Teokratiimut Atuarfimmut peqataalerit
1 Teokratiimik Atuarfik Jehovap nalunaajaasuinik millionilikkuutaanut nutaarsiassamik nuannersumik oqaluussissutiginnittunngornissaannut sunniuteqarsimavoq. Amerlanerusugut eqqaamavarput atuarfimmut ilanngukkatta qanoq annilaangallutalu imminut naammaginngitsigaluta misigisimanerput, maannali qujamasuutigeqaarput oqalugiartartutut Guutillu oqaasiinik ilinniartitsisutut anersaakkut ineriartornitta tamatuma pingaaruteqarnera. (Naleqqiuguk apustilit suliait 4:13.) Atuarfimmut tamatumunnga pitsaasumut ilaasalernissat nalunaarutigisimaviuk?
2 Kikkut atuarfimmut ilaasinnaappat? Atuakkami Organiseret til at fuldføre vor tjeneste-mi qupperneq 70-71-milu allassimavoq: „Kikkulluunniit ilagiinni suleqataasut atuarfimmut ilaasalernissaminnut nalunaarsinnaapput aamma ilagiit ataatsimiinnerinut najuuttaleqqammersut kristumiut tunngaviusumik najoqqutassaannut akerliusumik inooriaaseqanngikkunik.“ Kikkulluunniit piukkunnartut — angutit arnat meeqqallu — kajumissaarneqarput atuarfimmi nakkutilliisumut saaffiginneqqullugit Teokratiimullu Atuarfimmut peqataalernissaminnik qinnuteqaqqullugit.
3 1997-mi Atuarfimmut pilersaarut: Teokratiimi Atuarfimmi 1997-mi sammineqartussat aqqutigalugit Biibilimi ajoqersuutigineqartut inuttaalu tamatigoortumik ilisimasaqarfigilissavavut peqatigiiffiullu oqaluttuarisaanera paasisaqarfigisassallugu. Oqalullaqqissinissamik ajoqersuinissamillu sungiusaannarneq ajorpugut aammattaarli iluaqutigisarpavut anersaakkut erlinnartuutit naammattut sapaatit-akunneri tamaasa sammisassaniittut. (Uss. 9:9) Sapaatip-akunneranut pisassavut piareersartarutsigik ilaatigut Biibilimik atuagassat aalajangersimasumillu ataatsimiinnerit najuuffigisarutsigit programmi anersaakkut pissarsiaqarfigingaassavarput.
4 Pisassat aappaannut atatillugu 1997-imi Biibilimit atuffassissutigineqartussat ilaai siornagut naleqqiullugit naannerupput. Pisassaqartup pisassani piareersaleraagamiuk atuffassinerminut piffissaq qanoq annertutigisoq atornerlugu nakkutigeqqissaartariaqarpaa, taamaalilluni 5 minuttit piffissarititaasut iluanni aallarniinissaminut naggasiinissaminullu qanoq piffissaqartiginini ilisimaniassagamiuk. Taamaaliornermigut piffissaq tamaat atorluarsinnaassavaa atuffarissarsinnaalluni oqaasissaminillu tulleriissaareqqissaarsimanngikkaluarluni oqalunnissaminut pikkorissarsinnaalluni. — 1 Tim. 4:13.
5 Nutaartaavoq pisassaq nr. 3 (atuakkamit ’Ilisarsineq’-mit) sukkulluunniit nalunaajaanertut sananeqarsinnaanera. Qatanngutip arnap pisassamik tamatuminnga pisassaqartup pulaaqqiinertut, Biibilimik atuaqqissaaqatigiinnertut imaluunniit sukkulluunniit nalunaajaanertut saqqummiussinnaavaa. Soorunami pisassap atoriaannaasumik saqqummiunneqarnissaa pingaarnerutinneqarpoq, qanoq ilillugu saqqummiunneqarnera pinnagu.
6 Oqalugiartuuguit, Biibilimiluunniit saqqummiussassanik pissassaqartuuguit imaluunniit pisassanik allanik pisassaqartuuguit Teokratiimut Atuarfimmut pingaartitsinerit ersersissavat piareersarluartarnikkut, sungiusarluartarnikkut, qularunnaarsitsisumik angorniorlutillu saqqummiussinikkut, piffissarititaasumik eqqortitsisarnikkut, atuarfimmik nakkutilliisup siunnersuutaanik tusarnaarluartarnikkut malinnerisigullu kiisalu tamatigut peqqissaarullugu pisassiissutigineqartup suliarisarneratigut. Taamaaliornikkut Teokratiimi Atuarfimmut peqataanerit ilinnut allanullu tusarnaartunut tamanut pilluaqqussutaassaaq.