Naalagaaffimmik tusarliussaq — isumaa paasiuk
1 Siaruarterisumik assersuuteqarnermini Jesus oqarpoq ’issorissoq’ tassaasoq ’oqaatsimik tusartoq paasillugulu’. (Mat. 13:23) Maanna Naalagaaffik tusareeratsigu isumaa ’paasisimavarput’? Inuunitsinnut qanoq sunniuteqartigaa? Naalagaaffiup soqutigisai sallinngortissimavavut taamaalillutalu ersersillugu tusarliussap isumaa paasisimallugu?
2 Naalagaaffimmik tusarliussamik eqqortumik paasisaqassagaanni nammineq atuaqqissaarnissaq pisariaqarpoq. Anersaakkut inuussutissat uagutsinnut sassaalliutigineqartut isumaliutigeqqissaartariaqarpavut. Napasuliaq Alapernaarsuiffik-mik atuapallaannarnerup assigaa nerisassanik mamartunik inuussutissartaqarluartunillu tamuaqqaanngivilluni iisiinnarneq. Anersaakkut inuussutissat pisavit isumaliutigeqqisaarnissaannut piffissaqartittarpit? Sapinngisamik pissarsiaqassaguit kajumissuseqartariaqarputit anersaakkullu nererusussuseqarluartariaqarlutit. Taakku marluk piginngikkukkit pissarsiaqarnissaraluannut iliuutsit allat akornutigisinnaavatit imaluunniit nammineq atuaqqissaarnissamut piffissarsinngitsuussutigisinnaallugit. Aalajangersimasumik atuaqqissaartarfeqarniarneq ajornakusoorsinnaavoq. Piffissamik tulleriiaareqqissaarneq pisariaqarpoq, akerlianilli anersaakkut pisuussutinik pissarsiat nalissaqanngitsuusarput. — Uss. 3:13-18; Kul. 1:27.
3 Ullormut allassimaffiit misissortakkit Naalagaaffik pillugu ajunngitsunik ineriartornartunillu eqqarsaateqarnissatsinnut iluaqutigisarparput. ’Anersaakkut pisariaqartitaminnik miserratiginninngitsut’ ullormut allassimafimmik oqaasertaanillu atuarnermut ullut tamaasa minuttialunnguit atorniartarpaat. (Mat. 5:3) Oqaasertat ilarpassuini Naalagaaffiup immikkoortortai assigiinngitsut nassuiarneqartarput. Assersuutigalugu Matîuse 13:4 novembarip 22-ani 1994-imi sammineqarpoq. Oqaasertaani Naalagaaffimmik neriuut eqqartorneqarpoq, mianersoqquneqarpugullu qanigisanik sanilinillu peqateqartarnerup navianaataanik. Betelini nunarsuarmi sumi tamaaniittuni ullut tamaasa minuttini 15-ini ullormut allassimaffimmik sammisaqartarnerup erseqqissarpaa ullormut allassimaffimmik oqaloqatigiissutiginnittarneq qanoq iluaqutaatigalunilu pisariaqartigisoq. Illit ilaquttatillu assingusumik ileqqoqarpisi?
4 Naalagaaffik pillugu paasisaqarnerujartortillutit Naalagaaffik pillugu tusarliussamik allanut oqaluussissutiginninnissamut kajumissiartussaatit. Oqartoqarsinnaavoq Napasuliaq Alapernaarsuiffik aamma Iteritsi! tassaasut sianissutsikkut orsussat paasissutissanik nutaanik nalitsinnullu naleqquttunik isumatsinnik immiisartut. Silarsuup Guutip naalagaaffianik qanoq pisariaqartitsilluinnartigineranik erseqqissumik paasisaqarnissatsinnik ikiuisuupput. Anersaakkut pingaartitsisunngornissatsinnik ’Kristusillu isumaanik’ pigisaqarnissatsinnik ikiortarpaatigut. (1 Kor. 2:15, 16) Tamakku tamaasa neriunnitsigut pissatsissutigisarpavut Naalagaaffimmillu neriuummik allanik aveqatiginninnermut atatillugu ilungersuussinerulissutigisarlugit. — 1 Pîtr. 3:15.
5 Naalagaaffik pillugu tusarliussap isumaanik tamatta immikkut paasinninnerput inuuinnarnissatsinnut pingaaruteqartorujussuuvoq. Naalagaaffik atorlugu Guutip kisimi oqartussaanini akitsisittussaavaa, ajortut piiartussaallugit silarsuassamillu nutaamik — paratiisimik — pilersitsisussaalluni. Jesusip peqqusimavaatigut Naalagaaffik inuunitsinni sallerpaatissagipput. Naalagaaffimmut tamatumunnga innuttanngorniarutta assersuutaasumik savaasariaqarpugut. (Mat. 6:10, 33) Naalagaaffiup pilluaqqussutissartai angujumallugit periarfissat atorluarniaruk. (kmD 95/02 Rigets budskab — få fat i meningen.)