Inuusuttut aperipput:

Angajoqqaama upperisaat akueriinnassavara?

„MIKIGALLARAMA ilaanissannik pinngitsaalineqartarpunga, inuillu allat pissusii nuannarisimanngilakka.“ „Alliartorninni taamaakkunnaariartuaarpunga.“ Katuuliusimasut marluk taama akisimapput Gallupip misissuisitsinerani aperineqaramik sooq ilagiit ilaasortaaffigisatik qimassimaneritik. Taakkua pissutsinut isiginnittaasiat ullumikkut inuusuttorpassuit isumaannut assinguvoq. Misigisimanngillat angajoqqaamik upperisaata akueriinnarnissaanut ileqqussatigut pisussaallutik.

Imaanngilarli inuusuttut upperisaqanngilluinnartuusut. Misissuinerni Tysklandimi ingerlanneqarsimasuni ersersinneqarpoq inuusuttut „ileqqussatoqqanut eriaginartunut“, ilaatigut upperisarsiornermut, utersimasut. Amerikamiut upperisarsiornerannik misissueqqissaarnerni qulaarneqarsimavoq „USA-p inuusuttortaasa upperilluinnakkatik eqqarsaatigisaqigaat. Eqqarsaqqissaarnerit tamakkua ilaat ilagiinnut pioreersunut sakkortuumik isornartorsiuiualernermik kinguneqartarput.“ — The Search for America’s Faith G. Gallup nuk.-mit D. Polingimillu.

Patsisissaalluartut

Oqartoqarsinnaavoq inuusuttut ilaat angajoqqaamik upperisaannik qimatsinissaminnut patsisissaqarluartut. Gallupip misissuisitsinerani taaneqareersumi, sooq katuullit ilagiinnik ilaasortaaffigisaminnik qimatsisarnerannut tunngasumi, „angutip ataatsip naammagittaalliuutigisimavaa ’annikitsunik unioqqutitsinermini anniarfimmik sioorasaarneqartarsimanini’. Ilaasa ileqqulersuuterpassuit nalliuttorsiorpaluttut isoraat, allallu Bibelimut tunngasunik tusartinneqanngippallaartarnertik naammagittaalliuutigalugu“. — The Record, 27. oktoberi 1985.

Gallup aamma Poling ima oqarput: „Inuusuttuaqqalli anersaamut tunngasunik soqutigisaqartuaannarnertik ersersippaat. . . . Taamaattorli upperisarsiortunik aaqqissuussaasunik isumaqatiginninnginnertik oqaatiginiarpaat. . . . Inuusuttut anersaakkut pisariaqartitaasa ilagiinnit pioreersunit tunniunneqartannginnerat ersarilluarpoq.“ „Ilagiit pioreersut“ tassaanerarpaat ’ilagiittut pingaarnertut’ taasamik akornanni — katuullini, naaggaartuni, græsk-katuullini imaluunniit juutini — upperisarsioqatigiit assigiinngitsut suulluunniit.

Angut inuusuttoq metodistiusoq misissueqqissaartunit ima oqarsimanerarneqarpoq: „Inunnut oqaluffimminnut ornigunneq ajortunut ilagiit anngunniarsarisariaqaraluarput, uppinngitsullu ikiorlugit.“ Inuusuttut allat misissueqqissaarnermut peqataatinneqartut ilarpassuisa oqaatigaat „aperineqartuugunik suliniutinut ilagiinnut tunngasunut namminneq piumassutsiminnik peqataanissaminnut piffissamik ilaata atortarnissaanut piareersimaannaraluarlutik“. Nalunanngitsumilli aperineqartarsimanngillat.

Qanoq ililluni aalajangiisoqarsinnaasoq

Inuusuttut immikkooqatigiit anersaamut tunngasunik soqutiginnikkunik anersaakkullu pisariaqartitatik ’ilagiinnit pioreersunit’ angajoqqaamik ilaasortaaffigisaannit tunniunneqarsinnaanngippata taava sumut saaffiginnissappat? Angajoqqaat upperisaat ingerlatiinnassanerlugu qimassanerluguluunniit inuusuttutut aalajangerniarnermi suna tunngavigineqarsinnaava?

Soqutiginarpoq inuusuttut ilaasa katuuliusut angajoqqaamik upperisaannik qimatsisimanerminnut peqqutaasut ilaattut taammassuk „Bibelimut tunngasunik tusartinneqanngippallaarnertik“. Bibeli tassaanerarneqarsimavoq „kristumiussutsip atuagaa illernartoq“. Aap, upperisarsioqatigiit kristumiuunerartut suulluunniit nalilerniaraanni Bibeli najoqqutarineqartussaavoq. Oqartoqarsimavormi isumaliutersuut itisooq sunaluunniit „ilumoortunut naassaanngitsunut“ Bibelimiittunut nallersuussinnaanngilluinnartoq. Angajoqqaat qanorluunniit upperisaqaraluarpata eqqortuussaaq upperisaat Bibelimut naleqqiutissallugu.

Isorinnissutit ilagaat „anniarfimmut eqqartuussaaneq“. Kitaani kangianilu upperisarsiornerit amerlanersaasa toqup kingorna pillarneqarnissaq ajoqersuutigimmassuk aammattaaq qularnanngilaq illit angajoqqaavit upperisaat inuit ajortut anniarfimmut pinissaannik ajoqersuuteqartoq. Ilumoorpoq ullumikkut palaserpassuit anniarfik ’uunannginnerulersinniarmassuk’ oqarlutik pillagassaatinneqartut timikkut anniartitaanavianngitsut, kisianni ’Guutip takkuanik’ takusaqarsinnaannginnermikkut anersaakkut anniartinneqassasut. Isumaqanngilatilli inuup naassaanngilluinnartumik anersaakkut anniartinneqarnissaanik eqqarsaat timikkut naassaanngitsumik anniartinneqarnissaanik eqqarsaatitulli iluarinanngitsigisoq?

Bibelimi ajoqersuutigineqarpoq inuk tarniusoq toqusinnaasoq, toqup kingorna inuunermik neriuut tassaasoq Guutip toqusunik makititsisinnaassusia, aammalu piaaraluni ajortuliornermut pillaat tassaasoq toqu naassaanngitsoq, tassaanani naassaanngitsumik anniartitaaneq. (Takukkit Hisĩkiale 18:4; apustilit suliáinik agdlagkat 24:15; Rûmamiut 6:23.)a Anniarfimmik ikualasumik ajoqersuummit Guutimut ataqqinaataajaasumit tamanna naapertuilluassutsimik misigissutsinnut naapertuunnerunnginnerpa? Tamakku „ilumoortut naassaanngitsut“ Jehovap Nalunaajaasuisa Bibeli tunngavigalugu ajoqersuutigisaasa ilaannaraat.

Aammattaaq Jehovap Nalunaajaasuisa akornanni inuusuttut qinersisariaqarput

Inuusuttummi angajoqqaanit Jehovamut Nalunaajaasuusunit perorsarneqarsimasut? Taakku angajoqqaamik upperisaannik ingerlatsiinnassanerlutik imaluunniit ingerlatsiunnaassanerlutik apeqqummit nalaanneqarneq ajorpat? Soorunami nalaanneqartarput. Aammattaaq inuunermik Jehova Guutimut tunniulluinnassanerlugu tunniulluinnassannginnerluguluunniit namminneq aalajangiisariaqalerfiat inuuneranni takkuttarpoq.

Inuusuttut allat assigalugit imminut aperisarputtaaq ima: ’Qanoq ilillunga qulakkeersinnaavara angajoqqaama upperisaat ilumoortuunersoq?’ Inuit allat assigalugit paasiniaqqissaartariaqartarpaat upperisap tamatuma ajoqersuutai Bibelimut naapertuuttuunersut.

Ruth, Tysklandimi alliartorsimasoq, nassuerpoq inuusuttuaraagallarami qanoq ilimasuffigineqarnini nalusimanagu taamaattumillu „eqqortumik“ akisinnaasarsimalluni. Assersuutigalugu, ima aperineqaraangami: „Inuuninni suna pingaarnerpaatippiuk?“ ima akisarsimavoq: „Guutip naalagaaffia.“ Soorluli nammineq oqartoq: „Nalunngilara tamanna tassaasoq akissut eqqortoq, taamatulli akereerlunga imminut ima aperisarpunga: ’Ilumut Guutip naalagaaffia pingaarnerpaatippara?’“ Taamanikkut Guutip naalagaaffia pinnagu ilinniarnerminilli pingaarnerpaatitsinermi imminut nassuerutiginissaanut naammattumik unneqqarissuseqarsimavoq.

Kingorna imminut ima aperisimavoq: „Ajoqersuutit assigiinngitsorpassuit nassaassaammata taava qanoq ilillunga qulakkeersinnaavara ajoqersuut meeraaninni ilinniagara sallusuissutaasoq?“ Allassimaffiit tulliuttut pingasut ikiortigai: Matîuse 7:15-20 (’Inerititaannit ilisarissavasi’), Juánase 13:35 (’Matumannga tamarmik ilisarissavaasi ajoqersugarigissi: asaqatigiikkussi’), aamma Matîuse 24:14 (’Naalagaaffimmik iivangkiiliu tamanna oqaluussissutigineqassaaq inuit najugaanni tamarsuarmi inuiaqatigiit tamarmik nalujunnaarutissaannik’). Paasilerpaa upperisarsioqatigiit allat ajunngitsunik inerititaqanngitsuusut. Jehovap Nalunaajaasuisa akornanni takusinnaasimavai „nunarsuaq tamakkerlugu qatanngutigiissutut peqatigiissut ataasiussuseqartut Guutip naalagaaffia pillugu tusagassamik nuannersumik oqaluussissutiginninnermik namminissarsiortuunatik ulapputeqartut“. Upperisap meeraanerminiilli anaanami ajoqersuutigisimasaata ingerlatiinnarnissaa aalajangiuppaa.

Dorcas, Frankrigimeersoq, aammattaaq Jehovamut Nalunaajaasuusunik angajoqqaaqarpoq. Ullumikkut miserratiginngilaa atuagassianik Bibelilersaarutaasunik atuaqqissaartarsimanini qarsupiinnarpallaartuusimagami atuarfimmi ilinniakkaminik isumalioqqissaarutinut tunngasuusunik isumaliutiginneqqissaartarnerminit inangerneqarluinnarsimasoq. Taamaalilluni eqqarsaatinit nalornilersitsisunit tikinneqaqqajaalersimavoq. Taava takorloorniarsariler- paa inuunini qanoq issimassagaluartoq sallusuissut Bibelimiittoq angajoqqaami imminut ajoqersuutigisimasaat ilikkarsimanngitsuuguniuk. Paasivaa inuunini siunertaqassanngikkaluartoq. Taamaattumik atuaqqissaarnermut ikiuutit eqqortut ikiortigalugit Bibelimi siulittuutit peqqissaartumik misissorlugit aallartippoq. Ima oqarpoq: „Upperisama sallusuissutaanera kiisami qularutigiunnaarakku kuisippunga.“ Angajoqqaami upperisaata ingerlatiinnarnissaa Dorcasip aalajangiuppaa.

Angut inuusuttoq metodistiusoq ilagiit ’inunnut oqaluffimminnut ornigunneq ajortunut anngunniarsarisannginnerannik, uppinngitsunillu ikiuisannginnerannik’ naammagittaalliuutiginnippoq. Ruthilli Dorcasillu nuannaarutigaat Jehovap Nalunaajaasui allat peqatigalugit suliamut taama ittorpiamut suleqataanertik. Jehovap Nalunaajaasui tamarmik, inuusuttut utoqqaallu, kajumissaarneqarput ’piffissamik ilaata’ inunnut allanut oqaluussinermut atornissaanik. Inuusuttut Jehovamut Nalunaajaasuusut amerliartuinnartut tusagassamik nuannersumik Guutip naalagaaffiata qanittukkut nunarsuarmik Paratiisinngortitseqqinnissaanut tunngasumik oqaluussissutiginninnermut piffissartik annertooq atulersimavaat. — Matîuse 6:10.

Illit nammineq aalajangigassaraat

Nalunanngitsumik inuusuttut amerliartuinnartut paasilersimavaat inuuneq anersaamut tunngasunik anguniagaqarfiunngitsoq suunngitsuusoq. Soorluli takoreeripput inuusuttut ’anersaakkut pisariaqartitaminnik annertuunik ilagiinnit pioreersunit tunineqarneq ajorput’.

Imminut ima aperisartut ilagippatsit: „Angajoqqaama upperisaat akueriinnassavara?“, taava „ilumoortunut naassaanngitsunut“ Bibelimi nassaassaasunut upperisaat naleqqiunniariaruk. Atuagassiamik matuminnga naqitertitsisut allaffiginiakkit, imaluunniit Jehovap Nalunaajaasua nalunngisat kinaluunniit — atuarfigisanni atuartoq imaluunniit suleqatit — atassuteqarfiginiaruk qinnuigalugulu Bibelimi atuaqqissaarnermi ikiuutissannik misissueqqissaarninni atugassannik pissarsissuteqqullutit. Taava nammineq aalajangerniarsinnaassavat angajoqqaavit upperisaat maleruartariaqarnerlugu maleruartariaqannginnerluguluunniit. (gD 22/11 86)

[Quppernerup ataani ilanngussaq]

[Qupp. 28-mi issuagaq]

„Inuusuttuaqqat anersaamut tunngasunik soqutigisaqartuaannarnertik ersersippaat“

[Qupp. 30-mi assiliartaq]

Inuusuttut misissortariaqarpaat sallusuissummik Bibelimeersumik angajoqqaamik ajoqersorsimaneraatik