Immikkut ittumik ataatsimeersuarnissami saqqummiussassat nutaat
„Silaqassutsissigut inersimasunngoritsi“ immikkut ittumik ataatsimeersuarnissanut septembarimi 2000-mi aallartittussanut qulequtaassaaq. (1 Kor. 14:20) Najuuffigissallugu sooq uagutsinnut taama naleqartigissava? Silarsuarmi ajortoqarfiusumi inuugatta. Sunniineranut akiuussinnaassagutta ajortoq ajunngitsumik ajugaaffigisinnaajumallugu anersaakkut immikkoortitsisinnaassuserput pitsanngorsarniartariaqarparput. Immikkut ittumik ataatsimeersuarnerup taamaaliornissatsinnut ikiussavaatigut.
Saqqummiussassani siulliit ilaanni nakkutilliisup angalasartup oqalugiaatissaa ateqarpoq „Qanoq ililluta Biibilimik paasinninnitsigut inerluarsimasunngussasugut.“ Tassani erseqqissassavaa qanoq kristumiutut uppernitsigut aalajaallisinnaasugut. Qaaqqusap Betelimeersup oqalugiaammini „Anersaakkut pingaartitatit immikkoortitsisinnaassutsip ineriartortinneratigut illersukkit“-imi ersersissavaa immikkoortitsisinnaassutsitta ineriartortinnissaanut Biibilimi najoqqutassiat atornissaat imaluunniit malinnissaat qanoq pingaaruteqartigisoq.
Inuusuttut aamma siuneqassutsikkut inersimasunngortariaqarput. Tamanna saqqummiussassami „Sooq ajussutsitsigut merlertuussaagut?“-mi aamma „Inuusuttut maanna siuneqassuseqarusuttut“-mi sammineqassaaq. Inuusuttunik apersuisoqassaaq silarsuup suliaanut ajortunut alapernaannertik aqussinnaajumallugu ajornartorsiutillu ingalassinnaajumallugit anersaakkut nukittuniarlutik qanoq iliorsimanerminnik oqaluttuartunik.
Qanoq ililluta inuunermi pilluarneq anginerpaaq angusinnaavarput? Oqalugiartup Betelimeersup oqalugiaammi naggataarutaasumi „Biibilip najoqqutassiai silatuumik malillugit iluaqutigikkit“-mik qulequtalimmi tamanna nassuiassavaa. Taanna assersuuteqassaaq ajornartorsiutit anigorniarnerannut, aalajangiiniarnernut Jehovamillu ilinniartitaanerup iluaqutiginissaanut Guutip oqaasianik malinninneq uagutsinnut qanoq iluaqutaaneranik takutitsisumik.
Ataatsimeersuaararnissami kuisikkumasut nakkutilliisumut siulittaasumut sapinngisamik piaartumik nalunnaassapput. Ulloq ataatsimeersuaararfissaq nalunaarutigineqarniariartoq ullorsiutinnut allaguk, saqqummiunneqartussallu naleqangaartut tamakkiisumik pissarsiffiginissaannut pilersaarusiorit. Ataatsimeersuaararnissami tassani pineqartussat ilaannaalluunniit najuuffiginngitsooqinagu. Saqqummiunneqartussap Jehovamut aalajaattuaannarnissannut pissatsissavaatit ikiorlutillu.