Illimmi qanigisatit?
1 Amerlanersagut sallusuissummiinngitsunik qanigisaqarput. Ilataarinissaat kissaatigeqaarput inuunerup aqqutaatigut ingerlaqatigerusukkaluarpavut! Naassaanngitsumik siunissaannut soqutiginninnerput immaqa annerusarpoq nammineq inoqutivut eqqartorneqaleraangata. Naak ukiuni arlalinni sallusuissummut soqutiginnilersinniarsimagaluarlugit isumaqartariaqanngilagut pissutsit neriunaateqanngitsut.
2 Jesusip nunami kiffartuussinerata nalaani ’qatanngutaasa upperisimanngilaat’. (Juá. 7:5) Piffissap ilaani qanigisaasa imminik sianigiunnaarsimasutut isumaqarfigisimavaat. (Mák. 3:21) Jesusilli isumakkiiginnanngilai. Piffissap ingerlanerani qatanngutaasa sallusuissut ilassivaat. (ap. sul. 1:14) Affarmik qatanngutaa Jakob ilagiinni kristumiuni sukaasut ilaannut ilaavoq. (Gal. 1:18, 19; 2:9) Qanigisatit sallusuissummik ilassinnittut takullugit nuannaarutigiumagukkit, nutaarsiassamik nuannersumik angunissaannut isumakkeernaveersaartariaqarpatit.
3 Nutaannguallatsitsisuuneq sorraatsuunanili: Jesus oqaluussigaangami tusarnaartini arlaannik pinngitsaaliniarneq ajorpai, naagga, pissatsinneqarlutilli misigisarput. (Mat. 11:28, 29) Ajoqersuutinik paasisinnaanngisaannik artukkersorneq ajorpai. Qanigisatit sallusuissutip ernganik nutaannguallaatississagukkit, immiartorfimmut imermik tunisariaqarpatit qattaq imermik ulikkaartoq pinnagu. Angalalluni nakkutilliisoq ima oqarsimavoq: „Killeqartumik oqaluussinikkut qanigisaminnik alapernaalersitsisut ajunnginnerpaamik angusaqartarput.“ Tamatuma kingunerisinnaasarpaa allaat akerlilersuisut apersulernerat sallusuissummillu soqutiginnilernerat. — 1 Pît. 2:2; naleqqiuguk 1 Korintumiut 3:1, 2.
4 Kristumiut uppinngitsunik aappaqartut amerlasuut atuagassianik aapparmik soqutigisinnaasaannik quppeqqatitsisarnermikkut angusaqarluartarsimapput. Qatanngutip arnap taama iliortarsimasup meeqqatik aamma atuaqqissaaqatigisarpai uini tusarnaaraangat taassuma +aamma iluaqutigisinnaasaanik nassuiaasarluni. Ilaannikkut aperiinnartarpoq: „Ullumi Biibilimik atuaqqissaarninni imatut imatullu ilikkarpunga. Illit qanoq isumaqarpit?“ Naggataatigut angutip sallusuissut ilassivaa.
5 Ataqqinnittuugit erinitsajasuunak: Oqaluussisartup ilaata oqarneratut: „Namminneq upperisaqarsinnaasariaqarput isumaqarfiginnissinnaasariaqarlutillu.“ Taamaattumik ataqqisariaqarpavut eqqarsaatiminnik ersersitsigaangata, imaluunniit toqqaannartumik sallusuissut pillugu oqaluuteqqunatik qinnuigigaangatigut. (Nal. oq. 3:7; 1 Pît. 3:15) Utaqqisinnaassuseqarluta, asannittuulluta tusarnaallaqqissuullutalu piffissaallualernikkut nalunaajaalaarnissamut eqqumaffiginnissinnaavugut. Taamatut utaqqisinnaassuseqarneq akilerneqartarpoq, soorlu tamanna takuneqarsinnaasoq angummi kristumiumi ukiuni 20-ni aapparminit uppinngitsumit akerlilersorneqarnermini aalajaattuarsimasumi. Nuliani allannguuteqalermat ima oqarpoq: „Jehova qujamasuffigeqaara kamagittartuunissamik ineriartortitsinissannik ikiorsimammanga maanna takusinnaavara qanoq kinguneqartoq: Maanna nuliara inuunerup aqqutaatigut ingerlalersimavoq.“
6 Illimmi qanigisatit? Immaqa saqilluarnikkut qinnuttarnerisigullu ’ilataarineqarsinnaapput Jehovami’. — 1 Pît. 3:1, 2.