’Tunissutinik ajunngitsunik tamanik’ tunisisoq
„Ilaanni palasip ilagiinnit reformertiusuneersup oqaloqatigiumavaanga. Paaserusuppaa uanga ilagiissikka qanoq ilillunga aquttarnerikka. Oqarfigaara: . . . ’Akissarsisitsineq ajorpugut, oqqassutissanillu pilersoqarneq ajorpoq. Aningaasanik katersuiniartitsinngisaannarpugut.’ ’Aningaasammi sumit pisarpisigit?’ aperivaanga. Akivara: ’Hr. ——, ilumoortoq oqaluttuarigaluarukkuluunniit upperiuminaatsissagunarpat. Inuit aqqummik tamatuminnga soqutiginnileraangata pinngitsaalillugit tunisitinniarneqarneq ajorput. Paasisarpaat aningaasartuuteqartoqartoq taavalu imminnut ima oqarfigisarlutik: „Inersuaq manna aningaasanik akeqarpoq. . . . Suliaq tamanna siuarsarniarlugu qanoq ilillunga aningaasanik tunissuteqarsinnaavunga?“’ Nakkuppaanga soorlumi ima eqqarsarluni: ’Sutununa isigigimma — sianilluanngitsutut?’ Oqarpunga: ’Hr. ——, ilumoortoq oqaatigiinnarpara. . . . Inuk misigiguni pilluaqqusaalluni, pigisaqarunilu, taava pigisami Naalakkamut atornissaat kissaatigilersarpaa. Peqanngippallu taava sooq tunisitinniarsarissavarput?’“
— Charles T. Russell, Napasuliaq Alapernaarsuiffiup peqatigiiffiata præsidenteqqaava, „The Watch Tower“, 15. juuli, 1915.
TUNISISARPUGUT Jehova Guuti siulliulluni tunisisimammat. Itsarsuarli Jehova tunisisalersimavoq — tassa pinngortitani siulleq, ’ernitui’. (Juánase 3:16) Asanninnermigut inuunermik tunissut allanut ingerlateqqippaa.
Guutip ernera, Jesus Kristus, Jehovap uagutsinnut tunissutaasa annerpaartaraat. Guutilli ernini kisiat tunissutiginngilaa. ’Guutip saammaannera angingaartoq’ apustilip Paulusip taasimavaa ’Guutip tunissutaanik taassaanngitsumik’. (2 Korintumiut 9:14, 15) Nalunanngitsumik tunissummut tamatumunnga ilaavoq ajunngissutsip ilumoorlunilu tunniusimassutsip angingaartup Guutip Jesus aqqutigalugu innuttaminut ersersitaata katinnerat tamarmi. Saammaanneq ima asseqanngitsigaaq inuinnaat paasinnittaasiat akimorsimallugu. Sulilu aamma allanik Guuti tunissuteqarsimavoq.
Itsarsuaq kunngip maniguullunilu silatuup misiutigisimanngilaa tunissutigisinnaasani sunaluunniit iluamik oqaatigalugu Jehovap pigigaa. Oqarsimavoq: „Qilammiittut nunamiittullu tamaasa pigaatit, [Jehova]. Illit pigaat naalagaaffik, illimmi naalagaanersuullutit suut tamaasa sapigarinngilatit. . . . Uangami kinaanerpunga, innuttakkalu suunerpat? Uagut nammineq pissaanerput atorlugu kajumissutsikkut tunissutinik aatsivigisinnaanngilluinnarpatsigit. Suut tamarmik ilinnit pipput, makkuttaaq tunniussavut tassaapput ilinnit pisarisimasavut.“ — 1 Israelikkut 29:11-14.
Guutip maligassiaa
Jakobip, Jesus Kristusip ajoqersugaasa ilaata, nalusimanngilaa Jehova Guuti suut ajunngilluinnartut tamarmik pilerfigigaat. Tunissutit naammalluinnartuinnaat taassumannga pipput. Jakob allassimavoq: ’Tunissutit tamarmik ajunngitsut tunniussallu tamarmik naammalluartut pavannga qaamasut ataataannit allanngorfeqanngitsumit tarranilluunniit taallerneqartanngitsumit pisarput.’ — Jâko 1:17.
Aamma tunissutinik tunissuteqarnermut atatillugu Jakobip paasisinnaasimavaa Jehova Guuti inunnit immikkooruteqartoq. Ajunngitsunik tunisisinnaavugut, tamatiguunngitsorli taamaaliortarluta. Immaqa tunisisoqartarpoq namminissarsiortumik pissuteqarluni, imaluunniit inuk eqqunngitsumik iliortinniarsaralugu. Jehovali allanngorneq ajorpoq; allanngorfeqanngilaq. Taamaattumik tunissutai aamma allanngorneq ajorput. Tamatigut tassaasarput tunissutit ajunngitsut. Tamatigut uagutsinnut nuannaarutissaallutillu iluaqutissaasarput. Tamatigut iluaqutissaasarput ajoqutissaanngisaannarlutillu.
Tunissuteqartarnermut pissut
Jakobip nalaani upperisarsiornikkut siuttut tunissuteqartarput, allanit malugineqarnissartik kisiat siunertaralugu. Eqqunngitsumik pissuteqarlutik tunisisarsimapput. Inunnit iluarisaanissartik ilungersuutigiuartarsimavaat, naapertuilluassutsimut najoqqutassat unioqqutillugit. Kristumiulli taamatut iliortussaanngillat. Jesus ima siunnersuuteqarsimavoq: ’Taamaattumik piitsut tunisaraangakkit siunikkut qarlortaqqusissanngilatit, soorlu ilumoortuusaarniartut naalagiartarfinni illullu akornanni iliortartut inunnut nersoqqullutik. Ilumut oqarfigaassi: Akissarsiassaraluartik pereerpaat. Illilli piitsut tunisaraangakkit, saamiit arajutsili talerpippit suliaanik, tunissutit isertugaaqqullugu; taava Ataatavit isertortumut isigisup akilissavaatit.’ — Matîuse 6:2-4.
Kristumiut tunissuteqaraangamik allanik nuannaartitsinissartik, pisariaqartitaannik matussutissiinissartik imaluunniit pallorfiginninnermik ilumoortumik siuarsaanissartik siunertarisarpaat. Nersorneqarnissartik siunertarineq ajorpaat. Jehovap isai uummatitta ilorpiarpiaanut isigisinnaapput. Naakkinnissutinik tunissuteqaraangatta pissutigisarput ilorlerpaaq takusinnaasarpaa.
Jehovap nalunaajaasuisa ilungersuutigaat tunissuteqarnermut atatillugu Jehovap Jesusillu maligassiaannik malinninnissartik. Pigisaminnik tunissuteqartarput. Naalagaaffimmik nutaarsiassaq nuannersoq pigisartik allat pilluaqquneqaatissaannut siaruartertarpaat. Ussatit 3:9-mi oqaatsit nalunngilaat: „[Jehova] ataqqinaaseruk pigisannik, naatitavit tamarmik inereqqaataannik.“ Immikkoortortaqarfiit, ilagiit inuillu ataasiakkaat kikkut tamarmik iluaqutissaannut tunissuteqarnissartik eqiasuillutik ujartortarmassuk qatanngutigiissuit tamarmik anersaakkut nakussatsinneqartarput siumukarlutillu. Timikkut atortutigut siumukarneq anersaakkut siumukarnermik kinguneqarneq ajorpoq, anersaakkulli siumukarneq timikkut atortutigut, Jehovap suliaani pisariaqartutigut, siumukarnermik kinguneqartarpoq.
Aveqatiginneriaatsit
Kikkut tamarmik nutaarsiassap nuannersup siuarsarnissaanut qanorluunniit ilillutik tapersersuuteqarsinnaapput. Assersuutigalugu ilagiinni ilaasortaasut tamarmik rigssali atortarpaat. Ilaat rigssalip tamatuma sananeqarnissaanut imaluunniit attartornissaanut, qaammaqquteqarnissaanut, kiassarnissaanut aserfallatsaalinissaanullu aningaasaliisimapput. Tamarmik ilagiinnik aningaasatigut tapersersuinissaat pisariaqarmat rigssalimi tunissutinut nakkaatitsivimmik ikkussisoqarsimavoq, kajumissutsimillu tunissutit ilagiit aningaasartuutaannut matussutigineqartarput. Ilagiit aalajangerpata sinneruttut immikkoortortaqarfimmut tunissutitut nassiunneqarsinnaapput.
Aamma tunissutinik, ajoqersuiartortitanik specialpionerinillu nunarsuup ilaani nutaarsiassap nuannersup siammarsimaffigivallaanngisaani kiffartortunik ilinniartitsinermut inuussutissaqartitsinermullu atugassanik, Peqatigiiffiup immikkoortortaqarfiinut toqqaannartumik nassiussisoqarsinnaavoq. Nutaarsiassap nuannersup siammarterniarneranut atatillugu aningaasartuutinut aamma nakkutilliisut angalasartut kiffartornerat attuumassuteqarpoq. Apustilip Paulusip, ullumikkut nakkutilliisunut angalasartunut maligassaasup, Filippimi ilagiit nersualaarsimavai: ’Allaat ajorsaatigisannik ataasiarnasi pajuttarpassinga.’ (Filípimiut 4:14-16) Kiffartornernut tamakkununnga atatillugu aningaasartuutit, aningaasartuutit immikkoortortaqarfiit tamarmik aningaasartuutigisaasa, saniatigut aamma angerlarsimaffinnik Betelinik ingerlatsinermut tamakkunanilu najugaqartut sulisullu inuussutissaqarnissaannut atatilllugu aningaasartuuteqarpoq. Atuagassianik nutaarsiassap nuannersup oqariartuutaanik tipaatsunnartumik imalinnik allanneq naqiterinerlu immikkut pisinnaatitaaffiupput Guutimeersut, aammali agguaannissaat pisariaqarpoq, soorunalumi aamma tamanna aningaasartuutinik nassataqartarpoq. Kiisalu ataatsimeersuarnerit ’nutaarsiassarlu nuannersoq illersorniarlugu inatsisitigullu aalajangersarniarlugu’ eqqartuussisutigut ingerlatsisarsimanerit aningaasartuutaasarput. — Filípimiut 1:7, (NV).
Jehovamut kiffartortut piffissaq qanoq annertugisoq nutaarsiassamik nuannersumik oqaluussissutiginninnermut atorniarnerlugu tamarmik immikkut kajumissusertik naapertorlugu aalajangigassaraat, atortutigullu tunissutit aamma kajumissuseq naapertorlugu pisarput. Apustilip Paulusip kajumissaarutigisimavaa pallorfiginninnermik ilumoortumik siuarsaanissamut aalajangersimasumik aningaasanik tunissuteqartarnissaq: ’Iluartunulli tuniooraatissat pillugit . . . Sapaatip akunnerisa ulluisa siullianni kinaluunniit ilarsi immini iluarnaarnini missiliorlugu toqqorsilluni ilisisarili.’ — 1 Korintumiut 16:1, 2.
Inuk tunissuteqaraangami ilisimajuaannanngilaa sumut atorneqassasut, oqaluussinermilli suliap annertusineratigut inerneri takusinnaasarpai. Jehovas Vidners Årbog 1993-imi nalunaarutitigut erserpoq Naalagaaffimmik nutaarsiassaq nuannersoq nunani qeqertanilu 200-nit amerlanerusuni, 4.500.000-nit amerlanerusunik kristumiunik kiffartortulinni, oqaluussissutigineqarsimasoq. Nalunaarutit tamakku nuannaajallannartorujussuupput. Tunissut sunaluunniit, qanorluunniit atsigigaluaruni, nutaarsiassamik nuannersumik siaruarterinermut siuarsaataavoq.
Suliaq tamanna tamarmik tunissuteqartarneratigut aningaasalersorneqarpoq. Ilaat annertuumik tunissuteqarsinnaapput, tamannalu oqaluussinermut siuarsaataasorujussuuvoq. Ilaat minnerusumik tunissuteqartarput. Annikitsuinnarmilli tunissuteqarsinnaasut kanngusuttariaqanngillat misigisariaqarnatilluunniit tunissutertik taama annikitsigigami malunnaataanavianngitsoq. Jehovap taamatut isiginngilaa. Tamanna Jesusip ersersippaa uillarnerup tunissutimininngua Jehovap qanoq pingaartitsigigaa oqaluttuarigamiuk: ’Uillarneq piitsoq takuaa quppakunik marlunnik ilisisoq. Taava oqarpoq: „Ilumut oqarfigaassi: Uillarneq una piitsoq tamanit annermik ilisivoq. Taakku tamarmik sinnerutitamik ilaannik ilisimmata, uumali ajorsartuulluni inuutissarsiutissaraluani pigisani tamaasa ilivai.“’ — Lúkarse 21:2-4.
Aningaasatigut qanorluunniit atugaqaraluarutta Jehovap uummataanik nuannaartitsisumik tunissuteqarsinnaavugut. Tussiaasiortup ersersissimavaa qanoq ililluta Kunngerput Eqqartuussisorpullu ataqqinartissinnaagipput: „[Jehovap] aqqa ataqqinartissiuk. Pajussiuk tunissutinik silarliutaanullu ornigullusi.“ (Tussiaat 96:8) Taamaattumik Ataatatta qilammiusup asannittumik maligassiaa malinniartigu nuannaarluta tunisisarluta siulliulluni tunimmatigut. (wD 1/12 93)
[Qupp. 31-mi ungalusaq]
QANOQ ILILLUTIK ILAAT NAALAGAAFFIMMIK OQALUUSSISSUTIGINNINNERMUT TAPERSIISSUTAASUMIK TUNISSUTEQARTARTUT
□ ANINGAASAAT NUNARSUAQ TAMAKKERLUGU SULIAMUT TAPERSIISSUTIT: Amerlasuut naatsorsuutiminni nakkaatitsivimmut „Naalagaaffiup sulinera — Mat. 24:14“-imik allagartalimmut nakkartitassaminnik immikkoortitsisarput. Nakkartitat qaammatit tamaasa ilagiinnit Napasuliaq Alapernaarsuiffiup Peqatigiiffianut nassiunneqartarput.
□ TUNISSUTIT: Aningaasat kajumissutsimik tunissutit uunga nassiunneqarsinnaapput: Vagttårnet, Stenhusvej 28, 4300 Holbæk, giro 640-3468. Pinnersaatit nalillillu allat aamma tunissutigineqarsinnaapput. Allagarsertariaqarpulli tunissutaanerannik nalunaartumik.
□ PAARITITSINEQ: Aningaasat isumaqatigiissuteqarnikkut Napasuliaq Alapernaarsuiffiup Peqatigiiffianut paarisassanngortinneqarsinnaapput taamaaliortup toqunissaata tungaanut („tunissutissamaatit“).
□ SILLIMMASIISSUTIT: ’Inuunermut sillimmasiissutit’ utoqqalinersiutissatulluunniit nammineq katersukkat Napasuliaq Alapernaarsuiffiup Peqatigiiffianut pisassanngortinneqarsinnaapput. Taamaalisoqarniaruni tamatigut Peqatigiiffik ilisimateqqaarneqartariaqarpoq.
□ BANKKONTOT, PAPPIALAT NALILLIT AAMMA ILLUUTIT: Bankkontomi uninngatitat, pappialat nalillit illuutillu tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Aamma tamatumani Peqatigiiffik ilisimateqqaarneqassaaq.
□ KINGORNUSSASSAT: Aningaasaatit inatsisitigut atuuttumik testamentiliornikkut Napasuliaq Alapernaarsuiffiup Peqatigiiffianut kingornussassanngortinneqarsinnaapput. Pitsaassaaq Peqatigiiffik immaqalu ilagiit tamatuma kopiianik tunineqassappata. Ilisimatitsissutigisinnaavarput Vagttårnets Bibel- og Traktatselskabi kingornussassat akileraarutitaannut akiliisanngimmat.
□ PERIARFISSAT ALLAT (pisussaasutut nalunaarutit allallu): Ilgiinni ilaasortaaffigisanni utoqqaanertat tunissuteqarnissamut periarfissanik allanik paasiniaaffigisinnaavatit.
Tunissutinut kingornussassanullu atatillugu paasissutissinneqarnerorusukkuit siunnersorneqarusukkuillu ilagiinni utoqqaanertat apersorsinnaavatit imaluunniit uunga allassinnaavutit: Vagttårnet, Stenhusvej 28, 4300 Holbæk.
[Qupp. 32-mi assiliartat]
Tunissutit sunut atorneqartartut
1. Betelini kajumissutsiminnik sulisunut
2. Immikkoortortaqarfinnik sanaartornernut
3. Ajornartoortunik ikiuiniarnernut
4. Rigssaliliornernut
5. Ajoqersuiartortitanut