇعا ەتەدى. ٴبىراق ول اۋرۋىنان ايىقپايدى. ەحوبا ونى كەرەمەت تۇردە ايىقتىرىپ جىبەرسە، شايتان ونى ەحوبا ساۋىقتىرىپ جىبەرگەنى ٷشىن عانا قىزمەت ەتىپ ٴجۇر دەپ ايىپتار ەدى (ٵيۇپ 1:9—11؛ 2:4). ونىڭ ۇستىنە، ەحوبا بۇكىل اۋرۋ-سىرقاۋدى جوق قىلاتىن ۋاقىتتى بەلگىلەپ قويعان (يشايا 33:24؛ ايان 21:3، 4). دەمەك، سول كەزگە دەيىن ٴبىز عاجايىپ تۇردە قۇلانتازا جازىلىپ كەتەمىز دەپ كۇتپەيمىز. سوندىقتان الگى ەر باۋىرلاس ەحوبادان «وسى دەرتىمە ٴتوزۋ ٷشىن جانتىنىشتىعى مەن كۇش بەرە كورشى، ساعان ٵرى قاراي دا ادال قىزمەت ەتە الايىنشى» دەپ سۇراسا بولادى. 23w.11 24-ب.، 13-ابز.
20-تامىز، سارسەنبى
ٴبىزدى كۇنالارىمىزعا قاراپ جازالامايدى، ەسەمىزدى دە زاڭسىزدىعىمىزعا ساي قايتارمايدى (ٴزاب. 103:10).
سامسون وماقاسا قاتەلەسسە دە، ەش مويىعان جوق. ول ەحوبانىڭ فىلىستىرلەرگە قاتىستى تاپسىرماسىن اتقارۋدىڭ ٴساتىن باقتى (بي. 16:28—30). ٴسۇيتىپ، ەحوباعا: «فىلىستىرلەردەن كەك الايىنشى»،— دەپ جالبارىندى. ەحوبا ونىڭ جانايقايىن ەستىپ، بويىنا عاجايىپ كۇشىن قايتا دارىتتى. سول كەزدە ول بۇرىن-سوڭدى بولماعانداي كوپ ٴفىلىستىردىڭ كوزىن قۇرتتى. سامسون قاتەلىگىنىڭ اشتى زاردابىن تارتسا دا، ەحوبانىڭ ەركىن ٵرى قاراي ورىنداي بەردى. ٴسىز دە قاتەلىگىڭىزدىڭ كەسىرىنەن تۇزەتىلىپ جاتساڭىز يا جاۋاپكەرشىلىگىڭىزدەن ايىرىلىپ قالساڭىز، ەش بەرىلمەڭىز. ەحوبا سىزدەن كۇدەر ۇزبەيدى (ٴزاب. 103:8، 9). ٴسۇرىنىپ قالساڭىز دا، ٴسىز سامسون سياقتى ەحوبانىڭ ەركىن ورىنداۋعا جارامدى بولا الاسىز. 23w.09 6-ب.، 15، 16-ابز.
21-تامىز، بەيسەنبى
تاباندىلىق قۇدايدىڭ ىقىلاسىنا بولەيدى، قۇدايدىڭ ىقىلاسى بولسا ٷمىت بەرەدى (ريم. 5:4).
ٴسىز تاباندىلىق تانىتساڭىز، ەحوبانىڭ ىقىلاسىنا بولەنەسىز. ارينە، قيىندىقتان قينالىپ جاتقانىڭىزعا ەحوبا قۋانبايدى. ٴبىراق ول سىزگە ريزا بولادى. تاباندىلىعىمىزبەن ەحوبانى قۋانتىپ، ونىڭ ىقىلاسىنا بولەنۋ نەتكەن باتا! (ٴزاب. 5:12). ەسىڭىزدە بولسا، ىبىرايىم قيىندىقتاردا تاباندىلىق تانىتقان جانە قۇدايدىڭ ىقىلاسىنا يە بولعان. ال ەحوبا ونى دوسى ٵرى ٵدىل ادام دەپ سانادى (مۇس. 1-ج. 15:6؛ ريم. 4:13، 22). ەحوبا بىزگە دە سولاي قاراسىن دەسەك، نە ىستەۋىمىز كەرەك؟ قۇدايدىڭ ىقىلاسىنا بولەنۋىمىز قىزمەتتە قانشا جانە قانداي جۇمىس اتقارىپ جاتقانىمىزعا ەمەس، ادالدىق پەن تاباندىلىق تانىتاتىنىمىزعا بايلانىستى. جاسىمىز، جاعدايىمىز، قابىلەتىمىز قانداي بولماسىن، تاباندىلىقتى ٴبارىمىز دە تانىتا الامىز. ٴسىز ٴدال قازىر ەحوباعا ادالدىق ساقتاپ، قيىندىققا تاباندىلىقپەن ٴتوزىپ جۇرسەڭىز، ەحوبانىڭ ىقىلاسىنا يە ەكەنىڭىزدى ٴبىلىڭىز جانە سودان جۇبانىش تابىڭىز. ەحوبانىڭ ىقىلاسىنا يە ەكەنىمىزدى ٴبىلۋدىڭ اسەرى زور. بۇل ٴبىزدىڭ ٷمىتىمىزدى مولايتادى. 23w.12 11-ب.، 13، 14-ابز.
22-تامىز، جۇما
بەرىك ٵرى باتىل بول! (پات. 1-ج. 2:2).
ەر باۋىرلاس ادامدارمەن ٴتىل تابىسۋدى ۇيرەنىپ الۋى ٴتيىس. ادامدارمەن جاقسى ٴتىل تابىسۋ ٷشىن ولاردى قۇلاق قويىپ تىڭداپ، ويلارى مەن سەزىمدەرىن تۇسىنە ٴبىلۋىڭ كەرەك (ناق. س. 20:5). بۇل ٷشىن ادامنىڭ داۋسىنا، بەت-الپەتىنە، دەنە قيمىلدارىنا مۇقيات دەن قويساڭ بولادى. بۇل — ادامدارمەن كوبىرەك ارالاسۋىڭ كەرەك دەگەن ٴسوز. ال ەگەر سەن وزگەلەرمەن تەك ەلەكتروندى حابارلامالار ارقىلى سويلەسەتىن بولساڭ، ولارمەن جۇزبە-ٴجۇز دۇرىستاپ ارالاسا الماي قالاسىڭ. سوندىقتان ادامدارمەن بەتپە-بەت سويلەسۋدىڭ امالىن جاسا (جوح. 2-ح. 12). سونىمەن قاتار، رۋحاني تولىسقان ەر ازامات ٶزىن جانە وتباسىن اسىراي الۋى شارت (ٴتىم. 1-ح. 5:8). جۇمىس تابا الۋىڭ ٷشىن ٴبىر ٸستى يگەرىپ الۋىڭ كەرەك (ەل. ٸس. 18:2، 3؛ 20:34؛ ەفەس. 4:28). وزگەلەر سەنى ەڭبەكقور، جۇمىستى سوڭىنا دەيىن اپاراتىن ادام دەپ ٴبىلسىن. سوندا ساعان جۇمىس تابۋ جانە سوندا قالۋ وڭاي بولادى. 23w.12 27-ب.، 12، 13-ابز.
23-تامىز، سەنبى
ەحوبانىڭ كۇنى تاپ ۇرىنىڭ تۇندە تۇسەتىنى سياقتى كەلەدى (سال. 1-ح. 5:2).
كيەلى كىتاپتا «ەحوبانىڭ كۇنى» دەپ ەحوبا جاۋلارىن جازالاپ، ال ٶز حالقىن قۇتقارىپ قالاتىن كەزىن ايتادى. بۇرىنعى زاماندا ەحوبا جاۋلارىن جازالاپ، كۇل-تالقان ەتكەن (يشايا 13:1، 6؛ ەزەكيەل 13:5؛ سافونيا 1:8). ال ٴبىزدىڭ كەزىمىزدە «ەحوبانىڭ كۇنى» ساياسي جەتەكشىلەردىڭ ۇلى بابىلعا شابۋىلداۋىمەن باستالىپ، ارماگەددون شايقاسىمەن اياقتالادى. سول «كۇننەن» امان ٶتۋ ٷشىن بىزگە قازىردەن باستاپ دايىندالۋ كەرەك. يسا دا زور الاپاتقا «دايىن بولىڭدار» دەپ ۇيرەتكەن. بۇل تىركەس ٴبىر رەت قانا ەمەس، ۇنەمى دايىن ٴجۇرۋدى بىلدىرەدى (مات. 24:21؛ لۇقا 12:40). ماسىحشىلەردى ەحوبانىڭ سوتتايتىن كۇنىنە دايىن جۇرۋگە تالپىندىرۋ ٷشىن، ەلشى پاۋىل سالونيكالىقتارعا 1-حاتىندا بىرنەشە تەڭەۋ كەلتىرگەن. ارينە، ەحوبانىڭ كۇنى ٴدال سول ۋاقىتتا كەلمەيتىنىن پاۋىل بىلگەن (سال. 2-ح. 2:1—3). سوندا دا ول باۋىرلاستارىن سول كۇن تۋرا ەرتەڭ كەلەتىندەي دايىن جۇرۋگە شاقىرعان. ونىڭ بەرگەن كەڭەستەرىنىڭ ٴبىز ٷشىن دە ماڭىزى زور. 23w.06 8-ب.، 1، 2-ابز.
24-تامىز، جەكسەنبى
سۇيىكتى باۋىرلاستارىم، بەرىك بولىڭدار، مىزعىماي تۇرىڭدار (قور. 1-ح. 15:58).
1970-جىلداردىڭ اياعىنا تامان جاپونيانىڭ توكيو قالاسىندا اسپانمەن تالاسقان 60 قاباتتى عيمارات بوي كوتەرە باستادى. سول كەزدە جۇرت جەر سىلكىنىسى ٴجيى بولاتىن قالادا بۇنداي ٴزاۋلىم ٷي قالاي تۇرماق دەپ ويلادى. سويتسە، ينجەنەرلەر بۇل عيماراتتى بەرىك قىلىپ، سويتە تۇرا دۇمپۋلەردە قيراپ كەتپەي، يىلەتىندەي ەتىپ جاساعان ەكەن. ماسىحشىلەر دە قانداي دا ٴبىر ماعىنادا وسى عيماراتقا ۇقسايدى. سەبەبى ولار بەرىك ٵرى يلىككىش بولىپ، وسى ەكى قاسيەتتىڭ ورتاسىن تابا ٴبىلۋ كەرەك. ماسەلەن، ٴماسىحشى قۇدايدىڭ زاڭ-تالاپتارىن ورىنداۋعا كەلگەندە بەرىك تۇرۋى قاجەت. ول «مويىنسۇنۋعا دايىن» ٵرى ٶز ۇستانىمىنان ەش اتتامايدى. ٴبىراق ورىندى بولسا نە جاعداي تالاپ ەتىپ تۇرسا، «يلىككىش» تە بولا بىلەدى (جاق. 3:17). وسىنداي ٴماسىحشى تىم قاتال دا، تىم جۇمساق تا ەمەس. 23w.07 14-ب.، 1، 2-ابز.
25-تامىز، دۇيسەنبى
سەندەر ونى ەشقاشان كورمەسەڭدەر دە، سۇيەسىڭدەر (پەت. 1-ح. 1:8).
يساعا ٸبىلىس شايتاننىڭ ازعىرۋلارىنا توتەپ بەرۋگە تۋرا كەلدى، ٴتىپتى شايتان ونى اشىقتان-اشىق قۇدايدى ساتىپ كەتۋگە شاقىردى. سوندا دا يسا ادالدىعىنان ەش تايمادى (مات. 4:1—11). شايتان يسا تولەمنىڭ قۇنىن وتەي الماۋ ٷشىن بارىن سالىپ، وعان كۇنا جاساتقىسى كەلدى. قىزمەتى بارىسىندا يسا ودان بەتەر سىنالدى. ادامدار وعان قارسى شىعىپ، ٴتىپتى ولتىرمەك بولدى (لۇقا 4:28، 29؛ 13:31). بۇعان قوسا، ول ٸزباسارلارىنىڭ كەمشىلىكتەرىنە ٴتوزدى (مار. 9:33، 34). سونداي-اق سوتتالعاندا جاۋلارى ونى ازاپتاپ، كەلەكە-مازاق ەتتى. ارتىنان ماسقارالايتىن ٶلىم جازاسىنا كەسىلىپ، ادام توزگىسىز ازاپپەن قينالىپ ٶلدى (ەۆر. 12:1—3). وعان وسى سىناقتىڭ اقىرعى ساتتەرىنە جالعىز توتەپ بەرۋگە تۋرا كەلدى. ەحوبا ونى قورعاپ قالمادى (مات. 27:46). كورىپ وتىرعانىمىزداي، تولەم بەرۋ ٷشىن يسا تالاي ازاپتان ٶتتى. وسىنىڭ بارىنە ٴبىز ٷشىن توزگەنىن ويلاعاندا، يسانى جانىمىزعا جاقىن تارتىپ، جاقسى كورىپ كەتەمىز ەمەس پە؟! 24w.01 10، 11-ب.، 7—9 ابز.
26-تامىز، سەيسەنبى
اسىعاتىن ادام جوقشىلىققا ۇشىرار (ناق. س. 21:5).
شىدامدىلىق ادامدارمەن ٴتىل تابىسۋعا كومەكتەسەدى. سابىرلى بولساق، وزگەلەر سويلەپ جاتقاندا مۇقيات تىڭداي بىلەمىز (جاق. 1:19). سونداي-اق شىدامدىلىق بار جەردە تاتۋلىق بار. شىدامدى بولساق، سترەسس كەزىندە ويلانباي ارەكەت ەتۋدەن جانە اۋىر سوزدەر ايتىپ قويۋدان اۋلاق بولامىز. سونىمەن قاتار بىرەۋ سەزىمىمىزدى جارالاعان كەزدە دە اشۋلانۋعا اسىقپايمىز، كەك تە الماي، «ٶزارا ٴتوزىمدى بولىپ، ٴبىر-ٴبىرىمىزدى كەڭپەيىلمەن كەشىرەمىز» (قول. 3:12، 13). شىدامدىلىقتىڭ تاعى ٴبىر پايداسى — ول بىزگە دۇرىس شەشىمدەر قابىلداۋعا كومەكتەسەدى. اسىعىس، ويلانباي ارەكەت ەتۋدىڭ ورنىنا، جاعدايدى سالماقتاپ-سارالاۋعا ۋاقىت بولگەنىمىز دۇرىس. مىسالى، جۇمىس ىزدەپ جۇرگەن بولساق، ٴبىرىنشى تابىلعان جۇمىسقا كەلىسە سالعىمىز كەلەتىن شىعار. ٴبىراق ٴبىز شىدامدىلىق تانىتىپ، سول جۇمىستىڭ وتباسىمىز بەن رۋحاني كۇيىمىزگە قالاي اسەر ەتەتىنى جايلى ويلانىپ كورگەنىمىز ابزال. ٴيا، شىدامدىلىق وكىندىرەتىن شەشىمدەردىڭ الدىن الادى. 23w.08 22-ب.، 8، 9-ابز.
27-تامىز، سارسەنبى
بويىمدا باسقا ٴبىر زاڭنىڭ بار ەكەنىن بايقايمىن. ول وي-سانامداعى زاڭعا قارسى كۇرەسىپ، مەنى تانىمدەگى كۇنا زاڭىنىڭ تۇتقىنى ەتەدى (ريم. 7:23).
ەگەر ٴتان قالاۋلارىڭىزبەن كۇرەسۋ كەرەكتىگىڭىز كوڭىلىڭىزدى تۇسىرسە، ەحوباعا باعىشتالعان كەزدەگى بەرگەن سەرتىڭىز جايلى ويلانعانىڭىز ٴسىزدى نىعايتىپ، ازعىرۋلارمەن كۇرەسە بەرۋگە كۇش بەرەدى. قالايشا؟ ەحوباعا باعىشتالعاندا، ٴسىز وزىڭىزدەن باس تارتتىڭىز. بۇل ەحوباعا ۇنامايتىن قالاۋلارىڭىزعا، ماقساتتارىڭىزعا «جوق» دەپ ايتۋدى بىلدىرەدى (مات. 16:24). سوندىقتان ازعىرۋلارعا، سىناقتارعا كەزىككەندە، نە ىستەيمىن دەپ ەكى ويلانىپ جاتپايسىز. قانداي جاعداي بولماسىن، ٴسىز ٷشىن ٴبىر عانا دۇرىس شەشىم بار — ەحوباعا ادال بولىپ قالۋ. كەزىندە ٵيۇپ ادام توزگىسىز قيىندىققا كەزىككەندە: «مىنسىزدىگىمنەن تايماسپىن»،— دەگەن ەدى (ٵيۇپ 27:5). 24w.03 9-ب.، 6، 7-ابز.
28-تامىز، بەيسەنبى
ەحوبا ٶزىن شاقىراتىنداردىڭ ٴبارىنىڭ قاسىندا، ٶزىن شىن جۇرەكتەن شاقىراتىنداردىڭ ٴبارىنىڭ جانىندا (ٴزاب. 145:18).
«سۇيىسپەنشىلىكتىڭ قۇدايى» ەحوبا بىزبەن بىرگە (قور. 2-ح. 13:11). ول ٴارقايسىسىمىزدىڭ قامىمىزدى ويلايدى. ونىڭ «اينىماس سۇيىسپەنشىلىگىنە بولەنىپ» جۇرگەنىمىزگە نىق سەنىمدىمىز (ٴزاب. 32:10). بىزگە تانىتقان سۇيىسپەنشىلىگى جايلى ويلانعان سايىن، ەحوبانىڭ ٴتىرى تۇلعا ەكەنىن سەزىنىپ، وعان جاقىنداي تۇسەمىز. ٴبىز ەش يمەنبەي، ەمىن-ەركىن وعان دۇعا ەتىپ، سۇيىسپەنشىلىگىنە قانشالىقتى مۇقتاج ەكەنىمىزدى ايتا الامىز. بۇكىل ۋايىمىمىزدى اشىپ ايتامىز، سەبەبى ونىڭ ٴبىزدى تۇسىنەتىنىن جانە كومەكتەسۋگە اسىق ەكەنىن بىلەمىز (ٴزاب. 145:19). ايازدى كۇنى وتتىڭ جىلۋىنا اسىعاتىنىمىزداي، ەحوبا دا ىستىق سۇيىسپەنشىلىگىمەن ٴبىزدى وزىنە تارتادى. ونىڭ سۇيىسپەنشىلىگى وتە كۇشتى بولسا دا، سونداي ايالى دا نازىك. ەندەشە، ەحوبانىڭ سۇيىسپەنشىلىگىنە كەنەلىپ جۇرگەن ٴسىز باقىتتىسىز. ٴبىزدى سۇيگەن ەحوباعا بەرەر جاۋابىمىز مىنانداي بولسىن: «مەن ەحوبانى جاقسى كورەمىن!» (ٴزاب. 116:1). 24w.01 31-ب.، 19، 20-ابز.
29-تامىز، جۇما
ولارعا ەسىمىڭدى اشتىم (جوح. 17:26).
يسا جاي عانا «قۇدايدىڭ ەسىمى — ەحوبا» دەپ ايتقان جوق. ونىڭ ٴتالىمىن ەستىپ جۇرگەن ياھۋديلەر بۇنى ونسىز دا بىلەتىن. يسا ولارعا اكەسىنىڭ قانداي تۇلعا ەكەنىن تانىتتى (جوح. 1:17، 18). مىسالى، ەۆرەي جازبالارىندا ەحوبانىڭ مەيىرىمدى ٵرى جاناشىر ەكەنى ايتىلىپ كەتكەن ەدى (مۇس. 2-ج. 34:5—7). ال يسا وسى شىندىقتى تەرەڭىرەك ٴتۇسىندىرۋ ٷشىن اداسقان ۇل مەن اكەسى جايلى استارلى اڭگىمە ايتتى. اكەسى كۇناسىنا وكىنگەن ۇلىن «الىستا كەلە جاتقاندا-اق» كورىپ، الدىنان جۇگىرىپ شىعىپ، باۋىرىنا باسادى دا، كەڭپەيىلمەن كەشىرەدى. وسى سوزدەر ەحوبانىڭ مەيىرىمدى ٵرى جاناشىر ەكەنىن كەرەمەت بەينەلەيدى (لۇقا 15:11—32). ٴيا، يسا اكەسىنىڭ شىن مانىندە قانداي قۇداي ەكەنىن اشىپ ٴتۇسىندىردى. 24w.02 10-ب.، 8، 9-ابز.
30-تامىز، سەنبى
قۇداي ٴبىزدى جۇباتقانىنداي، ٴبىز دە... [وزگەلەردى] جۇباتا الامىز (قور. 2-ح. 1:4).
ەحوبا رۋحى كۇيرەگەن ادامدى سەرگىتىپ، جۇباتادى. قالاي ٴبىز دە ەحوباعا ەلىكتەپ، جاناشىرلىق سەزىنىپ، وزگەلەردى جۇباتا الامىز؟ بۇل ٷشىن بويىمىزدا وزگەلەردى جۇباتۋعا تالپىندىراتىن قاسيەتتەردى جەتىلدىرسەك بولادى. مىسالى، قانداي؟ بىزگە «ٴبىر-ٴبىرىمىزدى ٵردايىم... جۇباتىپ»، سۇيىسپەنشىلىك تانىتا بەرۋگە نە كومەكتەسەدى؟ (سال. 1-ح. 4:18). قايعىعا ورتاقتاسۋ، باۋىرلاستاردى ٴسۇيۋ، مەيىرىمدىلىك سياقتى قاسيەتتەر (قول. 3:12؛ پەتىردىڭ 1-حاتى 3:8). بۇل قاسيەتتەر قالاي كومەكتەسەدى؟ ەگەر جاناشىرلىق جانە ونىمەن بايلانىستى قاسيەتتەر بويىمىزدا جەتىلىپ، بولمىسىمىزعا ٴتان بولىپ كەتسە، ادام قينالعاندا قاراپ تۇرا المايمىز، ونى جۇباتۋعا اسىعامىز. ويتكەنى يسا ايتقانداي، «ادامنىڭ جۇرەگى نەگە تولى بولسا، اۋزى سونى ايتار. جاقسى ادام جۇرەگىندەگى جاقسى قازىنادان جاقسى نارسە... الىپ شىعادى» (مات. 12:34، 35). راسىمەن دە، باۋىرلاستاردى قاجەت كەزدەرىندە جۇباتۋ — ولارعا سۇيىسپەنشىلىك تانىتۋدىڭ ماڭىزدى جولى. 23w.11 10-ب.، 10، 11-ابز.
31-تامىز، جەكسەنبى
ٴبىراق اقىل-پاراساتى بارلار ۇعادى (دان. 12:10).
پايعامبارلىقتاردى ٴتۇسىنۋ ٷشىن بىزگە كومەك قاجەت. مىسالى، ٴسىز بەيتانىس جەرمەن كەلە جاتىرسىز دەلىك. ٴبىراق قاسىڭىزدا سول جەردى بەس ساۋساعىنداي بىلەتىن دوسىڭىز بار. ول ٴسىزدىڭ قايدا تۇرعانىڭىزدى جانە قاي جول قايدا اپاراتىنىن جاقسى بىلەدى. ونىڭ ٴسىزدى الىپ جۇرۋگە كەلىسكەنىنە وتە ريزا بولارسىز! ەحوبا دا تۋرا سونداي دوس سياقتى. ول ٴبىزدىڭ ۋاقىت لەگىنىڭ قاي جەرىندە تۇرعانىمىزدى جانە الدىمىزدا نە كۇتىپ تۇرعانىن جاقسى بىلەدى. سوندىقتان پايعامبارلىقتاردى ٴتۇسىنۋ ٷشىن ٴبىز ونىڭ كومەگىنە جۇگىنۋىمىز كەرەك (دان. 2:28؛ پەت. 2-ح. 1:19،20). كەز كەلگەن اتا-انا بالاسىنىڭ بولاشاعى جاقسى بولسا ەكەن دەيدى، ٴبىراق ەشقايسىسى دا بولاشاقتا نە بولاتىنىن ناقتى ايتا المايدى. ەحوبا دا بىزگە جاقسى بولاشاق تىلەيدى، ٵرى ول الدا نە بولاتىنىن بىزگە ٴدال ايتا الادى (ەرم. 29:11). الدا بولاتىن ماڭىزدى وقيعالاردى ٴبىلىپ وتىرۋىمىز ٷشىن ول ٶزىنىڭ سوزىنە پايعامبارلىقتار جازدىرىپ قويعان (يشايا 46:10). 23w.08 8، 9-ب.، 3، 4-ابز.