Andrew sumik ilikkagaqarfigigipput

SULIARTORTILLUNGA nuannaaqaanga ullualuit qaangiuttut pisimasut eqqarsaatigalugit. Nukappiaqqamut ataatanngoqqammerpunga, meeqqatta aappassaannut. Ullumikkut nuliara, Betty Jane erneerarpullu napparsimmavimmit angerlartussaapput.

Napparsimmavimmiilli angerlartinnatik nuliama sianerfigaanga, ernumarpalulluni. Tuaviinnavik napparsimmavimmukarpunga. Oqaasii siulliit imaapput: „Arlaannik ajortoqarpoq!“ Ingillutalu nakorsat takkunnissaat utaqqilerparput.

Meeqqat nakorsaata oqaasii siulliit tupaatigeqaavut. Ima oqarpoq: „Nalunanngilaq ernersi Downs syndromeqartoq.“ Oqaluttuuppaatigut ilimanartoq ernerput eqqarsartaatsimigut innarluuteqassasoq. Nassuiaataasa sinneri tusarnaanngilakkaluunniit. Tupannermik tusaasaqanngitsutut ippunga, isigisinnaasakkalu kisiisa isummama tigoorarpai.

Andrew tiguaa takutillutalu suup ajortoqarneranik ilimasulersissimagaani. Naalugiarsuup niaqua qasussimalluni nakangaannarpoq. Inoorlaaq nukillaangagaangat nalunartanngilaq Downs syndromeqartoq. Kingorna meeqqat nakorsaat oqaloqatigalugu eqqaasinnaasatsinnik tamanik apersoqattaarparput, aamma sumik pisoqarneranik paasinnikkiartorneruleriaratta. Qanoq innarluuteqartigissava? Suna ilimagisinnaavarput? Qanoq annertutigisumik ilinniartissinnaavarput? Qanoq paasisinnaatigissava? Nassuiaappaatigut apeqquterpassuatta akissutissaannut peroriartornermini avatangiisii inunnguutsiminillu piginnaaneri aalajangiisuussasut.

Ukiuni 20-ni amerlanerusuni qaangiutereersuni Andrew asanninnermik isumassuinermillu sapinngisatsinnik tamanik tunisarsimavarput sapinngisarpullu naapertorlugu ilinniartinniartarsimallutigu. Kingumulli qiviassagutta oqaatigisinnaavarput tunisineq kisiat pinnagu aammali tigusineq eqqarsaatigalugu ilinniagassaqartarsimalluta.

Siunnersuutit pitsaasut

Andrew ilagalugu inuunerput nutaaq suli sungiutinngikkipput, ikinngutit asannittut inuunerminni misilittagarisimasaminnik tunngaveqartunik siunnersortarpaatigut. Ajunngitsumik isumaqarlutik taama iliorput, kisianni aamma soorunami siunnersuutigineqartut ilaat atorsinnaaneq ajorpavut. Ukiorpassuarnili misilittakkatik tunngavigalugit siunnersuutaat ataatsimut kattullugit tassaalersimapput oqaassutit silatuut.

Ilaat tuppallersarniarluta oqartarput Andrewip innarluuteqarnera ingasarujussuanngitsoq. Taavali ikinngutigilluakkatta ilaata ima oqaaqqissaarpaatigut: „Pissutsit piviusut akueriniarsigik! Piginnaasaasa killissaqarnerat akuerigussiuk taassumunnga ilimasuffiginninnersi allanngulertornerussaaq taamaanneralu naapertorlugu sulissutigilissavarsi.“

Paasinarsivoq tamanna tatineqartarnitta akiornissaannut atatillugu ilinniarsimasatsinni pingaarnerpaasimasoq. Pissutsit piviusut akuerinngikkaanni siumukartoqalersinnaanngilaq. Ajornartorsiutit amerlasuutigut nalullugu meserratigineqartoortarput, taamaattuartilluguli killissat ’periarfissat nalaatsortumillu pisut’ iluanniittut naapertorlugit ajornartorsiutit piviusorsiortumik iliuuseqarfiginissaat kinguarsarneqartuartarpoq. — Nalunaajaasup oqaasii 9:11.

Ukiut ingerlanerini angajoqqaat atuarfimmi ilinniartitsissutaasunik nalinginnaasunik sapersunik immikkulluunniit atuartitaasariaqartunik meerallit naapikkaangatsigik, eqqarsaatigikulasarparput meeqqat taakkua ilarpassui eqqarsartaatsimikkut innarluuteqartuunersut allatigulluunniit innarluuteqarnersut. Eqqarsaatigisarparput tassaannginnersut „ersinngitsumik innarluutillit“, Andrewip akerlianik timimikkut, meeqqanit ajunngitsunit allaassuteqanngitsut? Inuit Downs syndromeqartut isikkumikkut ilisariuminartuupput, innarluutillilli allat takussaanngitsumik ilisarnaateqassanatik. Angajoqqaammitaava qassit piviusorsiunngitsunik ilimagisaqarlutillu meeqqamik killilimmik piginnaaneqarneranik akueriuminaatsitsisimappat, tamanut ernumatsannermik kingunilimmik. — Naleqqiuguk Kulorsamiunut agdlagkat 3:21

Siunnersuutip aappaa eqqortutut paasisimasarput mannaavoq: Pingaarnerpaamik ILISSI ANGAJOQQAAT allat meeqqassinnut qanoq iliorfiginninnissaannut sunniuteqartuuvusi. Ilissi taassumunnga qanoq iliorfiginnittarnissisut allat iliortarnissaat ilimanarluinnarpoq.

Ukiorpassuunngitsut ingerlaneranni inuit timikkut eqqarsartaatsimikkullu innarluutilinnut isiginnittarnerat assut allanngorsimavoq. Allanngornerit tamakku ilarpassuinut pisooqataapput innarluutillit namminneq, qanigisaat, inuinnaat pineqartunillu suliaqartut. Angajoqqaarpassuit meeqqamik immikkut paaqqinnittarfimmut inissinnissaannik siunnersuut sapiillutik itigartissimavaat taamaalillutillu innarluutilinnut isiginnittaaseq nalinginnaasoq allanngortissimallugu. Ukiut 50-it matuma siorna atuakkat Downs syndromimik nakorsaanermut tunngasut paasissutissanik eqqarsartaatsimikkut kinguarsimasunik paaqqinnittarfimmeersunik tunngaveqartarput. Ullumikkut meeqqanut Downs syndromilinnut ilimasuffiginninneq allaavoq, angajoqqaat allallu nutaamik aqqutissiuinerat pissutaanerulluni.

Misiginneqataanerunissaq ilikkarsimavarput

Maluginiarnartuuvoq qanoq ajornanngitsigisoq imminut salloqittartuussalluni allanut misiginneqataalluni. Nammineq akuliusimanngikkaanni ajornartorsiutit ilarpassuinut paasinninneq qarsupittorujussuusinnaavoq.

Andrewip atugaata paasitippaatigut innarluutillit amerlanerit atukkatik aqussinnaanngkkaat. Imminut aperisariaqalersimavugut: „Sanngiitsunut, eqqarsartaatsimikkut kinguarsimasunut utoqqarnullu qanorpiaq isiginnittaaseqarpunga?“

Qassiinik Andrew inuit akornanneeqatigigaangatsigu Andrewimik ittuukuluutiginagu ilaqutariinnut ilaalluinnartutut pinninnitsinnik maluginiagaqarsimasut saaffigisarpaatigut namminnerlu ajornartorsiutiminnik oqaluttuuttarluta. Soorlumi Andrewip najuunnerata qularunnaarsissimagaat pissutsit atukkatik paasisinnaassagivut.

Asanninnerup pissaanera

Andrewimit ilinniarsimasarput pingaarnerpaaq tassaavoq asanninneq silaqassutsimuinnaq tunnganngitsoq. Nassuialaarlara. Jehovap Nalunaajaasuisa ajoqersuutaasa tunngaviusut ilagaat kristumiussutsimi ilumoortumi ammip qalipaataatigut, innuttaaqatigiinni inissisimaffikkut politikkikkullu immikkoorutit paqumisuutillu atunngitsut. Tamanna tatigalugu nalunngilarput Andrew anersaakkut qatanngutinit angutinit arnanillu akuerineqassasoq. Naak ilisimasallit oqaraluartut kristumiut ataatsimiinnerini eqqissilluni issiasinnaanissaa ilimagissallugu piviusorsiornerunngitsoq, inunngorsimatsiaannartorli ataatsimiinnernut ilaginiartarparput illumiillu illumut oqaluussiartoqatigisarlutigu. Naatsorsuutigisatsitut ilagiit inussiarnersumik isumassuisumillu iliorfigisarpaat.

Ilaalli iliuuseqarnerusarput. Taassuminnga immikkut nuannarinnipput. Soorlumi Andrewip silaqassutsikkut piginnaanini killeqartut akimungaarlugit tamanna malugisinnaagaa. Qatanngutit taakku ilagigaangamigit ittoornini ajugaaffiginerusarpaa ataatsimiinnerlu naammassigaangat ingerlaannaq ornittarlugit. Arlaleriarluta malugisarparput nalusaminik piginnaaneqartoq, allaat katersuussimasorpassuarniikkaluaraangami, maluginiartarlugit kikkut imminut immikkut nuannarinnittuusut.

Andrew aamma immikkut soqutigisaqarnerminik ersersitsiffeqartarpoq. Meeqqanik mikisunik, utoqqarnik uumasuutinillu qajassuussisorujussuusarpoq. Ilaannikkut kisinnani meeraaqqat nalusatsinnik angajoqqaallit qanillattuleraangagit akulerunnissatsinnut piareersimasarpugut sakkortuallaartumik pinnguaqatigilersooqinammagit. Kisianni qassinimmita ilimasupilussimanerput kanngutsissutigisarnerparput takugaangatsigu anaanap milutitsisup iliortarneratut sallaatsumik attuuagai.

Sumik ilikkagaqartugut

Meeqqat Downs syndromeqartut isikkumikkut tamarmik assigiittarmata, takorloorsimagaluarparput tamarmik assigiimmik pissuseqassasut. Paasinasuarparpulli imminnut pinnatik ilaquttatik assiginerugaat. Tamarmik immikkut namminerisaminnik pissuseqarput.

Meeqqat allat pisarnerattut Andrewip suliassat nuannarivallaanngilai. Kisianni paasivarput pisariaqartunik naammagittassuseqarlutalu nikalluussiuissuseqarluta suliassamut aalajangersimasumut arlaleriarujussuarlugu sungiusartittarutsigu taava naggataatigut ileqquliutiinnassagaa, suliassatut isigiunnaarlugu. Maannakkut angerlarsimaffimmi pisussaaffini pissusissamisoorluinnartutut isigisarpai. Suliassat sungiusimanngisani kisiisa suliassatut ajornakusoortutut isigisarpai.

Andrewip peroriartornerani ilinniarsimasavut kingumut eqqarsaatigileraangatsigik, soqutiginartumik ersertoqartarpoq. Najoqqutassat Andrewimik perorsaanitsinni ilikkarsimasavut tamarmik meeqqatsinnut inunnullu allanut tamanut atatillugu atorluarsinnaapput.

Asanninnermik piviusumik ersersitsivigineqaraangatta kina arlarput ajunngitsumik qisuariartannginnerpa? Uagutsinnit allaanerujussuarnik piginnaaneqarlutillu misilittagalinnut nuanniitsumik naleqqiunneqaraangatta naapertuilluanngitsutut nikallornartutullu isigisannginnerparput? Amerlanersattalu misigisimannginnerpaat uagutsinnut suliassiissutigineqartut ilarpassui aallaqqaammut kajuminnanngeqqaaraluariarlutik unitsiinnanngikkaanni kajuminnarsiartuaartartut, aap allaat nuannersisartut.

Naak inuttut uungaannaq isigeqqajaalluta Andrew pillugu qullilisarsimagaluaqaluta, aammattaaq nuannaaruteqarsimaqaagut, angisuunik mikisunillu. Allatigullu Andrewimut attuumassuteqanngilluinnartutigut misigisimavugut siumukarnissatsinnik ikiorsimagaatigut. Ilinniarsimavarput inuunermi suulluunniit misigisat, qanorluunniit misilinneqaataatigigaluartut, nakallussutigiinnartariaqanngitsut, inuttulli ajunnginnerulernissatsinnik periarfissiisarlutik.

Aamma alla uatsinnut pingaaruteqaqaaq. Qilanaareqaarput Andrewip innarluuteqarnerminik ajorunnaarsitaanissaa. Biibilimi neriorsuutigineqarpoq Guutip silarsuassaani nutaami naapertuilluartumi tappiitsut, tusilartut, tusiattut oqajuitsullu ajorunnaarsitaajumaartut. (Jesaja 35:5, 6; Matîuse 15:30, 31) Takorlooriaruk nuannaarneq kikkut tamarmik misigisassaat isummakkut timikkullu ajorunnaarsinneqarnermik inuiaallu naammalluinnartunngortinneqarnerannik takunnilerunik. (Tussiaat 37:11, 29) — Nassiussaq.

[Qupp. 13-mi ungalusaq]

Downs syndromimut malunnaatit assigiinngitsut

Immikkut ilisimasallit inuit Downs syndromeqartut pingasunut avissimavaat. (1) Inuit immannguaq eqqorneqarsimasut. Taakku atuagarsornikkut annertungaatsiartumik piginnaasaqalersinnaapput. Taakkunani isiginnaartitsisartoqarpoq, allaallu ilinniartitsillaqqissoqarluni. Ilaat kisimiillutik najugaqarsinnaapput, nakkutigineqalaaginnarlutik. (2) Inuit sualunngitsumik eqqorneqarsimasut. Taakku suliassat naliginnaanerusut ilinniarsinnaavaat. Nammineernissartik ilinniarsinnaagaluarlugu tapersersorneqarnissartik atorfissaqartinnerusarpaat. (3) Inuit sualuttumik eqqorneqarsimasut. Nakkutigineqartuaannarnissartik atorfissaqartippaat.

Andrewimi? Nalunngilarput ullumikkut sualunngitsumik eqqorneqarsimasunut ilaasoq.