Ullormi immikkut ataatsimeersuaararfimmi programmi nutaaq
’Nutaarsiassaq nuannersoq pillugu tamaasa suliarikkit’, ullut immikkut ataatsimeersuaararfissat septembarimiit aallartittut taama qulequtaqassapput. (1 Kor. 9:23) Naalagaaffik pillugu nutaarsiassaq nuannersoq tassaavoq nutaarsiassat ullumikkut tusarliunneqartut pingaarnerpaartaat. Saqqummiussassat ikiussavaatigut nutaarsiassamik nuannersumik tamatuminnga oqaluussisartutut immikkut pisinnaaffitta pingaartinnissaanut. Aamma nutaarsiassamik nuannersumik nakimaalluta oqaluussiuarnissatsinnut nakussatsinneqassaagut. — ap. sul. 5:42.
Saqqummiussassat ersersissavaat qanoq ililluta teokratiimik ilinniartitaanerput atorluarsinnaagipput kiffartornermi sapinngisamik angusaqarsinnaaqqulluta. Kiffartornertik annertusiniarlugu allannguisimasunik tusagaqassaagut, ilaatigut inuusuttut nutaarsiassaq nuannersoq siuarsarniarlugu pilliuteqarsimasut. — Naleqqiuguk Filípimiut 2:22.
Oqalugiaammi pingaarnermi Betelimeersumit oqalugiaatigineqartussami erseqqissarneqassaaq ’iivangkiiliumik paarisaqartitaasinnaajuarnerput’ qanoq pingaartigisoq. (1 Tás. 2:4) Paasitinneqassaagut nutaarsiassamik nuannersumik allanut oqaluussisinnaanermik immikkut pisinnaatitaaffeqartuassagutta eqqarsartaatsikkut ileqqukkullu Guutip piumasaqaatai najoqqutassiaalu maleruartariaqarivut. Aamma taamaaliornermi pilluaqqusaanerit erseqqissarneqassapput.
Saqqummiussassat pingaartut tamakku annaaniaqinagit. Ataatsimeersuaararnermi tamatumani kuisikkusuttut siusinaarlutik nakkutilliisoq siulittaasoq tamatuminnga paasitissavaat. Atuaqqissaaqatigisartakkatit tamaasa najuunnissaannut kajumissaakkit. Nutaarsiassaq nuannersoq pillugu tamanik iliuuseqarnissamut nakussatsinneqarsinnaaqqulluta Jehova periarfissitsigu, taamaalilluta Harmagedon sioqqullugu suliassat annersaat naammassisinnaaqqullugu.