Kiffartornermi katersuuttarnerit ilikkarnartut
1 Lúkarse 10:1-11-mi Jesusip ajoqersukkaminik toqqarneqaqqammersunik 70-inik oqaluussinissaannut piareersarniarlugit ataatsimeeqatiginninnera oqaluttuarineqarpoq. Aaqqissuussaasumik sunniuteqarluartumillu oqaluussinissamut ikiuutigisinnaasaannik immikkut ittunik paasissutissippai. Paasitippai qanoq oqassasut qanorlu ilillutik pissutsit ajornakusoortut naapissinnaasatik anigorsinnaagaat. Taamaattumik oqaluttuaq tamanna misissussorutsigu ilikkagaqarfigilluassavarput.
2 Jesusip ataatsimiisitsinnerani tamatumani qularnanngitsumik ajoqersukkat 70-it tamarmik najuupput. Katersuunnerni piffissarujussuaq asiutinneqarsinnaasarpoq ilaasa inortuisarneq ileqqorippassuk. Inortuigaangata amerlasuutigut pisariaqartarpoq oqaluussiffissanik allatut agguaasseqqinnissaq kikkullu ingerlaqatigiinnissaasa allanngortinnissaat. Taamaalillutik katersuuttut tamarmik kinguartoortinneqartarput. Tamatta iliuuseqarsinnaavugut piffissaq eqqorlugu takkutereertarumalluta oqaluussiartornissamullu piariipallattarumalluta. Naak qatanngutip katersuunnermik aqutsisup oqaluussiartorfissaqarnissaa isumagissaraluaraa, tamarmillu oqaluussiartornissaannik ikiuissagaluartoq, iluaqutaasorujussuussaaq sapinngisamik oqaluussisartoqatissamik isumaqatigiissuseqareersimassalluni.
3 Jesusip oqaluussiartulersut aalajangersimasumik oqaluuserisassissimavai, tassa ’Guutip naalagaaffianik’. (Lúk. 10:9) Aamma uagut tamanna oqaluussissutigisassaraarput, qanorlu oqarnissatsinnik pitsaasunik siunnersorneqaraangatta qujamasuutigisarparput. Immaqa qatanngutip katersuunnermik aqutsisup ’Ræsonnerebogi’, aallarneeriaatsinik 40-nit amerlanerusunik kiisalu allassimaffinnik naleqquttunik pissutsini assigiinngitsorpasuarni atorneqarsinnaasunik imaqartoq innersuussutigisarpaa. Saqqummeeriaatsimik ataatsimik marlunnilluunniit takutitsineq ikiortigalugu oqaasissavut eqqaamasinnaavavut, qulannginnerullutalu oqalussinnaassaagut.
4 Jesusip ajoqersukkani qanoq oqassasut oqarfigiinnanngilai, aammali qanoq oqaatigissagaat ilitsersuullugit. (Lúk. 10:5, 6) Sapaatit-akunneri tamaasa kiffartornermut tunngasumik ataatsimiinnerni saqqummeeriaatsit Naalagaaffimmik Kiffartuuteqarneq-meersut, qanoq ililluta sunniuteqarluarnerpaamik tusarliussisinnaanissatsinnik ersersitsisut, saqqummiunneqartarput. Qatanngutip katersuunnermik aqutsisup immaqa ataatsimiinnermi kingullermi siunnersuutigineqarsimasoq uteqqissavaa takutinniarlugu oqalussiartorfissassinni qanoq atorneqarsinnaasoq. Allassimaffik aalajangersimasoq tunngavigalugu saqqummiusseriaaseq naatsoq piareersarneqarsimasorlu ikiortigalugu eqqarsaatit katersorneqarsinnaapput oqaasertalerlugillu.
5 Jesusip ajoqersukkani aamma qanoq ileqqoqarnissaannik ilitsersuussimavai. (Lúk. 10:7, 8) Immaqa qatanngutip katersuunnermik aqutsisup erseqqissaatigisinnaavaa pissutsit suut oqaluussinitsinnik isiginerlutsitsilersinnaasut. Immaqa unnersuutissavaatigut maaniinnaq katersuunnaveersaaqqulluta, imaluunniit akerlilersuisunik oqqateqarnaveersaaqqulluta. Immaqa eqqaasissavaatigut allattueqqissaartaqqulluta, imaluunniit kajumissaassalluta eqqaamalluinnaqqullugu pulaarneqarusunngitsut kasuttorfiginnginnissaat. Angajoqqaat meeqqaminnik nakkutiginneqqissaarnissaminnik eqqaasinneqarnissartik pisariaqartissinnaavaat.
6 Ajoqersukkat 70-it Jesusip ilitsersuussutai malippaat ’tipaatsullutillu’ utersimapput. (Lúk. 10:17) Katersuunnerni ilitsersuussutigineqartut malittarutsigik Naalagaaffimmik tusarliussassamik oqaluussissutiginninnitta nuannaarutissarsiffiginerunissaa ilimagisinnaavarput. — ap. sul. 13:48, 49, 52. (kmD 94/6 Lærerige samlinger til tjenesten)