Ersineq — ullumikkut atugaaqaaq taamaattuaannassanngilarli!
ERSINERUP atugaanerujussua Guutip oqaasiinik atuaqqissaartartut tupaallaatigineq ajorpaat. Jehovap nalunaajaasuisa sumi tamaani oqaluussinermikkut nalunaarutigisarsimavaat nalunanngitsumik inuiaat oqaluttuarisaaneranni piffissami immikkut ittumi inuusugut. Kikkut tamarmik nalunngilaat ersineq nalitsinni annertoorujussuusoq. Qangarsuarlili Jesusip nalerput tikkuarsimavaa najuinissami pissutsillu aaqqissuussaanerata naggatissaanut, imaluunniit ’silarsuup naggatissaanut’, suna nalunaaqutaassanersoq apustilimi apeqqutaannut akissuteqarnermini. — Matîuse 24:3.
Makku Jesusip siulittuutigai:
’Inuiaat inuiaqatiminnut pikitsitsiumaarput, naalagaaffillu naalagaaffeqatiminut; nunalu tamatigut tamaana sajungaartarumaarpoq, kaannersuarlu toqorarnerlu nalliuttarumaarput, ersinartorsuillu nalunaaqqutillu angisuut qilammit piumaarput.’ — Lúkarse 21:10, 11.
Malugaajuk ’ersinartorsuit’ eqqaammagit? Akissutimini kingusinnerusukkut oqaaseq ersineq Jesusip taaqqippaa immaqa ilinnik qanigisannillu toqqaannartumik attuisoq eqqartoramiuk. Tamatumali iserfigilluannginnerani ulluni kingullerni inuunitsinnut takussutissat allat sammilaassavavut. — 2 Timûtiuse 3:1.
Pissutissaqartumik sorsunnermut siooraneq
Sakkulersorluni akersuuttarnikkut nunarsuup ilarujussua soqanngitsunngortinneqarsimavoq. Assersuutigalugu uuliasiorfiit ukiualuit matuma siorna Kangiani Qiterlermi akersuunneqarnerani ikuallatsillugit qimaannarneqarsimanerat atuagassiami Geo-mi tassaanerarneqarsimavoq „avatangiisitigut ajunaarnersuaq ajunaarnersuit inuit pilersitaasa annerpaartaat“. Sorsunnerit inuit millionilikkuutaat toqunerannut iloqianngornerannullu pisuusimapput. Sakkutuut sakkutuujunngitsullu millionilikkuutaat sorsunnersuarmi siullermi toqutaasut saniatigut sorsunersuarmi kingullermi inuit 55 millionit toqutaasimapput. Eqqaamajuk Jesusip silarsuup naggatissaata qanillineranut ilisarnaatit ilaattut eqqaammagu ’inuiaat inuiaqatiminnut pikitsitsiumaartut, naalagaaffillu naalagaaffeqatiminut’.
Eqqaanngitsoorsinnaanngilavullu inunnik toqoraanersuit — naggueqtigiinnik inuiannilluunniit piaaraluni nungusaaniarsimanerigaluit. Inuiaat aammik kuisisimanerat annertoreeqisoq 1900-kkunni suli annerulersimavoq Armeniamiut, Cambodjamiut, juutit, Rwandamiut, Ukrainemiut allallu millionilikkuutaat toqutaasimaneratigut. Nunanilu upperisarsiortut ingasaassiniat naggueqatigiit assigiinngitsut avissaartuunnerannik sakkortusaaffigisaanni toqoraattoqartuarsinnarpoq. Aap, nunarsuaq aammik sorsunnertigut kuerarneqartumik mingutsinneqartuarpoq.
Ullumikkut sorsunnerni allaat akersuunnerit unitsinneqareeraluartut eqqugaasoqartarpoq — assersuutigalugu sumut tamaanga qaartartunik ilioraasoqarsimagaangat. Misissueqqissaartartoqatigiit Human Rights Watch naapertussagaanni „silarsuaq tamakkerlugu 100 millionit missaanni qaartartulersuuteqarpoq sakkutuujunngitsut inuunerinik navianartorsiortitsisunik“. Qaartartut tamakkua sorsunneq atuuffigisartik qaangiutereeraluartoq angutinut, arnanut meeqqanullu pisuussuteqanngitsunut takussaanatik navianartorsiortitsipput. Oqaatigineqartarpoq nunani 60-init amerlanerusuni qaammatit tamaasa inuit tuusintilikkuutaat qaartartunit taama ittunit toqutaanngikkunik aqqunartiterneqartartut. Sooq inuunermik navianartorsiortitsisut tamakku aaqqissuussaasumik piiarneqarsimanngillat? Aviisimi The New York Times-imi ima allassimasoqarpoq: „Ullut tamaasa qaartartut piiarneqartunit amerlanerujussuit qaartartulersuutigineqartarput, taamaammat ajunaarnerit amerliartortuarsinnarput.“
Ilanngutassiami 1993-imoortumi tassani oqaluttuarineqarpoq qaartartunik tamakkuninnga nioqquteqarneq ’ukiumut dollarinik 200 millioninik sinneqartoorfiusalersimasoq’. Niuernermi tamatumani ’nunani 48-ni, qaartartunik assigiinngitsunik 340-nik avammut nioqquteqarsimasuni, firmat naalagaaffimmilu qulliunerusoqarfiit 100-t missaat’ peqataapput. Qaartartut ilaat allaat pinngussatut isikkulerlugit sanaajupput, meeqqanit nassaarineqarunik tiguneqariaannaallutik — ilumut ingasak! Eqqarsaatigeriassagit! Piaaraluni meeqqat toqumut aqqunartiternermullu navianartorsiortinneqartut! Aviisit ilaanni allaaserisaq pingaarnerutitaq ima qulequtserneqarsimavoq: „Anniarfiup maskiinai 100 millionit.“ Ilanngutassiami tassani oqaatigineqarpoq qaartartulersuinikkut ’inuit toqutaasut sakkussianit allanit tamanit toqutaasunit amerlanerusut’.
Soorunami qaartartulersuutissiat toqutsissutaasinnaasuni nioqqutigineqartuni kisiartaanngillat. Sakkussianik nioqquteqartartut aningaaseritoorsuit nunarsuarmi sumi tamaaniittut taamatut nioqquteqarnermikkut aningaasanik millionerpassuaateqalertarput. Amerikami Illersornissaq pillugu Paasissutissiinnermi Qitiusoq atuagassiaatimini The Defense Monitor-imi ima nalunaaruteqarsimavoq: „Ukiuni kingullerni qulini [nunat siuttuusut ilaat] sakkussianik dollarinik 135 millioninik nalilinnik avammut nioqquteqarsimavoq.“ Naalagaaffik pissaanilik tamanna „nunanut 142-nut sakkussianik niueqateqarnissaminik aammalu sakkutooqarnikkut piorsaanissamik sungiusaanissamillu isumaqatigiissuteqarsimavoq“. Taamaalilluni suli sorsuttoqarnissaanut naalliuttoqarnissaallu tunngaviliisoqarpoq. The Defense Monitor-imi aamma ima allassimasoqarpoq: „1990-imiinnaq sorsunnerni inuit 5 millionit sakkutuunut sakkulisartitaasunut ilaasimapput, dollarit 50 milliardinit amerlanerusut atorneqarsimallutik inuillu, amerlanerit sakkutuujunngitsut, millionit kuartii toqutaasimapput.“ Qularnanngitsumillu taamanimiilli sorsunnerpassuarnik allanik inunnut suli millionilippassuarnut sioorassutaallutillu toqussutaasimasunik eqqaasaqarsinnaavutit.
Nunarsuarmik tamaanilu inuunermik suli aserorterineq
Professori Barry Commoner ima mianersoqqusivoq: „Isumaqarpunga nunarsuarmik mingutsitsineq, akornuserneqarnani ingerlaannassaguni, naggataatigut nunarsuarmik inunnut inuuffigineqarsinnaajunnaarsitsissasoq.“ Nangilluni oqaatigaa ajornartorsiut tassaanngitsoq ilisimasakissuseq, tassaallunili piumatussuseq. Illit isumaqarpit Guutip naapertuilluartup asannittullu tamanna naassaanngitsumut akueriinnassagaa, mingutsitsinermik ersissutiginninneq annerujartuinnartoq kinguneralugu? Nunarsuarmik mingutsitsineq ima ingasatsigaaq akisussaasut naatsorsuiffigineqartariaqalerlutik Guutilu akuliuttariaqalerluni nunarsuaq piorsaqqinniarlugu. Ilaatigut tamanna Jesusip eqqaasimavaa apustilimi ’silarsuup naggatissaa’ pillugu apeqqutaannut akissuteqarnermini.
Jehovap qanoq ililluni akisussaasunik nassueqqusinissaata iserfiginnginnerani inuit qanoq iliorsimanerat sammilaaqqaariartigu. Inuit pisuutitassaassutaasa ilaannaalluunniit eqqaaginnaraanni nikallornarpoq: sialuk seernartoq, soqutigittaatsumik orpippassuarnik killuineq, igitassanik radioaktiviusunik, kemikalianik toqunartunik imermillu mingutsitamik suliarineqanngitsumik akisussaassuseqanngitsumik immamut kiversaaneq, ozonimik illersuutaasumik nungukkiartortitsineq kiisalu naasupilunnut sullinernullu nungusaatinik atuipilunneq.
Aningaasanik piumatussuseq aamma nunarsuup allatigut mingutsinneqarneranik nassataqarpoq. Ullut tamaasa stoffit igitassat kuussuarnut immanullu, silaannarmut nunarsuarmullu, annguttarput. Ilisimatuut allaat silaannarsuarmut eqqaasarput, ilaatigut tappavaneereeraangamik ’torersaaneq ajoramik’. Nunarsuaq eqqagarsuarnik avatangerneqaqqajaavoq. Guutip nunarsuaq annerusutigut imminut salissinnaatillugu pinngortissimanngitsuuppagu qangarsuarli eqqagarsuatsinnit ipitinneqareersimassagaluarpugut.
Inuit ilarpassui allaat imminnut mingutsittarput. Tupamik ikiaroornartumillu atuineq assersuutigisinnaavarput. USA-mi ikiaroornartunik assigiinngitsunik atuineq tassaanerarneqarsimavoq tamaani „peqqinnissakkut ajornartorsiutit annersaat“. Ajornartorsiummut tamatumunnga ukiumut dollarit 238 millionit atorneqartarput, taakkunanngalu 34 millionit atorneqartarlutik „peqqinnissakkut passussinernut pisariaqanngikkaluanut“. Illit maani Kalaallit Nunaanni tupamik atuineq aningaasanik inuillu inuunerannik qanoq naleqartarsoraajuk?
Inuunerlunneq inooriaatsillu immikkukajaaq ittut inuppassuit pisinnaatitaaffimmittut isigisaat amiilaarnartunik kingunipiloqarsimapput; nappaatit kinguaassiuutitigut tunillaattartut inuppassuit suli inuusuttuutillutik toqussutigisimavaat. Illoqarfissuarni aviisini toqusunik nalunaarutitigut takuneqarsinnaavoq amerliartuinnartut 30-t 40-lluunniit angumaannarlugit ukioqarlutik toqusartut. Sooq? Amerlanerpassuit nammineq inooriaasertik aserornartoq toqussutigisimavaat. Nappaatit kinguaassiuutitigut tunillaattartut anniaatillu allat alianartumik amerliartuinnarnerat tamanna Jesusip ’toqorarnerit nalliuttarnissaannik’ siulittuutaanut naapertuuppoq.
Mingutsitsinerli ajornerpaaq inuit isumaanni, eqqarsartaasianni, imaluunniit anersaavanni, pivoq. Mingutsitsinerit maannamut eqqartoriikkavut kingumut qivialaarutsigik oqarsinnaassaannginnerpugut mingutsitsinerit amerlanersaat isumamik mingutsitaasimasumik pissuteqartut? Aamma eqqarsaatigikkit inuarnerit, pinngitsaaliinerit, saassussinerit allatigullu nakuusernerit qanoq amerlatigisut inunnit ajortumik eqqarsartaasilinnit iliuuserineqartartut. Inuppassuillu misiutiginngilaat naartuersittarnerit ukiumut millionilikkuutaat tassaasut sianissutsikkut anersaakkullu mingutsitaasimanermut ersiutit.
Sianissutsikkut mingutsitaasimaneq taama ittoq inuusuttuni takuneqarsinnaalereersarpoq. Oqartussaasunik, angajoqqaat allalluunniit oqartussaasusiannik, nikassaaneq ilaqutariit avissaarnerannut aammalu inatsisit aaqqissuussallu nalinginnaasut sumiginnarneqarnerannut pissutaaqataasarpoq. Oqartussaasunik ataqqinninnginneq tamanna inuusuttut anersaakkut peqqinnginnerannik toqqaannartumik pissuteqarpoq. Taamaattumik pinngoriartuaarsimaneraanermik, Guuteqannginneraanermik isumaliutersuutinillu uppernikkut sanngiillinartunik allanik ilinniartitsisut annertuumik pisooqataapput. Pisooqataasunut ilaapput upperisarsiornikkut ilinniartitsisut isummanik muteerniusunik „eqqortunillu“ saqqummiussuerusungaaramik Guutip oqaasiinik tunussisimasut. Taakkua allallu silarsuup ilisimassusianik immertissimasut inuit isumaliutersuutaannik akerleriinnik siaruarterisarput.
Kinguneri ullumikkut kimilluunniit takuneqarsinnaapput. Inuit Guutimut tullerminnullu asanninnertik pissutiginagu, uumissuinerli namminissarsiornerlu pissutigalugit iliuuseqartarput. Inerititat ajortunngorsimasut taakkua katersugaat tassa kanngunartuliorneq, nakuuserneq neriuuteqanngissuserlu. Tamakku tamarmik inunnik unneqqarissunik ernumalersitsisimapput, ilaatigut inuit ullut arlaanni imminnut nunarsuarmillu tamarmik aseruinissaannik ernumalersitsisimallutik.
Ajorsiartuinnassava pitsanngoriartussavaluunniit?
Siunissaq qaninnerusoq inuit ernumanerannut qanoq sunniuteqassava? Ernumaneq annertusiartuinnassava imalunniit ajugaaffigineqassava? Jesusip apustilimut oqaasii misissoqqeriartigik.
Jesusip siunissami qanittumi pisussaq eqqartorpaa, tassa annikilliornissarsuaq. Ima oqarpoq: ’Ullulli taakkua naalliunnartut kinguninnguatigut seqineq taarsissavoq qaammallu qaamajunnaarluni, ullorissallu qilammit nakkarumaarput qilaallu pissaaneri nakkarumaarlutik. Taavalu inuup Ernerata nalunaaqqutaa qilammi takussaassavoq; taavalu nunami naggueqatigiit tamarmik nimaarumaarput, isigiumaarpaallu inuup Ernera qilaap nuiaasigut aggersoq pissarsuulluni naalannartorsuullunilu.’ — Matîuse 24:29, 30.
Taamaattumik naatsorsuutigisinnaavarput annikilliornissarsuaq qanillisoq. Biibilimi siulittuutini allani takutinneqarpoq ’annikilliornartoq angisooq’ aallarnerlugu nunarsuarmi upperisarsiornerit eqqunngitsut tamarmik piiarneqarumaartut. Tamatuma kingorna aatsaannguaq atuariikkatsinni eqqartorneqartutut uissuumminartunik pisoqassaaq, ilaatigut qilammi tupinnartunik takussaasoqassalluni. Tamakkua inunnut nalinginnaasumik qanoq sunniuteqassappat?
Oqaluttuami allami aamma Jesusip akissutaanik imaqartumi tamanna erserpoq. Tassani siulittuutit aamma allat nassaassaapput:
’Nalunaaqquteqarumaarporlu seqinermi qaammammilu ullorissanilu, nunamilu inuiaqatigiit qussalallutillu ernumangaassapput, imarlu mallillu ittuttorsuanngorpata, inuit ersinermit inuillu najugaannut piumaartussanik ilimasunnermit tumannguppata; qilaammi pissaaneri aalajumaarput.’ — Lúkarse 21:25, 26.
Tamassa siunissami ilimagisinnaasavut. Taamanikkussamulli inuit tamakkeratik ersinermit tumanngussapput, imaluunniit iluaallissapput. Akerlianilli Jesus nangilluni oqarpoq: ’Tamakkuli pilerpata aarloritsi, niaqqusilu makitissigik, utertinneqarfissarsi [aniguisinneqarfissarsi] qanillimmat.’ — Lúkarse 21:28.
Taamatut qiimmaallannartunik ajoqersukkani oqarfigai. Ersinermit tumanngunermut imaluunniit iluaallernermut taarsiullugu ersissuteqaratik niaqqumik makitinnissaannut pissutissaqassapput, naak annikilliornartussarsuup sakkortunerpaaffissaa qanilliartorasuaraluartoq. Sooruna ersisariaqanngitsut?
Biibilimi erseqqissumik takutinneqarmat ’annikilliornartumi angisuumi’ aniguisoqarumaartoq. (sarĸúmersitat 7:14) Siulittuummi Biibilimiittumi tamatuminnga neriorsuiffiusumi aamma oqaatigineqarpoq, aniguisunut ilaassagutta, siornatigut takuneqarsimanngisaannartumik annertussusilimmik Guutimik pilluaqqusaajumaartugut. Siulittuummilu tassani naggataatigut neriorsuutigineqarpoq Jesusip ’paariumaarai tasiorlugillu imermik puilasunut inuunerup piinut; Guutillu qulliit tamaasa isaannit allarterumaarpai’. — sarĸúmersitat 7:16, 17.
Taamanikkussamut pilluaqqussutissanik tamakkuninnga nuannaarutiginnikkumaartussat — immaqa aamma uagut — ersissutinik ullumikkut inuit naalliuutigisaannit naalliuuteqarnavianngillat. (wD 15/10 95)
[Qupp. 8-mi assiliartaq]
Jehovamik pallorfiginnittut silarsuassaq nutaaq qilanaaraat
[Qupp. 7-mi suminngaanneernerat]
Mingutsitsineq: Foto: Godo-Foto; qaartartorsuaq: U.S. Army; orpiit ikuallattut: Richard Bierregaard, Smithsonian Institution