’Guutip oqaasia tamakkiisumik oqaluussissutiguuk’
1 Tigusannut qujamasuuteqangaaruit qujamasunnerit oqaatsitigut iliuutsikkullu takutissannginnerpiuk? Soorunami. Jehovap inunnut ajunngissusermik tunniusimalluinnarnermillu ersersitsinera eqqarsaatigalugu Paulusip qanoq qisuariarnera soqutiginarpoq. Oqarpoq: „Guuti qujanarsili tunissutini asseqanngitsoq pillugu.“ ’Tunissut asseqanngitsoq’ sunaana? Tassa ’Guutip saammaassingaarnera’ qanorluunniit ilisukkut uagutsinnut takutissimasaa, pingaarnerpaamillu ernini ajortitsinnut utertitsissutitut tunniukkamiuk. — 2 Kor 9:14, 15; Joh 3:16.
2 Paulusip Guuti oqaasiinnakkut qutsavigaa? Naamik. Takusinnaavarput pingaartitsinini assigiinngitsorpassuartigut takutittaraa. Kristumioqatimi anersaakkut ingerlalluarnissaat soqutigilluinnarpaa, Guutillu tunniusimalluinnarnera iluaqutigilluinnaqqullugu sapinngisani tamaat ikiorusuppai. Tamanna oqaasiatigut erserpoq: „Taamatut asallusi kissaatigisimavarput Guutip iivangkiiliuanik tuniinnarasi aammattaaq inuunerput tunniutissallugu nuannarisarilersimagassimi.“ (1 Thess 2:8) Ilagiinni ilaalereersimasunik annannissamut isumannaarsimasunut ikiuinermi saniatigut, kilometererpassuit nunakkut immakkullu angalalluni Paulusip qasusuilluni tusagassaq nuannersoq oqaluussissutigaa, ’inuunermik naassaanngitsumik eqqortumik isumaqarfiginnittut’ ujarlugit. (ApS 13:48 NV) Paulusi Jehovap tamanik imminut iliuuserisimasaanik pingaartitsinerata ’tamakkiisumik Guutip oqaasia nalunnaajaatigissallugu’ kajumilersippaa. — Kol 1:25.
3 Uaguttaaq Jehovap sunik tamanik iliuuserisimasaanik pingaartitsinitta ilagiinni pisariaqartitsisunut anersaakkut ikiuinialersippaatigut? (Gal 6:10) Angalaarfigisartakkatsinnilu sapinngisarput tamaat Naalagaaffimmik tusagassaq nuannersumik oqaluussissutiginninnissatsinnut kajumilersinneqarpugut. — Matt 24:14.
4 Pingaartitsinermik takutitsissalluni periarfissaq: Ukiut tamaasa Kristusip toquneranik eqqaaniaanermi Jehovap Jiisusillu uagut pilluta iliuuserisimasaanik pingaartitsinitsinnik ersersitsinissamut immikkut periarfissaqartarpugut. Ataatsimiinneq naliginnaasuunngilaq imaluunniit nalliuttorsiornertut pisimasumik eqqaaniaanerinnaanngilaq. Jiisusi oqarpoq: „Taamaaliortaritsi uanga eqqaaniarlunga!“ (Luk. 22:19) Kristusip toquneranik eqqaaniaalluni nalliuttorsiorneq, inuttaanik Jiisusi Kristusimik eqqarsaatiginninnissamut periarfissaavoq. Jiisusip nunami suliassani aalajaalluni suliarereeramiuk inuuninilu pilliutitut tunniullugu, maanna naalannassutsimik tunineqarsimalluni kunngiummat qujamasunnermik ersersitsivigissallugu pissutissaalluarpoq. Ullumikkut Kristusip ilagiinnik aqutsineranut naalatsigitinnerput ullormi eqqaaniaanermi takutissallugu periarfissaqarpugut. (Kol 1:17-20) Jehovap kiffai tamarmik ataqqinninnertik takutinniarlugu ullormi Kristusip toquneranik eqqaaniaanermi najuuttariaqarput. Ukioq manna sisamanngornermi marsip 28-ani seqernup tarrinnerata kingorna tamanna pissaaq.
5 Siorna eqqaaniaalluni nalliuttorsiornissap tungaanut suliniuteqarnerup kinguneranik Danmarkimi inuit 22.571-t nalliuttorsiornermut najuupput. Ukioq manna najuuttut qassiussanerpat? Sapinngisamik amerlasuut aggernissaannut ikiorniarlugit qanoq ’tamaviaartiginersugut’ apeqqutaavoq. — 1 Tim. 4:10.
6 Immaqa eqqaaniaalluni nalliuttorsiornissamut tunngatillugu kiffartornerulernissamut periarfissaqassaagut. Qularnanngitsumik nunarsuaq tamakkerlugu qaammammi ataatsimi arlalinniluunniit ikiorti-pioneriuniarlutik amerlasuut nalunaarumaarput. Illit aamma ikiorti- pioneriuniarlutit atukkatit allanngortissinnaavigit? Taamaaliorneq Jehovap Kristusip pilliutaatigut asannittumik tunissutaanut pingaartitsinermik ersersitsinissamut tulluassaaq. Soorlu misigisimasat tulliuttut takutikkaat tamanna pilluaqqussutaangaarumaarpoq.
7 Qatanngut arnaq siorna marsimi ulloq naallugu suliffimi saniatigut ikiorti pioneriusimasoq allappoq: „Naalagaaffimmi Kiffartorneq-mi 2001-mi februaarimoortumi pisinnaasut tamarmik eqqaaniaalluni nalliuttorsiornermut atatillugu ikiorti-pioneriunissamut kajumissaarneqarput. Marsip qaammataani sapaatip-akunnerata naaneri tallimaammata uannut taamaaliornissaq ajornanngilaq, taamaattumik nalunaarniarlunga aalajangerpunga.“ Aalajangersimavoq qaammatip aallartinneraniilli Biibilimik atuaqqissaaqatitaaniarsariniarluni. Iluatsitsiva? Aap, aatsaalli nalunaaquttap-akunneri 52-t oqaluussereerami. Kingorna oqarpoq: „Immikkut suliniuteqarneq pilluaqqusaangaarnartarpoq.“
8 Ilaqutariinniittut tamarmik pioneriusinnaappata qanoq iluaqutaassava? Siorna apriilimi ilaqutariinniittut sisamaasut tamarmik ikiorti-pioneriupput, qaammallu taanna puiuikkiussimallugu isumaqatigiissutigaat. Anaanaasoq oqarpoq: „Ullut tamaasa oqaluusseqatigiittarnitta isumalluartunngortippaatigut. Nerinitta nalaani oqaluussinitta qanoq ingerlasimanera eqqartortarparput, nuanneqaaq.“ Ernerat oqarpoq: „Ataata ulluinnarni suliffigisartagaraluani angalaaqatigalugu nuanneqaaq.“ Ataataasoq oqarpoq: „Ilaqutariit ittuattut nalerisimaarnaqaaq nalunagu ullutsinni suliamut pingaaruteqarnerpaamut tamatta peqataasugut.“ Ilaqutariitut pioneriusinnaavisi? Soormi ilaqutariittut eqqartorlugu paasiniarussiuk ilaqutariit tamarmiullutik upernaap ingerlanerani ikiorti-pioneriusinnaanersut?
9 Marsi manna tikillugu qaammatini pitsaanerpaanngortissinnaavarput? Qatanngutit arnat angutillu amerlasuut ukiut tamaasa ikiorti-pioneriunissaminnut periarfissarsisarput. 1999-mi apriilimi 3010-t ikiorti-pioneriusimapput, tamannalu Danmarkimi qaammammi ataasiinnarmi amerlanerpaaffigaat. Eqqarsaatigeriaruk angalaarfigisartakkatsinni ikiorti-pionerit qanoq naammasisaqartartiginersut. Siorna apriilimi oqaluussisartut 13 procentii ikiorti-pioneriupput, nalunaaquttap-akunnerinili oqaluussinermi atorneqartuni 36 procentit oqaluussillutik atorsimavaat, atuagassianit agguaanneqartunit 33 procentit tunniussimavaat, pulaaqqiinerni tamani 27 procentit pulaaqqiinermut atorsimallugit. Siorna upernaakkut anersaakkut suliniuteqarnerujussuaq pissutigalugu ilagiinni qiimmassimaarneq eqqaamaviuk? Ukioq manna aamma taama annertutigisumik annertunerusumilluunniit suliniuteqarsinnaavugut? Suleqatigiinnikkut Marsi 2002 „qaammatitsialanngortissinnaavarput.“ Sooq marsi?
10 Marsip immikkut ittumik ulapaarfigiunissaanut marlunnik pissutissaqarpoq. Siullermik qaammatip naalernerani eqqaaniaalluni nalliuttorsiortoqartussaavoq. Qaammat tamaat atorluarsinnaavarput sapinngisamik amerlasuunik qaaqqusilluta. Appassaanik marsimi sapaatip-akunnerata naaneri tallimaapput, taamaalilluni suliffilinnut atuartunullu ikiorti-pioneriunissaq ajornannginnerussalluni. Soormi maanakkut ullorsiut qupperneq 6-miittoq iluaqutigalugu piviusorsiortumik pilersaarusioruit? Immaqa ikiorti-pioneriunissaq ilimagisannit ajornannginnerussaaq. Assersuutigalugu sapaatip-akunnerata naanerinit tallimaasunit ataatsimi nalunaaquttap-akunneri arfineq-pingasut oqaluussillutit angusarukkit, qaammatip sinnerani nalunaaquttap-akunneri 50-t anguniarlugit nalunaaquttap-akunneri quliinnaat anguniagassarilissavatit.
11 Utoqqaanertat ilagiinnittut tamaasa ‘Guutip oqaasianik tamakkiisumik oqaluussissutiginninnissaannut‘ ikiorniarlugit qanoq iliorsinnaappat? Ataatsimiinnerni sammisassani namminerlu saaffiginnillutik oqaloqateqarnermikkut kajumissaarisinnaapput. Ilagiinni atuakkamik atuaqqissaaqatigiinnermi aqutsisartut ikiortaasalu gruppemini ataasiakkaat oqaloqatigisinnaavaat ikiorumallugillu. Oqaatsit kajumissinartut siunnersuutilluunniit atoriaannaasut tassatuaasinnaapput pisariaqartinneqartut. (Ussatit 25:11) Amerlasuut immaqa paasissavaat pilersaarutiminnik allannguilaarnikkut ikiorti-pioneriuneq nuannaarutigisinnaallugu. Ilagiinni amerlasuuni utoqqaanertat, ilagiinni kiffartortut aappaasalu amerlanersaat upernaakkut ikiorti-pioneriullutik maligassiuilluartarput. Oqaluussisartut ikinngeqisut ikiorti-pioneriunissaannut aamma kajumissaartarsimavaat. Oqaluussisartut ilaat immaqa timikkut pisinnaasatik killeqarmata allalluunniit pissutigalugit pioneriusinnaanngillat, ilagiinniittulli sapinngisamik oqaluusseqatigalugit pingaartitsinerminnik ersersitsinissamut kajumissaarneqarsinnaapput.
12 Suliniuteqarneq iluatsissappat utoqqaanertat pilersaarusiorluarnissaat apeqqutaasorujussuuvoq. Sapaatip-akunnerata ingerlanerani piffissaalluartumi katersuuttoqartassaaq. Kiffartornermut nakkutilliisup katersuunnerit tamaasa sapinngisamik qatanngummik angummik piukkunnaatilimmik aqutsisussamik najuuttoqartarnissaa isumagissavaa. Qatanngutit taakkua piareersarluarsimasariaqarput, qinuneq oqaluussisartunillu gruppikkaarinerit angalaarfissanillu agguaassinerit ilanngullugit katersuunnerit 10-15 minutsiinnaassammata. (apeqquteqarfik septembari 2001 takuuk) Ilagiit qaammatip ingerlanerani qaqugu katersuuttoqarnissaanik nalunaarfigineqassapput, katersuunnissanilu pilersaarummik nivinngaavimmiittoqassaaq.
13 Angalaarfissaqarluartariaqarpoq. Kiffartornermut nakkutilliisup angalaarfissanik agguaasartut peqatigalugit angalaarfigisartakkat angalaarfigineqakulanngitsut angalaarfigineqarnissaat eqqumaffigisariaqarpaat. Angerlarsimanngitsut pulaarnissaat, aqqusinermi, pisiniarfinni, unnukkullu angalaarnissat pingaartinneqartariaqarput. Naleqqulluarpat oqaluussisartut ilaat oqarasuaatikkut oqaluussinissamut ikiorneqarsinnaapput.
14 Aallarteqqinnissaannut ikiorneqarlik: Tusagassamik nuannersumik oqaluussisartuusimasunik, maannali unittooqqasunik, illoqarfissinniittoqarpa? Suli ilagiinnut ilaapput ikiortariaqarlutillu. (Tuss 119:176) Silarsuup matuma naggatissaa qanittuararsuanngorpoq, silarsuassarlu nutaaq aajunaararsuaq, taamaattumik pissutissaqarluarpugut unittooqqasut ikiorniarlugit tamaviaarnissatsinnut. (Rom 13:11, 12) Ukiuni tallimani qaangiuttuni inuit 1450-it ikiuineq tamanna ilassisimavaat aallarteqqissimallutillu. Asanninneq tatiginninnerlu aallaqqaammulli pigisimasaat pigilerseqqinniarlugu suli amerlanerusut ikiorniarlugit qanoq iliorsinnaavugut? — Hebr 3:12-14.
15 Utoqqaanertaqatigiit oqaluuserisinnaavaat ukiut tallimat kingulliit iluanni unittoorsimasut ikiorniarlugit qanoq iliorsinnaanerlutik. (Matt 18:12-14) Allatsip oqaluussinermut allagartat misissussavai kikkuunerilu allattorlugit. Paarsisutut sulinikkut ikiuisussarsiortoqartariaqarpoq. Immaqa utoqqaanertap oqaluussisartoq pineqartumut ilisarisimannittoq ikiueqqullugu qinnuigisinnaavaa. Immaqa oqaluussisartup unittooqqasoq atuaqatiginikuuaa, ikiuinissanilu nuannaarutigalugu. Oqaluussisartut aamma allat ikiueqqullugit qinnuigineqarsinnaapput. Qularnanngilaq unittooqqasut ilarpassui Guutip oqaasia oqaluussissutigeqqissallugu kajumeqqilissasut. Piumasaqaatit maleruarpatigit, eqqaaniaalluni nalliuttorsiornerup nalaa aallartiffigeqqissallgu pitsaanerpaajussaaq. — Tamanna pillugu paasissutissat amerlanerusut Naalagaaffimmi Kiffartorneq-mi 2000 novembarimoortumi nassaassaapput.
16 Allanik piumasaqaatinik malinnittoqarpa? Jehovap ’inuiaat tamarmik erlinnangaartortaat takkutitillugit’ (NV) pilluaqqusinini ingerlatiinnarpaa. (Hag. 2:7) Ukiut tamaasa tusindillit oqaluussisartunngornissaminnut piukkunnarsartarput. Kikkuuppat? Tassaapput Jehovap Nalunaajaasuisa meerartaat atuaqqissaaqatigisartagaallu. Qanoq ililluta nalilersinnaavarput oqaluussisartunngornissaminnut piumasaqaatit naammassisimaneraat?
17 Jehovap Nalunaajaasuisa meeraat: Meerarpassuit angajoqqaatik ukiorpassuarni matumiit matumut angalaaqatigisarsimavaat. Marsip qaammataa oqaluussisartutut aallartiffigissallugu pitsaassagunaqaaq. Qanoq ilillutit ilisimasinnaaviuk meeqqavit piumasaqaatit maleruarnerai? Atuakkami Organiseret til at fuldføre vor tjeneste-mi qupperneq 96-imi allassimasutut ’meeraq maligassaalluassaaq, aamma allanut tusagassamik nuannersumik oqaluussinermigut upperisani nassuiarsinnaasariaqarpaa, tamaaliussaarlu uummammigut kajumissisinneqarluni’. Isumaqaruit meeqqavit piumasaqaatit maleruarai, taava utoqqaanertaq ilagiinni kiffartornermut ataatsimiititaliamut ilaasortaq oqaloqatiguuk.
18 Biibilimik atuaqqissaaqatigineqartartut: Atuaqqissaaqatigineqartoq ilinniartinneqareersimappat sivisulaartumillu ataatsimiigiartarsimalluni, oqaluussisartunngornissani immaqa kissaatigissavaa. Taamaattumik atuaqqissaaqateqaruit apeqqutit tulliuttut isumaliutigikkit: Atuaqqissaaqatigineqartoq ukiuminut pisinnaasaaminullu naleqquttumik siuariartorpa? Upperisani pillugu allanut oqaluussisalersimava? ’Inuttaaq atiniarlugu iliuuseqarpa?’ (Kol. 3:10) ’Organisationsbog’-imi qupperneq 94-96-mi oqaluussisartunngortumut kuisimanngitsumut piumasaqaatit allassimasut naammassisimavai? Taamaappat ilagiinni kiffartornermi ataatsimiitsitaliaq, utoqqaanertamik ilinnik atuaqatinnillu oqaloqatiginnittussamik isumaginnittussaq attavigisariaqarpat. Piumasaqaatit maleruarunigit utoqqaanertanit marlunnit oqaluusseqataasinnaalernerminik ilisimatinneqassaaq.
19 Apriilimimi maajimilu? Aamma qaammatini taakkunani oqaluussinermi kiffartornerusoqassaaq/suliniarnersuaqassaaq. Marsimi ikiorti-pioneriusimasut arlallit immaqa aamma apriilimi maajimilu ikiorti-pionerioqqissapput. Apriilimi maajimilu Napasuliaq Alapernaarsuiffik Iteritsi!-lu pingaarnerutillugit neqeroorutigissavavut. Atuagassiat iluaqutaasumik sunniuteqarlutik atuartunut qanoq kinguneqarsinnaappat? Atuagassiat nalunaajaasut amerliartupiloornerannut pingaaruteqartupilussuusimapput. Apriilimi maajimilu sapinngisamik amerlasuunut neqeroorutigissallugit suliniuteqarnerussaagut. Maannangaaq piareersalereerniarit suliamut tamatumunnga tamakkiisumik peqataaniarlutit.
20 Oqaluussinermi peqataanerulernissat pissutigalugu atuagassiat pisartakkatit amerlinerulaartariaqassavatit. Ukioq kiffartorfik naallugu arfininngornerit tamaasa immikkut ittumik Napasuliaq Alapernaarsuiffik Iteritsi!-lu neqeroorutigisassavavut. Maannali qaammatini marlunni amerlasuunik ikiorti-pioneriusoqarniarmat suliniuteqarnerullutalu atuagassianik neqerooruteqarneruniaratta, atuagassiat pisartakkat amerlisinnissaat pisariaqarsinnaavoq. Taamaassappat atuagassianik nakkutilliisoq erngerluni nalunaarfigineqassaaq. Aamma atuakkanik nakkutilliisup tamaasa naqitaaqqanik Biibilimik paasisaqarnerorusuppit?-nik pissaqaqqullugit naammattunik peqarnissaa isumagissariaqarpaa.
21 Amerlasuut Naalagaaffimmik Kiffartorneq-mi ungalusamik „Atuagassiat qanoq neqeroorutigineqarsinnaasut“-mik pingaartitsinertik oqaatigisimavaat. Siunnersuutit sungiusariarlugit misilillugit iluaqutigisimavigit? Soormi ilaqutariittut sapaatip-akunneranut atuaqqissaaqatigiinnermi piareersarnissamut piffissaqalaartarussi?
22 Eqqaaniaalluni nalliuttorsiornerup nalaani sapinngisamik iliuuseqarit: Apustili Paulusitut, Jehovap ’tunissutaa asseqanngitsoq pillugu’ qujamasungaarnerput takutitsigu anersaakkut suliniuteqarneq upernaamut pilersaarutaasoq tapersersorluarlugu. Tassa (1) Ukiup ingerlanerani pingaarnerpaaq, Nalakkap unnukkorsiornerata sisamanngornermi marsip ulluisa 28-iani pisussap peqataaffiginissaa.; (2) unittooqqasut ’asannissutsimik siullermik’ pigisaqaqqilernissaannik ikiorlugit (Saqq 2:4; Rom 12:11); (3) meeqqatta atuaqqissaaqatigisartakkattalu piumasaqaatit naammassisimappatigit oqaluussisartunngornissaannik ikiornissaat; aammalu (4) oqaluussinermi suliniuteqarnermut sapinngisamik peqataalluta, immaqa marsimi qaammatinilu tulliuttuni ikiorti-pioneriunitigut.— 2 Tim 4:5.
23 Eqqaaniaalluni nalliuttorsiornerup naalaani Naalagaaffimmik tusagassap nuannersup oqaluussissutiginissaanut tamatta tamakkiisumik peqataanissarput qinnutigaarput, taamaalilluta Jehovap uagut pilluta iliuuserisimasaanik pingaartitsingaarnerput takutissagatsigu.
[Qupp. 6-mi ungalusaq]
2002-mi marsimi kiffartornissamut pilersaarut
Ataasinngorneq — Marlunngorneq — Pingasunngorneq — Sisamanngorneq — Tallimanngorneq — Arfininngorneq — Sapaat
1 — 2 — 3
4 — 5 — 6 — 7 — 8 — 9 (Atuagassianik agguaaffik) — 10
11 — 12 — 13 — 14 — 15 — 16 (Atuagassianik agguaaffik) — 17
18 — 19 — 20 — 21 — 22 — 23 (Atuagassianik agguaaffik) — 24
25 — 26 — 27 — 28 Eqqaaniaalluni nalliuttorsiorneq Seqernup tarrinnerata kingorna — 29 — 30 (Atuagassianik agguaaffik) — 31
Marsimi ikiorti-pioneriunissannut naulnaaquttap akunneri 50-t angullugit pilersaarusiorsinnaavit?