Immami Aappalaartumi tupinnartuliaq

Faaruup Israalikkut Egyptenimiit aallarsimasut tusaramiuk ingerlaannaq aallartitsisimanini peqqissimis­sutigilerpaa. Sakkutuuni peqquai: ‘Qamutit sorsuutit tamaasa piareersarsigit! Malersor­niassavagut! Aallartis­simassan­ngikkaluaratsigit.’ Taava Faaruup sakkutuunilu Israalikkut malersulerpaat.

Jehovap innuttani ullukkut nuiaq atorlugu unnuakkullu inneq atorlugu siulersorpai. Immamut Aappalaar­tumukartippai, tassanilu oqarfigai tupissasut.

Maanna Israalikkut paasilerpaat Faaruup sakkutuuisalu malersoraatik. Immap Aappalaartup illuatungaaniipput Egyptenimiullu illuatungaaniit aggerlutik. Qimaaffis­saqarsorin­nginnamik Moorsisimut nilliapput: ‘Tamatta toqussaagut! Egyptenimiigin­nartissimas­sagaluaratsigut.’ Moorsisili oqarpoq: ‘Erseqinasi! Jehovap qanoq annaatis­saneraatigut takoriarsiuk.’ Moorsisip Jehova tatigil­luinnarpaa, ilaa!

Jehovap Israalikkut oqarfigai ingerlaq­qinnissaminnut piareersassasut. Unnuaq taanna Jehovap nuiaq Egyptenimiut Israalikkullu akornannut pisippaa. Egyptenimiut tungaani taarpoq Israalikkullu tungaani qaamalluni.

Jehovap Moorsisi oqarfigaa assani immap qulaagut isaatissagaa. Taava Jehova unnuaq tamaat anorersuar­titsivoq. Imaq avissaarpoq naqqalu qeqqatigut pisuffigineqarsin­naanngorluni. Taamaalillutik Israalikkut millionillit imaq illuttut iigarsuartut avissimasoq ikaarlugu ingerlalerput.

Faaruup sakkutuuisa Israalikkut immap naqqatigut panertukkut ingerlasut malersulerpaat. Taava Jehovap sakkutuut paatsiveerutitippai. Qamuterpassuit assakaasui katagalerput. Sakkutuullu nilliapput: ‘Qimaaniarta! Jehova illersor­niarlugit sorsummat.’

Taava Jehovap Moorsisi oqarfigaa: ‘Assat immap qulaagut isaaguk.’ Taamaalisorlu ingerlaannaq Egyptenimiut sakkutuuinut Faaruumullu imaq iikkatut ikkunnaarluni kuuttorsuan­ngorpoq. Faaruu sakkutuuilu tamarmik toqupput, ataatsimil­luunniit annattoqanngilaq.

Akiani inuppassuit ikaarsimasut erinarsorlutik Guuti unnersiutigaat: ‘Jehova qutsissingaar­titaammat erinarsorfigisigu. Hestit qimussersullu immamut naloriuppai.’ Erinarsor­tillutik arnartaat qitipput qilaataasanillu nipilersorlutik. Tamarmillu aniguisitaanertik nuannaarutigeqaat.