Ilisarsinerup Guutimeersup apeqquterpassuit akisarpai
1 Sallusuissummik eqqorluartumik ilisarsilinngikkallaravit pissutsinut atuuttunut qularnanngitsumik akisinnaanngisannik apeqquterpassuaqarsimavutit. Taamaattumik akissutissaat Biibilimi ilikkarakkit nuannaarutigeqaat. Maannakkut akissutissanik tamakkuninnga allat ikiornissaannik pisinnaanngorsimavutit. (Naleqqiuguk 2 Timûtiuse 2:2.) Ilisarsinermik inuunermut naassaanngitsumut sammisumik oqaluttuussinnaavatit. (Juá. 17:3) Qanorli ilillutit pulaakkatit ikiorsinnaavigit paasitinniarlugit ilisarsinerup tamatuma naleqassusianik? Eqqarsaatigikkit illit nammineq apeqqutigisartakkavit Biibilimit akineqartarnerat. Inuit sallusuissummik ujarlersut apeqqutigisartagaasa assiginnginnerpaat? Tamanna eqqarsaatigalugu atuagaq Ilisarsineq inuunermut naassaanngitsumut sammisoq neqeroorutigisinnaavat. Juunimi oqaluussiartornissannut piareersaleruit siunnersuutit makku iluaqutigisinnaavatit.
2 Inuppassuit sooq silarsuarmi taama ajortoqartigineranik inuppassuit isumaliutiginnittarmata, immaqa aallarniut manna kinguneqarluartumik atorneqarsinnaavoq:
◼ „Ajunaarnersuit tusaraangamikkik imaluunniit pinerlunniarfigitinnermik nakuuserfigineqarnermillu misigisaqaraangamik inuit aperigajuttarput sooq amiilaarnartut tamakku pisarnersut. Suna tamatumunnga akissutissaassangatippiuk?“ Pulaakkat akili oqaaseqarfigiullu. Atuakkami ’Ilisarsinermi’ kapitali 8 qupperuk immikkoortoq 2-milu eqqarsaatit ilaat taakkit. Eqqaajuk atuakkap pissutsit nikallornartut tamakkua pisarnerannut Biibilip nassuiaataa imarigaa imalu oqarlutit: „Atuagaq atuarusukkukku pisinnaavat.“
3 Pulaarsimasat pulaaqqilerukku ima oqarsinnaavutit:
◼ „Qilanaarutigisimavara tusassallugu atuakkami apeqqutip matuma akineqarnera isumaqatiginerit: Sooq silarsuarmi taama ajortoqartigaa?“ Pulaakkat akili. ’Ilisarsinermi’ qupperneq 76-77-imi immikkoortoq 17 atuaruk, Rûmamiut 9:14-ip pulaakkavit biibilianit atuarnissaa neqeroorutigiuk. Taava ima oqarsinnaavutit: „Iluaallannaqaaq paasillugu Guuti naapertuilluanngitsuunngitsoq naalliuutinik anniaatinillu atugaqartinneq ajorluta. Inuunermik naassaanngitsumik eqqissinermik pilluarnermillu neriorsorsimavaatigut. Atuakkami kapitali siulleq ima qulequtaqarpoq ’Pilluarnartumik siunissaqalersinnaavutit!’ Oqaluttuukkusussinnaavakkit tamanna qanoq uatsinnut piviusunngorsinnaasoq.“ Kapitali 1 qupperuk, qanorlu atuaqqissaarneqarsinnaasoq takutillugu. Pissutsit apeqqutaatillugit kapitalip imai sammilaariakkit.
4 ’Ræsonnerebog’-imi qupperneq 10-imi qulequtarineqartoq „Utoqqalisarneq/toqusarneq“ immaqa aallarniutigalugu atorumassavat.
◼ „Ima aperisimavit: Toqu tassaanerpa suut tamarmik naggatissaat, imaluunniit toqup kingorna allamik inuuneqarpa? [Pulaakkat akili.] Apeqqutinut taamaattunut, soorlu inuuneq toqulu pillugit, Biibili akissuteqarpoq. [Nalunaajaasup oqaasii 9:5, 10 atuakkit.] Tassani takutinneqarportaaq inunnut uppertunut ilumoortumik neriuutissaqartoq. [’Ilisarsinermi’ qupperneq 84, immikkoortoq 13 qupperuk; Juánase 11:25-mi Jesusip oqaasii atuakkit nassuiarlugillu.] Kapitali tamanna apeqqut una akiniarlugu allanneqarsimavoq: Asasavut toqusimasut sumiippat? Atuagaq atuarusukkukku pisinnaavat.“
5 Aggeqqikkuit kingullermik pulaaravit eqqartorsimasasi eqqaasinnaavatit imalu oqarlutit:
◼ „Kingullermik eqqartorparput toqup kingorna qanoq pisoqartartoq. Inuppassuit isumaqarput qilammukanngikkunik anniarfimmukartartut. Eqqarsaatiginikuuiulli toqusimasut nunami maani inuuleqqissinnaasut? [Pulaakkat akili.] Biibili malillugu toqusimasut Guutip makititai tassaassapput qanilaartut nunamik kingornussisussat najugaqassallutillu tassani naassaanngitsussamut. [Tussiaat 37:11, 29 atuakkit, taavalu ’Ilisarsinermi’ qupperneq 88-imi immikkoortoq 20 sammillugu.] Neriuutip tamatuma inuit millionilippassuit toqumik ersissuteqaraluartut ikiorsimavai. Atuakkap uuma tamatuminnga iluamik paasitinniarlutit ikiorsinnaavaatit. Takutilaarsinnaavakkit qanoq ililluni?“
6 Ajornannginnerusoq piumanerugukku immaqa ima oqarsinnaavutit:
◼ „Uani atuakkami ima qulequtaqartumi Ilisarsineq inuunermut naassaanngitsumut sammisoq-mi assilissamik takutilaarusuppakkit. Kusanaq ilaa? Atuakkami quppernerit 4-5-ilu takutikkit. Akissutissamik utaqqigit. Taava qupperneq 5-imi oqaaseqaatit atuakkit. Naggataatigut ima oqarit: „Atuagaq atuarusukkukku, ilinnut tunissutaavoq.“ Pulaakkannut paasiniaruk qanoq innikkut soqutiginninneq ilaartorniarlugu aggeqqinnissat pitsaanerussanersoq.
7 Ilisarsinermik Guutimeersumik inuunermi apeqqutit pingaaruteqartut akissutaannik peqarpugut. Piareersarluartarit, paasissutissanillu tamakkuninnga inuunermut sammisumik allanut sallusuissummik ujarlersunut avitseqatiginnikkumallutit ilungersornitit Jehovap pilluaqqujumaarpai.