Oqaluussinerput qanoq ililluta pitsaanerulersissinnaagipput
1 Oqaluussinermik suliaq ullumikkut aatsaat taama nukinginnartigilersimavoq. Inuit nutaarsiassamut nuannersumut qisuariarnerat inuuinnarnissaannut aalajangiisuussaaq. (1 Pîtr. 4:5, 6, 17; sar. 14:6, 7) Tamanna pissutigalugu qanoq ililluta oqaluussinitta pitsaanerulersissinnaanera eqqumaffigiuartariaqarparput. Siunnersuutit matuma kingulianiipput.
2 Piareersarluarneq: Saqqummiusseriaatsimik Naalagaaffimmut Kiffartorneq-mit nutaanerpaameersumik, oqaluussiffigisartakkanni inunnut soqutiginarunartitannik, toqqagaqarit. Pissutsinut tamaani atugaasunut naleqqussaruk. Immaqa isumassarsiat allassimaffiillu kinguneqarluartissimasatit saqqummiussininni atorusunneruatit. Inunnut soqutiginnilersitsisumik aallarniinissaq pisariaqarpoq. (Takuuk ’Ræsonnerebog’-imi qupp. 9 — 15.) Immaqa eqqarsariaallannartumik apererusupputit, imaluunniit pulaakkat tamaani ajornartorsiutaasoq pillugu apererusuppat. Qanoq saqqummiussinissat paasigukku pitsaassaaq ilaquttavit ilaat oqaluussisartorluunniit, saqqummiussassavit pitsaanerunissaanik siunnersuuteqarsinnaasoq, alla ilagalugu sungiusassallugu.
3 Oqaloqatigiinneq: Siunertaq tassa tusarliussassaq pingaaruteqartoq tusarliutissallugu. Taamaaliortoqarsinnaavoq pulaakkap oqaloqatigilerneratigut. Pulaakkat akerliliippat isummamilluunniit aalajangersimasumik saqqummiussippat oqaasissai tusarnaaqqissaakkit. Oqaasii ikiortigalugit paasisinnaavat qanoq ilillutit Biibili aallaavigalugu neriuutit tunngavilersorsinnaanerlugu. (1 Pîtr. 3:15) Isumaa Biibilimut naapertuutinngippat periaaserissumik ima oqarsinnaavutit: „Inuppassuit ilittulli isumaqarput. Allatulli aamma isummerfigineqarsinnaavoq.“ Taava allassimaffimmik naleqquttumik atuaagit pulaakkallu isumaanik saqqummiussitiguk.
4 Piffissamik pilersaarusiaq eqaatsoq: Piareersarluarsimanerput iluaqutaanavianngilaq oqaluussassaqanngikkutta. Kasuttukatta ilarpassui angerlarsimaneq ajorput. Oqaluussiffigisartakkanni angerlarsimanngitsoqakulappat piffissaq oqaluussiffigisartakkat allanngortissinnaavat amerlanerit angerlarsimaneranni kasuttorsinnaajumallugit. Immaqa weekendini pitsaaneruvoq; immaqa ilaat ulluinnarni unnukkut naapinneqarsinnaapput. Oqaluussiffigisartakkat ilaanni oqaluussisartut ilaasa nalliuttorsuit atorluarniartarpaat, inuit angerlarsimasut naapissinnaajumallugit. Aamma ulluni taama ittuni inuit eqqissisimanerusarput oqalukkumanerusarlutillu. Aallarniutit piffissamut tamatumunnga naleqquttuutiguk, Biibilimeersumullu atassuseruk.
5 Saqqummiusseriaatsit qanoq sunniuteqartiginersoq eqqarsaatigiuk: Pulaareernerit tamaasa imminut aperisarit: ’Pulaagara atassuteqarfigilluarpara? Oqalutsilerpara, eqqarsaataanullu tusarnaarpunga? Pissuserissumik akivara? Periaaseq pitsaanerpaaq atorpara?’ Oqaluussisartumik misilittagartuumik pioneerimilluunniit ilaannikkut oqaluussiartoqateqartarneq iluaqutaasarpoq, maluginiartarlugu qanoq periaaseqarnersut, oqaluussinermi suliniutit pitsaanerulersissinnaajumallugit.
6 Oqaluussillaqqissuuguit sallusuissut allanut ingerlateqqissinnaassavat taamaalillutillu imminut ’annatsikkumaarlutit tusartitillu annatsikkumaarlugit’. — 1 Tim. 4:16; Uss. 22:29. (kmD 94/11 Hvordan vi kan forbedre vor forkyndelse)