Mosesip qaarsoq anaagaa

UKIUT ingerlapput — qulit, 20-t, 30-t, ukiut 39-t! Israelikkullu suli inoqajuitsumiipput. Ukiorpassuarnili tamakkunani Jehovap innuttani isumassorpai. Mannanik nerisittarpai. Ullukkut napasumik nuiaasumik siulersortarpai, unnuakkullu napasumik innerusumik. Ukiorpassuarnilu tamakkunani atisaat nungullanngillat isigaallu annernarneq ajorlutik.

Maanna Egyptenimit aniguineranniit ukiut 40-ssaata qaammataasa siullersaraat. Israelikkut Kadesjimi tammaaqqipput. Tamaaniissimapput ukiut 40-ngajaat tamatuma siorna alapernaarsuisut aqqaneq-marluk aallartitaammata Kana’anip nunaa alapernaarsoriartorlugu. Mosesip aleqaa Mirjam Kadesjimi toquvoq. Siornatigutullu naammagittaalliortoqartaqqilerpoq.

Inuit imissaaleqipput. Taava Mosesimut maalaarput: ’Toqusimassagaluaratta. Sooq Egyptenimit aallaruppisigut najukkamut matumunnga ajortumut naasoqarfiunngitsumut? Karreqanngilaq, fiigeqanngilaq, viinnissaqanngilaq kimmernarsuaqaraniluunniit. Imeqanngilarluunniit imersinnaasatsinnik.’

Moses Aronilu qinujartorlutik illernartuummut pimmata, Jehovap Moses oqarfigaa: ’Inuit katersortissigik. Taava tamarmik isigitillugit qaarsoq innga oqaluffigissavat. Inuit nersutaataasalu imigassaat naammaqisoq tassannga anissaaq.’

Taava Mosesip inuit katersortippai, oqarlunilu: ’Tusaaniaritsi, Guutimut tatiginninngitsusi ukorsii! Aronilu qaarsumit matumannga imermik anisitsivigissavassi?’ Taava Mosesip qaarsoq marloriarluni ajaappissaminik anaavaa, imerlu qaarsumit kuuttorsuanngorpoq. Naammattumik imissarsipput inuit uumasullu tamarmik imigassaannik.

Jehovalli Moses Aronilu kamaappai. Suna pigaa nalunngiliuk? Pissutigalugu Moses Aronilu oqarmata namminneq qaarsumit imermik kuutsitsiniarlutik. Jehovaliuna taamaaliortoq. Taavalu Mosesip Aronillu tamanna ilumoortumik oqaatiginngimmassuk, Jehova oqarpoq pillarumaarlugit. ’Innuttakka Kana’anip nunaanut apuutissanngilasi,’ oqarpoq.

Israelikkut Kadesjimit aallarput. Sivitsunngitsoq Horebip qaqqaanut pipput. Tassani, qaqqap qaavani, Aron toquvoq. Toqugami 123-nik ukioqarpoq. Israelikkut aliasoqaat, taamaattumik ullut 30-t inuit tamakkerlutik Aron qiavaat. Ernera Eleazar inuiaqatigiinni Israelikkunni tulliulluni palasiuninngorpoq.