Allat kajumissaarniakkit Jesus isumalluarfigiualeqqullugu
1 Atuagaq Inuk inuit inuusimasut pingaarnerpaartaat ilumut asseqanngilluinnarpoq. Kapitaliini 133-ni Jesusip inuuneranik ajoqersuineranillu amerlasuunik paasissutissaqarpoq, atuartartunillu Jesusimik isumalluarfiginnittualernissamut maligassiaanillu maleruaanissamut kajumissisitsisinnaalluni. Eqqortumik oqaatigineqarsimavoq Jesus kunnginit naalakkersuisimasunit tamanit inuit inuunerannik sunniinerpaasimasoq. Tamatta Jesus, inuk inuit inuusimasut pingaarnerpaartaat, isumalluarfigiuaannarutsigu iluaqutigingaassavarput.
2 Jesusip ajoqersukkani Ataatani pillugu ajoqersortarsimavai pissusiilu kusanaqisut malillugit. Taassuma ilinniartitsillaqqissusia, qunusuilluni siulersueriaasia asannittumillu misiginneqataanera eqqarsaatigigaangatsigik assut attortittarpugut. Utertinniarluta inuunini pilliutigigamiuk naalliuuterpassuit atorsimasai eqqarsaatigigaangatsigik qujamasungaarnissatsinnut pingaartitsinissatsinnullu pissutissaqalertarpugut. Aamma inuit allat Inuk inuit inuusimasut pingaarnerpaartaat ikiortigalugu Jesus taama isigilersinnaavaat. Illittaaq atuakkap tamatuma asseqanngitsup agguaanneqarnissaanut peqataarusuppit?
3 Piareersarluartarit: Biibili pillugu oqaloqatigiinnermut aallarneeriaatsimik inunnik allanik Jesusimik isumalluarfiginnittualernissamut kajumissisitsisinnaasumik sungiusarluartarit. Ilaquttatit allalluunniit ilagalugit sungiusarsinnaavutit. Sapinngisannik inuit soqutiginnilersinniakkit Inuk inuit inuusimasut pingaarnerpaartaat-mik atuarumallertillugit. Immaqa aatsaat arlaleriarlugit oqaloqatigereerukkit tamanna angusinnaassavat. Oqaloqatit aallaqqaammut soqutiginnippallaanngippat naqitaaqqamik tunisinnaavat imaluunniit atuagassiaaqqamik atuagassiamilluunniit neqeroorfigisinnaallugu.
4 Decemberimi illumiit-illumut angalaarnitsinni ingammik Jesus oqaloqatigiissutigissavarput inuit taassuminnga ilisarisimanninnerulernissaannik kajumissaarlugit. Inuk inuit inuusimasut pingaarnerpaartaat-mi aalajangersimasut tikkuarlugit allat ikiorsinnaavavut paasitillugit Jesus tassaaginnanngitsoq inuk itsaq inuusimasoq imaluunniit naalungiarsuk nersutaatit nerrivianni innangasoq, tassaallunili Guutip ernera naalagaaffimmilu inuiaat ajornartorsiutaannik tamanik aaqqiisussami kunngiusoq. Ilumut tusagassaq nuannersoq tusarliussassaqqissoq!
5 Angutip atuarusussuseqarpallaanngikkaluartup atuagaq Inuk inuit inuusimasut pingaarnerpaartaat atuarlugu nuannaarutigisimavaa. Oqarpoq atuakkap unnukkut atuartarneq nuannernerulersikkaa. Allat taassumatut misigisaqarnissaannut ikiorniartigik, sapinngisatsinnik kajumissaarniarlugit Inuk inuit inuusimasut pingaarnerpaartaat soqutiginnillutik atuarneratigut Jesusimik isumalluarfiginnittualernissaannik. (kmD 12/92 Tilskynd andre . . .)