Sunniuteqarsinnaanerusumik kiffartorneq
1 Naalagaaffiup soqutigisai inuunitsinni salliutippavut, oqaluussinerlu inuunitsinni suliatta pingaarnersaattut qinersimavarput. Taamaattumik suliamut tamatumunnga pikkorissoorusuppugut. (Mák. 13:10) Oqaluussinermut qanoq sivisutigisumik peqataasimanerput apeqqutaatinnagu tamatumunnga pikkorinnerulernissarput kissaatigaarput. Qanoq ililluta pikkorinnerulersinnaavugut?
2 Silarsuarmi atorfimmik iluani annerusumik angusaqarusuttut suleruluttariaqartarput takkuttullu nutaat suliaminnut tunngasut malinnaaffigiuartariaqartarlugit, aammalu pikkorinnerulerumallutik pikkorissartitsinernut peqataasarlutik. Immaqalu ilaat ullormut inuussutissaqarumallutik taamatut suleruloortarput. Uagut oqaluussineq ilumoorukkatsigu nalunnginnatsigulu sumik aalajangiiffiusoq taamatut ilungersortariaqarpugut. Oqaluussisinnaassuserput, ajoqersuganngortitsiniarsinnaassuserput Guutillu naalagaaffia pillugu inunnik allanik ajoqersuisinnaassuserput pitsanngorsartariaqarpavut. Oqaluussinermik aallarneeriaatsit nutaat nuannaajallannartullu inunnik assigiinngitsunik soqutiginnilersitsisinnaasut ujartortuartariaqarpavut. — Mat. 28:19, 20.
SULIASSAQ IMAANNAANNGITSOQ AALLUGUK
3 Inunnik naapertuilluarnermik nuannarisaqartunik katersuineq Jehovap siuarsarpaa, tamannalu pissutigalugu ilarpassuatta angalaarfigisartakkatik suli akulikinnerusumik angalaarfigisarpaat. Oqaluussisartut pionerillu aatsaat taama amerlatigilersimapput, amerlasuullu oqaluussisarnertik annertusisissimavaat. Tamanna malugineqanngitsuunngilaq, uitsatigineqarlunili. Inuit amerliartuinnartut oqaluussinitsinnut ilassinnikkumanngillat, siornatigullu saqqummiuttakkavut massakkut oqaluussiffigisatsinnut immaqa soqutiginarunnaarsimapput. Suliarput tassaaginnanngilaq inunnik soqutiginnittunik nassaarniarneq, aammali inuit unneqqarissut soqutiginnilersinniartariaqarpavut. Tamanna imaannaanngitsuuvoq, pikkorissarnissarpullu tamatumani pisariaqarpoq.
4 Inunnik atassuteqarniarnermut pikkorissinissamut isumalluassuseq tunngaviuvoq. Vagttårnet-imi, 15. juli 1988-imeersumi, siunnersuutit atoriaannaasut atorluarniakkit. Immikkoortumi „’Nutaamik’ angalaarfigisartagaqalerniarsarigit“-mik qulequtalimmi siunnersuutit isumalluarpaluttut malugikkit. Aammattaaq oqaloqatigiissutissat aallarneeriaatsillu assigiinngitsut atornissaat sulissutigiuk. Siunnersuutit ’Ræsonnerebog’-imiittut amerlasuunut iluaqutaasimaqaat. Aallarneeriaatsit assigiinngitsut angalaaqatigiit oqaloqatigiissutigisinnaavaat sungiusaqatigiissutigisinnaallugillu.
5 Angalaarfigisartakkanni Bibelimik atuaqqissaaqatigiinnissaq toqqaannartumik neqeroorutigisimaviuk? Angalalluni nakkutilliisuutitatta ilaat ima aperigajuttarpoq: „Inunnut Bibeli pillugu ilikkagaqarnerorusussinnaanerminnik eqqarsaatiginnissimasunut ilaavit?“ Taava takutittarpaa qanoq ililluni atuagaq ’Paratiisilersaarut’ imaluunniit atuagassiaaraq ’Ata! Suut tamaasa nutaanngortippakka’ ikiortigalugu Bibeli oqaluuserisakkuutaarlugu atuarneqarsinnaasoq imaluunniit atuaqqissaarneqarsinnaasoq. Aqqusinermi oqaluussinissamut periarfissat atortarpigit? Piffissaalluartukkut? Inuit amerliartuinnartut aqqusinermi oqaluussiffigineqarnermikkut soqutiginnilersinneqarsimapput. Angut qatanngutinit arnanit aqqusinermi oqaluussisunit atuagassianik marlunnik pisimavoq. Taava Holbækimi allaffitsinnut allagaqarsimavoq atuagaatitsinnik amerlanerusunik piumalluni. Qatanngummit ilagiinneersumit pulaarneqarpoq oqaluttuarlunilu aqqusinermi naapitaqarnermi siornagut Jehovap Nalunaajaasui oqaloqatigisimanngisaannarlugit. Sapaammi tulliuttumi rigssalimut ilaanissaminik isumaqatigiissuteqarfigineqarpoq.
6 Sunniisinnaassuseqartumik kiffartornermut peqqissaassuseq ilaavoq. (Evf. 6:13) Paasiniartaruk illumi ataatsimi ilaqutariit arlaqartut najugaqarnersut, imaluunniit naqqup ataani, qaliani, illullu ilaani allami il. il. najugaqartoqarnersoq. Tassaasinnaapput utoqqaat kasuttortoqaraangat qaqutiguinnaq ammaassisartut, imaluunniit inuit piffissap angalaarfigisartakkatta nalaani sulisartut. Piffissami allami angalaarfigisartakkat taanna angalaarfigigukku immaqa ilaqutariinnut ilaasortaasut ilaat allat naapissinnaassavatit. Unnukkut angalaartaruit tamatumani iluatsitsisinnaassaatit.
ANGUNIAGARIUK
7 Oqaluussinermut pikkorinnerulernissamik anguniagaqarneq pitsaasuuvoq eqqortuullunilu amerlanersatsinnit anguniagarineqarsinnaasoq. (2 Tim. 2:15) Ilungersortumik qinuneq, piareersarneq sungiusarnerlu tamatumani pisariaqarput. Illit nammineq pikkorissiartornerit ilutigalugu qularnanngitsumik aammattaaq inuit allat siumukarnissaannik ikiorsinnaassavatit. — Gal. 6:6.
8 Puiussanngilarput ajoqersuinerput ’annikilliornartumi angisuumi’ taamaatittussaanngimmat. (Mat. 24:21) Toqusunittaaq makittut ajoqersorneqassapput, nuannissaqaarlu takullugu Jehovamik aalajangiussisut ilumoorlutillu Kristusip naalakkersuineranut naalatsigitilersut. Taamaalilluta suliaq siunissami pisussanik annertuunik ilimasuffiusoq suleqataaffigaarput, pikkorissaruttalu kiffartornitsinni annertunerusumik naammassisaqarsinnaassaagut — Jehovamut ataqqinaataasumik nersornaataasumillu.
(kmD 1/90 En mere effektiv tjeneste)