Aronip ajaappiaa sikkertoq

SIKKERNERIT qaqqortarissallu inerittut ajaappissami uaniittut takoriakkit. Tassaana Aronip ajaappiaa. Sikkernerit inerittullu taakku Aronip ajaappiaani unnuami ataasiinnarmi naasimapput! Suna pissutaasoq tusariartigu.

Israelikkut inoqajuitsumi angalaartuarput. Inuit ilaasa Moses siulersuisoriumanngilaat, Aronilu palasiuneroqqunagu. Taamatut isumaqartut Kora ilagaat. Datan Abiramilu inuillu naalagaasa ilaat 250-it aamma taama isumaqarput. Tamarmik Moses oqarfigiartorpaat: ’Suna pillugu illit uatsinnit qutsinneruniarpit?’

Mosesip Kora tapersersortaalu oqarfigai: ’Aqagu ullaakkut aamaasivisi tigussavasi tipigissaammillu ilisiffigalugit. Taava Jehovap illernartuutaanukassaasi. Jehovap kina toqqarumaarneraa takujumaarparput.’

Aqaguani Kora tapersersortaalu 250-iusut illernartuummukarput. Allarpassuit ilaapput angutit taakku tapersersorumallugit. Jehova kamattorujussuuvoq. ’Inupiluit taakkua toqqi nigorsigit,’ Moses oqarpoq. ’Pigisaat suulluunniit attoqinasigit!’ Inuit naalappaat, Korallu, Datanillu Abiramillu toqqinit nigorlutik.

Taava Moses oqarpoq: ’Tassuuna Jehovap toqqagai nalunarunnaassapput. Nuna ammassaaq inupiluillu taakku iillugit.’

Moses nipangermat nuna qupivoq. Korap toqqa pigisaalu Datanilu Abiramilu ilagisaallu nakkarput, nunallu matuai. Quppamut nakkartut nillianeri inuit tusaramikkik suaarput: ’Qimaaniaritsi! Nunap aamma uagut eeqinavaatigut!’

Kora tapersersortaalu 250-iusut suli illernartuutip eqqaaniipput. Taava Jehova innermik anisitsivoq, tamarmillu ikuallagaapput. Taava Aronip ernera Eleazer Jehovap oqarfigaa angutit toqusut aamaasivii kanngussaasut tigoqqullugit aatsillugillu pilliivimmut saattumik qalliutigeqqullugit. Pilliivimmut qalliut tamanna Israelikkunnut mianersoqqussutaavoq Aron ernerilu kisimik Jehovamut palasiusussaasut.

Jehovalli erseqqissaqqissaarumavaa Aron ernerilu qinerini palasinngortillugit. Moses oqarfigaa: ’Israelikkut naggueqatigiissortaasa siulersortaat tamarmik immikkut ajaappissamik aggiusseqqukkit. Naggueqatigiit Levikkut sinnerlugit Aron ajaappissaminik aggiusseqqujuk. Taava ajaappissat taakku tamaasa illernartuutiliami angerutsip illerfiata saanut ilikkit. Angutip uanga palasitut qinikkama ajaappiaa sikkerumaarpoq.’

Aqaguani takusaramigit Mosesip takulerpaa Aronip ajaappiaa sikkerlunilu inerittunik qaqqortariaqartoq! Taava paasiviuk suna pissutigalugu Aronip ajaappiaa Jehovap sikkertikkaa?