Iluatsitseqqissanerpugut? Ikiorti-pioneeriunissamut kajumissaarut
1 Upernaap qaammataani amerlasuut ikiorti-pioneeriuniarlutik iluatsitseqqissappat? Naalagaaffimmut Kiffartorneq-mi februaari 1997-imoortumi qulequtaq imaattoq maluginiarnarpoq: „Kissaatigineqarput: Iikiorti-pioneerit 3000-t.“ Tatigisimavarput kajumissaarut ilumoorutissagissi. Kiffartornermut nalunaarusiat kisinneqarmata ikiorti-pioneeriusimasut 3083-iusimasut paasillugu nuanneqaaq. Pioneerit nalinginnaasut special-pioneerillu taakkununnga ilannguppata, takuneqarsinnaavoq oqaluussisartut procentii annertuut pioneeritut kiffartorsimasut. Upernaaq manna aamma iluatsitseqqissanerpugut?
2 Siorna upernaakkut kiffartornermi immikkut suliniuteqarsimasut tamaasa nersorniarpavut. Tamarmik Jehova Guutimut tullermullu asanninnermik namminissarsiunngitsumik pissuteqarsimapput. (Lúk. 10:27; 2 Pît. 1:5-8) Oqaluussisartut assigiinngitsorujussuarnik atugaqartut ikiorti-pioneeriusimapput. Ilagiinni ataatsimi oqaluussisartut 51-it qaammammi ataatsimi ikiorti-pioneeriusimapput, taakkua ilagaat utoqqaanertat amerlanersaat, anaanaq qaammatinik 15-inik utoqqaassusilimmik panilik, qatanngut arnaq suliffimminit soraarluni affaannarmik sulisalersoq qatanngullu arnaq utoqqasaaq siornatigut ikiorti-pioneeriusimanngitsoq. Ilageeqatigiinnut nakkutilliisoq allappoq: „Oqaluussinermi tupinnartumik suliniuteqartoqarpoq. . . . Oqaluussiffigisartakkanuinnaq sunniuteqanngilaq. Ilagiit nuannaarnermit qalaarput. Qatanngutit imminnut ilisarinerulernertik oqaluussinermilu angusarissaarutitik nuannaarutigeqaat.“
3 Inuusuttut aamma ilaasimapput. Oqaluussisartup kuisimanngitsup 13-inik ukiullip Jehovamut tunniulluinnarsimanermi ersersinnissa qilanaarisimavaa. Februaarimi kuisereernermi kingorna marsimi ikiorti-pioneeriorusunnini pillugu allappoq: „Akornutissaaruppunga, taamaattumik qinnuteqaat immersorpara. . . . Misigisat nuannersorpassuit misigisimassanngikkaluarpakka, asannittumik ikiorti-pioneeriunissamut kajumissaarisimanngikkaluarussi. Jehova qujamasuffigeqaara ikiorti-piorneererpassuarnut ilaasimaninnut immikkut pisinnaatitaaffimmut.“ Kiffartorneq tamanna misileqqinniarlugu anguniagaraa.
4 Immaqa illit marsimi, apriilimi maajimilu 3083-it ikiorti-piorneeriusimasut akornanniissimavutit. Ukioq mannami? Siorna periarfissaqarsimanngikkuit, ukioq manna taamaaliorsinnaavit?
5 Apriili maajilu pingaartinnerukkit: Ukioq manna eqqaaniaaneq nalliuttorsiutigissavarput arfininngornermi apriilip 11-ani, taamaattumik apriili qaammataavoq kiffartornerup annertusinissaanut pitsaalluinnartoq. (2 Kor. 5:14, 15) Aamma 4. apriili immikkut kiffartorfiussaaq, aammattaarlu apriilip qaammataani atuagassiaaraq Inunnut tamanut atuagaq atorlugu immikkut suliniarnersuaq aallartissavarput. Qaammatip ulluini aqqanilinni siullerni soqutiginnittut sapinngisamik amerlanerpaat eqqaaniaanermi najuunnissaannut qaaqqunissaat eqqumaffigissavarput. Iikiorti-pioneeriunissamik pilersaaruteqaruit kajumissaarniarpatsigit qinnuteqaatit piffissaalluartukkut tunniuteqqullugu. — 1 Kor. 14:40.
6 Maajimi weekendit tallimaassapput, taamaattumik immaqa oqaluussisartut atuartut ullorlu naallugu sulisartut qaammammi tassani ajornannginnerusumik ikiorti-pioneeriusinnaassapput. Weekendini tallimani taakkunani tamani kiffartornermi nalunaaquttap-akunneri qulit tamatigut pilersaarutigineqarunik qaammammi tassani nalunaaquttap-akunneri quliinnaat sinneruttut angusariaqarput, nalunaaqquttap-akunneri 60-it anguniarlugit.
7 Apriilimi maajimilu atuagassiaaqqap Inunnut tamanut atuagaq-ip saniatigut Napasuliaq Alapernaarsuiffik aamma Iteritsi! neqeroorutigissavavut. Tamatuma suli amerlanerusut ikiorti-pioneeriutittariaqarpai. Sooq? Atuagassiat neqeroorutigiuminartuupput agguaallugillu nuannersuulluni. Oqaluusseriaatsini tamani atorneqarsinnaapput — illumiit illumut, niuertarfeqarfinni aqqusinermilu angalaarnermi, biilinik inissiisarfinni, illoqannginnersani allanilu naapitanut. Napasuliaq Alapernaarsuiffik aamma Iteritsi! pingaarnerpaamik Naalagaaffik pillugu sallusuissummik illersuisuupput. Biibilip siulittuutaasa eqquussornerinik innersuussipput Guutillu naalagaaffiata atuunnera uppernarsarpaat. Aammattaaq inuit inuunerannut sunniuteqarput inuit pisariaqartitaviinik paasinnittumik matusigamik. Atuagassiat nammineq inuunitsinnut qanoq sunniuteqarsimaneri eqqarsaatigigutsigu, apriilimi maajimilu sapinngisamik annertunerpaamik agguaannissaannut kajuminnerulissaagut.
8 Tamaviaarullugu atuagassianik siaruarterinersuassamut periareersaatitut allaaserisat uku atuassallugit iluaqutaassaaq: „Napasuliaq Alapernaarsuiffik aamma Iteritsi! — Oqaatsit sallusuissutip pii piffissaq eqqorlugu“ (Napasuliaq Alapernaarsuiffik 1. januaari 1994-imoortoq), „Brug bladene på den bedst mulige måde“ (Rigets Tjeneste septembari 1995-imoortoq) aamma „Nammineq atuagassianik saqqummiusseriaasiliorit“ (Naalagaaffimmut Kiffartorneq oktobari 1996-imoortoq).
9 Utoqqaanertat siulersuissapput: Siorna ilagiinni ataatsini utoqqaanertat ikiorti-pioneerinik tapersersuerusussimapput, taamaattumik ilagiinnut tamarmut ullormik immikkut kiffartorfimmik aaqqissuussisimapput. Arfininngormi tamatumani arlaleriarlutik naapinnissartik isumaqatigiissutigaat, taamaalilluni ilagiit tamarmik oqaluusseriaatsini assigiinngitsuni ilaanissaannut periarfissinneqarput. Soorlu niuertarfeqarfinni aqqusinikkullu angalaarnermi, illumiit illumut, pulaaqqiinermi, allakkatigut oqarasuaatikkullu oqaluussisoqarpoq. Angusaqartoqarluarpoq; ullup ingerlanerani oqaluussisartut 117-it peqataasimapput. Oqaluussinermi nalunaaquttap-akunneri 521-t atorneqarsimapput atuagassiallu, atuagassiaaqqat atuakkallu 617-it agguaanneqarsimallutik. Qiimasunneq sapaammi kikkunnut tamanut oqalugiarnermut Napasuliaq Alapernaarsuiffimmillu atuaqqissaarnermut najuuttut amerlanerpaaffiat akimungajallugu najuuttoqarneranik kinguneqarpoq.
10 Apriilimi maajimilu oqaluussinermut tunngasumik ataatsimiinnerit tamaasa sapaatip-akunnerani tullermi sumi qaqugulu katersuuttoqassanersoq ilagiit eqqaasinneqartariaqarput, ingammik immikkut ittunik aaqqissuussissoqaraangat. Pioneerit nalinginnaasut ikiorti-pioneeriunngitsullu kajumissaarneqarput sapinngisamik aaqqissuussinerit taakkua tapersersoqqullugit.
11 Kiffartornermik nakkutilliisup qatanngut oqaluussisarfinnik isumaginnittoq oqaluussisarfiit angalaarfigineqakulanngitsut angalaarfigineqarnissaat pillugu oqaloqatigissavaa. ’Angerlarsimanngitsut’ naapinniarnissaat aqqusinikkullu angalaarneq niuertarfeqarfinnilu oqaluussineq eqqumaffigineqarluartariaqarput. Aamma unnukkut oqaluussisoqarsinnaavoq, ingammik marsimi sapaammi kingullermi aasaanerani nalunaaquttap siuartinneqarnerata kingorna. Suliniuteqarnerunissaq eqqarsaatigalugu atuagassianik apriilip maajillu normuinik naammattunik inniminniisoqartariaqarpoq.
12 Oqaluussisartorpassuit peqataasinnaapput: Iikiorti-pioneerimut qinnuteqarnermi immersugassap oqaaseqatigiivi siulliit imaapput: „Jehovamut asanninnera allallu taassuminnga taassumalu siunertaanik ilinniartinnissaannik kissaateqarnera pissutigalugit, oqaluussisarfinni kiffartornera annertusiniarlugu ikiorti-pioneeritut qinnuteqarpunga.“ Jehovamut asanninnerput allanillu anersaakkut ikiuerusunnerput tunniulluinnarsimanitsinni tunngaviuvoq. (1 Tim. 4:8, 10) Iikiorti-pioneeriussagaanni kuisereersimasariaqarpoq, ileqqorissaartuusutut ilisimaneqartariaqarluni qaammammullu nalunaaquttap-akunneri 60-t kiffartornermut atorsinnaasariaqarlugit. Tamatta periarfissavut eqqarsaatigisariaqarpavut; immaqa ikiorti-pioneeriusimanngitsut ukioq manna apriilimi maajimilu qinnuteqarsinnaapput.
13 Immaqa allat assingusunik atugaqartut qinnuteqartut takugunikkik amerlasuut paasissavaat ikiorti-pioneeriunissamut periarfissaqarlutik. Atuartut, utoqqasaat, ulloq naallugu sulisartut, soorlu utoqqaanertat ilagiinnilu kiffartortut, allallu angusaqarluarlutik ikiorti-pioneeriusimapput. Illumi ningiuusup marlunnik meerallip ullorlu naallugu suliffillip qaammammi ikiorti-pioneeriuffigisamini nalunaaquttap-akunneri 60-t angusimavai, atuagassiat 108-t agguaassimallugit pingasunillu atuaqqissaaqatitaarsimalluni. Qanoq iliorsimava? Suliffimminit ulloqeqqaraangami angalaartarfimmi qanittumiittumi oqaluussisarsimavoq, aamma allakkatigut biilinillu inissiisarfinni aqqusinernilu oqaluussisarsimavoq. Sapaatip-akunneranoortumik sulinngiffeqarnermini oqaluussinermi ilagiit suleqatigisarpai. Aallaqqaammut isumaqarsimagaluarpoq ikiorti-pioneeriusinnaanani, allalli kajumissaarinerisigut atoriaannaasumillu pilersaarusiornikkut ajornartorsiutit qaangerneqarput.
14 Jesusip ajoqersukkani ima neriorsoqqissaarsimavai: ’Nammaatarami iluaqaaq, nammakkiussaralu oqeqaluni.’ (Mat. 11:30) Vagttårnet-mi 15. aggusti 1995-imoortumi allaaserisap kajumissinartup aamma allassimaffik tamanna qulequtaraa. Tassani oqaluttuarineqarpoq qatanngut arnaq ilungersunartumik ulloq naallugu suliffilik. Iikiorti-pioneeriunissaq angusinnaanngitsutut isigisimavaa? Naagga, qaammatimmi tamaasa ikiorti-pioneeriusimavoq. Sooq? Iikiorti-pioneeriunini oqimaaqatigiissaarinerminut iluaqutigalugu misigigami. Inuit sallusuissummik ilinniartinnerat Guutimullu iluarisaaniarlutik inuunerminni allannguisut takullugit ulluinnarni ulapinnermini nuannaarutiginerpaasimavai. — Uss. 10:22.
15 Iikiorti-pioneeriuniarluni sumilluunniit pilliuteqartariaqaraanni pilluaqqusaanermik nassatarisaanik akimorneqangaassaaq. Qatanngutip arnap ikiorti-pioneeriunermini misigisani allaatigisimavaa: „Imminut eqqarsaatigivallaannginnissannut allanilli ikiuiniarnerunissannut iluaqutigisimavara. . . . Periarfissaqartunut tamanut kajumissaarutigisinnaavara.“
16 Pilersaarusiorluarnissaq pisariaqarpoq: Naalagaaffimmut Kiffartorneq-mi matumani qupperneq 6-imiippoq skema Naalagaaffimmut Kiffartorneq februaari 1997-imoortumiittup assinga. Immaqa arlaat illit atukkannut naleqqutissaaq. Misissorukkit qaammatit tamaasa nalinginnaasumik suliarisartakkatit eqqarsaatigisariaqarpatit. Illumi suliassat suut siumoorlugit suliarineqarsinnaappat kingusinnerusukkulluunniit suliassanngorlugit? Aliikkutanut, qasuersaarnermut allanulluunniit piffissaq atortagaq annikillisinneqarsinnaava? Nalunaaquttap-akunneri 60-it isiginagit ullormut sapaatip-akunneranulluunniit pilersaarusiortoqartariaqarpoq. Ullormut nalunaaquttap-akunneri marluinnaat sapaatip-akunneranulluunniit nalunaaquttap-akunneri 15-iinnaat pisariaqarput. Aqerluusaq tiguuk, skemat isiginnaakkit misissorullu ilinnut ilaquttannullu naleqquttumik kiffartornissannut pilersaarusiorsinnaanerlutit.
17 Siorna upernaakkut ilagiinni ataatsini qisuariarneq pitsaasoq suliniuteqarnerunerlu nuannaarutigalugu pioneeri nalinginnaasoq ima allassimavoq: „Iikiorti-pioneeriunermi immikkut suliniuteqarnerunissamut asannittumik kajumissaarisimanermut qujanarujussuaq. . . . Iikiorti-pioneeriusimanngitsut amerlasuut skemat iluaqutigalugit takusinnaalersimavaat qanoq iliorsinnaallutik. . . . Jehovap peqatigiissortaanut ilaasinnaanera inussiallu aalajaallunilu silatuup kajumissaarineranut asannittumillu siulersuineranut malinnissinnaanera nuannaarutigeqaara.“
18 Ussatit 21:5-imi ima neriorsorneqarpugut: „Eqiasuitsup eqqarsarluaqqaarnera iluanaarutissarsisitsisarpoq.“ Ussatit 16:3-mi allassimavoq: „Suliarisassatit tamaasa [Jehovap] assaanut tunniutikkit, taava pilersaarutitit iluatsikkumaarput.“ Aap, aalajangiinitsinni Jehova ilaatikkutsigu tunaartaralugulu ikiorti-pioneeriunissamut pilersaarutivut isumalluarluta isigisinnaavavut. Qaammammi ataatsimi marlunniluunniit ikiorti-pioneeritut ingerlalluarsimagutta, taava immaqa immersugassami imatut allassimanerata nalaa nalunaaqutsersinnaavarput: „Nalunaarnissavit tungaanut aalajangersimasumik ikiorti-pioneeriunissat kissaatigigukku una nalunaaqutseruk.“
19 Jesus ima siulittuisimavoq: ’Suliat suliarisakka uannut uppertuttaaq suliariumaarpai; tamakkua angeqqingiluunniit suliariumaarpai.’ (Juá. 14:12) Ullumikkut siulittuutip tamatuma eqquunnerani angisuumi Guutip suleqataatut kiffartorsinnaanerput immikkut pisinnaatitaaffiusoq nuannaarutigisinnaavarput. Siornatigut taamaassimanngisaannartumik oqaluussinissamut piffissanngorsimavoq suliassamut tamatumunnga piffissarsilluta. (1 Kor. 3:9; Kul. 4:5) Sapinngisamik akulikinnerpaamik ikiorti-pioneeriusarnitsigut Naalagaaffik pillugu oqaluussinermi suliniuteqarluassaagut. Upernaaq manna ikiorti-pioneerinit unnersiutiginninneq qanoq annertutigissanersoq pissangalluta utaqqivarput. (Tus. 27:6) Siorna upernaakkut angusat eqqarsaatigalugit ima aperivugut: ’Iluatsitseqqissanerpugut?’ Tamanna qularutiginngilarput!
[Qupp. 3-mi ungalusaq]
Ikiorti-pioneeriusinnaavit?
„Kuisereersimaguit ileqqorissaartuullutillu ilisimaneqarluartuullutit qaammatip ingerlanerani nalunaaquttap-akunneri 60-it kiffartornermut atornissaat aaqqissorsinnaallugit, isumaqarlutillu ikiorti-ppioneeriusinnaassallutit qaammammi ataatsimi arlalinniluunniit ilagiinni utoqqaanertat nuannaarutigalugu kiffartornissamut immikkut pisinnaatitaaffiusumut tamatumunnga qinnuteqaatit eqqarsaatigeqqissaassavaat.“ — Organiseret til at fuldføre vor tjeneste, qupperneq 110.
[Qupp. 6-mi ungalusaq]
Ikiorti-pioneerinut skema
Kiffartuussinermi sapaatip-akunneranut nalunaaquttap-akunneri 15-it angunissaannut siunnersuutit
Ullaap tungaani — ataasinngornermiit arfininngornermut
Sapaat ullormut allamut taarsiunneqarsinnaavoq
Ulloq Piffissaq Nalunaaquttap-akunneri
Ataasinngorneq Ullaap-tungaa 2 1⁄2
Marlunngorneq Ullaap-tungaa 2 1⁄2
Pingasunngorneq Ullaap-tungaa 2 1⁄2
Sisamanngorneq Ullaap-tungaa 2 1⁄2
Tallimanngorneq Ullaap-tungaa 2 1⁄2
Arfininngorneq Ullaap-tungaa 2 1⁄2
Nalunaaquttap-akunneri katillugit: 15
Ullut marluk naallugit
Sapaatip-akunnerani ullut marluk qinikkit
Ulloq Piffissaq Nalunaaquttap-akunneri
Pingasunngorneq Ulloq naallugu 7 1⁄2
Arfininngorneq Ulloq naallugu 7 1⁄2
Nalunaaquttap-akunneri katillugit: 15
Unnuit marluk weekendimilu
Sapaatip-akunnerani unnuit marluk qinikkit
Ulloq Piffissaq Nalunaaquttap-akunneri
Ataasinngorneq Unnukkut 1 1⁄2
Pingasunngorneq Unnukkut 1 1⁄2
Arfininngorneq Ulloq naallugu 8
Sapaat Ullup affaa 4
Nalunaaquttap-akunneri katillugit: 15
Ualikkut arfinngornermilu
Sapaat ullormut allamut taarsiunneqarsinnaavoq
Ulloq Piffissaq Nalunaaquttap-akunneri
Ataasinngorneq Ualikkut 2
Marlunngorneq Ualikkut 2
Pingasunngorneq Ualikkut 2
Sisamanngorneq Ualikkut 2
Tallimanngorneq Ualikkut 2
Arfininngorneq Ulloq naallugu 5
Nalunaaquttap-akunneri katillugit: 15
Kiffartornissamut nammineq skemaliaq
Kiffartornermi nalunaaquttap-akunneri qassiunissaat allattukkit
Ulloq Piffissaq Nalunaaquttap-akunneri
Ataasinngorneq
Marlunngorneq
Pingasunngorneq
Sisamanngorneq
Tallimanngorneq
Arfininngorneq
Sapaat
Nalunaaquttap-akunneri katillugit: 15