Angajoqqaat — qitornasi oqaluussisartunngornissaannik ajoqersorsigik
1 Nuannaarutigisarparput meerarpassuit ilagiitsinniittut ilumoorlutik Guutimik kiffartuusserusuttarmata. (Nal. oq. 12:1) Taakkuupputtaaq Jehovap imminut unnersiutiginnillutik peqataanissaannut qaaqqusimasai. (Tus. 148:12-14) Angajoqqaat eqqaamasariaqarpaat ulluinnarni ilinniartitsinerminni ilaasariaqartoq meeqqat qanoq ilillutik oqaluussiartornermi uppernertik allanut oqaluttuarisinnaaneraat. — 5 Mos. 6:6, 7.
2 Siuariartortumik meeqqat ilinniartinneqarlik: Meeqqat pisassarivaat oqaluussiartornermut angajoqqaatik ilagalugit ukiukittunnguunerminniilli ilinniartinneqarnissartik. Anitinnasi qitornatit ikiukkit siunertaqarluartumik peqataasinnaaqqullugit. Kasuttulerussi qanoq iliornissaat naatsorsuutigalugu aalajangereerit. Meeqqat mikinerusut naqitaaqqanik tunniussisinnaapput inunnillu naalagaaffilersaartarfimmut qaaqqusisinnaallutik. Meeqqat anginerumaat atuffarissut kasuttornermi allassimaffinnik atuartinneqarsinnaapput. Aallarniut pisariitsoq atorlugu atuagassianik neqerooruteqarsinnaapput. Misilittagaqarnerulaalerpata saqqummiinerminni Biibilimik atuisarnissaannik ilinniartikkit. Oqaluussisartut meerarpassuit namminneq atuagassianik pajuttagaqalereersimapput pulaaqqiigajuttarlutillu. Pitsaanerusarpoq meeraq inersimasumik ilaqartaruni allanik meeqqanik angalaaqateqarnani. Inersimasup pulaagartik nassuiaassinnaammagu meeqqap oqaluussinermik ilinniartinneqarnera.
3 Niviarsiarannguaq ilagiinni utoqqaanertanut orniguttarsimavoq Naalagaaffimmik oqaluussissutiginnittartunngornissaminut ikioqqulluni qinnuigalugit. Niviarsiaraq taanna tallimaannarnik ukioqaraluarluni sulilu atuarsinnaanngikkaluarluni Biibilimi allassimaffiit assigiinngitsut sumiinneri nalunngilai. Allassimaffik nanereeraangamiuk pulaarfigisani qinnuigisarpaa atuaqqullugu, taavalu allassimaffik nassuiartarlugu.
4 Angajoqqaat maligassiuinermikkut meeqqat ilikkarsinnaavaat aalajangersimasumik oqaluussiartortarnerup naleqassusia. Angajoqqaat piviusorsiortumik sapaatip-akunneranut oqaluussiartortarnissanik pilersaarusiortariaqarput malillugulu meeqqat tamatigut nalunnginniassammassuk sapaatip-akunnerani qanoq innikkut oqaluussiartornissamut immikkoortinneqarsimasoq.
5 Meeqqat ukiukinneraniilli ilinniartinneqaraangamik oqaluussiartorneq nuannaralugu, siunissami pisinnaatitaaffissanik annerusunik, immaqa pioneerinngornissamik, anguniarnissaminnut kajumissaarneqassapput. (1 Kor. 15:58) Tamatta meeqqat akornatsinniittut kajumissaartariaqarpavut Jehovamik unnersiutiginnittutut siumukarnissaannut.