Oqaluussineq — immikkut pisinnaatitaaffik ataqqinartoq
1 Jehovap immikkut pisinnaatitaaffilersimavaatigut ataqqinartumik, tassa nutaarsiassamik nuannersumik oqaluussissutiginninnermik. (Rûm. 15:16; 1 Tim. 1:12) Illilli tamanna immikkut pisinnaatitaaffittut isigaajuk? Piffissap ingerlanera allalluunniit illaruaatiginninnerat tamatuminnga pingaartitsinitsinnut millissutaatittariaqanngilavut. Guutip aqqanik taaguuteqarneq ataqqinaataavoq inuit ikittuinnaat pigisaat. Immikkut pisinnaatitaaffimmik tamatuminnga qanoq ililluta pingaartitsinerulersinnaavugut?
2 Naalagaaffimmik oqaluussissutiginninneq silarsuarmi tusaamasaalernermik iluarisaalernermilluunniit nassataqarneq ajorpoq. Inuppassuit suliatsinnik suusupaginnittuupput. Allat illaruaatigisarpaatigut akerlilersorlutaluunniit. Akerlilersorneqarsinnaavugut suleqatitsinnit, sanilitsinnit allaalluunniit ilaquttatsinnit. Taakkua tammartitaasimasutut sianiitsutullu isigaatigut. (Juá. 15:19; 1 Kor. 1:18, 21; 2 Tim. 3:12) Oqaasii nikallornartut ilungersuussinitsinnik millititsiniutaapput, suliniarnitsinnik annikillisitsiniutaallutik imaluunniit suliatsinnik ataqqinartumik taamaatitsiniutaallutik. Isummat pitsaanngitsut Satanimit siuarsarneqartarput, taassuma ’uppinngitsut isumaat tappiillisippai, Kristusip tassa Guutip assingata naalannassusianik iivangkiiliup qaamangaarnera taakkununnga qaamaqqunagu’. (2 Kor. 4:4) Tamakkununnga qanoq qisuariartarpit?
3 Pingaartorujussuuvoq eqqaamassallugu Naalagaaffimmik oqaluussissutiginninneq ullumikkut suliarineqartunit tamanit pingaarnerpaajusoq. Tusarliussamik inuunermik annaassissutaasumik allatigut pineqarsinnaanngilluinnartumik oqaluussissutiginnippugut. (Rûm. 10:13-15) Pingaarnerpaaq tassaavoq Guutimit, inunniunngitsoq, iluarisaanissaq. Silarsuup oqaluussinitsinnut isiginerluinera nakimaalluta nutaarsiassamik nuannersumik oqaluussissutiginninnissatsinnut akornutiginngilarput. — ap. sul. 4:29.
4 Jesusip Ataatami piumasaanik iliornini immikkut pisinnaatitaaffissuartut isigisimavaa. (Juá. 4:34) Kiffartornerminut tamakkiisumik tunniulluinnarsimavoq, sunaluunniillu imaluunniit kinaluunniit, akerlilersortiniluunniit, ilungersuussissutsiminik annikillisitsissutigisimanngilaa. Naalagaaffimmik oqaluussissutiginninneq inuunermini tamatigut salliutittuaannarsimavaa. (Lúk. 4:43) Taassuma maligassiaanik malinneqquneqarsimavugut. (1 Pîtr. 2:21) Taamaalilluta ’Guutimut suleqataalersimavugut’. (1 Kor. 3:9) Immikkut pisinnaatitaaffimmi tamatumani tamakkiisumik peqataavit? Nutaarsiassamik nuannersumik allanut oqaluussinissannut periarfissarsiortarpit, torrutiinnarlugu allatulluunniit? Jehovamut nalunaajaasutut ’taassuma aqqanik tamanut nassuerutiginninnissamut’ piareersimajuaannartariaqarpugut. — Epr. 13:15.
5 Pissutsit atukkavut, isiginnittaaserput pingaartitsinerpullu kiffartornermut peqataanitta annertussusianut aalajangiisuupput. Jehovap uagutsinnut iliuuserisimasaanut tamanut pingaartitsilluinnarpugut? Jehovamut asanninnermik ineriartortitsisimavugut sapinngisamik iliuuseqarnissatsinnut kajumississutigisatsinnik? Pilluaqqusaanerit ullumikkut nuannaarutigisavut siunissamilu pissamaartitai isumaliutigeqqissaartarutsigik Jehovamut asanninnerput alliartussaaq. Asanninnerup taama ittup iliuuseqalersittarpaatigut, nikallujuissuseqartittarluta oqaluussinermilu aalajangersimasumik iliuuseqartittarluta. Ilungersuussissuserput Jehovamik tullitsinnillu asanninnitsinnut ersiutaavoq. — Mák. 12:30, 31.
6 Pingaartilluinnagaqaraangatta tamanna tamatuminnga pinninnitsigut oqaluuserinninnitsigullu takuneqarsinnaasarpoq. Naalagaaffimmik oqaluussissutiginninnermik immikkut pisinnaatitaaffik ilumut pingaartipparput? Kiffartuuterput ataqqivarput? Naak akerlilersorneqartaraluarluta suliami inuunermut pingaaruteqartorujussuarmi tamatumani nikallujuinnissarput aalajangiusimavarput? Taamaappat ilungersuussilluta tamakkiisumillu uummateqarluta kiffartussaagut. — 2 Kor. 4:1, 7. (kmD 95/02 Forkyndelsen — et ærefuldt priviligium.)