Ataatsimeersuartarnivut — sallusuissummik nalunaajaataalluartut
1. Ukiumoortumik nalliuttorsiornerni anersaakkut sallusuissutsit suut Israelikkut eqqarsaatigeqqissaassallugit oqaloqatigiissutigissallugillu periarfissaqalertarpat?
1 Itsaq Israelikkut ukiumut pingasoriarlutik nalliuttorsiorniarlutik katersuuttarput. Angutit kisimik peqataanissaat piumasaqaataagaluartoq tamatigungajak ilaqutariit tamakkerlutik Jerusalemimut aallartarput ataatsimeersuarnerit nuannersut najuuffigiartorlugit. (5 Mos 16:15, 16) Katersuuttarnerni taamaattuni anersaakkut sallusuissutsit pingaaruteqartut eqqarsaatigeqqissaassallugit oqaloqatigiissutigissallugillu periarfissaqalertarput. Sallusuissutsit suut pineqarpat? Ilaat tassaavoq Jehova isumassuisuusoq tunisiumatooq asannittorlu. (5 Mos 15:4, 5) Aamma siulersuinera sernissuineralu tatigisassaapput. (5 Mos 32:9, 10) Aamma Israelikkut inuiattut Jehovap aqqanik atuisuullutik ersersittussaavaat, taamaattumik naapertuilluassusia eqqortumik ilaartariaqarpaat. (5 Mos 7:6, 11) Taamatuttaaq ullumikkut ataatsimeersuartarnerit uagut iluaqutigisinnaavavut.
2. Ataatsimeersuarnermi saqqummiussassat suut sallusuissutsinik paasisimasaqarnerulersitsissappat?
2 Saqqummiussassat sallusuissummik paasisimasaqarnerulersitsisut: Ataatsimeersuarnitsinni oqalugiaatit, isiginnaagassiat, takutitsinerit apersuinerillu Biibilip sallusuissutaanik pingaaruteqangaartunik paasisimasaqarnerulersitsisut nuannaarutigisarpavut. (Joh 17:17) Ataatsimeersuarnissamut piareersaaneq aallartereersimalerpoq. Jehovap peqatigiissortaani saqqummiussassat silarsuarmi pisariaqartinneqartut piareersarneqarput. (Matt 24:45-47) Suut saqqummiunneqarumaarnersut takunissaanut tusarnissaanullu qilanaaraagit?
3. Saqqummiusat iluaqutigisinnaajumallugit qanoq iliussaagut?
3 Soorunami aatsaat ulluni pingasuni najuukkutta tusarnaarluaruttalu tamakku pissarsiaqarfigilluarnerusinnaavavut. Suli taamaaliorsimanngikkuit, sulinngiffeqarniarlutit sulisitsisut oqaloqatigiuk. Saqqummiussassat sammineqarneranni eqeersimaarniarlutit unnuit tamaasa innajaartarit. Amerlasuut oqalugiartumut tusarnaaqqissaartarnertik naatsunillu allattuisarnertik iluaqutigisarpaat. Oqarasuaat angallatagaq ujaarliullu akornutaateqinagit. Saqqummiisoqarnerani oqalunnaveersaarit, sms-ernaveersaarit, nerinaveersaarlutillu imernaveersaarit.
4. Ataatsimeersuarneq meeqqanut pissarsiaqaataasinnaaqqullugu angajoqqaat qanoq iliorsinnaappat?
4 Sabbatit ukiuanni tupiusaliorfinni Israelikkut katersuukkaangata inatsisit ‘tusaqqullugit ilikkarsinnaaqqullugillu’ ‘meeqqatik’ ilagisarpaat. (5 Mos 31:12) Ataatsimeersuarnerup ingerlanerani ilaqutariit issiaqatigiittut meeqqallu malinnaasut takullugit nuannertangaarami! Soormi allattorsimasasi unnuit tamaasa samminianngilisigit saqqummiunneqartunilu pingaartitasi oqaloqatigiissutigalugit? “Sianiissuseq nukappissap uummataanut qilersugaavoq,” taamaattumik angajoqqaat silatusaassapput qitornatik, aamma inuusuttuaqqat, nereqatigiinnerup nalaani hotelinilu, ‘isumamineersinnagit’ nakkutigisarunikkit. — Uss 22:15; 29:15 (1990).
5. Hotelimiitilluta pissuserissaarnerput qanoq sallusuissummut pinnersaataava?
5 Pissuserissaarnerput sallusuissummut pinnersaataavoq: Illoqarfimmi ataatsimeersuarfitsinni pissuserissaarnerput sallusuissummut pinnersaataavoq. (Tit 2:10) Hotelimi sulisut maluginiartarpaat najugaqartut eqimattat hotelip maleruagassiaanik maleruaagaangata sulisunullu erinitsajuillutillu inussiarnisaaraangata. (Kol 4:6) Siorna immikkoortortaqarfiup sinniisai hotelip pisortaanik isumaqatigiissuteqarniartillutik oqarfigai: “Inutsialaagassi maaniittarnersi nuannareqaarput. Pissuserissaarlusilu inussiarnersuuvusi sulisutsinnullu ataqqinnittumik pissusilersortarlusilu pigisavut sissuertarpasi.”
6. Ataatsimeersuarfitsinniinnitsinni atisalersoriaatsitsigut qanoq sallusuissummut pinnersaataasinnaavugut?
6 Ataatsimeersuarnitsinni kinaassutitsinnik allagartarput ataatsimeersuarnerinnarmut nalunaajaatanngilaq imaluunniit ataatsimeersuaqataasut kikkuuneranik takussutissaannaanani, aammali avataanit isiginnittunut nalunaajaataavoq. Inuit illoqarfimmi ataatsimeersuarfitsinniittut maluginiassavaat kinaassutsiminnik allagartallit, silarsuarmi nalinginnaasut assigalugit torinngitsunik pikitsitsiumatuutullu atisalersoratik atisarissaartuullutillu nuimanianngitsuusut. (1 Tim 2:9, 10) Taamaattumik illoqarfimmi ataatsimeersuarfissatsinniitilluta, aamma hotelimut iserterutta, atisavut eqqumaffigisariaqarpavut. Koorpunik sukisaarutinillu atisaqarluni tikinnissaq tulluartuunavianngilaq. Ataatsimeersuarfipput silamiikkaluarpalluunniit atisavut takujuminartuussapput. Ataatsimeersuarnerup ulluini neriniartarfimmukarniarutta eqqarsaatigissavarput suli ataatsimeersuariaagatta atisatsinnillu qasukkaasariaqannginnatta.
7. Ataatsimeersuarnerup nalaani kristumiutut ataasiussuseqarnerput qanoq nuannaarutigisinnaavarput?
7 Ukiumoortumik nalliuttorsiornerni Israelikkut uppeqatitik nunat ilaaneersut nunanilu allaneersut ilagigaangamikkit uppernermikkut nakussassaatigisarpaat ataasiussuseqarnerulertarlutillu. (ApS 2:1, 5) Kristumiutut qatanngutigiissuserput ataatsimeersuarnerni ersarinnerusarpoq. Anersaakkut paratiisi tamanna isiginnittut tupigusuutigikkajuttarpaat. (Tuss 133:1) Ulloqeqqanut qatanngutit allat eqqatsinni issiasut ilassiorniassagatsigit ataatsimeersuarfipput qimallugu nerisassanik pisiniarnermit oqitsunik taquarnissaq innersuussutigissavarput.
8. Pisinnaagutta, kajumissutsimik sulinissatsinnut sunik pissutissaqarpugut?
8 Ataatsimeersuarnerit aaqqissugaalluartarneri torersumillu ingerlanneqartarneri avataanit isiginnittut tupigusuutigisarpaat, pingaartumik suut tamarmi kajumissutsimik suliarineqartarneri paasigaangamikku. Ataatsimeersuarnermi suleqataanissamut ‘kajumillutit sassarnissannut’ periarfissaqarpit? (Tuss 110:3) Meeqqatik allanik ikiuisarnissaannut ilinniartikkumallugit ilaqutariiniittut tamarmik kajumillutik ikiuuttarput. Ittoortuuguit, ataatsimeersuarnermi suleqataaneq ataatsimeersuarianik allanik naapitsinissamut periarfissaalluassaaq. Qatanngut arnaq oqarpoq: “Ilaquttakka ilisarisimasakkalu ikittuinnaat eqqaassanngikkaanni maani allanik ilisarisimasaqanngilanga. Eqqiaanermulli ikiuukkama qatannguterpassuit ilisarisimalerpakka. Nuanneqaaq!” Ataatsimeersuarnermi ikiuinikkut ikinngutissarsiornitsinni ammagutta nuannernerussaaq. (2 Kor 6:12, 13) Kajumissutsimik suleqataasimanngikkuit, utoqqaanertaq aperiuk qanoq ikiuussinnaanerlutit.
9. Ataatsimeersuarnermi qaaqqusinissamut qanoq oqarsinnaavugut?
9 Sallusuissummik tusarnaariaqqullugit allat qaaqqukkit: Ukiut siulii assigalugit ataatsimeersuarnissarput sapaatip akunneranik pingasunik sioqqullugu allat qaaqquniarlugit suliniuteqarnermut peqataassaagut. Ilagiit qaaqqusiniarlutik angalaarfigisartakkatik sapinngisamik angalaarfigissavaat. (Takuuk ungalusaq “Qaaqqusinermi qanoq oqarsinnaavugut?”) Qaaqqusissutit sinneruttut ataatsimeersuarfimmut nassarneqassapput. Taakku torrutiinnarlugu oqaluussinermi ataatsimeersuarianit atorneqassapput.
10. Ukiumoortumik qaaqqusilluta suliniarnitta kinguneqarluartarnerannik misigisalikkersaarit.
10 Ukiumoortumik suliniuterput inunnit tigulluarneqarpa? Ataatsimeersuarnerup ilaanni nakkutilliisup aappariit issiavissarsiuullugit ikiorpai. Oqaluttuuppaat qaaqqusissummik tunisissimallutik “soqutiginartillugulu”. Najuukkumallutik 320 kilometerit biilinik ingerlasimavaat! Pisumi allami, qatanngut arnaq illumiit illumut angalaartilluni angut ataatsimeersuarnissamut soqutiginninnermik takutitsisoq qaaqqusissummik tunivaa. Taamaattumik qaaqqusissut pillugu oqaloqatigingaatsiarpaa. Ullualuit qaangiummata ataatsimeersuarnermi qatanngutip arnap angut ikinngutaalu takuai saqqummersimasut nutaat ilaat tigummiaraat!
11. Ukiumoortumik ataatsimeersuarnernut najuuttarnerit sooq pingaaruteqarpat?
11 Ukiumoortumik nalliuttorsiortarnerit Jehovamit asannittumik isumagineqartut Israelikkut ‘ilumoortumik unneqqarissumillu’ kiffartornissaannut ikiortarpai. (Jos 24:14) Taamatuttaaq ukiumoortumik ataatsimeersuartarnivut pallorfiginninnitsinnut pingaaruteqangaartuupput sallusuissummilu inuuinnarnissatsinnut iluaqutaallutik. (3 Joh 3) Qanortoq Jehovap sallusuissummik asannittut tamaasa najuunniarlutik ataatsimeersuarnerlu tamakkiisumik iluaqutiginiarlugu ilungersortut pilluaqquligit!
[Qupp. 4-mi issuagaq]
Illoqarfimmi ataatsimeersuarfitsinni pissuserissaarnerput sallusuissummut pinnersaataavoq
[Qupp. 5-mi issuagaq]
Ataatsimeersuarnissarput sapaatip akunneranik pingasunik sioqqullugu allat qaaqquniarlugit suliniuteqarnermut peqataassaagut
[Qupp. 3-mi ungalusaq]
2012-Imi Ataatsimeersuarnissamut Eqqaasitsissutit
◼ Aqutsisup allaffia: Isiginnaartitsiviup sanianiippoq.
◼ Ikiueqqaarneq: Kavaajaartarfimmut saaffiginnittoqassaaq. Pinartumik pisoqarpat nakkutilliisumut qaninnerpaamut saaffiginnittoqassaaq, taannalu ikiueqqaarnermik ilinniarsimasumut qanoq navianartorsiortoqartigineranik naliliisussamut ikiortissarsiortussamullu saaffiginnipallassaaq. Pisariaqarpat ikiueqqaartut peqqissaavimmut sianissapput.
◼ Issiavinnik inniminniineq: Taseralimmi sulisut eqqiaasarnerlu eqqarsaatigalugit issiavinnik inniminniisoqartassanngilaq.
◼ Katatat qimatallu: Kavaajaartarfimmiissapput.
◼ Kuisinneq: Kuisinnissaq sioqqullugu kingornatigullunniit kuisittut kuisitsisarfimmi assilisinniartassanngillat.
◼ Nangilersuisarfik: Torsuusarsuarmi talerperlermi inersuarmut isertarfiup silataaniippoq matu.
◼ Nerineq: Torsuusarsuarmi inimi tapiliussami taquassat nerineqarsinnaapput. Cafe Taseralik ulloqeqqanut ammassaaq.
◼ Nutserineq: Saqqummiussat nutserneqarneri FM-ikkut tusarnaarneqarsinnaapput.
◼ Perusuersartarfiit: Torsuusarsuup talerperliup tungaani gangimiipput.
◼ Qasuersaartarfik: Torsuusarsuup talerperliup tungaani gangip isuaniippoq.
◼ Saqqummiussassanut piffissat: Ulluni pingasuni saqqummiussassat nal. 9.20 aallartittassapput. Matu nal. 8.00 ammarneqassaaq. Aqutsisoq nipilersuutip aallartinnissaanik ilisimatitsippat, tamatta issiavissatsinnut ingikkiartortariaqarpugut saqqummiineq torersumik aallartinniassammat. Tallimanngorneq arfininngornerlu saqqummiussassat nal. 16.55 naassapput sapaammilu nal. 15.40 naassaaq.
◼ Saqqummiussassanik immiussineq: Immiussissutit Taseraliup sarfalersuutaanut imaluunniit nipilerissutaanut ikkunneqassanngillat. Saqqummiussassanik immiussisoqassappat allanut akornutaanngitsumik taamaaliortoqarsinnaavoq.
◼ Taquaasiviit: Inimut tapiliussamut (nerisarfimmut) inissinneqarsinnaapput.
◼ Tunissutit: Ataatsimeersuartarnitsinnut qujamasunnerput takutissinnaavarput ataatsimeersuarnermi silarsuaq tamakkerlugu suliniarnermut kajumissutsitsinnik tunisinikkut.
[Qupp. 6-mi ungalusaq]
Qaaqqusinermi qanoq oqarsinnaavugut?
Angalaarfigisartagarput tamakkissagutsigu naatsumik saqqummiigutta ajunnginnerussaaq. Imatut oqarsinnaavugut: “Haluu. Nunarsuaq tamakkerlugu qaaqqusissummik agguaavugut, aana illit pissat. Tassani paasisaqarnerusinnaavutit.” Angorniorit. Sapaatip akunnerata naanerani angalaarniaruit tulluarpat atuagassiat ilanngullugit neqeroorutigisinnaavatit.