Oqaluussinermi siumukarniarit
1 Imaattumik ussatitoqaqarpoq: „Uninnganeq tassaavoq kinguariartorneq.“ Aamma oqaluussinermi taamaappoq. Oqaluussisunngoqqaaravit immaqa Naalagaaffimmik tusagassaq naatsuinnarmik saqqummiussinnaavat. Taamanikkumiilli ukiorpaaluit qaangiutereersimappata sulilu siuariarsimanak, taava ’kinguariartorsimassaatit’. Taava qanoq iliorsinnaavit?
2 Alloriarnissat siulleq tassa ilinniartitsillaqqissinissamut ilisimassutsimik Jehovap qinnuiginissaa. (Uss. 15:14; Jâko 1:5) Alloriarnissavit aappaat tassa qinnutit naapertorlugu iliuuseqarneq. ’Ræsonnerebog’-imi aallarniutit misissoriakkit. Aallarniummik atorsinnaasorisannik ujarlerit, sungiulluarnissaalu tikillugu sungiusarlugu. Pingajussaannik oqaluusisartoq alla ilagalugu oqaluussigit, sungiusarsimasatit saqqummiusinnaaqqullugit.
IKINNGUTIVIT IKIORSINNAAVAATSIT
3 Immaqa eqqarsarputit oqaannarneq iliuuseqarnissamit ajornannginnerusoq, eqqaamajulli ikinngutivit ikiorsinnaammatsit. Inuusuttuuguit angajoqqaatit imaluunniit oqaluussisartut misilittagallit oqaluussinermi angusaqarluartartut oqaloqatigisinnaavatit. Apereriakkit siunnersuutigisinnaaneraat qanoq ilillutit matuni inuit oqaloqatigisinnaagitit. Immaqa sungiusaqatigiinnissarsi siunnersuutigissavaat. Taava piareersarsimasat saqqimmiussinnaavat, sungiusaqatillu pulaagaasuusaartissinnaavat oqaluussiffissinni nalinginnaasunik akerliliissutaasartunik akerlilersuisuusaartillugu. Sungiusarnikkut inunnik oqaloqatiginninnissannut pikkorissisinnaavutit.
4 Allattaaq ikiorsinnaavaatsit. Pionerit oqaluussillaqqissuupput misilittagaqarluaramik pionerinullu ilinniarfimmi ilinniarsimallutik. Immaqa atuaqqissaaqatigiinnermik siulersuisup oqaluussinermillu nakkutilliisup illumiit illumut oqaluusseqatigalutit takutissinnaavaat qanoq ilillutit inuit eqqarsalersinniarlugit oqaloqatigisinnaagitit.
INUIT SOQUTIGINNINNERAT INERIARTORTIGUK
5 Inuit atuagassianik atuakkanilluunniit tunineqarsimasut anersaakkut ikiorusuppavut. Taamaattumik pulaaqqittariaqarpavut soqutiginninnerallu ineriartortinniarlugu. Pulaaqqiinnginninni allattukkatit misissortariaqarpatit kingullermik suna oqaloqatigiissutigisimanerlusiuk paasiniarlugu, taamaalillutit soqutiginnilernerannut pissutaasoq itisilersinnaajumallugu. Eqqaamassavattaaq naak illit ikkussuisutit imerterillutillu, Jehova tassaammat naajartortitsisoq. Pulaaqqiitinnak taassuma siulersuinissaa qinnutigiuk. (1 Kor. 3:6; 2 Kor. 9:10) Allat ajoqersoraangatsigik nammineq siumukartarpugut.
6 Alloriarnissavit tulliat pingaartoq tassa Bibelimik ilinniaqqissaartitaqalernissat. Oqaluussisartutut ineriartorninni tamanna suli angusimanngikkukku, Jehova qinnuigisariaqarpat ikioqqullutit savamik assersuutaasumik anersakkut nerisissinnaasannik nassaaqqullutit. Immaqa oqaluussillaqqissoq qanoq ililluni Bibelimik ilinniaqqissaartitsisoq takullugu iluaqutigissavat, taassumalu ilinniartitseriaasii ilaarlugit. Aamma ilinniartitseriaatsit pillugit ilikkakkavut uteqqissinnaavatit, soorlu Vagttårnet-mi 1984-imi 1. novemberip normuani quppernerit 8-miit 17-imut, Napasuliaq Alapernaarsuiffik-milu 1985-imi, novemberip normuani quppernerit 10-miit 15-imut paasissutissat. Taamaalillutit piareersaruit, Bibelimik ilinniaqqissaartitsinissannut piareersimassaatit qinnutit akineqarpat.
ANGUNIAGAQARIT — ANGULLUGILLU
7 Ilinniartitsinermut, pulaaqqiinermut Bibelimillu ilinniaqqissaartitsinermut pikkorinnerulerumalluni anguniakkap anguniarnera sivisusarpoq. Anguniagaqalersinnaanerpit suli ataatsimik, tassa ikiorti-pionerinngornissat imaluunniit nalinginnaasumik pionerinngornissat? Oqaluussinermi siumukariartortillutit allanik kajumissaaqataasinnaavutit. Jehovamillu pilluaqquneqangaarumaarputit uninngaannarnak siumukartuaruit.