Ilisimaniarit — ilikkakkatit maleruakkit
1 Inuit amerlanersaasa eqqissinartumik pilluarnartumillu inuunissartik kissaatigaat. Atuakkat allaaserisallu tuusintilippassuit qanoq ililluni aappariinnerup pilluarnartup anguneqarsinnaaneranut, qanoq ililluni meeqqat pitsaasumik perorsarneqarsinnaanerannut, qanoq ililluni aningaasatigut ajornartorsiutit anigorneqarsinnanerannut, qanoq ililluni peqqinnerup anguneqarsinnaaneranut pigiuaannarneqarsinnaaneranullu, allarpassuarnullu tunngasut pillualernissatsinnik ikiorniarluta allanneqartarsimapput. Naalli silamiut atuagassiaataanni ilisimassut atoriaannaasoq nassaassaagaluartoq taamaattoq inuit silamiut pilluanngeqaat. Sooq taamaappa?
2 Akissut Bibelimiippoq, ússatit 1:7-imi: ’Jehova mianeralugu tassa ilisarsinermut aallarniutaasoq; sianiitsut ilisimassut perorsaallu asiginnartarpaat.’ Ilisarsinerup ilisimassutillu piviusut pilerfiat, Jehova Guuti, nersorumanngikkaanni ataqqiumanngikkaannilu eqqissinermik pilluarnermillu angusinissaq ilimagineqarsinnaanngilaq.
3 Silarsuaq anersaakkut piitsooqaaq — aap, anersaakkut pisariaqartunik nerisaqanngippaallaarnini pissutigalugu toqulerpoq. Nammineq pisuulluni silarsuaq pissutsinik taama ittunik atugaqarpoq, tassami nunarsuaq tamakkerlugu anersaakkut inuussutissanik ulikkaaraluarmat, allaallu tamanut ammasunik. (úss. 1:20, 21; sarĸ. 22:17) Inuit silamiut anersaakkut taarsuarmi paatsiveqaratik ingerlaartuarput Jehovap ilisimassutaa piumannginnamikku. (úss. 1:22-32) Taakku assiginagit uagut, Jehovap innuttaasut salliutitaasutut, anersaakkut nerisaqarluartuuvugut taassuma inatsisai ataqqillugillu naalakkatsigik. (Is. 65:13, 14) Asanninnerup Guutip peqatigiissortaani nassaassaasup ersersippaa tassaasugut Kristusip ajoqersugai ilumoortut. (Juán. 13:35) Aap, Jehovap Nalunaajaasuisa silarsuaq tamakkerlugu qatanngutigiissutut peqatigiinnerata ersersippaa Bibelimi unnersuussutaasunik ajoqersuutaasunillu maleruaaneq qanoq ilisimasutut iliornerutigisoq.
4 Jehovalli peqatigiissortaanut ilaasut ilaasa pilluarneq misigisinnaasaraluartik misiginngilaat. Immaqa allaat oqaatsimikkut iliuutsimikkullu allat pilluarnerannut ajortumik sunniisarput. Sooq taamaappa? Pissuterpiaasoq tassaavoq Guutip ilisimassutaa inuunerminni atunnginnamikku. Immaqa ataatsimiinnernut ataatsimeersuarnernullu najuuttaraluarput, aammalu atuagaatitsinni atuagassiaatitsinnilu unnersuussutigineqartartut nalunngilluinnaraluarpaat, inooriaatsimikkulli inunnut allanut, ilaatigut kristumioqatiminnut, iliorfiginneriaatsimikkut ersersippaat sallusuissut paasilluarsimanagulu maleruanngikkitsik. Qanormi iliortariaqarpat? ’Anersaamut siaruarterinissartik’ pimoorullugu ilungersuutigisariaqarpaat inuunerminni pilluarneq piviusoq angusinnaajumallugu taamaalillutillu allat pilluarnerannut ilasaaqataasinnaajumallutik. — Gal. 6:7, 8.
SUNA MALERUASSAVARPUT?
5 Inuttut ataasiakkaatut nakkaannajasuugutta, mianersortuunngikkutta aammalu Satanimut, silarsuarmut namminerlu timitsinnut akuersiinnarutta nuannaarneq Jehovamut qanimut attaveqarnitsinni pigisarput annaassavarput. Ataatsimiinnertigut, ataatsimeersuarnertigut Jehovallu peqatigiissortaani aaqqissuussarpassuartigut allatigut ilikkakkatta maleruarnissaat aatsaat taama pisariaqartigilersimavoq. Silarsuaq avatangiiserput inuuffigissallugu navianartuuvoq, allanngorartuaannarporlu. Taamaattumik „inussiaq aalajaallunilu silatooq“ aqqutigalugu Jehovap siunnersuutai atorasuarniartariaqarpavut, piffissaasukkut anersaakkut inuussutissatut isigalugit. — Mat. 24:45-47, NV.
6 Ullormi ataatsimeersuarfiusumi immikkut ittumi qanoq ililluta savaatitut ataatsitut aalajaattuaannarnissatsinnik pitsaasunik unnersuunneqarpugut. Aammattaaq assersuutigalugu, nikallornartut, silarsuarmi siulersorneqarumanngissuseq aliikkutassiallu piffissaajaataasut pissutigalugit anersaakkut sanngiillinerup qanoq ililluta pinngitsoorsinnaaneranik pitsaasunik atoriaannaasunillu siunnersorneqarpugut. Jehovamik taassumalu ilioriaasianik tunaartarinninnissatsinnik, teokratiimik oqartussaassutsimik akuersillutalu siulersortinnissatsinnik, pilimanianngitsuullutalu maniguuttuunissatsinnik, teokratiimullu tunngasunut piffissaqarluarnissatsinnik kajumissaarutit atoriaannaasut maleruarnerpavut? (Migga 6:8; Evf. 5:15, 16; Epr. 6:10; 13:17) Kristumiutut inooriaaseqarnissatsinnik ilaqutariittut ikioqatigiippugut? Aliikkutassianik qinersinerput, ileqquvut ulluinnarnilu inuunerput siunnersuutinik Bibelimit pisatsinnit sunnerneqarsimasuusariaqarput. Ilikkakkatta atornissaat ilungersuutiginngikkutsigu anersaakkut siumukarujussuarnavianngilagut imaluunniit siumakarnaviarata, aammalu eqqissinerput pilluarnerpullu atugarliortinneqassallutik. — Fil. 4:7-9; Jâk. 1:22-25.
7 Aammattaaq ilaqutariittut aammalu nammineq atuaqqissaartarnissaq pingaaruteqartorujussuupput. Paasissutissat qanoq ililluni Bibelimi najoqqutassiat atorneqarsinnaanerannut tunngasut Register til Vagttårnets publikationer ikiortigalugu nanigasuarneqarsinnaapput. Silarsuarmi Satanerpaluttumi ajornartorsiutinik aniguiniarneranni qitornamik ikiorniarneranni atuagaq Unge spørger — svar der duer! angajoqqaat atorluarsinnaasaraat pitsaalluinnartoq. Paasissutissat taamaattut atorluartarutsigik Jehovap pissutsinik isiginnittaasiatut isiginnittaaseqalissaagut taassumalu najoqqutassiaanit naapertuilluartunit siulersortissinnaalluta. Anersaakkut ikiuutissat pigisavut atunngikkutsigik assigiinnassavaa nakorsaammik pitsaasumik pigisaqarutta kisianni napparsimalerutta atornagu. Ilaqutariittut imaluunniit inuttut ataasiakkaatut aalajangersimasumik akuttunngitsumik atuaqqissaartarneq uppernitsigut ineriartuutigissavarput aalajaattuarnissatsinnullu nakussatissutigissallugu. Misilinneqaraangatta uppernerput nakkassutigisatsinnik nukillaartinneqarnavianngilaq. — Mat. 13:6; Lúk. 8:13; Epr. 2:1.
8 Utoqqaanertat ilagiinnilu kiffartuuteqartut ilaquttaminnik siulersuilluarnermikkut maligassiuisuusariaqarput. Tamatumani pisariaqarpoq nuliaminnik meeqqaminnillu Guutip oqaasiani peqatigiissortaanilu ilikkakkaminnik maleruaanissaannik ikiuinissaat, taamaalillutik anersaakkut nukittuunngorsinnaaqqullugit. Taamaalillutik ilaqutariit kristumiutut inooriaatsimikkut maligassiuisuulluassapput tamannalu ilutigalugu inunnut allanut ilagiinniittunut ilagiillu avataanniittunut qiimmassaataassallutik. — Evf. 6:4; 1 Tim. 3:4, 12, 13.
KIKKUT IKIORNEQARTARIAQARPAT?
9 Eqqaaniaanermut najuuttartut ilarpassui ilikkakkaminnik maleruaanissaminnut Jehovallu peqatigiissortaani suliniartunngornissaminnut annerusumik kajumissaarneqartariaqarput. Inuunerminni Bibelimi najoqqutassianik atuinissaannik taamaalillutillu Jehovap inassutaanik naapertuilluartunik maleruaanissaannik ilinniartinnerisigut Bibelimik atuaqqissaaqatigisartakkavut asannittumik isumassussavavut. Kuisinnissaminnik sulissutiginnittut soqutiginninnermik ersersitsivigisariaqarpavut.
10 Aalajaatsuujunnaarsimasut suliniuteqarunnaarsimasullu ikiortariaqarpavut takoqqullugu teokratiimut tunngasunik aalajangersimasumik suliniuteqaqataanissaq qanoq pisariaqartigisoq. Aammattaaq tamakkiisumik Jehova kiffartuukkallaramikku eqqissinerup pilluarnerullu pigisimasamik pigileqqinnissaat pisariaqartippaat. (Juán. 13:17) Sallusuissummik pingaartitsileqqinnissaminnik aammalu ’pilliutinik qujaniutinik Guutimut aatsinissaminnut’ asannittumik ikiorneqarunik ilikkakkatik atorsinnaalissavaat inuunerullu aqqutaatiguuinnarsinnaassallutik. — Epr. 13:15; Takuuk Naalagaaffimmik Kiffartuuteqarneq junimi 1979-meersoq, qupperneq 3, aamma februarimi 1977-imeersoq, qupperneq 3.
11 Guutip innuttaaniittut tamarmik Jehovap peqatigiissortaanut siumukaqateqarnissaat pisariaqarpoq. Imminuinnaq pingaartinnissarput akuerisinnaannngilarput. Anersaakkut peqqissuserput pigiuaannarniartariaqarparput, paasissutissallu nutaat Jehovap peqatigiissortaaneersut eqqumaffigisariaqarlugit aammalu ilikkakkavut atortariaqarlugit. Tamatumani ilungersortumik suliniarnissaq ilaannikkullu inuttut pilliuteqartarnissaq pisariaqarput. Pisinnaasavulli qaangerlugit Jehovap piumaffiginngilaatigut. Taanna Pinngortitsisigaarput uagutsinnullu suna pitsaanerpaasoq nalunngilaa. Taamaattumik Jehovamit ajoqersorneqarnerup ilassineratigut ilikkakkatsinnillu maleruaanitsigut ilisimassummik ersersitsisa. Tamanna taassumunnga nersornaataassaaq naassaanngitsumillu uagutsinnut iluaqutaassaalluni. — Is. 48:17; 54:13.